1, 2. Ano an gusto ni Jehova para sa mga pamilya?

AN Diyos na Jehova an nagkasal sa inot na mag-agom. Sinasabi sato kan Bibliya na ginibo niya an inot na babayi asin ‘dinara ini sa lalaki.’ Ugmahon si Adan kaya nasabi niya: ‘Ini ngunyan tulang nin sakuyang mga tulang asin laman nin sakong laman.’ (Genesis 2:22, 23) Ipinapahiling kaini sa sato na gusto ni Jehova na magin maugma an mga mag-agom.

² Nakakamundo ta dakul na pamilya an dai lamang nagin maugma. Pero dakul sa Bibliya nin prinsipyong makakatabang sa gabos na miyembro kan pamilya para magin maugma an saindang pag-iribanan.—Lucas 11:28.

3, 4. (a) Paano dapat tratuhon kan agom na lalaki an saiyang agom? (b) Taano ta mahalaga na an mag-agom magpatinawadan?

³ Sinasabi kan Bibliya na an sarong marahay na agom na lalaki tinatrato na may pagkamuot asin paggalang an saiyang agom. Basahon tabi an Efeso 5:25-29. Dapat na pirmi siyang magin mabuot sa saiyang agom. Poprotektaran asin aatamanon niya ini, saka dai siya magibo nin ano man na puwedeng makakulog sa saiyang agom.

⁴ Pero ano an dapat gibuhon kan agom na lalaki kun may nagibong sala an saiyang agom? Sinasabi kan Bibliya sa mga agom na lalaki: “Padagos na mamutan an saindong mga agom asin dai maanggot sa sainda na may kapaitan.” (Colosas 3:19) Mga agom na lalaki, tandaan na nasasala man kamo. Asin kun gusto nindong patawadon kamo nin Diyos, dapat na patawadon man nindo an saindong agom. (Mateo 6:12, 14, 15) Kun an mag-agom parehong handang  magpatinawadan, makakatabang iyan para magin maugma an saindang pag-ibanan.

5. Taano ta dapat na tawan nin onra kan agom na lalaki an saiyang agom?

⁵ Inaasahan ni Jehova na tatawan nin onra kan agom na lalaki an saiyang agom. Dapat pag-isipan na marhay kan agom na lalaki kun ano an mga kaipuhan kan saiyang agom. Seryosong marhay ini. Kun bakong marahay an pagtrato nin sarong agom na lalaki sa saiyang agom, tibaad dai dangugon ni Jehova an saiyang mga pamibi. (1 Pedro 3:7) Ibinibilang ni Jehova na mahalaga an sarong tawo pag namumutan siya kaini. Pantay an paghiling niya sa lalaki asin babayi.

6. Ano an buot sabihon kan pagigin “sarong laman” kan mag-agom?

⁶ Ipinaliwanag ni Jesus na an agom na lalaki asin babayi “bako nang duwa, kundi sarong laman.” (Mateo 19:6) Magigin maimbod asin onesto sinda sa kada saro. (Talinhaga 5:15-21; Hebreo 13:4) Dai dapat ipagsayuma kan mga agom na lalaki asin babayi an seksuwal na pangangaipo kan lambang saro. (1 Corinto 7:3-5) Dapat na tandaan kan agom na lalaki na “mayo nin tawong naungis kasuarin man sa sadiri niyang hawak, kundi pinapakakan niya ini asin inaataman.” Kaya dapat mamutan niya asin atamanon an saiyang agom. Saro pa, an pinakagusto nin agom na babayi iyo an mabuot saka mapagpadangat na agom.—Efeso 5:29.

7. Taano ta kaipuhan sa sarong pamilya an payo?

⁷ An gabos na pamilya nangangaipo nin payo, saro na magiya sa pamilya para magin marahay an saindang pag-iribanan. Sinasabi kan Bibliya sa 1 Corinto 11:3: “An payo kan lambang lalaki iyo an Cristo; siring man, an payo kan babayi iyo an lalaki; asin an payo kan Cristo iyo an Diyos.”

8. Paano maipapahiling kan agom na babayi an hararom na paggalang sa saiyang agom?

⁸ An gabos na agom na lalaki nasasala. Pero kun sinusuportaran  kan agom na babayi an mga desisyon kan saiyang agom asin gikan sa buot na nakikikooperar sa saiya, nakikinabang an bilog na pamilya. (1 Pedro 3:1-6) Sinasabi kan Bibliya: “An agom na babayi dapat na magkaigwa nin hararom na paggalang sa saiyang agom.” (Efeso 5:33) Paano kun iba an relihiyon kan agom na lalaki? Dapat pa man giraray magpahiling nin hararom na paggalang an agom na babayi. Sinasabi kan Bibliya: “Kamong mga agom na babayi, magpasakop kamo sa saindong mga agom, tanganing kun igwa man sa sainda na bakong masinunod sa tataramon, makumbinsir sinda maski mayong tataramon dahil sa paggawi kan saindang mga agom, palibhasa nahihiling mismo ninda an saindong malinig na paggawi na may kaibang hararom na paggalang.” (1 Pedro 3:1, 2) An marahay na halimbawa kan agom na babayi puwedeng makatabang sa agom niya na masabutan saka irespeto an saiyang pagtubod.

9. (a) Ano an dapat gibuhon kan agom na babayi kun dai siya uyon sa opinyon kan saiyang agom? (b) Ano an sinasabi kan Tito 2:4, 5 sa mga agom na babayi?

⁹ Ano an puwedeng gibuhon kan agom na babayi kun dai siya uyon sa saiyang agom? Dapat na magalang niyang  sabihon sa agom niya an saiyang opinyon. Halimbawa, kan may sabihon si Sara pero dai uyon si Abraham, sinabi ni Jehova ki Abraham: ‘Dangugon mo siya.’ (Genesis 21:9-12) Bihira man na mangyari na magdesisyon an sarong Kristiyanong agom na lalaki na kontra sa sinasabi kan Bibliya, kaya dapat suportaran kan agom na babayi an saiyang agom. (Gibo 5:29; Efeso 5:24) An sarong marahay na agom na babayi inaasikaso an saiyang pamilya. (Basahon an Tito 2:4, 5.) Pag nahihiling kan saiyang agom asin mga aki kun gurano siya kahigos sa pag-asikaso sa sainda, mas lalo ninda siyang papadangaton asin igagalang.—Talinhaga 31:10, 28.

10. Ano an sinasabi kan Bibliya manungod sa pagsuwayan asin pagdiborsiyo?

¹⁰ Kun minsan, may mga mag-agom na nagdedesisyon tulos na magsuwayan o magdiborsiyo. Pero sinasabi kan Bibliya na “an agom na babayi dai dapat sumuway sa saiyang agom” asin na “dai dapat bayaan kan agom na lalaki an saiyang agom.” (1 Corinto 7:10, 11) May grabeng mga sitwasyon na dahil diyan puwedeng magsuwayan an mag-agom. Pero seryosong desisyon iyan. Kumusta an pagdiborsiyo? Sa Bibliya, igwa nin saro sanang balidong rason para makipagdiborsiyo—kun an agom nakipag-sex sa iba.—Mateo 19:9.

11. Ano an urog sa gabos na kaipuhan kan mga aki?

¹¹ Mga magurang, magtao nin dakul na panahon sa mga aki nindo. Kaipuhan kamo kan saindong mga aki. Asin urog sa gabos, kaipuhan ninda kamo para tukduan sinda manungod ki Jehova.—Deuteronomio 6:4-9.

12. Ano an dapat gibuhon kan mga magurang tanganing maprotektaran an saindang mga aki?

¹² Lalo pang nagigin maraot an kinaban ni Satanas, saka may mga tawong gustong gibuhan nin maraot asin molestiyahon pa ngani an satong mga aki. May mga magurang na  nadidipisilan na ipakipag-ulay sa mga aki ninda an manungod diyan. Pero dapat patanidan kan mga magurang an saindang mga aki manungod sa mga tawong arog kaiyan asin tukduan sinda kun paano lilikayan an mga ini. Mga magurang, dapat nindong protektaran an saindong mga aki. *—1 Pedro 5:8.

13. Paano dapat tukduan kan mga magurang an saindang mga aki?

¹³ Responsabilidad kan mga magurang na tukduan nin tamang pag-uugali an saindang mga aki. Paano mo tutukduan an saimong mga aki? Kaipuhan na sanayon an mga aki, pero  dai ka dapat magin maisog kun itinatanos sinda. (Jeremias 30:11) Kaya dai nuarin man disiplinahon an mga aki mo pag anggot ka. Dai mo gugustuhon na makulgan sinda dahil sa mga tataramon na garo “mga saksak nin espada.” (Talinhaga 12:18) Itukdo sa mga aki mo kun taano ta kaipuhan nindang magin masinunod.—Efeso 6:4; Hebreo 12:9-11; hilingon an Dagdag na Impormasyon 30.

14, 15. Taano ta dapat na magin masinunod an mga aki sa saindang mga magurang?

¹⁴ Si Jesus pirming masinunod sa saiyang Ama, dawa kan bako iyan madali sa saiya. (Lucas 22:42; Juan 8:28, 29) Inaasahan man ni Jehova na an mga aki magin masinunod sa saindang mga magurang.—Efeso 6:1-3.

¹⁵ Mga aki, dawa kun nadidipisilan kamong magsunod sa saindong mga magurang, tandaan na pag masinunod kamo, mauugma sa saindo si Jehova asin an saindong mga magurang. *—Talinhaga 1:8; 6:20; 23:22-25.

16. (a) Ano an ginigibo ni Satanas tanganing tentaran an mga hoben na gumibo nin maraot? (b) Taano ta mahalaga na mga tawong namumuot ki Jehova an pilion mong magin mga amigo?

¹⁶ Puwedeng gamiton kan Diyablo an mga amigo mo asin an ibang hoben para tentaran kang gumibo nin maraot. Aram niyang masakit labanan an panggigipit na ini. Halimbawa kaiyan si Dina na aking babayi ni Jacob. Nagkaigwa siya nin mga amiga saka amigo na dai namumuot ki Jehova. Dakulang problema an dinara kaiyan saiya asin sa pamilya niya. (Genesis 34:1, 2) Kun an mga amigo mo dai namumuot ki Jehova, puwedeng tentaran ka nindang gumibo nin sarong bagay na ikinakaanggot ni Jehova, na posibleng magdara nin grabeng kulog sa saimo, sa pamilya mo, asin sa Diyos. (Talinhaga 17:21, 25) Kaya mahalagang marhay na  mga tawong namumuot ki Jehova an pilion mong magin mga amigo.—1 Corinto 15:33.

17. Ano an dapat gibuhon kan kada miyembro kan pamilya?

¹⁷ Kun susunudon kan mga miyembro nin pamilya an mga instruksiyon nin Diyos, malilikayan ninda an dakul na problema. Kaya kun saro kang agom na lalaki, kamutan mo an saimong agom asin tratuhon mo siya na may kabuutan. Kun saro kang agom na babayi, igalang mo an saimong agom asin magpasakop ka sa saiya saka arugon mo an halimbawa kan agom na babayi na mababasa sa Talinhaga 31:10-31. Kun saro kang magurang, tukduan mo an saimong mga aki na mamutan an Diyos. (Talinhaga 22:6) Kun saro kang ama, giyahan an saimong pamilya “sa mahusay na paagi.” (1 Timoteo 3:4, 5; 5:8) Asin mga aki, sunudon an saindong mga magurang. (Colosas 3:20) Tandaan na an kada miyembro kan pamilya nasasala, kaya magin mapakumbaba asin maghagad nin tawad sa kada saro. Iyo, igwa sa Bibliya nin mga giya hali ki Jehova para sa kada miyembro kan pamilya.