1, 2. Unsay gusto ni Jehova alang sa mga pamilya?

SI Jehova nga Diyos ang nagkasal sa unang magtiayon. Ang Bibliya nag-ingon nga iyang gihimo ang unang babaye ug “iya kining gidala sa lalaki.” Nalipay kaayo si Adan ug miingon: “Sa kataposan kini ang bukog sa akong mga bukog ug unod sa akong unod.” (Genesis 2:22, 23) Kini nagpakita nga gusto ni Jehova nga magmalipayon ang magtiayon.

² Ikasubo, daghang pamilya ang wala magmalipayon. Pero daghan ug prinsipyo ang Bibliya nga makatabang sa tanang membro sa pamilya aron sila molampos ug magmalipayon ingong pamilya.​—Lucas 11:28.

3, 4. (a) Unsay angayng pagtratar sa bana sa iyang asawa? (b) Nganong importante nga magpinasayloay ang bana ug asawa?

³ Ang Bibliya nag-ingon nga ang maayong bana angayng maghigugma ug magtahod sa iyang asawa. Palihog basaha ang Efeso 5:25-29. Kanunayng trataron sa bana ang iyang asawa sa mahigugmaong paagi. Panalipdan niya siya ug atimanon, ug dili siya mobuhat ug bisan unsa nga makadaot sa iyang asawa.

⁴ Pero unsay angayng buhaton sa bana kon masayop ang iyang asawa? Ang mga bana gisugo: “Padayong higugmaa ang inyong mga asawa ug ayaw kasuko pag-ayo kanila.” (Colosas 3:19) Mga bana, hinumdomi nga masayop pod mo. Ug kon gusto ninyong pasayloon mo  sa Diyos, angay ninyong pasayloon ang inyong asawa. (Mateo 6:12, 14, 15) Kon ang bana ug asawa magpinasayloay, magmalipayon ang ilang kaminyoon.

5. Nganong angayng pasidunggan sa bana ang iyang asawa?

⁵ Gusto ni Jehova nga pasidunggan sa bana ang iyang asawa. Kinahanglan niyang hunahunaon ang panginahanglan sa iyang asawa. Seryoso kaayo kini. Kon ang bana dili maayog pagtratar sa iyang asawa, dili pamation ni Jehova ang iyang mga pag-ampo. (1 Pedro 3:7) Isipon ni Jehova nga bililhon ang mga tawo kon sila dunay gugma kaniya. Pareho lang ang iyang pagtratar sa mga lalaki ug mga babaye.

6. Unsay ipasabot nga ang bana ug asawa mahimong “usa ka unod”?

⁶ Gipatin-aw ni Jesus nga ang bana ug asawa ‘dili na duha, kondili usa ka unod.’ (Mateo 19:6) Maunongon sila sa usag usa ug dili nila budhian ang ilang kapikas. (Proverbio 5:15-21; Hebreohanon 13:4) Ang bana ug asawa angayng magtagana sa seksuwal nga panginahanglan sa usag usa. (1 Corinto 7:3-5) Angayng hinumdoman sa bana nga “wala gyoy tawo nga nagdumot sa iyang lawas, apan nagpakaon ug nagpangga niini.” Busa angay niyang higugmaon ug panggaon ang iyang asawa. Sa pagkatinuod, gusto gyod sa asawa nga mahalon siya sa iyang bana ug tagdon sa lumo nga paagi.​—Efeso 5:29.

7. Nganong nagkinahanglag ulo ang pamilya?

⁷ Ang matag pamilya nagkinahanglag ulo nga mogiya sa pamilya aron sila magkahiusa. Ang Bibliya nag-ingon diha sa 1 Corinto 11:3: “Ang ulo sa matag lalaki mao ang Kristo; sa baylo, ang ulo sa babaye mao ang lalaki; sa baylo, ang ulo sa Kristo mao ang Diyos.”

8. Unsaon pagpakita sa asawa ug lawom nga pagtahod sa iyang bana?

 ⁸ Ang matag bana masayop. Pero kon suportahan sa asawa ang mga desisyon sa bana ug andam mokooperar niya, makabenepisyo ang tibuok pamilya. (1 Pedro 3:1-6) Ang Bibliya nag-ingon: “Ang asawa angay nga dunay dakong pagtahod sa iyang bana.” (Efeso 5:33) Komosta man kon ang bana lahig tinuohan sa iyang asawa? Ang asawa kinahanglan gihapong magpakitag lawom nga pagtahod kaniya. Ang Bibliya nag-ingon: “Kamong mga asawa, pasakop mo sa inyong mga bana, aron nga kon dunay dili masinugtanon sa pulong sa Diyos, sila makabig nga walay pulong pinaagi sa inyong panggawi, kay saksi sila sa inyong putling panggawi ug lawom nga pagtahod.” (1 Pedro 3:1, 2) Ang maayong ehemplo sa asawa makatabang aron masabtan ug tahoron sa bana ang iyang tinuohan.

9. (a) Unsay angayng buhaton sa asawa kon dili siya mouyon sa iyang bana? (b) Unsay tambag sa Tito 2:4, 5 alang sa mga asawa?

⁹ Unsay puwedeng himoon sa asawa kon dili siya mouyon sa iyang bana? Angay niyang isulti ang iyang  opinyon sa matinahorong paagi. Pananglitan, si Sara may gisulti nga wala maangayi ni Abraham, apan giingnan ni Jehova si Abraham: “Paminawa siya.” (Genesis 21:9-12) Panalagsa lang nga supak sa Bibliya ang desisyon sa Kristohanong bana, busa ang asawa angayng mosuportar niya. (Buhat 5:29; Efeso 5:24) Ang maayong asawa mag-atiman sa pamilya. (Basaha ang Tito 2:4, 5.) Kon makita sa bana ug mga anak ang iyang paghago para nila, mas higugmaon ug tahoron nila siya.​—Proverbio 31:10, 28.

10. Unsay giingon sa Bibliya bahin sa panagbulag ug diborsiyo?

¹⁰ Usahay dali rang makadesisyon ang magtiayon nga magbulag o magdiborsiyo. Pero ang Bibliya nag-ingon nga “ang asawa dili gayod mobulag sa iyang bana” ug “ang bana dili gayod mobiya sa iyang asawa.” (1 Corinto 7:10, 11) Dunay pipila ka grabeng kahimtang nga ang magtiayon puwedeng magbulag, apan seryoso kana nga desisyon. Komosta ang diborsiyo? Sumala sa Bibliya, usa lang ang balidong rason sa diborsiyo​—dihang ang bana o asawa nakigsekso sa dili nila kapikas.​—Mateo 19:9.

11. Unsay labaw nga gikinahanglan sa mga anak?

¹¹ Mga ginikanan, kutob sa mahimo paggahin ug dakong panahon uban sa inyong mga anak. Gikinahanglan mo nila. Labaw sa tanan, kinahanglang tudloan ninyo sila bahin kang Jehova.​—Deuteronomio 6:4-9.

12. Unsay angayng buhaton sa ginikanan aron maproteksiyonan ang ilang mga anak?

¹² Ang kalibotan ni Satanas misamot ka daotan, ug naay mga tawo nga gustong modaot sa atong mga anak, tingali hayloon sila sa seksuwal nga mga buhat. Ang ubang ginikanan malisdan sa pagpakig-estorya bahin  sa sekso. Pero kinahanglan nilang pasidan-an ang ilang mga anak bahin sa maong mga tawo ug tudloan sila kon unsaon paglikay kanila. Mga ginikanan, angay ninyong proteksiyonan ang inyong mga anak. *​—1 Pedro 5:8.

13. Unsaon pagtudlo sa ginikanan ang ilang anak?

¹³ Responsabilidad sa ginikanan nga tudloan ang ilang anak ug maayong pamatasan. Unsaon pagtudlo ang mga anak? Ang imong mga anak nagkinahanglag pagbansay, pero ayawg himoa ang pagtul-id sa pintas  o bayolenteng paagi. (Jeremias 30:11) Busa ayaw silag disiplinaha dihang nasuko ka. Likayi nga ang imong masulti samag “dunggab sa espada” nga makapasakit nila. (Proverbio 12:18) Tudloi sila nga masabtan kon nganong kinahanglan silang magmasinundanon.​—Efeso 6:4; Hebreohanon 12:9-11; tan-awa ang Endnote 30.

14, 15. Nganong angayng sundon sa mga anak ang ilang ginikanan?

¹⁴ Pirmeng gisunod ni Jesus ang iyang Amahan, bisan pag usahay dili kini sayon. (Lucas 22:42; Juan 8:28, 29) Gusto sab ni Jehova nga sundon sa mga anak ang ilang ginikanan.​—Efeso 6:1-3.

¹⁵ Mga anak, bisan pag para ninyo lisod ang pagsunod sa inyong ginikanan, hinumdomi nga kon mosunod mo nila, malipay ninyo si Jehova ug ang inyong ginikanan. *​—Proverbio 1:8; 6:20; 23:22-25.

16. (a) Unsaon pagtental ni Satanas ang mga batan-on sa paghimog daotan? (b) Nganong importante nga makig-amigo lang niadtong nahigugma kang Jehova?

¹⁶ Puwedeng gamiton sa Yawa ang imong mga amigo ug ubang batan-on aron tentalon ka nga mohimog daotan. Nahibalo siya nga lisod kaayo ning balibaran. Pananglitan, ang anak ni Jacob nga si Dina naay mga amiga ug amigo nga wala mahigugma kang Jehova. Miresulta tog dakong problema kaniya ug sa iyang pamilya. (Genesis 34:1, 2) Kon ang imong mga amigo walay gugma kang Jehova, basig tentalon ka nila nga mohimog mga buhat nga gidumtan ni Jehova, nga mohatag ug dakong kaguol kanimo, sa imong pamilya, ug sa Diyos. (Proverbio 17:21, 25) Busa importante kaayo nga  makig-amigo lang ka niadtong nahigugma kang Jehova.​—1 Corinto 15:33.

17. Unsay responsabilidad sa matag membro sa pamilya?

¹⁷ Kon sundon sa mga membro sa pamilya ang mga sugo sa Diyos, malikayan nila ang daghang problema. Busa kon bana ka, mahala ang imong asawa ug tratara siya sa mahigugmaong paagi. Kon asawa ka, tahora ang imong bana ug pagpasakop kaniya. Sundoga ang ehemplo sa asawa nga gihisgotan sa Proverbio 31:10-31. Kon ginikanan ka, tudloi ang imong anak sa paghigugma sa Diyos. (Proverbio 22:6) Kon amahan ka, giyahi ang imong pamilya “sa maayong paagi.” (1 Timoteo 3:4, 5; 5:8) Ug mga anak, sunda ang inyong ginikanan. (Colosas 3:20) Hinumdomi nga ang matag membro sa pamilya masayop, busa magmapainubsanon ug pangayog pasaylo. Oo, ang Bibliya naay mga giya ni Jehova para sa matag membro sa pamilya.