1, 2. Ebɛnadze na Jehovah pɛ dɛ mbusua nya?

JEHOVAH NYANKOPƆN na ɔhyehyɛɛ awar a odzi kan no. Bible no bɔ hɛn amandzɛɛ dɛ, ɔbɔɔ ɔbaa a odzi kan no na “ɔdze no brɛɛ nyimpa no.” Adam n’enyi gyee araa ma ɔkãa dɛ: “Afei oyi nye me mbiew mu obiew, na mo honam mu nam.” (Genesis 2:22, 23) Iyi ma yehu dɛ Jehovah pɛ dɛ awarfo enyi gye.

² Dza ɔyɛ awerɛhow no, nyimpa pii nnyaa ebusua mu enyigye da. Naaso, ngyinadonsɛm pii wɔ Bible no mu a ɔbɔboa ebusua no mufo ma wɔaayɛ dza ɔbɛma hɔn ebusua asetsena no ayɛ enyigye, na wɔaatsena abɔ mu wɔ enyigye mu.​—Luke 11:28.

3, 4. (a) Ebɛn kwan do na ɔsɛ dɛ okun nye ne yer dzi? (b) Ebɛnadze ntsi na ohia dɛ okun na ɔyer dze hɔn bɔn kyekyɛ hɔnho?

³ Bible no kã dɛ, ɔsɛ dɛ okun pa nye ne yer dzi wɔ ɔdɔ na obu mu. Yɛserɛ dɛ, kenkan Ephesusfo 5:25-29. Dza Jehovah hwehwɛ nye dɛ, okun nye ne yer bedzi wɔ ɔdɔ nye obu mu ber nyina. Bio so, ɔbɔbɔ no ho ban, ɔaahwɛ no na ɔnnkɛyɛ biribiara a obepira ne yer no.

⁴ Naaso, ebɛnadze na ɔsɛ dɛ okun yɛ ber a ne yer edzi mfomdo no? Wɔkã kyerɛ kunnom dɛ: ‘Hom nkɔ do ndɔ hom yernom na mma hom nnyɛ hɔn yerɛyerɛw.’ (Colossaefo 3:19) Kunnom, hom nkaa dɛ hom so hom dzi mfomdo. Na sɛ epɛ dɛ Nyankopɔn dze wo bɔn kyɛ wo a, ɔsɛ dɛ edze wo yer so no bɔn kyɛ no.  (Matthew 6:12, 14, 15) Sɛ okun na ɔyer wɔ ɔpɛ dɛ wɔdze bɔn bɛkyɛ a, ɔbɔboa hɔn ma woeenya enyigye wɔ hɔn awar mu.

5. Ebɛnadze ntsi na ɔsɛ dɛ okun dzi ne yer nyi?

⁵ Jehovah hwehwɛ dɛ okun dzi ne yer nyi. Ɔsɛ dɛ okun susu ne yer n’ehiadze ho yie paa. Iyi yɛ enyibersɛm. Sɛ okun nye ne yer enndzi no yie a, annhwɛ a Jehovah rinntsie ne mpaabɔ. (1 Peter 3:7) Ɔdɔ a nkorɔfo wɔ ma Jehovah na ɔma wɔsom bo wɔ n’enyi do. Ɔmmpɛ mbarimba asɛm nnsen mbaa.

6. “Honankor” a okun na ɔyer yɛ no kyerɛ dɛn?

⁶ Jesus kyerɛkyerɛɛ mu dɛ okun na ɔyer nnda “ho nnyɛ beenu bio, na wɔyɛ honankor.” (Matthew 19:6) Hɔn beenu nkotsee na ɔsɛ dɛ wonya nda mu nkitahodzi na ɔnnsɛ dɛ wofi hɔn ahokafo ekyir da. (Mbɛbusɛm 5:15-21; Hebrewfo 13:4) Ɔsɛ dɛ kunnom na yernom fi ayamuyie mu dzi hɔn ahokafo ehiadze yi ho dwuma. (1 Corinthfo 7:3-5) Ɔsɛ dɛ okun kaa dɛ, “obiara nntan nankasa no honam pɛn, na mbom ɔnyɛn no na ɔhwɛ no yie.” Ntsi, ɔsɛ dɛ ɔdɔ ne yer na ɔma n’enyi ku no ho. Dza ɔsen biara no, ɔyer pɛ dɛ no kun nye no dzi wɔ ayamuyie na ɔdɔ mu.​—Ephesusfo 5:29.

7. Ebɛnadze ntsi na ebusua biara hia ebusuatsir?

⁷ Ebusua biara hia ebusuatsir, kyerɛ dɛ, obi a obedzi ebusua no enyim mbrɛ ɔbɛyɛ a wobotum ayɛ edwuma abɔ mu yie. Bible no kã wɔ 1 Corinthfo 11:3 dɛ: “Ɔbarimba biara ne tsir nye Christ, na ɔbaa ne tsir nye ɔbarimba, na Christ ne tsir nye Nyankopɔn.”

8. Ɔyer besi dɛn akyerɛ obu kɛse ama no kun?

⁸ Okun biara dzi mfomdo. Naaso, sɛ ɔyer taa no kun  ne gyinaesi ahorow ekyir na ofi ne pɛ mu nye no bɔ mu yɛ edwuma a, ebusua mu no nyina nya do mfaso. (1 Peter 3:1-6) Bible no kã dɛ: “Ɔyer dze, ɔmfɛr no kun.” (Ephesusfo 5:33) Na sɛ ɔyer ne gyedzi nye no kun nedze nnhyia ɛ? Ɔsɛ dɛ ɔkɔ do ara nya obu kɛse ma no kun. Bible no kã dɛ: “Yernom, hom mbrɛ homho adze mma homankasa hom kunnom; na sɛ binom enntsie asɛm no mpo a, wokwetsi asɛm no nam hɔn yernom abrabɔ do enya hɔn; dɛ wɔbɔhwɛ hom abrabɔ a ho tsew a osuro ka ho.” (1 Peter 3:1, 2) Ɔyer no nhwɛdo pa botum aboa no kun ma woeenya ntseasee nye obu ama ne gyedzi.

9. (a) Sɛ ɔyer nye no kun nnyɛ adwen wɔ biribi ho a, ebɛnadze na obotum ayɛ? (b) Ebɛn afotu na wɔdze ma yernom wɔ Titus 2:4, 5?

⁹ Sɛ ɔyer nnye no kun nnyɛ adwen wɔ biribi ho a, ebɛnadze na obotum ayɛ? Ɔsɛ dɛ ɔkyerɛ n’adwen wɔ obu kwan do. Dɛ nhwɛdo no, Sarah kãa biribi a nna Abraham n’enyi nngye ho, naaso Jehovah kãa kyerɛɛ Abraham dɛ: “Tsie ne ndze.” (Genesis 21:9-12) Ɔnntaa  mmba dɛ gyinae a otwa tun a okun a ɔyɛ Christiannyi besi no bɛyɛ dza otsia dza Bible no kã, ntsi ɔsɛ dɛ ne yer boa no. (Ndwuma 5:29; Ephesusfo 5:24) Ɔyer pa bɔhwɛ ebusua no yie. (Kenkan Titus 2:4, 5.) Sɛ no kun nye ne mba hu mbrɛ osi yɛ edwumadzen dze boa hɔn no a, wɔbɔdɔ no na wɔaakyerɛ obu kɛse ama no.​—Mbɛbusɛm 31:10, 28.

10. Ebɛnadze na Bible no kã wɔ ntsetsewmu na awargu ho?

¹⁰ Ɔtɔfabi a, awarfo per hɔnho si gyinae tsetsew mu anaa wogyaa awar. Naaso, Bible no kã dɛ, “mma ɔbaa nngyaa no kun” anaa ɔnnye no kun nntsetsew mu, na “mma okun so nnkõ ne yer” anaa ɔnnye ne yer nntsetsew mu. (1 Corinthfo 7:10, 11) Iyi ma yehu dɛ, Bible no nnhyɛ ntsetsewmu ho nkuran. Tsebea a no mu yɛ dzen paa bi tum ma awarfo tsetsew mu, naaso ɔyɛ gyinae a ɔyɛ enyibersɛm. Na awargu so ɛ? Bible no ma yehu dɛ, dza wobotum egyina do egu awar nye dɛ, okun anaa ɔyer nye obi a ɔnnyɛ no hokafo benya nda mu nkitahodzi.​—Matthew 19:9.

11. Ebɛnadze na mbofra hia sen adze fofor biara?

¹¹ Awofo, ɔsɛ dɛ hom nya mber pii ma hom mba. Hom mba hia hom paa, na dza ɔsen adze fofor biara no, wohia hom ma hom aakyerɛkyerɛ hɔn Jehovah no ho adze.​—Deuteronomy 6:4-9.

12. Ebɛnadze na ɔsɛ dɛ awofo yɛ dze bɔ hɔn mba ho ban?

¹² Aber a ndzebɔnyɛsɛm rodɔɔ sõ wɔ Satan wiadze yi mu no, nyimpa binom wɔ hɔ a wɔpɛ dɛ wodzi hɛn mba no ewu, wɔnye hɔn nya nda mu nkitahodzi na mpo wɔto hɔn mbɔndar. Ɔyɛ dzen ma awofo binom dɛ wɔnye hɔn mba bedzi nsɛm a ɔtsetse dɛm yi ho nkɔmbɔ.  Naaso, ɔsɛ dɛ awofo bɔ hɔn mba kɔkɔ wɔ nyimpa a wɔtse dɛm no ho na wɔkyerɛkyerɛ hɔn mbrɛ wobotum atwe hɔnho efi dɛm nkorɔfo yi ho. Awofo, ɔsɛ dɛ hom bɔ hom mba ho ban. *​—1 Peter 5:8.

13. Ebɛn kwan do na ɔsɛ dɛ awofo kyerɛkyerɛ hɔn mba?

¹³ Awofo wɔ asodzi dɛ wɔkyerɛkyerɛ hɔn mba mbrɛ wonsi mbɔ bra pa. Hom besi dɛn akyerɛkyerɛ hom mba? Hom mba hia ntsetsee, naaso ɔnnsɛ dɛ hom tsẽa hɔn etsirmɔdzen do. (Jeremiah 30:11) Dɛm ntsi, ɔnnsɛ  dɛ hom tsẽa hom mba ber a hom bo efuw no. Mma hom nsɛm nnyɛ tse dɛ, “nkrantsee no nwowɔe” na hom emmpira hɔn. (Mbɛbusɛm 12:18) Hom nkyerɛkyerɛ hom mba ma wɔntse siantsir a ɔsɛ dɛ wɔyɛ setsie no ase.​—Ephesusfo 6:4; Hebrewfo 12:9-11; hwɛ Nsɛm bi a Wɔakyerɛ Mu 30.

14, 15. Ebɛnadze ntsi na ɔsɛ dɛ mbofra yɛ setsie ma hɔn awofo?

¹⁴ Jesus yɛɛ setsie maa n’Egya ber nyina. Wɔ ber a no mu yɛ dzen mpo mu no, ɔkɔr do yɛɛ setsie. (Luke 22:42; John 8:28, 29) Dɛmara so na Jehovah hwehwɛ dɛ, mbofra yɛ setsie ma hɔn awofo.​—Ephesusfo 6:1-3.

¹⁵ Mbofra, sɛ hom tse nkã dɛ ɔyɛ dzen ma hom dɛ hom bɛyɛ setsie ama hom awofo mpo a, hom nkaa dɛ sɛ hom yɛ setsie ma hom awofo a, hom bɔsɔ Jehovah na hom awofo enyi. *​—Mbɛbusɛm 1:8; 6:20; 23:22-25.

16. (a) Ebɛn kwan do na Satan bɔ mbɔdzen dɛ ɔbɔsɔ mbofra ahwɛ dɛ wɔnyɛ dza omuo? (b) Ebɛnadze ntsi na ɔsɛ dɛ efa hɔn a wɔdɔ Jehovah nyɛnko?

¹⁶ Abɔnsam botum edua w’anyɛnkofo do anaa mbofra afofor do aasɔ wo ahwɛ dɛ yɛ dza omuo. Onyim dɛ obotum ayɛ dzen ama wo dɛ ebɔkõ etsia nhyɛdo a ɔtse dɛm. Dɛ nhwɛdo no, Jacob ne babaa Diana nye hɔn a wɔnnsom Jehovah bɔɔ fɛkuw. Iyi dze ɔhaw pii baa ɔno nye n’ebusua do. (Genesis 34:1, 2) Sɛ w’anyɛnkofo yɛ nkorɔfo a wɔnndɔ Jehovah a, wobotum asɔ wo ahwɛ ma aayɛ biribi a Jehovah kyir. Iyi botum dze ɔhaw abrɛ ɔwo nye w’ebusua na aahow Nyankopɔn no werɛ. (Mbɛbusɛm 17:21, 25) Iyi ntsi na no ho hia  paa dɛ efa anyɛnkofo a wɔdɔ Jehovah no.​—1 Corinthfo 15:33.

17. Ebɛn asodzi na ebusua no munyi biara wɔ?

¹⁷ Sɛ ebusua no mufo dzi Nyankopɔn n’akwankyerɛ do a, wobokwetsi ɔhaw nye nsɛndzendzen pii. Ntsi sɛ eyɛ okun a, dɔ wo yer na enye no ndzi wɔ ɔdɔ mu. Sɛ eyɛ ɔyer a, bu wo kun na brɛ woho adze ma no na suasua ɔyer a wɔakã no ho asɛm wɔ Mbɛbusɛm 31:10-31 no, no nhwɛdo no. Sɛ eyɛ ɔwofo a, kyerɛkyerɛ wo mba ma wɔndɔ Nyankopɔn. (Mbɛbusɛm 22:6) Sɛ eyɛ Egya a, dzi w’ebusua no enyim “yie.” (1 Timothy 3:4, 5; 5:8) Mbofra, hom nyɛ setsie mma hom awofo. (Colossaefo 3:20) Hom nkaa dɛ, ebusua no munyi biara botum edzi mfomdo, ntsi hom mbrɛ homho adze na hom mfa bɔn nkyekyɛ homho. Ampaara, Bible no wɔ Jehovah n’akwankyerɛ ma ebusua no munyi biara.