1, 2. Kisa Jéova lé pou tout fanmi-ya ?

A JÉOVA ki maryé prémyé mouché-a ké prémyé madanm-an. Labib-a ka di ki i fè prémyé fanm-an épi i « mennen l’ pou wonm-an ». Tèlman i té kontan, Adan di : « Gadé, men zo ki soti di mo zo é lachè ki soti di mo lachè » (Genèse 2:22, 23). Sa ka anprann nou ki Jéova lé ki moun maryé viv byen ansanm.

² Malérèzman, roun patché moun pa janmen rivé gen tchò kontan annan yé fanmi. Mé annan Labib-a i gen bokou prensip ki pouvé idé tout moun annan fanmi-a pou yé viv byen ansanm ké tchò kontan (Luc 11:28).

3, 4. a) Kouman roun mari divèt aji ké so madanm ? b) Poukisa roun mari ké so madanm divèt pardonnen yé konpanyen ?

³ Labib-a ka di ki roun mari divèt kontan so madanm é rèspèkté l’. Li Éphésiens 5:25 jiska 29. Roun mari toujou divèt aji ké so madanm ké bokou lanmou, protéjé l’ ké pran swen di li. I pa janmen divèt fè l’ méchansté.

⁴ Kouman roun mari divèt réyaji lò so madanm ka fè ouben ka di bagaj i pa divèt ? Labib-a ka di mari-ya : « Kontinyé kontan zòt madanm é a pa pou zòt rèd ké yé » (Colossiens 3:19). Si ou sa roun mari, pa bliyé ki ou menm osi ou ka fè é ou ka di bagaj ou pa divèt. Si ou lé Bondjé pardonnen ou, ou divèt pardonnen ou  madanm (Matthieu 6:12, 14, 15). Pou yé pouvé gen tchò kontan annan yé maryaj, mari ké madanm divèt pardonnen yé konpanyen san fòrsé.

5. Poukisa roun mari divèt rèspèkté so madanm ?

⁵ Jéova ka doumandé mari-ya rèspèkté yé madanm. Roun mari divèt chaché konprann kouman i pouvé idé so madanm. I divèt bay li sa i bézwen pou viv. A pou i pran tan palé ké so madanm é éséyé konprann sa i gen annan so tchò. A roun bagaj ki trè enpòrtan. Si roun mari pa ka aji ké so madanm kou i divèt, Jéova pouvé désidé pa kouté so lapriyè (1 Pierre 3:7). Ki fanm ki wonm, Jéova kontan yé tout menm fason-an. Si roun moun gen bokou valò douvan Jéova, a paské sa moun-an kontan l’.

6. Roun mari ké so madanm sa « rounsèl lachè ». Kisa sa lé di ?

⁶ Jézi di ki roun mouché ké so madanm « pa dé moun ankò, mé yé sa rounsèl lachè » (Matthieu 19:6). Yé divèt rété fidèl roun a ròt (Proverbes 5:15-21 ; Hébreux 13:4). Roun mari ké so madanm divèt chaché bay yé konpanyen sa yé bézwen annan domenn sèksyèl (1 Corinthiens 7:3-5). Roun mari divèt sonjé ki « pyès moun pa janmen rayi so pròp kò ; mé tout moun ka bay yé kò manjé é ka pran swen di yé kò ». Atò, roun mari divèt kontan so madanm é pran swen di li. Prémyé bagaj roun madanm lé, a ki so mari janti ké li épi kontan li (Éphésiens 5:29).

7. Poukisa roun fanmi bézwen roun chèf ?

⁷ Chak fanmi bézwen roun chèf, sa lé di roun moun pou gidé fanmi-a, pou tout moun rivé travay ansanm.  Annan 1 Corinthiens 11:3, nou ka li : « Chèf tout wonm, a Kris ; chèf fanm-an, a wonm-an ; é chèf Kris, a Bondjé. »

8. Kouman roun madanm pouvé montré ki i gen bokou rèspè pou so mari ?

⁸ Tout mari ka fè é ka di bagaj ki pa divèt. Mé lò roun madanm ka soutni désizyon so mari ka pran é ka idé li ké tout so tchò, tout fanmi-a ka trapé bénédiksyon (1 Pierre 3:1-6). Labib-a ka di : « Madanm-an divèt gen roun gran rèspè pou so mari » (Éphésiens 5:33). É si roun mari pa gen menm krwayans ki so madanm ? I divèt gen bokou rèspè pou li kanmenm. Labib-a ka di : « Zòt madanm-yan, rété soumi anba zòt mari, konsa, si i gen sa ki pa ka obéyi paròl-a, kondwit yé madanm ké bay yé anvi adoré Bondjé, paské yé wè kouman zòt konpòrtman té sen douvan Bondjé é plen ké rèspè » (1 Pierre 3:1, 2). Gras a so bon konpòrtman roun madanm pouvé idé so mari konprann épi rèspèkté so krwayans.

9. a) Lò roun madanm pa dakò ké so mari, kisa i pouvé fè ? b) Annan Tite 2:4 ké 5 ki konsèy i gen pou madanm-yan ?

 ⁹ Lò roun madanm pa dakò ké so mari, kisa i pouvé fè ? I divèt di li sa i ka pansé ké rèspè. Annou pran èkzanp Sara. Roun jou i di so mari, Abraam, roun kichoz ki pa fè l’ plézi. Mé Jéova di Abraam kouté so madanm (Genèse 21:9-12). Lò roun mari krétyen ka pran roun désizyon ki pa ka kontrédi sa Labib-a ka di, so madanm divèt soutni l’ (Actes 5:29 ; Éphésiens 5:24). Anplis di sa, roun bon madanm ka pran swen di so fanmi (li Tite 2:4, 5). Lò so mari ké so timoun ka wè l’ ka travay rèd pou yé, yé kontan l’ é yé ka rèspèkté l’ plis ankò. (Proverbes 31:10, 28).

10. Kisa Labib-a ka di asou séparasyon ké divòrs ?

¹⁰ Détan, mari ké madanm ka désidé séparé ouben divòrsé san pran tan réfléchi. Mé Labib-a ka di : « Roun madanm pa divèt séparé di so mari. » I ka di osi ki roun « mari pa divèt lésé so madanm » (1 Corinthiens 7:10, 11). Annan sitiyasyon ki grav, roun koup pouvé séparé. Mé anvan yé pran sa désizyon-an yé divèt byen réfléchi. Kanta divòrs-a, kisa Labib-a ka di asou sa ? I ka anprann nou ki rounsèl bagaj ka bay madanm ké mouché drwa divòrsé : roun koup pouvé divòrsé sèlman si mouché-a ouben madanm-an alé kouché ké rounòt moun (Matthieu 19:9).

11. Kisa timoun-yan bézwen pasé pyès ròt bagaj ?

¹¹ Si ou gen timoun, fè tousa ou pouvé pou pasé tan ké yé. Ou timoun bézwen ou la ké yé. É sa yé plis bézwen ankò a ki ou idé yé konnèt Jéova (Deutéronome 6:4-9).

12. Kisa paran-yan divèt fè pou protéjé yé timoun ?

 ¹² Monn Satan-an ka divini plizanpli mové. Pitèt i ké gen moun ki ké lé fè ou timoun méchansté ouben menm vyolé yé. I gen dé paran ki pa ka rivé palé di sa bagaj-a ké yé timoun. Mé yé divèt avèrti yé timoun é èspliké yé kouman chapé lwen di sa moun-yan. Si ou gen timoun, ou divèt protéjé yé * (1 Pierre 5:8).

13. Kouman paran-yan divèt ansényé yé timoun ?

¹³ Paran-yan gen rèsponsabilité anprann yé timoun  gen roun bon konpòrtman. Kouman ou pouvé ansényé ou timoun ? Ou timoun bézwen édikasyon, mé lò ou ka korijé yé, ou pa janmen divèt ni rèd ni vyolan (Jérémie 30:11). Pa janmen korijé yé lò ou kòlè (gadé nòt n^o 30, paj 223). Pa fè yé soufri ké paròl ka blésé kousidiré a té kout sab (Proverbes 12:18). Èspliké yé poukisa yé divèt obéyi (Éphésiens 6:4 ; Hébreux 12:9-11).

14, 15. Poukisa timoun-yan divèt obéyi yé paran ?

¹⁴ Jézi toujou obéyi so Papa, menm lò sa té rèd (Luc 22:42 ; Jean 8:28, 29). Kou Jézi, timoun-yan divèt obéyi yé paran paské a sa Jéova lé (Éphésiens 6:1-3).

¹⁵ Si ou sa roun timoun, pitèt ou ké trouvé ki sa rèd di obéyi ou paran. Mé pa bliyé : lò ou ka obéyi, ou ka fè Jéova ké ou paran plézi * (Proverbes 1:8 ; 6:20 ; 23:22-25).

16. a) Kouman Satan ka éséyé fè jennjan-yan fè bagaj ki pa bon ? b) Poukisa sa enpòrtan ki ou zanmi kontan Jéova ?

¹⁶ Satan pouvé itilizé ou zanmi ouben ròt jennjan pou fè ou fè mové bagaj. I savé ki détan sa difisil di tchenbé rèd lò ròt moun ka pousé ou fè bagaj ki pa bon. Annou pran èkzanp Dina, tifi Jakòb-a. I té zanmi ké moun ki pa té kontan Jéova. Akoz di sa, li ké so fanmi trapé roun patché traka (Genèse 34:1, 2). Si ou zanmi pa kontan Jéova, pitèt yé ké pousé ou fè roun bagaj i rayi. Si ou ka fè bagaj ki pa bon, ou ké fè ou fanmi ké Bondjé lanpenn, épi ou menm osi ou ké soufri akoz di sa  (Proverbes 17:21, 25). A pou sa, sa enpòrtan ki ou zanmi kontan Jéova (1 Corinthiens 15:33).

17. Kisa Bondjé ka doumandé chak moun annan fanmi-a fè ?

¹⁷ Lò tout moun annan roun fanmi ka fè sa Bondjé ka doumandé yé fè, yé ka chapé anba bokou traka. Si ou sa roun mari, a pou ou kontan ou madanm é aji ké li ké bokou lanmou. Si ou sa roun madanm, a pou ou rèspèkté ou mari é rété soumi. Imité èkzanp madanm-an yé ka palé annan Proverbes 31:10 jiska 31. Si ou sa roun papa ouben roun manman, a pou ou anprann ou timoun kontan Bondjé (Proverbes 22:6). Si ou sa roun papa, a pou ou byen dirijé ou fanmi (1 Timothée 3:4, 5 ; 5:8). Si ou sa roun timoun, a pou ou kouté ou paran (Colossiens 3:20). Épi pa bliyé : nou tout ka fè ouben di bagaj nou pa divèt. A pou sa nou divèt fè nou kò toupiti é doumandé nou konpanyen pardon. Chak moun annan fanmi-a pouvé trouvé konsèy Jéova ka bay li annan Labib-a.