1, 2. Ano ang gusto ni Jehova para sa mga pamilya?

SI Jehova nga Dios ang nagkasal sa una nga mag-asawa. Ginasilingan kita sang Biblia nga ginhimo niya ang una nga babayi kag “gindala niya sia sa lalaki.” Nalipay gid si Adan gani nakasiling sia: “Amo gid ini ang tul-an sang akon mga tul-an kag unod sang akon unod.” (Genesis 2:22, 23) Nagasugid ini sa aton nga gusto ni Jehova nga mangin malipayon ang mga mag-asawa.

² Ang masubo kay madamo nga pamilya ang indi malipayon. Pero, may mga prinsipio sa Biblia nga makabulig sa tanan nga miembro sang pamilya para mangin madinalag-on ang ila pamilya kag malipayon nga nagaupdanay.—Lucas 11:28.

3, 4. (a) Paano dapat trataron sang bana ang iya asawa? (b) Ngaa dapat patawaron sang mag-asawa ang isa kag isa?

³ Ginasiling sang Biblia nga ang maayo nga bana nagapalangga kag nagarespeto sa iya asawa. Palihug basaha ang Efeso 5:25-29. Mapinalanggaon pirme nga ginatratar sang bana ang iya asawa. Dapat man niya sia proteksionan, atipanon, kag likawan ang mga butang nga makasakit sa iya.

⁴ Pero ano ang himuon sang bana kon makasala ang iya asawa? Ginasilingan ang mga bana: “Padayon nga higugmaa ang inyo asawa kag indi kamo magkaakig sing tuman sa ila.” (Colosas 3:19) Mga bana, dumduma nga kamo  makasala man. Kag kon gusto mo nga patawaron ka sang Dios, dapat mo patawaron ang imo asawa. (Mateo 6:12, 14, 15) Kon ang mag-asawa handa sa pagpatawad sa isa kag isa, mangin malipayon ang ila pag-asawahay.

5. Ngaa dapat pabaloran sang bana ang iya asawa?

⁵ Gusto ni Jehova nga pabaloran sang bana ang iya asawa. Dapat pamensaron sing maayo sang bana ang kinahanglanon sang iya asawa. Serioso gid ini nga butang. Kon indi maayo ang pagtratar sang bana sa iya asawa, mahimo indi pagpamatian ni Jehova ang iya mga pangamuyo. (1 Pedro 3:7) Ginapabaloran ni Jehova ang mga tawo kay palangga niya sila. Palareho lang ang pagtan-aw niya sa lalaki kag babayi.

6. Ano ang buot silingon nga ang mag-asawa “isa ka unod”?

⁶ Ginpaathag ni Jesus nga ang bana kag asawa “indi na . . . duha, kundi isa ka unod.” (Mateo 19:6) Mainunungon kag matutom gid sila sa isa kag isa. (Hulubaton 5:15-21; Hebreo 13:4) Dapat man ihatag sang mag-asawa ang seksuwal nga kinahanglanon sang kada isa. (1 Corinto 7:3-5) Dapat dumdumon sang bana nga “wala sing tawo nga nagadumot sa iya kaugalingon nga lawas, kundi ginapakaon kag ginapalangga niya ini.” Gani dapat palanggaon kag pabaloran gid niya ang iya asawa. Isa pa, gusto sang asawa nga mabuot kag mapinalanggaon ang iya bana sa iya.—Efeso 5:29.

7. Ngaa dapat may ulo ang pamilya?

⁷ Ang kada pamilya dapat nga may ulo, nga amo ang magagiya sa pamilya para mangin madinalag-on ini. Ang Biblia nagasiling sa 1 Corinto 11:3: “Ang Cristo amo ang ulo sang tagsa ka lalaki; ang lalaki amo ang ulo sang babayi; ang Dios amo ang ulo sang Cristo.”

8. Paano mapakita sang asawa ang tudok nga pagtahod sa iya bana?

 ⁸ Ang tanan nga bana mahimo gid makasala. Pero makabenepisyo gid ang bilog nga pamilya kon suportahan sang asawa ang desisyon sang iya bana kag handa nga magbulig sa iya. (1 Pedro 3:1-6) Ang Biblia nagasiling: “Ang asawa dapat may tudok nga pagtahod sa iya bana.” (Efeso 5:33) Pero ano abi kon indi pareho ang pagtuo sang bana sa iya asawa? Dapat gihapon respetuhon sang asawa ang iya bana. Ang Biblia nagasiling: “Kamo nga mga asawa, magpasakop kamo sa inyo bana, agod ang bisan sin-o sa ila nga wala nagatuman sa pulong, madaug nga wala sang pulong paagi sa paggawi sang ila asawa, bangod nasaksihan nila ang inyo putli nga paggawi upod ang tudok nga pagtahod.” (1 Pedro 3:1, 2) Ang maayo nga halimbawa sang asawa makabulig sa iya bana nga maintiendihan kag respetuhon ang iya pagtuo.

9. (a) Ano ang dapat himuon sang asawa kon indi sia ugyon sa iya bana? (b) Ano ang laygay sang Tito 2:4, 5 para sa mga asawa?

⁹ Ano ang himuon sang asawa kon indi sia ugyon sa iya  bana? Dapat matinahuron niya nga isugid ang iya opinyon. Halimbawa, may ginsiling si Sara nga wala nanamian ni Abraham, pero ginsilingan ni Jehova si Abraham: “Pamatii sia.” (Genesis 21:9-12) Talagsa lang gid nga ang desisyon sang Cristiano nga bana kontra sa ginasiling sang Biblia, gani dapat nga suportahan sia sang iya asawa. (Binuhatan 5:29; Efeso 5:24) Ginaatipan sang maayo nga asawa ang iya pamilya. (Basaha ang Tito 2:4, 5.) Mas palanggaon kag respetuhon pa gid sia sang iya bana kag kabataan kon makita nila nga nagapangabudlay gid sia para sa ila.—Hulubaton 31:10, 28.

10. Ano ang ginasiling sang Biblia parte sa pagbulagay kag diborsio?

¹⁰ Kon kaisa, kadasig lang magdesisyon ang mga mag-asawa nga magbulagay ukon magdiborsio. Pero ang Biblia nagasiling nga “ang asawa indi dapat magbulag sa iya bana” kag “ang bana indi dapat magbiya sa iya asawa.” (1 Corinto 7:10, 11) May mga sitwasyon nga mahimo magbulagay ang mag-asawa, pero serioso ini nga desisyon. Kamusta naman ang diborsio? Ginapakita sang Biblia nga ang lamang nga rason nga magdiborsio ang mag-asawa kon ang bana ukon asawa nakig-sex sa iban nga indi niya bana ukon asawa.—Mateo 19:9.

11. Ano gid ang mas kinahanglan sang kabataan?

¹¹ Tubtob posible, dapat makig-upod pirme ang mga ginikanan sa ila kabataan. Kinahanglan kamo sang inyo kabataan, ilabi na gid para tudluan sila parte kay Jehova.—Deuteronomio 6:4-9.

12. Ano ang dapat himuon sang mga ginikanan para proteksionan ang ila kabataan?

¹² Nagalain na gid ang kalibutan ni Satanas, kag may  gusto manghalit sa inyo kabataan kag abusuhan sila sa sekso. Nabudlayan ang pila ka ginikanan nga istoryahan ini nga topiko. Pero dapat paandaman sang mga ginikanan ang ila kabataan sa sina nga mga tawo kag tudluan sila kon paano ini malikawan. Mga ginikanan, dapat proteksionan ninyo ang inyo kabataan. *—1 Pedro 5:8.

13. Paano dapat tudluan sang mga ginikanan ang ila kabataan?

¹³ Mga ginikanan, responsibilidad ninyo nga tudluan ang inyo kabataan sang maayo nga pamatasan. Paano mo  tudluan ang imo kabataan? Dapat mo sila hanason, pero ang pagdisiplina indi dapat mapintas. (Jeremias 30:11) Gani indi pagdisiplinaha ang imo kabataan kon akig ka. Indi mo gid gusto nga ang imo mga tinaga mangin daw mga “buno sang espada” nga makasakit sa ila. (Hulubaton 12:18) Tudlui ang imo kabataan nga importante ang pagtuman.—Efeso 6:4; Hebreo 12:9-11; tan-awa ang Endnote 30.

14, 15. Ngaa dapat tumanon sang kabataan ang ila mga ginikanan?

¹⁴ Ginatuman gid ni Jesus ang iya Amay, bisan kon kaisa indi mahapos. (Lucas 22:42; Juan 8:28, 29) Gusto man ni Jehova nga tumanon sang kabataan ang ila mga ginikanan.—Efeso 6:1-3.

¹⁵ Mga kabataan, bisan pa nabudlayan kamo magtuman sa inyo mga ginikanan, dumduma nga malipay si Jehova kag ang inyo mga ginikanan kon mangin matinumanon kamo. *—Hulubaton 1:8; 6:20; 23:22-25.

16. (a) Paano ginasulay ni Satanas ang mga pamatan-on nga maghimo sing sala? (b) Ngaa dapat mo pilion ang mga abyan nga nagapalangga kay Jehova?

¹⁶ Mahimo gamiton sang Yawa ang imo mga abyan kag ang iban nga kaedad mo para sulayon ka nga maghimo sing sala. Nakahibalo sia nga mabudlay ini pangindian. Halimbawa, ang bata ni Jacob nga si Dina may mga abyan nga wala nagapalangga kay Jehova. Indi gid maayo ang resulta sini sa iya kag sa iya pamilya. (Genesis 34:1, 2) Kon ang imo mga abyan wala nagapalangga kay Jehova, basi sulayon ka nila nga himuon ang ginadumtan ni Jehova,  kag mahimo masakitan ka, ang imo pamilya, kag ang Dios. (Hulubaton 17:21, 25) Amo nga dapat ang imo mga abyan nagapalangga man kay Jehova.—1 Corinto 15:33.

17. Ano ang responsibilidad sang kada miembro sang pamilya?

¹⁷ Kon sundon sang kada miembro sang pamilya ang sugo sang Dios, malikawan nila ang madamo nga problema. Kon ikaw isa ka bana, palanggaa ang imo asawa. Kon ikaw isa ka asawa, respetuha kag magpasakop sa imo bana kag iluga ang halimbawa sang asawa nga mabasa sa Hulubaton 31:10-31. Kon ikaw isa ka ginikanan, tudlui ang imo kabataan nga palanggaon ang Dios. (Hulubaton 22:6) Kon ikaw isa ka amay, giyahi “sing maayo” ang imo pamilya. (1 Timoteo 3:4, 5; 5:8) Kag mga kabataan, tumana ang inyo mga ginikanan. (Colosas 3:20) Dumduma nga ang kada isa sa pamilya mahimo gid makasala, gani mangin mapainubuson kag mangayo sing patawad. Huo, ang Biblia nagaunod sang mga giya ni Jehova para sa kada miembro sang pamilya.