1, 2. Otjikeṋa Jehova tje zerira omaṱunḓu?

JEHOVA MUKURU ongwa kupisa ovandu ovatenga. Ombeibela i tu raera kutja eye wa mema omukazendu omutenga “ne mu eta ku” Adam. Adam wa ri nondjoroka tjinene nga tja tja: “Ingwi eṱupa romaṱupa wandje, nonyama yonyama yandje!” (Genesis 2:22, 23) Ihi matji raisa kutja Jehova u vanga kutja ovakupasane ve kare nondjoroka.

² Ouhumandu, ovandu ovengi kave ya rora okukara nouṋingandu meṱunḓu rawo. Posi yokutja, Ombeibela i nomirari omingi mbi mavi vatere ovandu avehe meṱunḓu okueta ouṋingandu keṱunḓu rawo nokutjaterwa okukara pamwe.—Lukas 11:28.

3, 4. (a) Omurumendu ma sokutjinda vi omukazendu we? (b) Ongwaye tje ri otjiṋa otjinanḓengu komurumendu nomukazendu we okuisirasana?

³ Ombeibela i tja omurumendu ma sokutjinda omukazendu we norusuvero nondengero. Arikana lesa Ovaefese 5:25-29. Omurumendu ma sokutjinda omukazendu we norusuvero oruveze aruhe. Eye wina ma sokumutjevera, e mu parura nu kamaa tjiti ngamwa otjiṋa tji matji hihamisa omukazendu we.

⁴ Nu hapo omurumendu ma sokutjita vi indu omukazendu we tja zunḓa? Ovarumendu mave raerwa kutja, “Suvereye ovakazendu veṋu, nu amu kara nombeze ku wo.” (Ovakolose 3:19) Varumendu, tjiweye kutja eṋe wina povikando tjiva mu zunḓa. Nu tji mamu vanga kutja Mukuru  me mu isire, eṋe wina mamu sokuisira ovakazendu veṋu. (Mateus 6:12, 14, 15) Indu omurumendu nomukazendu we tji ve isirasana, maku ve vatere okukara norukupo oruṋingandu.

5. Ongwaye omurumendu tji ma sokuyozika omukazendu we?

⁵ Jehova u undjira ko kutja omurumendu ma yozike omukazendu we. Omurumendu ma sokuripurira kovihepwa vyomukazendu we nawa. Ihi otjiṋa tji ma hepa okutjita tjiri. Omurumendu tje hi nokutjinda omukazendu we nawa, Jehova mape ya a ha puratene kozongumbiro ze. (1 Petrus 3:7) Otjiṋa tji tji tjita kutja omundu ma rire omunanḓengu ku Jehova, orondu tja suvera Jehova. Eye kavara ovarumendu otjovandu ovananḓengu povakazendu.

6. Ombeibela tji i tja omurumendu nomukazendu we mave rire “onyama imwe” i heya tjike?

⁶ Jesus wa kahurura kutja omurumendu nomukazendu we “otji ve he tji nakurira vevari, nungwari otji mave rire onyama imwe.” (Mateus 19:6) Owo ve karasana nouṱakame. (Omiano 5:15-21; Ovaheberi 13:4) Auhe wawo ka sokuripurira ku ye omuini uriri nungwari ma sokurikendera kozonḓero zonyama zomukwao. (1 Ovakorinte 7:3-5) Omurumendu ma sokuzemburuka kutja “kapeya ninga omundu ngwa tondere orutu rwe omuini. Nungwari eye u ru parura ne ru hungu.” Okutja eye ma sokusuvera nokuvara omukazendu we otjotjiṋa otjihuze. Kombanda yaavihe, omukazendu u vanga kutja omurumendu we me mu tjinde momuano omuwa norusuvero.—Ovaefese 5:29.

7. Ongwaye eṱunḓu tji ri hepa otjiuru tjeṱunḓu?

⁷ Eṱunḓu arihe ri hepa otjiuru tjeṱunḓu, tji matji hongorere eṱunḓu kutja ri ungure nawa kumwe. Ombeibela 1 Ovakorinte 11:3 mai tja: “Kristus Eye otjiuru tjomurumendu  auhe, nomurumendu eye otjiuru tjomukazendu we, nu Ndjambi Eye otjiuru tjaKristus.”

8. Omukazendu ma yenene vi okuyozika omurumendu we?

⁸ Kaaruhe omurumendu tje sora. Posi yokutja indu omukazendu tji ma yandja oruvara kozondyero zomurumendu we na ungura nawa kuna ye, eṱunḓu arihe ri muna ouwa. (1 Petrus 3:1-6) Ombeibela i tja: ‘Omukazendu auhe nga yozike omurumendu we.’ (Ovaefese 5:33) Omukazendu tja kupwa i omurumendu ngu he ri owongamburiro ye, eye ma sokutjita vi? Eye ngunda ma sokuyozika omurumendu we. Ombeibela mai tja: “Eṋe vakazendu, wina otjinga amwa sokuriwisa kehi yovarumendu veṋu, kokutja tji pe na tjiva vawo mbe ha kambura membo raNdjambi, omeritjindiro weṋu ye ve kotore kongamburiro. Kamaa rire ohepero eṋe okuhungira embo, owo tjinga amave munu kutja omeritjindiro weṋu owo omakohoke nu ye nondira.” (1 Petrus 3:1, 2) Otjihorera otjiwa tjomukazendu matji yenene okuvatera omurumendu we okutjiwa ongamburiro ye nawa nokukara nondengero ku yo.

9. (a) Omukazendu ma sokutjita vi indu tje noumune mbwa panguka ku imbwi owomurumendu we? (b) Etjangwa raTitus 2:4, 5 mari yandja eronga riṋe kovakazendu mba kupwa?

 ⁹ Omukazendu tje noumune mbwa panguka ku imbwi owomurumendu we ma yenene okutjita vi? Eye ma sokumuraera oumune we nondengero. Okutara kotjihorera, Sara wa hungira otjiṋa Abraham tje ha ri nonyuṋe na tjo, posi yokutja Jehova we mu raera kutja, “tjita atjihe Sara tji me ku raere.” (Genesis 21:9-12) Katjinene omurumendu Omukriste okutjita ondyero ndji ri ombirukira nomirari vyOmbeibela, okutja omukazendu we ma sokumupa oruvara. (Oviungura 5:29; Ovaefese 5:24) Omukazendu omusemba u tjevera eṱunḓu re nawa. (Lesa Titus 2:4, 5.) Indu omurumendu novanatje ve tji mave munu omuano mu ma ungura oukukutu, owo mave mu suvere nave kara nondengero ku ye kombanda ya indu tji pe kara.—Omiano 31:10, 28.

10. Ombeibela i tja vi ohunga nomahaṋikiro nomateyero worukupo kotjiveta?

¹⁰ Povikando tjiva ovakupasane ve hakahana okutya okuhaṋika poo okuteya orukupo kotjiveta. Nungwari Ombeibela mai tja: “Omukazendu ke nokusokuhaṋika nomurumendu we. Nomurumendu wina a ha isa omukazendu we.” (1 Ovakorinte 7:10, 11) Pe nozongaro zarwe ozombi nḓu mape ya aze yandjere ovakupasane okuhaṋika. Posi yokutja ihi otjiṋa tji mave sokuripurira ko nawa ngunda ave hi ya toora omukambo mbwo. Nu tjike tji twe ya kokuteya orukupo? Ombeibela i raisa kutja epu ariyerike ovakupasane ndi mave yenene okuteyera orukupo, orondu omurumendu poo omukazendu tja kahakaena ku nomundu warwe monyama.—Mateus 19:9.

11. Ovanatje tjinenenene ve hepa tjike?

¹¹ Vanene, twapeye oruveze rwokukara puna ovanatje veṋu otja pu mamu yenene. Ovanatje veṋu ve hepa ombango  yeṋu, nu tjinenenene owo ve hepa kutja mu ve honge ohunga na Jehova.—Deuteronomium 6:4-9.

12. Ovanene mave sokutjita vi kutja ve tjevere ovanatje vawo?

¹² Ouye waSatan u ririra ko ouvi tjinene, nu pe novandu tjiva mbe vanga okuhihamisa ovanatje vetu, nandarire okuvetjera. Kovanene tjiva, ouzeu okuhungira ohunga nepu ndi ku novanatje vawo. Posi yokutja ovanene mave sokurakiza ovanatje vawo hunga novandu otja imba nave ve hongo omuano wokukara kokure novandu mba. Vanene, tjevereye ovanatje veṋu. *—1 Petrus 5:8.

13. Ovanene mave sokuhonga vi ovanatje vawo?

 ¹³ Ovanene ombe nomerizirira wokuhonga ovanatje vawo omuano omusemba wokuritjinda. Mo yenene vi okuhonga ovanatje voye? Ovanatje ve hepa okuhongwa, nungwari kamomuano omuvi poo wombeze. (Jeremia 30:11) Okutja o roro okuronga ovanatje voye ngunda a wa pindike. Konoo vanga kutja omambo woye ye ‘tuvakaṋe tjimuna engaruvyo’ nu ye ve hihamise. (Omiano 12:18) Honga ovanatje voye okuzuva kutja ongwaye tji mave sokukara nonḓuviro.—Ovaefese 6:4; Ovaheberi 12:9-11; tara kOmambo wokehi 30.

14, 15. Ongwaye ovanatje tji mave sokukara nonḓuviro kovanene vawo?

¹⁴ Jesus aruhe wa ri nonḓuviro ku Ihe, nandarire indu tja ri ouzeu okutjita nao. (Lukas 22:42; Johanes 8:28, 29) Jehova wina u undjira ko kutja ovanatje ve kare nonḓuviro kovanene vawo.—Ovaefese 6:1-3.

¹⁵ Vanatje, nandarire kutja mamu munu kutja ouzeu okukara nonḓuviro kovanene veṋu, tjiweye kutja tji mu nonḓuviro, mamu yorokisa omutima waJehova nowovanene veṋu. *—Omiano 1:8; 6:20; 23:22-25.

16. (a) Satan u kondjisa vi okupukisa omitanda kutja vi tjite oviṋa ovivi? (b) Ongwaye tji matu sokutoorora omapanga nga suvera Jehova?

¹⁶ Satan ma yenene okuungurisa omapanga woye nomitanda vyarwe okukurora kutja u tjite oviṋa ovivi. Eye u tjiwa kutja ku rira ouzeu okupirukira oṋiṋikizire otja indjo. Okutara kotjihorera, omusukona waJakob wena Dina wa ri nomapanga nge ha suverere Jehova. Otjiṋa hi tja eta omauzeu omengi ku Dina neṱunḓu re. (Genesis 34:1, 2) Omapanga woye tji ye ha suvera Jehova, mape ya aye ku pukisa  kutja u tjite otjiṋa Jehova tja tonda. Nu otjiṋa hi mape ya atji eta omuhihamo omuingi kove, kovanene voye na ku Mukuru. (Omiano 17:21, 25) Kunao, opu mo sokukara nomapanga nga suvera Jehova.—1 Ovakorinte 15:33.

17. Omundu auhe meṱunḓu u nomerizirira waye?

¹⁷ Indu ovandu avehe meṱunḓu tji mave kongorere omirari vyaMukuru, ku ve vatera kutja ave ha kara nomauzeu omengi. Okutja tji u ri omurumendu, suvera omukazendu woye nu u mu tjinde norusuvero. Tji u ri omukazendu, raisa ondengero, riwisa kehi yomurumendu woye nu u horere kotjihorera tjomukazendu ngwa tamunwa mOmiano 31:10-31. Tji u ri omunene, honga ovanatje voye okusuvera Mukuru. (Omiano 22:6) Tji u ri omurumendu omukwate, hongorera eṱunḓu roye momuano ‘omuwa.’ (1 Timoteus 3:4, 5; 5:8) Neṋe vanatje, kareye nonḓuviro kovanene veṋu. (Ovakolose 3:20) Tjiweye kutja omundu auhe meṱunḓu ma yenene okuzunḓa, okutja risusupariseye nu mu ningirasane ondjesiro. Ombeibela i nomirari vyaJehova komundu auhe meṱunḓu.