1, 2. Yeova alota likola livenavo nyamani?

YEOVA Nnungu ni apangile shitamu shitandi. Ibibiliya inkutangola kenga anímumba nkongwe ntandi na “kumwing’a nnume.” Adamu andípuwanga namene, na nae kushidoni: “Idavo napanelo ali ni ligwangwa lyamagwangwa angu na mili wamili wangu.” (Kutunduvanga 2:22, 23) Shinu ashi shinkulilodya kenga Yeova alota avalá vaungile shitamu vavenavo lipuwilo.

² Ni shinu shashididi nelo, makola oe halanavanavo shinu lipuwilo. Kanji Ibibiliya, inkuvanavo midimu vilota kumpwashela kula munu palikola kutandedya madalaka ake na kupuwangila pamo na likola.—Lukashi 11:28.

3, 4. a) Ntwamunu immaikidile antanane dashi ndyagwe? b) Mwaa shani kulivalivanila makosha ni shinu shikumene pakati pashitamu?

³ Ibibiliya inkuvalanga kenga nnume wambone inimmaikila annagwaledye ndyagwe na amwishimu. Shomya Vaepeshu 5:25-29. Ntwamunu ngwengwe inimmaikila antanane ndyagwe na linagwaledyo. Nae ananshililidya, ananshunga na hanatenda shinu shoeshoe shilota kumpwateka.

⁴ Kanji ntwamunu immaikidile atende nyamani ndyagwe akankashedya? Ibibiliya inkuvaulila vatwamunu doni: ‘Wena mushu muvanagwaledya vadyavenu na hamunavavikile ukalau.’ (Vakoloshu 3:19) Mmatwamunu, immaikidile mukumbukile kenga mwenu momo munakowa. Ikava kenga munkulota Nnungu anivalive makosha enu,  namwenu momo valivalive vadyavenu makosha ave. (Mateu 6:12, 14, 15) Ntwamunu na ndyamunu vandavanavo lipuwilo pakati pashitamu, vakalivalanila makosha ave.

5. Mwaa shani ntwamunu inimmaikila amwishimu ndyagwe?

⁵ Yeova alota ntwamunu amwishimu ndyagwe. Ntwamunu inimmaikila amwangaikangile ndyagwe kwaupande wamakumbukililo na mili. Ashi ni shinu shikumene namene. Ikava kenga ntwamunu hanantanana shinu ndyagwe, Yeova haigwilila shinu kushwali kwake. (1 Patulu 3:7) Yeova ankuvatumbyanga vanu uti vannagwaledya nae. Nae hanavona shinu valume kuva vambone kuliko vakongwe.

6. Manaake ni nyamani ntwamunu na ndyamunu kuva mili umo?

⁶ Yesu andívalanganga kenga ntwamunu na ndyamunu havanava ‘shinu vanu vavili kanji ni mili umo.’ (Mateu 19:6) Indivavaikila kula munu amwamini muje. (Mikong’o 5:15-21; Vabalaniya 13:4) Ntwamunu na ndyamunu indivavaikila kula munu atandedye avilá vilotéka nkati mukulombana. (1 Vakolintu 7:3-5) Ntwamunu inimmaikila akumbukile kenga “hapali munu ánanyatila mili wo wake mwene kanji shitandi análisha na kutanana.” Ntwamunu inimmaikila annagwaledye ndyagwe na antanane. Kupunda vinu vinji, ndyamunu annota ntwamunu annagwaledye na ampambedye.—Vaepeshu 5:29.

7. Mwaa shani likola livaikidile livenavo muti?

⁷ Kula likola livaikidile livenavo muti wakulangalalela pakulota vinu vyuke na mipangililo. Mu 1 Vakolintu 11:3 Ibibiliya inkushidoni: “Muti wakula nnume ni Klistu, muti wankongwe ni nnume na muti umwe Klistu ni Nnungu.”

8. Ndyamunu alota kulodya dashi ishima kwa ntwagwe?

⁸ Vatwamunu momo vanakowa. Kanji ikava kenga nkongwe  ankungila nkono wamushi wantwagwe na kumpwashela kwalilotelo lyake, likola uti linapata paida. (1 Patulu 3:1-6) Ibibiliya inkushidoni: “Ndyamunu inimmaikila amwishimu ntwagwe.” (Vaepeshu 5:33) Ilota kuva dashi ikava kenga nnume hanava shinu wakukulupila? Ata ikava davo, nkongwe inimmaikila amwishimu ntwagwe. Ibibiliya inkushidoni: ‘Mwenu mmadyamunu livike mwina mwavatavenu kwambangidya ata ikava kenga vanji havanakulupila shinu lilove lyake Nnungu, vapatikanange kwabila malove kwamwaa washinamidyo shenu mwenu mmadyavave; vona shinamidyo shenu shíkave ushapu na shaishima yoe.’ (1 Patulu 3:1, 2) Mpano wambone wa ndyamunu unkuulula kumpwashela ntwamunu kwigwa shana na kwishimu likulupililo lya ndyagwe.

9. a) Nkongwe immaikidile atende nyamani ikava kenga hanakubaliania shinu na maoni a ntwagwe? b) Titu 2:4, 5 aumya midimu shani kwaupande wa nkongwe?

⁹ Nkongwe immaikidile atende nyamani ikava kenga hanakubaliania shinu na maoni a ntwagwe? Nae inimmaikila alodye maoni ake kwaishima. Kwampano, Abulaamu hashilota kwigwilila maoni andyagwe Shalaa, kanji  Yeova anímwaulila doni: “Igwilila.” (Kutunduvanga 21:9-12) Nkongwe ankuulula kungila nkono wamushi woewoe wa ntwagwe ikava kenga hanapujungula shinu midimu vya mu Ibibiliya. (Vitendo 5:29; Vaepeshu 5:24) Nkongwe wambone anashunga shana likola lyake. (Shomya Titu 2:4, 5.) Nnume na vana pavamwona nae atenda madengo na ntima wake, vanavo vanannagwaledya na vanamwishimu.—Mikong’o 31:10, 28.

10. Ibibiliya ivalanga nyamani kwaupande wakwapukananga na kulakana?

¹⁰ Myanda vinji inkuululika kupagwa matatisho lalota kuntadya nnume na nkongwe kukumbukila kwapukananga au kulakananga. Kanji, Ibibiliya inkushidoni: “Nkongwe hanaapukanange na nnume ntwagwe” na “nnume hananneke nkongwe ndyagwe.” (1 Vakolintu 7:10, 11) Ankuulula kumilila matatisho makumene lalota kuntadya mwenu kwapukananga, kanji wamushi awo ukumene namene. Kushi ing’ano yakulakana? Ibibiliya inkuvalanga kenga shabaa imo yalota Nnungu pakulota nnume au nkongwe kulakana ni ugoni.—Mateu 19:9.

11. Vana valota nyamani kwaupande wa vatatamunu?

¹¹ Mmatatamunu, inimmaikila mutumile wakati woe mupagwa na vanavenu. Vana valota vapagwe namu mwenu mmatatamunu wakati woe kupunda shinu shoeshoe, vanavo vankunnota mwenu muvapundishe vinu vimwe Yeova.—Kumbukumbu 6:4-9.

12. Vatatamunu ivavaikidile vatende nyamani pakulota vavashunge vanavao?

¹² Shilambo shimwe Shatwani shivenavo vitendo vyakunyata namene, nayadavo vapali vanu vakunyata mitima valota kuvaushanga vanavetu kwaindila ya vitendo vyawendi. Vatatamunu vanji vaonangila dyoni kuvapundisha  vanavavo kwaupande wavinu vyawendi. Kanji vatatamunu indivavaikila vavalaililile vanavavo kwavanu avo vakunyata mitima na vavapundishe mwashi mwakulishungila. Mmatatamunu, inimmaikila muvashunge vanavenu. *—1 Patulu 5:8.

13. Vatatamunu ivavaikidile vavapundishe dashi vanavavo?

¹³ Vatatamunu vankunvanavo madalaka la kuvapundisha vana pakulota vavenavo matendo ambone. Ulota kuvapundisha dashi? Vatatamunu indivavaikila vavadume vana, kanji kuduma ko hakunave kwaukalau. (Yelemiya  30:11) Namomo, haunandume mwana uvenavo shitundi. Paunduma, haunatumile malove makumene lakupwateka kenga ‘lyambila palyenga.’ (Mikong’o 12:18) Vapundishe vanavenu pakulota vamanye mwaa shani vanavo indivavaikila vavaigwilile vatatavao.—Vaepeshu 6:4; Vabalaniya 12:9-11; lola imbande Igwa Shana 30.

14, 15. Mwaa shani vana indivavaikila vavaigwilile vatatamunu?

¹⁴ Yesu ngwengwe ashinamwigwilila Tatake, ata mpaka muwakati wakukamadyanga. (Lukashi 22:42; Nshuwau 8:28, 29) Yeova alota vana vavaigwilile vatatamunu.—Vaepeshu 6:1-3.

¹⁵ Mwenu mmana, ata mukaona kenga inkunkamadyangidya kuvaigwilila vatatavenu, inimmaikila mukumbukile kenga mukavaigwilila munamupa lipuwilo Yeova pamo na vatatavenu. *—Mikong’o 1:8; 6:20; 23:22-25.

16. a) Shatwani atumila indila shani pakulota kuvatadya vanemba vatende vinu vyakunyata? b) Mwaa shani ni shambone kutenda umbodi na vanu vannagwaledya Yeova?

¹⁶ Shatwani ankuulula kuvatumila vambodi vako na vanemba vanji vaulinga wako pakulota kukutadya wako utende vinu Vyakunyata. Nae ankumanya kenga inakukamadyangidya kuvaitila. Kwampano, Dina mwanagwe Yakobo andítenda imbodi na vanu vakashinnagwaledya Yeova. Kwamwaa awo Dina andídanavo matatisho oe namene kwaupande wake na likola lyake. (Kutunduvanga 34:1, 2) Ikava kenga wako unkutenda umbodi na vanu vakánnagwaledya Yeova, vankuulula kukutadya wako kutenda vinu vikave mana, pakulota kwidanavo matatisho kwako, likola lyako pamo na Nnungu. (Mikong’o 17:21, 25) Kwaumwiu  ni shambone namene kutenda umbodi na vanu vannagwaledya Yeova.—1 Vakolintu 15:33.

17. Madalaka shani lavenavo kula munu palikola?

¹⁷ Kula munu palikola akaodedya midimu vyake Nnungu, vanatila matatisho oe namene. Ikava kenga wako undilomba ntanane ndyao na linagwaledyo. Ikava kenga undilombwa mwishimu ntwao na umwigwilile, nayadavo indikuvakila ujedye mpano wa nkogwe wavamwandike mulibuku lya Mikong’o 31:10-31. Ikava kenga wako unkuvanavo vana, vapundishe kunnagwaledya Nnungu. (Mikong’o 22:6) Ikava kenga wako utatamunu, pundisha likola lyako mu “dindila dyambone.” (1 Timoti 3:4, 5; 5:8) Namwenu mmana, vaigwilile vatatavenu. (Vakoloshu 3:20) Kumbukila kenga kula munu palikola ankuulula kukosha, ivedoni indikuvaikila ulishapeye ujugwa shamani pakulota akulivalive makosha ako. Kwaumwiu, Ibibiliya inkuvanavo midimu vyake Yeova vilota kumpwashela kula munu palikola.