1, 2. Иегованың сӧбірелер часкалығ ползыннар тіп хынчатханы нимедең кӧрінче?

ПАСТАҒЫ сӧбірені Худай тӧстеен. Библияда Иегова пастағы ипчіні, Еваны, чайап алып, Адамзар ағыл килген тіп чоохталча. Аны кӧр салып, Адам хысхырыбысхан: «Мына сӧӧгімнең сӧӧк паза ит-ханымнаң ит-хан» (Бытие 2:22, 23). Ол уғаа часкалығ полған. Анзы Иегованың сӧбірелер часкалығ ползыннар тіп хынчатханын кӧзітче.

² Ачырғастығ, че прайлары часкалығ сӧбіреде ӧспееннер. Андағ даа полза, Библиядағы принциптер ирепчілерге, паба-іҷелерге паза палаларға часкалығ сӧбіре пӱдіріп аларға полыс поларлар. Анда оларның полғаны ла сӧбірізіне кирек полчатханын паза ағаа хынчатханнарын пілінерлер (Лука 11:28).

3, 4. а) Ирі ипчізіне хайди хайарға кирек? б) Ирепчілер ноға пыроларын тастазарға тимде поларға киректер?

³ Библияда ирі ипчізіне хынарға паза аны улуғлирға кирек тіп чоохталча. Ефестегілерге 5:25—29-ты хығырып алыңар. Чахсы ир ипчізіне хаҷан даа паарсаснаң хайча. Ол ипчізін арачылапча, хайраллапча паза ағаа хомай ползын тіп пір дее ниме итпинче.

⁴ Пірееде ипчізі ирінің кӧңніне кірбес ниме ит салча. Андағ туста ирі хайди тудынарға кирек? Кӧріңер, ирлерге Библия хайдағ чӧп пирче: «Ирлер, ипчілеріңе хыныңар [«хынарын тохтатпаңар», НТ], оларға хазырланмаңар» (Колосстағыларға 3:19). Ирлер, ундутпаңар, сірер  дее алҷаастар итчезер. Худай сірернің пыроңарны тастазын тіп хынчатсар, ипчіңернің пыроларын ідӧк тастаңар (Матфей 6:12, 14, 15). Удур-тӧдір пыроларын тастазарға тимде ирепчілернің сӧбірелері часкалығ полча.

5. Ноға ирі ипчізін аарлирға кирек?

⁵ Иегова ирі ипчізін аарлазын тіп хынча. Ол аның кирексіністерінеңер сағынарға кирек. Пу уғаа аарлығ сурығ. Ноға? Ирі ипчізіне хомай хайчатса, Иегова аның пазырыстарын испес тее (1 Петрның 3:7). Иегова ирлерні ипчілердең аарлығ тіп санабинча. Ол ағаа хынчатханнарға прайзына хынча.

6. Пір ит-сӧӧк пол парғаны нимедір ол?

⁶ Иисустың сӧстерінің хоостыра, иреннең ипчі хоных хон салзалар, «олар, паза ікі кізі полбин, пір пол парчалар», пасха сӧстернең чоохтаза, олар уғаа чағын пол парчалар (Матфей 19:6). Ирепчілер удур-тӧдір киртістіг поларға киректер (Притчи 5:15—21; Еврейлерге 13:4). Ирепчілер хоных хонғанының сексуальнай кирексіністерін санға аларға киректер, постың на кирексіністерінеңер сағынарға чарабас (1 Коринфтегілерге 7:3—5). Библияда чоохталча: «Хаҷан даа пір дее кізі позының ит-сӧӧгін хырт кӧре чоғыл, че позын, азырап, хайраллидыр». Пу сӧстер ирінің ипчізіне хынғаны ла асхынах полчатханын кӧзітчелер, ол ипчізін паарсаснаң хайраллирға кирек. Ипчі кізі ирі ағаа паарсазын паза хынзын тіп хынча (Ефестегілерге 5:29).

7. Ноға сӧбіренің пазы кирек?

⁷ Сӧбіре ынағ паза пик полар ӱчӱн, ағаа чахсы устағҷы алай сӧбіре пазы кирек. Библияда чоохталча: «Ноо даа ирге пазы Христос полча, ипчізіне — ирі, Христосха, тізең, — Худай» (1 Коринфтегілерге 11:3).

8. Ирін уғаа тың улуғлапчатханын ипчі хайди кӧзіт полар?

 ⁸ Хайдағ даа ир алҷаас итче. Че ипчінің ирі алған пӧгіннернең чарасханы паза ағаа хабасханы прай сӧбірее туза полча (1 Петрның 3:1—6). Библияда чоохталча: «Ипчізі, тізең, ирін [«уғаа тың», НТ] улуғлазын» (Ефестегілерге 5:33). Ирі Худайға киртінминчетсе алай ол пасха религияда полза, ипчі иріне хайди хайарға кирек? Ағаа аны ідӧк уғаа тың улуғлирға кирек. Библия ипчілерге чоохтапча: «Сірер, ипчілер, ідӧк ирлеріңнің сӧзінең сыхпаңар. Андада Худай сӧзін испинчеткен хай пірее ирлер, ипчілерінің чуртастары пастыра ла, артых чоохтаспин, Худайға хозыл парарлар. Сірернің арығ сағыстығ, Худайдаң хорығып чуртапчатханнарыңны [«паза иріңерні уғаа тың улуғлапчатханнарыңны», НТ] кӧрзелер, оларға пір дее ниме чоохтирға кирек чох полар» (1 Петрның 3:1, 2). Ипчізі Библияның принциптерінің хоостыра чуртаза, ирі аның киртінізінеңер кӧп арах піліп аларға хынарына паза аның киртінізін улуғлирына ізеніс пар.

9. а) Пірее киректе ирінең чараспинчатса, ипчі кізі ниме идерге кирек? б) Титке 2:4, 5-те ипчілерге хайдағ чӧп пирілче?

⁹ Ипчізі ирінең пірее киректе чараспинчатса, ағаа  хайди поларға? Иріне позының кӧрізін улуғласнаң чоохтап пирерге чарир. Кӧзідімге, Сарра Авраамға пір сурығдаңар ниме сағынчатханын чоохтап пирген. Че анзы Авраамның кӧңніне кірбеен. Андағ даа полза, Иегова Авраамға Сарраның чооғынҷа тудынарға чоохтаан (Бытие 21:9—12). Христианин полчатхан ирлер кӧбізін Библиядаң тоғыр парбинчатхан пӧгіннер алчалар, аннаңар ипчілер ирлерінің пӧгіннерінҷе тудынарға киректер (Илҷілернің 5:29; Ефестегілерге 5:24). Чахсы ипчі паза іҷе позының сӧбірезінеңер сағынча. (Титке 2:4, 5 хығырыбызыңар.) Ирі паза палалары аның анҷа кӧп итчеткенін кӧрзелер, ағаа уламох тың хынарлар паза аны улуғлирлар (Притчи 31:10, 28).

10. Чара чуртастаңар алай чарылыстаңар Библия ниме чоохтапча?

¹⁰ Пірееде ирепчілер чарылызарға алай оонаң чуртирға маңзырапчалар. Че Библияда «ипчізіне ирінең чарылыспасха» паза «иріне дее ипчізінең чарылыспасха» чоохталча (1 Коринфтегілерге 7:10, 11). Пірееде хайдағ-да киректернің ӱчӱн ирепчілер чара чуртирға пӧгін алчалар, че андағ пӧгін алар алнында, уғаа чахсы сағынып аларға кирек. Чарылыстаңар Библия ниме чоохтапча? Чарылызарға пір ле сылтағ пар — ол пасха кізінең оралысханы (Матфей 19:9).

11. Палаларға ниме иң кирек?

¹¹ Паба-іҷелер, палаларыңнаң хада кӧп арах тус иртір турыңар. Сірер палаларыңа кирексер. Оларға Иеговадаңар чоохтаңар. Анзынаң артых сірер оларға пір дее ниме ит полбассар (Второзаконие 6:4—9).

12. Палаларын арачылир ӱчӱн, паба-іҷелер ниме идерге киректер?

¹² Сайтанның чир-чалбағы чабалдаң чабал ла полып одырча. Ачырғастығ, че сірернің палаларыңа хомай ит  саларға, кӱл тее саларға хынчатхан кізілер пар. Андағ киректердеңер пірее паба-іҷелер палаларынаң чоохтазарға уйатчалар. Че олар палаларын андағ хорғыстардаңар сизіндірерге паза андағ кізілернең хайди тудынарға ӱгредерге киректер. Паба-іҷелер, сірер палаларыңны арачылирға кирексер * (1 Петрның 5:8).

13. Палаларны ӱгретчетселер, паба-іҷелер нимедеңер ундутпасха киректер?

¹³ Паба-іҷелер палаларын орта тудынарға ӱгредерге киректер. Хайди анзын идерге? Палаларны сыбыра  ӱгредерге кирек, че олох туста паба-іҷелерге хатығ паза хазыр тудынарға чарабас (Иеремия 30:11). Хылыхтанчатсар, паланың саба тудынызын ӱзӱрбеңер. Хылыхтанып чоохтанчатхан сӧстерің палаа хылыс чіли теңер (Притчи 12:18). Палаларға ноға олар чооғыңарны истерге кирек полчатханын піліп аларға полыс пиріңер (Ефестегілерге 6:4; Еврейлерге 12:9—11; 30 приложениені кӧріңер).

14, 15. Ноға палаларға паба-іҷелерінің чооғын истерге кирек?

¹⁴ Иисус Пабазының чооғын хаҷан даа, оой полбаза даа, исчең (Лука 22:42; Иоанн 8:28, 29). Иегова палалар паба-іҷелерінің чооғын иссіннер тіп хынча (Ефестегілерге 6:1—3).

¹⁵ Палалар, сірерге паба-іҷелеріңнің чооғын истерге аар пілдірчетсе, піліңер, оларның чооғын исчетсер, олар даа ӧрінчелер, Иегова даа ӧрінче * (Притчи 1:8; 6:20; 23:22—25).

16. а) Хайди Сайтан чииттерні саба тудынарға кӧӧктірче? б) Ноға Иеговаа хынчатханнарнаң нанҷылазарға кирек?

¹⁶ Диавол сірерні нанҷыларыңнаң алай таныстарыңнаң пастыра саба киректер идерге кӧӧктірерге айабас. Нанҷыларның кӧңніне тоғыр турарға хайди сидік полчатханын Сайтан чахсы пілче нооза. Иаковтың хызын Динаны сағысха кир кӧріңер. Ол Иеговаа хынминчатхан кізілернең нанҷыласхан. Анзы ағаа даа, аның сӧбірезіне дее кӧп чобағ ағылған (Бытие 34:1, 2). Сірернің нанҷыларың Иеговаа хынминчатсалар, олар сірерні Иегова хырт кӧрчеткен киректерні идерге кӧӧктірерлер дее. Анзы сірерге паза сӧбіреңерге кӧп чобағ ағылар паза Худайның  чӱреен ағыртар (Притчи 17:21, 25). Аннаңар Иеговаа хынчатханнарнаң нанҷыласханы уғаа аарлығ (1 Коринфтегілерге 15:33).

17. Худай сӧбіредегілердең, полғанынаң на, ниме сағыпча?

¹⁷ Сӧбіреде полған на кізінің Худайның кӧңнінҷе тудынғаны сӧбірені кӧп сидіктердең арачылир. Ирлер, ипчілеріңе хыныңар паза оларға хаҷан даа паарсаснаң хайыңар. Ипчілер, ирлеріңні улуғлаңар паза оларның чооғынҷа тудыныңар. Притчи 31:10—31-де чоохталчатхан ипчее тӧӧй поларға кӱстеніңер. Паба-іҷелер, палаларыңны Худайға хынарға ӱгредіңер (Притчи 22:6). Пабалар, ибдегілернең чахсы устирға кӱстеніңер (1 Тимофейге 3:4, 5; 5:8). Палалар, паба-іҷелеріңнің чооғын истіңер (Колосстағыларға 3:20). Ундутпаңар, сӧбіреде полған на кізі алҷаас итче. Аннаңар пазымнығ тудынып, пыроңарны тастирға сурыныңар. Пу пастағдаң кӧрінче: Библияда сӧбіредегі полған на кізее уғаа хыйға чӧптер пар.