1, 2. Ihi ia mesena Nzambi ku miji?

JIHOVA NZAMBI, muéne ua kazalesa o dikaza dia dianga mu ixi. O Bibidia i tu tangela kuila muéne ua bhange o muhatu ua dianga iu ua mu “bheka ku diiala.” Adá ua sangulukile kiavulu, muéne uambe: “Kiki kifuba kia tundu mu ifuba iami, xitu ia tundu mu xitu iami.” (Dimatekenu 2:22, 23) Kiki kilombolola kuila, Jihova ua mesena kuila makaza moso a zediua.

² Maji athu avulu kene ni muiji ua zediua. Mu Bibidia muala itumu iavulu i kuatekesa athu oso ku muiji, kukala ni muiji ua zediua ni kukala ni ukamba uambote mudiâ.—Luka 11:28.

3, 4. (a) Kiebhi o diiala kia tokala ku talatala o muhatu’ê? (b) Mukonda diahi o diiala ni muhatu a tokala a kala ni ukexilu ua ku diloloka?

³ O Bibidia i zuela kuila o diiala diambote, ua tokala kuzola ni kuxila muhatu’ê. Tua ku dióndo tanga Efezo 5:25-29. Ithangana ioso, o diiala ua tokala kutalatala o muhatu’ê ni henda. Muéne ué u mu langa, u mu tambula konda, ka bhange kima ki mu luualesa.

⁴ Maji ihi ia tokala kubhanga o diiala se muhatu’ê ua zange? O maiala a a tendelesa kiki: “Zolenu ahatu enu, kana ku a thathamena jinga.” (Kolose 3:19) Enu mu maiala, ijiienu-kiu kuma enu uenu mu akua ituxi. Se mua-ndala kuila Nzambi u mi loloka, enu uenu mua  tokala mu loloka ahatu’enu. (Matesu 6:12, 14, 15) O diiala ni muhatu se a kala ni ukexilu ua kudiloloka ni muxima uoso, ene a-nda kala ni muiji ua zediua.

5. Mukonda diahi o diiala ua tokala kubhana kijingu ku muhatu’ê?

⁵ Jihova ua mesena kuila o diiala u bhana kijingu ku muhatu’ê. O diiala ua tokala kuxinganeka kiambote o ibhindamu ia muhatu’ê. Iá maka a dikota-zé! O diiala se u kamba kutalatala kiambote muhatu’ê, Jihova ka-nda kuívua o misambu iê. (1 Phetele 3:7) Jihova u zola athu oso, maiala ni ahatu, kabasa athu iá a mu zola. Muéne kene mu zangeleka o maiala, o ahatu ndenge, kana.

6. Ihi ilombolola o diiala ni muhatu kukituka “xitu imoxi?”

⁶ Jezú ua jimbulula kuila o diiala ni muhatu “kala dingi kiiadi, maji xitu imoxi kiá.” (Matesu 19:6) Ene a tokala a kala jifiiele mudiâ. (Jisabhu 5:15-21; Jihebeleu 13:4) Kiiadi kiâ kana muthu u di tuna mukuá. (1 Kolindo 7:3-5) O diiala ua tokala kulembalala kuila, sé-ku diiala ‘ua zembe o mukutu ué-muène. Maji u u dikila, u u tambula konda.’ Kienhiki, muéne ua tokala kuzola ni kutambula konda ia muhatu’ê. O muhatu u mesena kuila muadi uê, u kala muthu uambote ni mukua henda.—Efezo 5:29.

7. Mukonda diahi ku muiji kua tokala ku kala muthu ku pholo?

⁷ Miji ioso ia bhingi muthu u kala ku pholo phala kuendesa kiambote o muiji. O divulu dia 1 Kolindo 11:3, di zuela: “O diiala dioso, ua mu kala ku pholo Kristu; o muhatu ua mu kala ku pholo o diiala: o Kristu, ua mu kala ku pholo Nzambi.”

8. Kiebhi o muhatu kia tena kulondekesa kuila u xila kiavulu muadi uê?

 ⁸ Maiala oso akua ituxi. Maji o muhatu se u xikina o ibanzelu ia muadi uê ni ku mu belesela ni muxima uoso, o muiji uoso u zediua. (1 Phetele 3:1-6) O Bibidia i zuela: “O muhatu ué a xile munumi’ê.” (Efezo 5:33) Maji ihi ia tokala kubhanga o muhatu se muadi uê, ka tokala-nê ngeleja imoxi? Hanji kiki, muéne ua tokala ku mu xila kiavulu. O Bibidia i zuela: “Enu ahatu beleselenu anume enu, phala né-mbe bhu kala ni iá a kamba kutumaka o maka ma Nzambi, ki bhekela ku a nganhala mu uendelu ua mbote ua ahatu â. Ene ki kua-ndù bhinga ngó ku a zuelela kima, kioso kia mi mona o uendelu uenu ua ujitu ni uoma.” (1 Phetele 3:1, 2) O muhatu uambote, uala ni uendelu ua ujitu, u tena kukuatekesa muadi uê kuxila o ngeleja iê.

9. (a) Ihi ia tokala kubhanga o muhatu, se o ibanzelu iê ki iene imoxi ni ia muadi uê? (b) Milongi iebhi ia tokala o ahatu i tu sanga mu divulu dia Titu 2:4, 5?

⁹ Ihi ia tokala kubhanga o muhatu, se o ibanzelu iê  ki iene imoxi ni ia muadi uê? Muéne ua tokala kuzuela ni ujitu uoso ia mu kala ku muxima. Mu kifika, Sala uambele kima, Mbalahamu ka ki uabhele, maji Jihova ua tangela Mbalahamu: “Ioso ia kuambela Sala xikana-iu.” (Dimatekenu 21:9-12) O diiala ka-nda banza kubhanga kima kiejiia kuila kituxi bhu pholo ia Nzambi, mu kiki-phe o muhatu ua tokala kuxikina ia banze muadi uê. (Ikalakalu 5:29; Efezo 5:24) O muhatu uambote u tambula konda ia dibhata diê. (Tanga Tito 2:4, 5.) Kioso muadi uê ni tuana tuê kia-nda mona ioso ia mu bhanga muéne phala o mbote ia muiji, ene a-nda mu zola dingi ni ku mu xila kiavulu.—Jisabhu 31:10, 28.

10. Ihi i zuela o Bibidia ia lungu ni kudisenga ni kudixisa?

¹⁰ Saí makaza a banza ku disenga mba kudixisa mu kama kofele. Maji o Bibidia i zuela kuila ‘o muhatu ua kazala, ka diehe ni muadi uê’ o ‘diiala ué kiene, ka diehe ni muhatu’ê.’ (1 Kolindo 7:10, 11) Maji kuene ima ia bhonzo i bhangesa o makaza ku di senga, maji iá maka a dikota. Maji ihi i tuamba ia lungu ni makaza kudixisa? O Bibidia ilondekesa kuila o makaza a tokala kudixisa ngó, se o diiala mba muhatu u ta phánda.—Matesu 19:9.

11. Kikuatekesu kiahi kia beta-o-kota kia, bhindamena o tuana?

¹¹ Jitata, sotenu kithangana phala kukala ni an’enu izuua ioso. An’enu a bhingi o kikuatekesu kienu, maji o kikuatekesu kia beta-o-kota, o kua longa o kidi kia lungu ni Jihova.—Matendelelu 6:4-9.

12. Ihi ia tokala ku bhanga o jitata phala ku langa o tuana tua?

¹² O kuiibha ku mundu ua Satanaji, kua mu dibandekesa  kala kizuua, saí athu a mesena kubhanga ima ia iibha ni tuana tuetu, katé muene ni ku mesena ku a ta jiphánda. Saí jitata, ki a bhonza kuzuela ni tuana tuâ o maka a lungu ni uiala mba o ujitu ua ahatu. Maji o jitata a tokala ku langa o tuana tua ku athu ia, ni ku a longa kiebhi kia tokala kudilanga mu diâ. Jitata, mua tokala ku langa o tuana tuenu. *—1 Phetele 5:8.

13. Kiebhi o jitata kia tokala ku longa o tuana tuâ?

¹³ O jitata ala ni kikalakalu kia ku longa o tuana tuâ,  kiebhi kia tokala o kuenda. Kiebhi ki ua tokala ku longa o tuana tuê? O tuana tuê a bhingi ku a longa, maji ka tokala ku a longa ni njinda mba ku a bazela kia iibha. (Jelemia 30:11) Kana ku bazela mon’ê se eie ua luuala. O izuelu iê, ki i tokala ku kala “kála jiphondo ja xibhata” phala ene. (Jisabhu 12:18) Longa o tuana tuê kuijia se mukonda diahi a tokala ku belesela.—Efeso 6:4; Jehebeleu 12:9-11; Tanga o Kibandekesu kia 30.

14, 15. Mukonda diahi o tuana tua tokala ku belesela o jitata?

¹⁴ Jezú ua belesele Tat’ê ithangana ioso, né muene mu ithangana ia bhonzele. (Luka 22:42; Nzuá 8:28, 29) Jihova ua mesena ué kuila, o tuana tu belesela o jitata jâ.—Efeso 6:1-3.

¹⁵ Tuana, se mu mona kuila kua mu bhonza ku belesela o jitata jenu, lembalalenu kuila se mu belesela, mua-nda sangulukisa Jihova ni Jitata jenu. *—Jisabhu 1:8; 6:20; 23:22-25.

16. (a) Kiebhi Satanaji kia bhangesa o minzangala ku ta kituxi? (b) Mukonda diahi kima kiambote kusota ngó makamba a zolo Jihova?

¹⁶ O Diabhu u tena ku funhisa o makamba mê ni minzangala ia mukuá, ku ku bhangesa ku ta kituxi. Muéne uejiia kuila, se o kijijidiku kijila ku minzangala ni akuenu, ki kua-nda bhonza ku mi kuata. Mu kifika, o mona a Jakobo Dinah, ua kexile ni makamba kexile abhezi a Jihova. Kiki kia mu bhekela ibhidi iavulu, kia bhekela ué ibhidi ku muiji ué. (Dimatekenu 34:1, 2) Se makamba mê ka zolo Jihova, a tena ku ku funhisa kubhanga kima kia iibhila Jihova, ki ku bhekela itateku  ku muenhu ué, ku muiji, ni kua Nzambi. (Jisabhu 17:21, 25) Mukonda dia kiki, kima kiambote kusota ngó makamba a zolo Jihova.—1 Kolindo 15:33.

17. Ihi ia tokala o kubhanga kala muthu ku muiji?

¹⁷ Se athu oso ku muiji a belesela o itumu ia Nzambi, o muiji uoso ki ua-nda bhita ni ibhidi iavulu. Kienhiki, eie u diiala, talatala kiambote muhatu’ê, mu londekese henda. Eie u muhatu, xila munumi’ê ni ku mu belesela, kaiela o phangu ia muhatu a mu tumbula mu divulu dia Jisabhu 31:10-31. Eie u tata, longa o tuana tuê kuzola Nzambi. (Jisabhu 22:6) “Tumina kiambote o dibhata” diê. (1 Timote 3:4, 5; 5:8) Ana, belesele-nu jitata jenu. (Kolose 3:20) Ijienu-kiu kuila, oso ku muiji akua ituxi, mukonda dia kiki, londekese-nu o kulenduka, mu kubhinga muloloki. O Bibidia iala ni itendelesu phala athu oso ku muiji.