ບົດທີ 14
ຄອບຄົວຂອງເຈົ້າຈະມີຄວາມສຸກໄດ້ແນວໃດ?
1, 2. ພະເຢໂຫວາຢາກໃຫ້ທຸກຄອບຄົວເປັນແນວໃດ?
ພະເຢໂຫວາພະເຈົ້າຈັດໃຫ້ມີການແຕ່ງດອງເທື່ອທຳອິດ. ຄຳພີໄບເບິນບອກວ່າພະອົງສ້າງຜູ້ຍິງຄົນທຳອິດແລ້ວກໍ “ຍົກໃຫ້ຜູ້ຊາຍ.” ຕອນນັ້ນອາດາມມີຄວາມສຸກຫຼາຍ ລາວເວົ້າວ່າ: “ກະດູກ [ຂອງລາວ] ມາແຕ່ກະດູກຂອງເຮົາແລະເນື້ອໜັງ [ຂອງລາວ] ມາແຕ່ເນື້ອໜັງຂອງເຮົາ.” (ຕົ້ນເດີມ 2:22, 23) ເລື່ອງນີ້ບອກເຮົາໃຫ້ຮູ້ວ່າພະເຢໂຫວາຢາກໃຫ້ຄົນທີ່ແຕ່ງດອງແລ້ວມີຄອບຄົວທີ່ມີຄວາມສຸກ.
2 ໜ້າເສົ້າທີ່ຫຼາຍຄອບຄົວພັດບໍ່ມີຄວາມສຸກ. ແຕ່ຄຳພີໄບເບິນມີຄຳແນະນຳຫຼາຍຢ່າງທີ່ຊ່ວຍທຸກຄົນໃນຄອບຄົວໃຫ້ຮູ້ວິທີທີ່ຈະເຮັດໃຫ້ຄອບຄົວມີຄວາມສຸກຫຼາຍຂຶ້ນ. (ລູກາ 11:28) ນອກຈາກນັ້ນ ຄຳພີໄບເບິນຍັງສອນເຮົາກ່ຽວກັບຄຸນລັກສະນະທີ່ດີຂອງພະເຢໂຫວາແລະພະເຢຊູ ຖ້າທຸກຄົນໃນຄອບຄົວຮຽນແບບພວກເພິ່ນ ພວກເຂົາກໍຈະຢູ່ນຳກັນຢ່າງມີຄວາມສຸກ.—ເອເຟໂຊ 5:1, 2
ພະເຈົ້າຢາກໃຫ້ຜົວເຮັດຫຍັງ?
3, 4. (ກ) ຜົວຄວນປະຕິບັດຕໍ່ເມຍແນວໃດ? (ຂ) ເປັນຫຍັງການໃຫ້ອະໄພກັນຈຶ່ງສຳຄັນ?
3 ຄຳພີໄບເບິນບອກວ່າຜົວທີ່ດີຄວນໃຫ້ກຽດແລະປະຕິບັດຕໍ່ເມຍດ້ວຍຄວາມຮັກ. (ອ່ານເອເຟໂຊ 5:25-29) ຄົນທີ່ເປັນຜົວຈະຮັກແລະເອົາໃຈໃສ່ເບິ່ງແຍງເມຍຢູ່ສະເໝີ. ລາວຈະປົກປ້ອງເມຍ ແລະບໍ່ທຳຮ້າຍເມຍທັງທາງຄຳເວົ້າແລະການກະທຳ.
4 ແຕ່ຖ້າເມຍເຮັດຜິດພາດ ຜົວຄວນເຮັດແນວໃດ? ພະເຈົ້າບອກຜົວວ່າ: “ໃຫ້ຮັກເມຍສະເໝີແລະຢ່າຮຸນແຮງໃສ່ເມຍ.” (ໂກໂລຊາຍ 3:19) ຜູ້ເປັນຜົວຄວນຈື່ໄວ້ວ່າເຈົ້າເອງກໍເຮັດຜິດພາດຄືກັນ ແລະຖ້າເຈົ້າຢາກໃຫ້ພະເຈົ້າໃຫ້ອະໄພ ເຈົ້າກໍຕ້ອງໃຫ້ອະໄພເມຍ. (ມັດທາຍ 6:12, 14, 15) ຖ້າທັງຜົວແລະເມຍເຕັມໃຈໃຫ້ອະໄພກັນ ຊີວິດຄູ່ຂອງພວກເຂົາກໍຈະມີຄວາມສຸກ.
5. ເປັນຫຍັງຜົວຄວນໃຫ້ກຽດເມຍ?
5 ພະເຢໂຫວາຢາກໃຫ້ຜົວໃຫ້ກຽດເມຍ. ຜົວຄວນສົນໃຈຄວາມຕ້ອງການທາງດ້ານຮ່າງກາຍແລະດ້ານອາລົມຂອງເມຍ. ເລື່ອງນີ້ສຳຄັນຫຼາຍ ເພາະຖ້າຜົວບໍ່ເຮັດແບບນັ້ນ ພະເຢໂຫວາຈະບໍ່ຟັງຄຳອະທິດຖານຂອງລາວ. (1 ເປໂຕ 3:7) ພະເຢໂຫວາບໍ່ເຄີຍຖືວ່າຜູ້ຍິງມີຄ່າໜ້ອຍກວ່າຜູ້ຊາຍ ເພາະຄົນທີ່ມີຄ່າໃນສາຍຕາພະເຢໂຫວາແມ່ນຄົນທີ່ຮັກພະອົງ.
6. ຜົວແລະເມຍຈະສະແດງໃຫ້ເຫັນແນວໃດວ່າພວກເຂົາເປັນ “ກາຍອັນດຽວກັນ”?
6 ພະເຢຊູອະທິບາຍວ່າຜົວແລະເມຍ “ບໍ່ເປັນສອງອີກຕໍ່ໄປ ແຕ່ເປັນກາຍອັນດຽວກັນ.” (ມັດທາຍ 19:6) ຜົວເມຍຕ້ອງສັດຊື່ຕໍ່ກັນແລະບໍ່ນອກໃຈກັນ. (ສຸພາສິດ 5:15-21; ເຮັບເຣີ 13:4) ທັງສອງຄວນຄິດເຖິງຄວາມຕ້ອງການທາງເພດຂອງກັນແລະກັນແບບບໍ່ເຫັນແກ່ຕົວ. (1 ໂກຣິນໂທ 7:3-5) ນອກຈາກນັ້ນ ຜົວຄວນຈື່ໄວ້ວ່າ “ບໍ່ມີຜູ້ຊາຍຄົນໃດຊັງຮ່າງກາຍຕົວເອງ ແຕ່ຈະບຳລຸງລ້ຽງແລະທະນຸຖະໜອມ.” ດັ່ງນັ້ນ ຜົວຄວນຮັກແລະທະນຸຖະໜອມເມຍ. ສິ່ງທີ່ເມຍຕ້ອງການທີ່ສຸດແມ່ນຢາກໃຫ້ຜົວຮັກແລະອ່ອນໂຍນຕໍ່ລາວສະເໝີ.—ເອເຟໂຊ 5:29
ພະເຈົ້າຢາກໃຫ້ເມຍເຮັດຫຍັງ?
7. ເປັນຫຍັງທຸກຄອບຄົວຕ້ອງມີຜູ້ນຳ?
7 ທຸກຄອບຄົວຕ້ອງມີຜູ້ນຳ ຜູ້ນຳຄອບຄົວຈະເປັນຄົນທີ່ເບິ່ງແຍງຄົນໃນຄອບຄົວໃຫ້ຢູ່ນຳກັນຢ່າງມີຄວາມສຸກ. ໃນ 1 ໂກຣິນໂທ 11:3 ບອກວ່າ: “ພະຄລິດເປັນຜູ້ນຳຂອງຜູ້ຊາຍທຸກຄົນ ຜູ້ຊາຍເປັນຜູ້ນຳຂອງຜູ້ຍິງ ແລະພະເຈົ້າເປັນຜູ້ນຳຂອງພະຄລິດ.”
8. ເມຍຈະສະແດງຄວາມນັບຖືຕໍ່ຜົວໄດ້ແນວໃດ?
8 ຜົວບໍ່ແມ່ນຄົນທີ່ສົມບູນພ້ອມແລະເຮັດຜິດພາດໄດ້. ແຕ່ຖ້າເມຍເຕັມໃຈຮ່ວມມືແລະສະໜັບສະໜູນການຕັດສິນໃຈຂອງຜົວ ຄອບຄົວກໍຈະມີຄວາມສຸກ. (1 ເປໂຕ 3:1-6) ຄຳພີໄບເບິນບອກວ່າ: “ເມຍກໍຄວນນັບຖືຜົວຈາກໃຈ.” (ເອເຟໂຊ 5:33) ແຕ່ຖ້າຜົວບໍ່ໄດ້ນັບຖືສາສະໜາດຽວກັບເມຍເດ ເມຍຈະເຮັດແນວໃດ? ລາວກໍຍັງຕ້ອງນັບຖືຜົວຈາກໃຈ ເພາະຄຳພີໄບເບິນບອກວ່າ: “ໃຫ້ພວກເຈົ້າທີ່ເປັນເມຍຍອມເຊື່ອຟັງຜົວ ເພື່ອວ່າຖ້າຜົວບໍ່ເຊື່ອຖ້ອຍຄຳຂອງພະເຈົ້າ ຄວາມປະພຶດຂອງເຈົ້າກໍອາດຊະນະໃຈລາວໄດ້ໂດຍບໍ່ຕ້ອງໃຊ້ຄຳເວົ້າ ເພາະລາວໄດ້ເຫັນການປະພຶດທີ່ດີແລະຄວາມນັບຖືຈາກໃຈຂອງເຈົ້າ.” (1 ເປໂຕ 3:1, 2) ຕົວຢ່າງທີ່ດີຂອງເມຍອາດເຮັດໃຫ້ຜົວເຂົ້າໃຈແລະຍອມຮັບຄວາມເຊື່ອທາງສາສະໜາຂອງເມຍ.
9. (ກ) ເມຍຈະເຮັດແນວໃດຖ້າບໍ່ເຫັນດີນຳຜົວ? (ຂ) ໃນຕີໂຕ 2:4, 5 ແນະນຳຄົນທີ່ເປັນເມຍແນວໃດ?
9 ເມຍຈະເຮັດແນວໃດຖ້າບໍ່ເຫັນດີນຳຜົວ? ລາວຄວນບອກຜົວດ້ວຍຄວາມນັບຖືວ່າລາວຄິດແນວໃດໃນເລື່ອງນັ້ນ. ໃນຄຳພີໄບເບິນມີຕົວຢ່າງຂອງຊາຣາທີ່ເວົ້າບາງຢ່າງກັບອັບຣາຮາມຜົວຂອງລາວ ເຖິງວ່າອັບຣາຮາມບໍ່ເຫັນດີນຳ ແຕ່ພະເຢໂຫວາກໍບອກລາວວ່າ: “ໃຫ້ເຮັດຕາມທີ່ຊາຣາບອກ.” (ຕົ້ນເດີມ 21:9-12, ລ.ມ.) ແຕ່ຖ້າຜົວຕັດສິນໃຈໄປແລ້ວເດ? ຖ້າເລື່ອງນັ້ນບໍ່ໄດ້ຂັດກັບຫຼັກການໃນຄຳພີໄບເບິນ ເມຍກໍຄວນສະໜັບສະໜູນການຕັດສິນໃຈຂອງຜົວ. (ກິດຈະການ 5:29; ເອເຟໂຊ 5:24) ນອກຈາກນັ້ນ ເມຍທີ່ດີຈະເບິ່ງແຍງເຮືອນຊານແລະເອົາໃຈໃສ່ຄອບຄົວ. (ອ່ານຕີໂຕ 2:4, 5) ເມື່ອຜົວກັບລູກເຫັນວ່າລາວພະຍາຍາມເຮັດຫຼາຍຢ່າງເພື່ອພວກເຂົາ ພວກເຂົາກໍຈະຮັກແລະນັບຖືລາວຫຼາຍຂຶ້ນ.—ສຸພາສິດ 31:10, 28
ຊາຣາເປັນຕົວຢ່າງທີ່ດີແນວໃດສຳລັບຄົນທີ່ເປັນເມຍ?
10. ຄຳພີໄບເບິນບອກແນວໃດເລື່ອງການແຍກກັນຢູ່ແລະການຢ່າຮ້າງ?
10 ບາງຄູ່ຕັດສິນໃຈໄວໂພດທີ່ຈະຢ່າຮ້າງຫຼືແຍກກັນຢູ່. ແຕ່ຄຳພີໄບເບິນບອກວ່າ “ເມຍບໍ່ຄວນໄປຈາກຜົວ” ແລະ “ຜົວກໍບໍ່ຄວນຖິ້ມເມຍ” ດັ່ງນັ້ນ ຜົວກັບເມຍບໍ່ຄວນແຍກກັນຢູ່. (1 ໂກຣິນໂທ 7:10, 11) ເຖິງວ່າມີສະຖານະການບາງຢ່າງທີ່ຜົວແລະເມຍອາດແຍກກັນຢູ່ໄດ້ ແຕ່ນີ້ເປັນເລື່ອງທີ່ຕ້ອງຄິດໃຫ້ຮອບຄອບກ່ອນຕັດສິນໃຈ. ແລ້ວເລື່ອງການຢ່າຮ້າງເດ ຄຳພີໄບເບິນບອກແນວໃດ? ຄຳພີໄບເບິນບອກວ່າສາເຫດດຽວທີ່ຈະຢ່າຮ້າງໄດ້ກໍຄື ເມື່ອຝ່າຍໃດຝ່າຍໜຶ່ງມີຊູ້ເທົ່ານັ້ນ.—ມັດທາຍ 19:9
ພະເຈົ້າຢາກໃຫ້ພໍ່ແມ່ເຮັດຫຍັງ?
ພະເຢຊູເປັນຕົວຢ່າງທີ່ດີໃຫ້ກັບທຸກຄົນໃນຄອບຄົວ
11. ລູກຕ້ອງການຫຍັງຈາກພໍ່ແມ່ຫຼາຍທີ່ສຸດ?
11 ພໍ່ແມ່ຕ້ອງໃຫ້ເວລາກັບລູກຫຼາຍທີ່ສຸດເທົ່າທີ່ຈະເຮັດໄດ້. ລູກຕ້ອງການເຈົ້າ ແລະສິ່ງທີ່ສຳຄັນສຳລັບລູກກໍແມ່ນເຈົ້າຕ້ອງສອນພວກເຂົາໃຫ້ຮູ້ເລື່ອງພະເຢໂຫວາ.—ພະບັນຍັດ 6:4-9
12. ພໍ່ແມ່ຕ້ອງເຮັດຫຍັງເພື່ອປົກປ້ອງລູກ?
12 ໂລກຂອງຊາຕານແຮ່ງນັບມື້ນັບຊົ່ວຮ້າຍຫຼາຍຂຶ້ນເລື້ອຍໆ ອາດມີບາງຄົນທີ່ຢາກທຳຮ້າຍລູກຂອງເຈົ້າ ຫຼືຈອບຈະທຳຮ້າຍທາງເພດດ້ວຍຊ້ຳ. ພໍ່ແມ່ບາງຄົນຮູ້ສຶກວ່າຍາກທີ່ຈະລົມເລື່ອງແບບນີ້ກັບລູກ. ແຕ່ພໍ່ແມ່ຕ້ອງເຕືອນແລະສອນລູກໃຫ້ຮູ້ວິທີປ້ອງກັນຕົວເອງຈາກຄົນພວກນັ້ນ. ເຈົ້າທີ່ເປັນພໍ່ແມ່ຕ້ອງປົກປ້ອງລູກຂອງເຈົ້າ. *—1 ເປໂຕ 5:8
13. ພໍ່ແມ່ຄວນສອນລູກແນວໃດ?
13 ພໍ່ແມ່ມີໜ້າທີ່ສອນລູກໃຫ້ເປັນຄົນດີ. ແລ້ວເຈົ້າຈະສອນລູກແນວໃດ? ເຈົ້າຕ້ອງອົບຮົມສັ່ງສອນພວກເຂົາ ແຕ່ບໍ່ຄວນດ່າຫຼືເຮັດຮຸນແຮງຕໍ່ລູກ. (ເຢເຣມີ 30:11) ບໍ່ຄວນເຮັດຕອນທີ່ເຈົ້າກຳລັງໃຈຮ້າຍ. ເຈົ້າຄືຊິບໍ່ຢາກເວົ້າຫຍັງທີ່ເຮັດໃຫ້ລູກເຈັບປວດໂດຍການໃຊ້ຄຳທີ່ “ແທງຄືດາບ.” (ສຸພາສິດ 12:18) ເຈົ້າຄວນສອນລູກໃຫ້ເຂົ້າໃຈວ່າເປັນຫຍັງລາວຕ້ອງເຊື່ອຟັງ.—ເອເຟໂຊ 6:4; ເຮັບເຣີ 12:9-11; ເບິ່ງຄຳອະທິບາຍເພີ່ມເຕີມ 30
ພະເຈົ້າຢາກໃຫ້ລູກເຮັດຫຍັງ?
14, 15. ເປັນຫຍັງລູກຄວນເຊື່ອຟັງພໍ່ແມ່?
14 ພະເຢຊູເຊື່ອຟັງພະເຢໂຫວາພໍ່ຂອງເພິ່ນສະເໝີແມ່ນແຕ່ໃນເລື່ອງທີ່ຍາກ. (ລູກາ 22:42; ໂຢຮັນ 8:28, 29) ພະເຢໂຫວາກໍຢາກໃຫ້ລູກເຊື່ອຟັງພໍ່ແມ່ຄືກັນ.—ເອເຟໂຊ 6:1-3
15 ເຖິງວ່າບາງຄັ້ງເຈົ້າທີ່ເປັນລູກຮູ້ສຶກວ່າການເຊື່ອຟັງພໍ່ແມ່ເປັນເລື່ອງທີ່ຍາກ ແຕ່ຂໍໃຫ້ຈື່ໄວ້ວ່າຖ້າເຈົ້າເຊື່ອຟັງ ເຈົ້າກໍຈະເຮັດໃຫ້ພະເຢໂຫວາແລະພໍ່ແມ່ມີຄວາມສຸກ. *—ສຸພາສິດ 1:8; 6:20; 23:22-25
ສິ່ງໃດຈະຊ່ວຍເດັກນ້ອຍແລະໄວລຸ້ນໃຫ້ສັດຊື່ຕໍ່ພະເຈົ້າເມື່ອຖືກຊວນໃຫ້ເຮັດຜິດ?
16. (ກ) ຊາຕານເຮັດແນວໃດເພື່ອໃຫ້ເຮົາເຮັດສິ່ງທີ່ຜິດ? (ຂ) ເປັນຫຍັງຕ້ອງເລືອກເປັນໝູ່ກັບຄົນທີ່ຮັກພະເຢໂຫວາ?
16 ຊາຕານອາດໃຊ້ໝູ່ຫຼືຜູ້ໃດກໍໄດ້ຊວນເຈົ້າໃຫ້ເຮັດສິ່ງທີ່ຜິດ ເພາະມັນຮູ້ວ່າຖ້າຖືກກົດດັນຫຼາຍໆເຈົ້າກໍຈະຍອມແພ້ໄດ້ງ່າຍ. ຕົວຢ່າງເຊັ່ນ: ດີນາລູກສາວຂອງຢາໂຄບເລືອກເປັນໝູ່ກັບຄົນທີ່ບໍ່ໄດ້ຮັກພະເຢໂຫວາເຊິ່ງເຮັດໃຫ້ລາວແລະຄອບຄົວຕ້ອງເຈິບັນຫາຫຼາຍຢ່າງ. (ຕົ້ນເດີມ 34:1, 2) ຖ້າເຈົ້າມີໝູ່ທີ່ບໍ່ຮັກພະເຢໂຫວາ ພວກເຂົາກໍອາດຊວນເຈົ້າໃຫ້ເຮັດສິ່ງທີ່ພະອົງກຽດຊັງ ເຊິ່ງເຮັດໃຫ້ທັງເຈົ້າ ຄອບຄົວ ແລະພະເຈົ້າຕ້ອງເຈັບປວດ. (ສຸພາສິດ 17:21, 25) ດັ່ງນັ້ນ ການເລືອກໝູ່ຈຶ່ງເປັນເລື່ອງທີ່ສຳຄັນຫຼາຍ ເຈົ້າຄວນເລືອກໝູ່ທີ່ຮັກພະເຢໂຫວາຄືກັບເຈົ້າ.—1 ໂກຣິນໂທ 15:33
ຄອບຄົວຂອງເຈົ້າຈະມີຄວາມສຸກໄດ້ແນວໃດ?
17. ແຕ່ລະຄົນໃນຄອບຄົວຕ້ອງເຮັດຫຍັງ?
17 ເມື່ອທຸກຄົນໃນຄອບຄົວເຮັດຕາມຄຳແນະນຳຂອງພະເຈົ້າ ຄອບຄົວກໍມີຄວາມສຸກ. ບໍ່ຕ້ອງເຈິກັບບັນຫາແລະຄວາມຫຍຸ້ງຍາກຫຼາຍຢ່າງ. ດັ່ງນັ້ນ ຖ້າເຈົ້າເປັນຜົວ ເຈົ້າຕ້ອງຮັກເມຍແລະເບິ່ງແຍງເອົາໃຈໃສ່ລາວສະເໝີ. ຖ້າເຈົ້າເປັນເມຍ ໃຫ້ນັບຖືແລະເຊື່ອຟັງຜົວ. ໃຫ້ເຈົ້າຮຽນແບບເມຍທີ່ດີໃນສຸພາສິດ 31:10-31. ຖ້າເຈົ້າເປັນພໍ່ແມ່ ໃຫ້ສອນລູກໃຫ້ຮັກພະເຈົ້າ. (ສຸພາສິດ 22:6) ຖ້າເຈົ້າເປັນພໍ່ ເຈົ້າຕ້ອງ “ນຳໜ້າຄອບຄົວຂອງຕົວເອງຢ່າງດີ.” (1 ຕີໂມທຽວ 3:4, 5; 5:8) ສ່ວນລູກກໍຕ້ອງເຊື່ອຟັງພໍ່ແມ່. (ໂກໂລຊາຍ 3:20) ຂໍໃຫ້ຈື່ໄວ້ວ່າທຸກຄົນເຮັດຜິດພາດໄດ້ ດັ່ງນັ້ນ ເມື່ອເຮັດຜິດເຮົາຕ້ອງຖ່ອມຕົວແລະຂໍໂທດ. ເຈົ້າຄືຊິເຫັນດີນຳວ່າຄຳພີໄບເບິນມີຄຳແນະນຳທີ່ພະເຢໂຫວາໃຫ້ກັບທຸກຄົນໃນຄອບຄົວ.
^ ຂໍ້ 12 ເຈົ້າສາມາດຊອກຫາຂໍ້ມູນເພີ່ມເຕີມກ່ຽວກັບວິທີປົກປ້ອງລູກໃນປຶ້ມຮຽນຈາກຄູຜູ້ຍິ່ງໃຫຍ່ ບົດ 32 ຈັດພິມໂດຍພະຍານພະເຢໂຫວາ.
^ ຂໍ້ 15 ລູກອາດເລືອກທີ່ຈະບໍ່ເຊື່ອຟັງພໍ່ແມ່ກໍໄດ້ ຖ້າເລື່ອງທີ່ພໍ່ແມ່ບອກໃຫ້ເຮັດຂັດກັບກົດໝາຍຂອງພະເຈົ້າ.—ກິດຈະການ 5:29
ເລື່ອງທີ່ເຈົ້າອາດຈະມັກ
ຄອບຄົວຂອງທ່ານຈະມີຄວາມສຸກໄດ້ແນວໃດ
ຄອບຄົວຈະມີຄວາມສຸກເມື່ອໝາຍເພິ່ງພະເຈົ້າ
ໃຊ້ພຽງສອງຄຳຖາມທີ່ງ່າຍໆແຕ່ສາມາດເຮັດໃຫ້ຊີວິດຄູ່ຂອງທ່ານດີຂຶ້ນໄດ້
ຄອບຄົວຂອງທ່ານຈະມີຄວາມສຸກໄດ້ແນວໃດ
ນະມັດສະການພະເຢໂຫວາເປັນຄອບຄົວ
ທ່ານຈະນະມັດສະການປະຈຳຄອບຄົວຢ່າງມີຄວາມສຸກໄດ້ແນວໃດ
ປຶ້ມແລະຈຸນລະສານ
ສອນລູກໃຫ້ເປັນຄົນດີ
ພໍ່ແມ່ສາມາດໃຊ້ຈຸນລະສານນີ້ເພື່ອສອນບົດຮຽນທີ່ມີຄ່າຈາກຄຳພີໄບເບິນໃຫ້ລູກ
ປຶ້ມແລະຈຸນລະສານ
