1, 2. Yehova wakeñaña nindi yisaka yikali ñahi?

YEHOVA NZAMBI wasumbwishili antu atachi. Bayibolu yatulejaña nawu waleñeli mumbanda watachi, ‘hakumutwala kudi muntu.’ Adama wazañaleli nankashi chakwila wahosheli nindi: “Iwu neli dehi ifwaha dami, neli dehi mujimba wami.” (Kutachika 2:22, 23) Chumichi chinakumwekesha nawu Yehova wakeñaña adisumbula kwikala namuzañalu.

² Chawushona, antu amavulu kanda ekaleñahu dehi namuzañalu muchisaka. Hela chochu, muBayibolu mwekala nshimbi jajivulu jikukwasha antu adi muchisaka kwikala namuzañalu nikushakama hamu chiwahi.—Luka 11:28.

3, 4. (a) Iyala watela kuhemba ñahi ñodindi? (b) Muloñadi eyala namumbanda chatela kudanakenawu?

³ Bayibolu yahoshaña nawu iyala wamuwahi watela kukeña ñodindi nikumulemesha. Mwani tañenu Aefwesesa 5:25-29. Iyala watela kumuhemba ñodindi nakukeña. Nawa watela kumukiña, kumuhemba nikubula kwila yuma yinateli kumuneñesha.

⁴ Hanu dinu iyala watela kwila ñahi neyi ñodindi waluwañeshaña? Amayala ayileja nawu: “Keñenuña añodi jenu nawa bayi muyilendumokelañaku.” (Akolosi 3:19) Amayala, mwatela kwiluka nenu, ninenu  mwaluwañeshaña. Neyi munakukeña nenu Nzambi yayanakeni, mwatela kwanakena añodi jenu. (Matewu 6:12, 14, 15) Neyi eyala namumbanda akudanakenaña, chikuyikwasha kwikala namuzañalu muwulu.

5. Muloñadi iyala chatela kulemeshelayi ñodindi?

⁵ Yehova wakeñaña nindi iyala yalemesheña ñodindi. Iyala watela kwiluka yuma yinakukeñayi ñodindi. Chumichi chalema nankashi. Neyi iyala nakuhemba chiwahi wanyi ñodindi, Yehova wukutiya wanyi kulomba kwindi. (1 Petulu 3:7) Yehova walemeshaña antu neyi amukeña. Walemesha ejima amayala niambanda.

6. Nhoshelu yakwila nawu eyala namumbanda ekala “mujimba wumu” yatalisha mudihi?

⁶ Yesu walumbulwili nindi eyala namumbanda “hiyadi cheñi ayediku, ilaña adi mujimba wumu.” (Matewu 19:6) Ekala ashinshika kudi mwinikwawu nawa akatwalekahu kwikala ashinshika. (Yishimu 5:15-21; Aheberu 13:4) Adisumbula atela kudakamena neyi mwinikwindi nakukeña nindi abulakani. (1 Akorinda 7:3-5) Iyala watela kwiluka nindi “kwosi muntu wahelahu dehi mujimba windiku, ilaña wawudiishaña nikuwuhemba chiwahi.” Dichi watela kukeña nikumulemesha ñodindi. Mumbanda wakeñaña nindi amuhembeña chiwahi nikumukeña kudi nfumwindi kubadika yuma yejima.—Aefwesesa 5:29.

7. Muloñadi chisaka chichatela kwikalila namutu wachisaka?

⁷ Chisaka chejima chatela kwikala namutu wachisaka, muntu watela kuchilombola kulonda chizateña chiwahi. Bayibolu yahosha ha 1 Akorinda 11:3 nawu: “Mutu weyala hiKristu; nawa mutu wamumbanda hiiyala; nawa mutu waKristu hiNzambi.”

8. Mumbanda nateli kumulemesha ñahi chikupu nfumwindi?

 ⁸ Amayala ejima aluwañeshaña. Ilaña neyi mumbanda yeteja munafuukuliyi nfumwindi nikuzatila hamu nindi, chisaka chejima chikwila namuzañalu. (1 Petulu 3:1-6) Bayibolu yahoshaña nawu: “Mumbanda niyena nawa watela kwikala nakalemesha chikupu kudi nfumwindi.” (Aefwesesa 5:33) Indi neyi nfumwindi wakuhwelela wanyi yuma yakuhwelelayi? Watela kumulemesha chikupu nfumwindi. Bayibolu yahoshaña nawu: “Enu ambanda, ovwahilenuña anfumu jenu, kulonda amayala abulaña kwovwahila mazu aNzambi, ayikoki chakadi mazu kuhitila muyilwilu yawañodi jawu, muloña wakudimwena awenawu yilwilu yenu yayiwahi nikalemesha kenu kasweja.” (1 Petulu 3:1, 2) Neyi mumbanda wukwilaña yuma yayiwahi nfumwindi nateli kutiya nikulemesha yuma yakuhwelelayi.

9. (a) Mumbanda watela kwiladi neyi nakaani munafuukuliyi nfumwindi? (b) Kufumbanyi kwakundama kudi ambanda kwekala haTitusa 2:4, 5?

⁹ Mumbanda watela kwiladi neyi nakaani munafuukuliyi nfumwindi? Watela kuhosha chinakutoñojokayi  nakalemesha. Chakutalilahu, Sara wahosheli yuma yabulili kukeñayi Abarahama, Yehova wamulejeli Abarahama nindi: “Kumina dakutiya mwizu daSara.” (Kutachika 21:9-12) Mpinji jikwawu, iyala mukwaKristu nateli kufuukula yuma yinaambuki nachahosha Bayibolu, dichi ñodindi watela kumukwasha. (Yilwilu 5:29; Aefwesesa 5:24) Mumbanda wamuwahi wahembaña chisaka. (Tañenu Titusa 2:4, 5.) Neyi nfumwindi nianyanindi amona chazatañayi nañovu, akumukeña nikumulemesha nankashi.—Yishimu 31:10, 28.

10. Bayibolu yahoshaña nawudi kutalisha hakwaambuka nikudiseña?

¹⁰ Mpinji yikwawu adisumbula anyakalaña kutoñojoka nawu ambuki hela adiseñi. Hela chochu, Bayibolu yahosha nawu “mumbanda bayi yaambuka nanfumwindiku” nawa “iyala niyena hatela kushiya ñodindiku.” (1 Akorinda 7:10, 11) Kudi yuma yinateli kukojeja adisumbula kwaambuka, ilaña chiña neyi yuma yinakali. Indi kudiseña? Bayibolu yahoshaña nawu antu adisumbula atela kudiseña hohu chiña neyi iyala hela mumbanda nakaami namuntu wabula kwikala mwinikwindi.—Matewu 19:9.

11. Chumanyi chakeñañawu anyana nankashi?

¹¹ Anvwali, ikalenuña nampinji yakuhanjekaña nawanyanenu. Anyanenu anakuyikeña nankashi, anakukeña nawu muyidizishi amwiluki Yehova.—Kuhituluka 6:4-9.

12. Anvwali atela kwiladi kulonda akiñi anyanawu?

¹² Kaayi kaSatana kanakutaminaku chikupu, nawa kudi antu anakukeña kukisañana anyanetu nikukaama nawu chakuyikanjikija. Anvwali amakwawu chayikalilaña  kuhanjeka nawanyanawu haniyi nsañu. Ilaña anvwali atela kuyisoñamisha anyanawu kubula kudikunda nawantu amuchidiwu nikuyileja chakwaambuka nawu. Anvwali, mwatela kukiña anyanenu. *—1 Petulu 5:8.

13. Anvwali atela kudizisha ñahi anyanawu?

¹³ Anvwali akweti mudimu wakudizisha anyanawu yilwilu yayiwahi. Munateli kuyidizisha ñahi anyanenu? Mwatela kuyifumba anyanenu ilaña bayi muyifumba  munjila yatamaku. (Yeremiya 30:11) Dichi bayi mubabesha mwanenu neyi munahiliku. Bayi kuzatisha mazu atama ‘akutapola neyi mpoku yakabali’ kulonda muyihilishiku. (Yishimu 12:18) Yilejenu anyanenu chuma chikuyikwasha ovwahileña.—Aefwesesa 6:4; Aheberu 12:9-11; talenu Mazu Adi Kunsa 30.

14, 15. Muloñadi anyana chatela kwovwahilawu anvwali jawu?

¹⁴ Yesu wadiña nakumwovwahila Tata yindi nihampinji yakala. (Luka 22:42; Yowanu 8:28, 29) Yehova wakeñaña nindi anyana ovwahileña anvwali jawu.—Aefwesesa 6:1-3.

¹⁵ Enu anyana, hela chakwila chikuyikalila kwovwahila anvwali jenu, mwatela kwiluka nenu Yehova nianvwali jenu akutiya kuwaha neyi mwovwahila. *—Yishimu 1:8; 6:20; 23:22-25.

16. (a) Satana wesekaña ñahi atwansi kulonda eleña yuma yatama? (b) Muloñadi chichawahila kwikala nawamabwambu amukeña Yehova?

¹⁶ Diyabolu nateli kuzatisha amabwambu jenu niakwenu atwansi kulonda ayeseki kwila yuma yatama. Weluka nindi himukutwesha kuyikañeshaku. Chakutalilahu, Dina mwana kaYakoba wadiña nawamabwambu abulili kumukeña Yehova. Chumichi chamuleteleli kukala hamu nichisaka chindi. (Kutachika 34:1, 2) Neyi amabwambu jenu amukeña wanyi Yehova, akuyikojeja mwili yuma yahelayi Yehova yikuyineñesha hamu nichisaka chenu kushilahu niNzambi. (Yishimu 17:21, 25) Dichichawahila kwikala nawamabwambu amukeña Yehova.—1 Akorinda 15:33.

17. Yumanyi yatela kwilayi muntu wejima muchisaka?

¹⁷ Neyi antu amuchisaka akulondelaña nshimbi jaNzambi, akumonaña wanyi kukala kwakuvulu. Dichi neyi mwasumbula, mukeñenu ñodenu nawa muhembenuña chiwahi. Neyi mwasumbuka, lemeshenuña nikumwovwahila nfumwenu nawa londelenu chakutalilahu chamumbanda ashimunawu haYishimu 31:10-31. Neyi mudi anvwali, dizishenu anyanenu kulonda amukeñi Nzambi. (Yishimu 22:6) Neyi mudi tata yawantu, lombolenu chisaka chenu “chachiwahi.” (1 Timotewu 3:4, 5; 5:8) Enu anyana ovwahilenuña anvwali jenu. (Akolosi 3:20) Mwatela kwiluka nenu muntu wejima muchisaka waluwañeshaña, dichi ikalenu adizoza nawa danakenenuña wumu namukwawu. Mwamweni, muBayibolu mwekala kufumba kwaYehova kunateli kukwasha muntu wejima muchisaka.