1, 2. Jehova dwaro ni joot odag e ngima machalo nade?

JEHOVA NYASAYE e ma noriwo dhako gi dichwo mokwongo e kend. Muma wacho ni ka Nyasaye nosechueyo dhako ‘notere ir dichwo’ miluongo ni Adam. Ne omor ahinya mowacho niya: “Ma e chogo mar chokena, kendo ringre mar ringrena.” (Chakruok 2:22, 23) Mor ma Adam ne morgono nyiso ni Jehova dwaro ni joma okendore obed mamor.

² Gima lit en ji mang’eny ok odak gi mor e utegi. Muma oting’o puonj ma nyalo konyo ji duto e ot mondo otim gik ma nyalo miyo gidag kanyachiel gi kuwe.​—Luka 11:28.

3, 4. (a) Dichwo onego odag gi chiege e yo mane? (b) Ang’o momiyo dichwo gi dhako ok onego omak wach e kindgi?

³ Muma wacho ni dichwo maber onego oher chiege kendo omiye luor. Som Jo-Efeso 5:25-29. Kinde duto dichwo onego otim gik ma nyiso ni ohero chiege. Onego orite maber kendo ok onego otimne gik ma nyalo hinye.

⁴ Dichwo onego otim ang’o sama jaode otimo gima rach? Nyasaye wacho ne chwo niya: “Dhiuru nyime hero mondeu kendo kik ubed gi mirima mager kodgi.” (Jo-Kolosai 3:19) Un chwo, ng’euru ni un bende utimoga gik ma ok kare. To kudwaro ni Nyasaye  owenu richou, un bende nyaka ung’won ne mondeu. (Mathayo 6:12, 14, 15) Ka dichwo gi dhako ok mak wach e kindgi, mano biro konyogi dak gi mor kod kuwe.

5. Ang’o momiyo dichwo onego omi chiege luor?

⁵ Jehova dwaro ni dichwo omi chiege luor. Dichwo onego ong’e chiege maber mondo ong’e kaka onyalo rite. Mano en gima onego okaw mapek. Ka dichwo timo ne jaode gik ma richo, Jehova ok bi winjo lamone. (1 Petro 3:7) Jehova ohero ng’ato ang’ata mohere bed ni en dichwo kata dhako.

6. Joma okendore gin “ringruok achiel” e yo mane?

⁶ Yesu nolero ni dichwo gi dhako mosekendore “ok gin ji ariyo kendo, to gin ringruok achiel.” (Mathayo 19:6) Omiyo, dichwo ok bi nindo gi dhako machielo mopogore gi chiege to chiege bende ok bi nindo gi dichwo machielo. (Ngeche 5:15-21; Jo-Hibrania 13:4) Joma osekendore ok onego otuonre weche mag nindruok. (1 Jo-Korintho 7:3-5) Dichwo onego ong’e ni “onge ng’at ma osin gi dende owuon, to opidhe kendo orite ahinya.” Omiyo, onego oher kendo ogen chiege ahinya. Dhako moro amora oheroga dichwo mang’won kendo mohere.​—Jo-Efeso 5:29.

7. Ang’o momiyo ot onego bed gi ng’at ma taye?

⁷ Mondo gik moko otimre e yo mochanore e ot, dwarore ni odno obed gi ng’at ma taye. Ndiko mar 1 Jo-Korintho 11:3 wacho kama: “Wi dichwo ka dichwo en Kristo; to wi dhako en dichwo; kendo wi Kristo en Nyasaye.”

8. Dhako nyalo miyo chwore luor matut e yo mane?

 ⁸ Onge dichwo ma onge ketho. Kuwe biro bedo e ot mana ka dhako oyie winjo chwore kendo riwo lwedo paro ma ochiwo. (1 Petro 3:1-6) Muma wacho kama: “Dhako bende onego omi chwore luor matut.” (Jo-Efeso 5:33) To nade ka yie ma dichwo nigo opogore gi mar chiege? Pod biro dwarore ni dhako omiye luor matut. Muma wacho niya: “Un mon, bolreuru ne chwou mondo ka nitie moko kuomgi ma ok luw wach Nyasaye, to oywagi kokalo kuom timbe mag mondegi kata ka ok oyalnegi wach, nikech gisebedo ka gineno timbeu maler kod kaka unyiso luor matut.” (1 Petro 3:1, 2) Timbe mabeyo ma dhako nigo biro miyo chwore ochak chiwo luor ne yie ma en-go.

9. (a) Ang’o ma dhako nyalo timo ka ok omor gi paro ma chwore ogolo? (b) En paro mane ma omi mon e bug Tito 2:4, 5?

⁹ To nade ka dhako ok mor gi paro ma chwore ogolo? Onego ochiw pache e yo ma nyiso luor. Kuom ranyisi, Sara nogolo paro moro ma ne ok omoro  Ibrahim. Kata kamano, Jehova nonyiso Ibrahim niya: ‘Winj dwonde.’ (Chakruok 21:9-12) Nikech ng’enyne paro ma dichwo moluoro Nyasaye ng’ado gin ma Nyasaye oyiego, chiege onego oriwe lwedo. (Tich Joote 5:29; Jo-Efeso 5:24) Dhako maber biro rito ode maber. (Som Tito 2:4, 5.) Chwore gi nyithinde koneno kaka otiyonegi matek, gibiro here kendo miye luor ahinya.​—Ngeche 31:10, 28.

10. Ang’o ma Muma puonjo e wi wach pogo dak kod ketho kend chuth?

¹⁰ Seche moko joma okendore rikniga pogo dak kata ketho kend margi chuth. Kata kamano, Muma wacho ni “dhako kik we chwore” to “dichwo ok onego owe chiege.” (1 Jo-Korintho 7:10, 11) Nitie gik moko ma nyalo chuno dichwo gi dhako mondo opog dak. Kata kamano, mano en gima onego okaw mapek. To nade wach ketho kend chuth? Muma nyiso ni gima nyalo miyo dichwo gi dhako oketh kendgi chuth en ka dichwono kata dhakono oterore gi ng’at machielo.​—Mathayo 19:9.

11. En ang’o ma nyithindo dwaroga moloyo?

¹¹ Un jonyuol, manyuru thuolo moromo mar bedo gi nyithindu. Nyithindo dwaroga ahinya bedo gi jonyuolgi moloyo gimoro amora. Dwarore ni in kaka janyuol ikonygi ng’eyo Jehova gi chikene.​—Rapar mar Chik 6:4-9.

12. Ang’o ma jonyuol onego otim mondo girit nyithindgi?

¹² Piny ma Satan lochoeni medo bedo marach. Nitie joma dwaro hinyo nyithindi, kata mana wuondogi mondo ginind kodgi. To e ma pod iyudo ni tek ne  jonyuol moko wuoyo gi nyithindgi e wi weche mag nindruok. Dwarore ni jonyuol onyis nyithindgi ni nitie joma kamago, kendo gikonygi ng’eyo kaka ginyalo tang’ kodgi. Un jonyuol, nyaka urit nyithindu mondo kik gimoro ohinygi. *​—1 Petro 5:8.

13. Jonyuol nyalo puonjo nyithindgi e yo mane?

¹³ Jonyuol nigi ting’ mar konyo nyithindgi mondo gibed gi timbe mabeyo. Ere kaka inyalo timo kamano? En adier ni dwarore ni ipuonj nyithindi. Kata  kamano, ok onego ibed mager kodgi mokalo tong’ sama irieyogi. (Jeremia 30:11) Omiyo, kik ikum nyithindi sama pod iyi owang’. Wecheni ok onego obed ma “chuoyo chuny ka ligangla,” kendo ma nyalo hinyo nyithindi. (Ngeche 12:18) Puonj nyithindi gimomiyo onego gibed joma nigi luor.​—Jo-Efeso 6:4; Jo-Hibrania 12:9-11; som Weche Momedore namba 29.

14, 15. Ang’o momiyo nyithindo onego owinj jonyuolgi?

¹⁴ Yesu ne timo gik ma moro Wuon mare kinde duto, kata mana e kinde ma ne ok yot timo kamano. (Luka 22:42; Johana 8:28, 29) E yo ma kamano bende, Jehova dwaro ni nyithindo owinj jonyuolgi mana kaka Yesu notimo.​—Jo-Efeso 6:1-3.

¹⁵ Un nyithindo, ng’euru ni sama uwinjo jonyuolu, umoro Jehova kaachiel gi jonyuolu, kata mana sama uneno ni timo kamano tek. *​—Ngeche 1:8; 6:20; 23:22-25.

16. (a) Satan tiyo gi yore mage mondo otemgo nyithindo? (b) Ang’o momiyo ber ka wayiero osiepe mohero Jehova?

¹⁶ Jachien nyalo temi kotiyo gi osiepeni kata nyithindo weteni mondo itim gik maricho. Ong’eyo ni ka nyithindo weteni e ma temi, biro bedoni matek tamori. Kuom ranyisi, Dina ma ne en nyar Jakobo nomako osiep gi joma ne ok ohero Jehova. Mano nokelone chandruoge mang’eny kaachiel gi joodgi. (Chakruok 34:1, 2) Ka in gi osiepe ma ok ohero Jehova, ginyalo ywayi mondo itim gik ma Jehova osin-go, to mano  biro keloni lit mang’eny, joodu, kod Jehova. (Ngeche 17:21, 25) Mano e momiyo ber ka imanyo osiepe mohero Jehova.​—1 Jo-Korintho 15:33.

17. En ting’ mane ma ng’ato ka ng’ato e ot nigo?

¹⁷ Ka joot te luwo kaka Jehova chikogi, ginyalo geng’o chandruoge mang’eny. Omiyo, ka in ng’ama dichwo her chiegi kendo nyis mano gi timbeni. Ka in ng’ama dhako, bolri ne chwori kendo nyise luor kiluwo ranyisi mar dhako ma iwuoyo kuome e Ngeche 31:10-31. Ka in janyuol, puonj nyithindi hero Nyasaye. (Ngeche 22:6) Un wuone, tauru uteu “e yo maber.” (1 Timotheo 3:4, 5; 5:8) To un nyithindo winjuru jonyuolu. (Jo-Kolosai 3:20) Ng’e ni ng’ato ka ng’ato e ot nyalo ketho, kuom mano, ka itimo gima ok kare, bolri kendo ikwa ng’wono. Adier en ni Muma oting’o puonj ma nyalo konyo ng’ato ka ng’ato e ot.