1, 2. Еш-влак шотышто Иегован кумылжо могай?

ИКЫМШЕ еш Иегова Юмылан кӧра лийын. Библийыште возымо почеш Иегова ӱдырамашым ыштен да пӧръеҥ деке намиен. Тудым ужын, Адам куанен каласен: «Теве, лу — мыйын луэм гыч, шыл [кап] — мыйын шылем [капем] гыч» (Тӱҥалтыш 2:22, 23). Тудо пеш пиалан лийын. Тыге Иегова еш-влак пиалан лийышт манын кумылжым ончыктен.

² Чаманаш логалеш, но шукышт пиалан ешыште шочын-кушкын огытыл. Туге гынат, библийысе принцип-влак ешлан пиалан лияш полшен кертыт. Тыгай ешыште чыланат икте-весым аклаш да йӧраташ тӱҥалыт (Лукан 11:28).

3, 4. а) Марий ватыж дене шкем кузе кучышаш? б) Марий ден вате икте-весын титакыштым молан кудалтышаш улыт?

³ Библийын каласымыж почеш марий шке ватыжым йӧратышаш да пагалышаш. Ефесян-влаклан 5:25—29 лудын лекса. Сай марий ватыж дене эре поро. Тудо ватыжым арала, тудын верч тырша да нигунамат тудлан нимогай зияным огеш ыште.

⁴ Но ватыже марийжылан иктаж-мом келшыдымым ышта гын, марийже шкем кузе кучышаш? Библий марий-влаклан теве могай каҥашым пуа: «Шке ватыдам йӧратыза [«йӧратымым ида чарне», УТ] да нунын дене торжа ида лий» (Колоссян-влаклан 3:19).  Марий-влак, шарныза: теат йоҥылышым ыштен кертыда. Юмо тендан языкдам кудалтыже манын кумылда уло гын, теат ватыдан титакшым кудалтышаш улыда (Матфейын 6:12, 14, 15). Марий ден вате икте-весын титакыштым уло кумылын кудалтат гын, нунын ешышт пиалан лиеш.

5. Марий шке ватыжын чапшым молан волтышаш огыл?

⁵ Марий шке ватыжын чапшым волтышаш огыл. Тиде Иегован йодмашыже. Тудо шке ватыжын духовный, эмоциональный да физический кӱлешлыкшым шотыш налшаш. Тидым ышташ чот кӱлешан, вет марий ватыж дене торжа лиеш гын, Иегова тудын кумалме мутшым колыштмым чарнен кертеш (1 Петрын 3:7). Пӧръеҥ ӱдырамаш деч шергаканрак улеш манын, Иегова огеш шоно. Айдеме Юмым йӧрата гын, Юмылан шергакан улеш.

6. Марий ден вате «икте улыт» манме шомак мом ончыкта?

⁶ Иисусын мутшо почеш мужыраҥме деч вара пӧръеҥ ден ӱдырамаш «ынде кокыт огыл, а икте улыт», вес мут дене, нунын коклаште кыл кучымашышт пеш лишыл лиеш (Матфейын 19:6). Марий ден вате икте-весылан ӱшанле лийшаш улыт. Нуно шке пелашыж деч весе дене коштшаш огытыл (Притчи 5:15—21; Еврей-влаклан 13:4). Марий ден вате сексуальный кӱлешлык шотышто шке нерген гына огыл, а икте-весын кӱлешлыкышт нерген шонышаш улыт (1 Коринфян-влаклан 7:3—5). Библийыште возымо: «Нигӧ нигунам шке капшым ужмышудымо ок лий, а тудым пукша да ырыкта». Тугеже, марий шке ватыжым йӧратышаш гына огыл, но тыгак тудын верч ныжылгын тыршышаш. Вате шке марийже  деч поро улмыжым да йӧратымыжым эн чот вуча (Ефесян-влаклан 5:29).

7. Ешын вуйжо молан лийшаш?

⁷ Еш пиалан да пеҥгыде лийже манын, тудлан сай вуйлатыше але вуй кӱлеш. Библийыште возымо: «Кажне пӧръеҥлан вуй — Христос, а ӱдырамашлан вуй — пӧръеҥ, а Христослан вуй — Юмо» (1 Коринфян-влаклан 11:3).

8. Вате марийжым пагалымым кузе ончыктен кертеш?

⁸ Мутат уке, марий йоҥылышым ыштен кертеш. Но вате марийжын решенийже дене келша гын да тудын шонымыжым илышыш пурташ полша гын, тиде уло ешлан пайдам конда (1 Петрын 3:1—6). Библийыште каласыме: «Вате тек марийже деч лӱдеш [«пагала», УТ]» (Ефесян-влаклан 5:33). Марийже Юмылан огеш ӱшане гын але вес семын кумалеш гын, ватылан кузе лийман? Тыгай годым вате  марийжым тыгак пагалышаш. Библийыште вате-влаклан возымо: «Теат, вате-влак, шке марийдам колыштса. Тыгеракын, Юмын шомаклан ӱшаныдыме марий-влак ватыштын арун да Юмо деч лӱдын илымыштым [«кугу пагалымыштым», УТ] ужын, нунын илышыштлан кӧра мут деч посна ӱшандарыме лийын кертыт» (1 Петрын 3:1, 2). Ватын сай примерже марийжым тудын религийже нерген шукырак пален налаш да тудын ӱшанымашыжым пагалаш таратен кертеш.

9. а) Вате шке марийже дене иктаж-мо шотышто огеш келше гын, мом ыштышаш? б) Титлан 2:4, 5 почеламутышто вате-влаклан могай каҥашым пуымо?

⁹ Вате шке марийже дене иктаж-мо шотышто огеш келше гын, тудлан шке шонымыжым каласен кертеш. Тыгодым вате пагален ойлышаш. Мутлан, икана Сарра Авраамлан ик йодыш шотышто шке шонымыжым каласен. Каласымыже Авраамлан келшен огыл. Но Иегова тудлан каласен: «Сарран каласыме чыла мутшым колышт» (Тӱҥалтыш 21:9—12). Христиан улшо марий-влакын решенийышт шукыж годым Библийлан тореш огытыл, сандене вате-влак нунын решенийышт почеш ыштышаш улыт (Апост. пашашт 5:29; Ефесян-влаклан 5:24). Сай вате шке ешыж верч тырша. (Титлан 2:4, 5 лудын лекса.) Марий ден йочаже-влак тудын чот тыршымыжым ужын, тудым эше чотрак йӧраташ да пагалаш тӱҥалыт (Притчи 31:10, 28).

10. Посна-посна илымаш да ойырлымаш нерген Библийыште мом возымо?

¹⁰ Южгунам марий ден вате ойырлаш але посна-посна  илаш вашкат. Но Библий почеш «вате марийже деч ойырлышаш огыл» да «марий ватыжым кудалтышаш огыл» (1 Коринфян-влаклан 7:10, 11). Посна случай годым гына пелаш-влак посна-посна илен кертыт, но тидлан кугу амал лийшаш. А ойырлымаш нерген Библийыште мом возымо? Пелаш-влак яжарланымаш амал дене веле ойырлен кертыт (Матфейын 19:9).

11. Йоча-влаклан мо эн чот кӱлешан?

¹¹ Ача-ава-влак, йочада дене пырля шукырак жапым эртарыза. Йочалан вниманий чот кӱлешан.  Тудлан Иегова нерген каласкалыза. Вет тидым палымаш илышыште эн кӱлешан (Второзаконие 6:4—9).

12. Ача-ава-влак, шке йочаштым аралаш манын, мом ыштышаш улыт?

¹² Сатанан тӱняже кажне кечын утыр-утыр осалештеш. Сандене южо еҥ-влак тендан йочалан осалым, эсогыл сексуальный виешлымашым, ыштен кертыт. Южо ача-ава йочашт дене тыгай теме нерген мутланаш вожылыт. Но икшывым тыгай лӱдыкшӧ нерген шижтараш кӱлеш да туныкташ, кузе тыгай годым шкем кучаш. Ача-ава-влак, те икшывыдам аралышаш улыда * (1 Петрын 5:8).

13. Ача-ава-влаклан йочаштым туныктымышт годым мо нерген шарныман?

¹³ Йоча-влак шкем сайын кучен моштышт манын, ача-ава-влак нуным туныктышаш улыт. Нуно тидым кузе ыштен кертыт? Йочам эре туныкташ кӱлеш, но тыгодым ача-авалан торжа лийман огыл (Иеремия 30:11). Шыдешкыше улмыда годым йочадам нигунамат ида тӧрлате. Вет тунам мутда керде семын йочан шӱм-чонжым сусыртен кертеш (Притчи 12:18). Молан нуно тендам колыштшаш улыт йочадалан умылаш полшыза (Ефесян-влаклан 6:4; Еврей-влаклан 12:9—11; 30-шо ешартыш статьям ончыза).

14, 15. Йоча-влак ача-аваштым молан колыштшаш улыт?

¹⁴ Иисус Ачажым эре колыштын, эсогыл куштылго  лийын огыл гынат (Лукан 22:42; Иоаннын 8:28, 29). Иегова йоча-влак деч ача-аваштым колыштмым вуча (Ефесян-влаклан 6:1—3).

¹⁵ Йоча-влак, тыланда ача-авадам колышташ йӧсӧ гын, шарныза: нуным колыштын, те ача-авадам гына огыл, Иеговамат чот куандареда * (Притчи 1:8; 6:20; 23:22—25).

16. а) Сатана самырык-влакым уда пашам ышташ кузе таратен кертеш? б) Иеговам йӧратыше еҥ-влак дене йолташ лияш молан кӱлеш?

¹⁶ Диавол самырык-влакым уда пашам ышташ кузе таратен кертеш? Тидлан тудо йолташым  кучылтын кертеш. Тудо пала: йолташ ваштареш шогаш самырык айдемылан куштылго огыл. Теве, мутлан, Динам налына, Иаковын ӱдыржым. Динан йолташыж-влак Иеговам йӧратен огытыл. Тыгай йолташ дене лишыл кыл кучымаш тудлан да ешыжлан шуко ойгым конден (Тӱҥалтыш 34:1, 2). Тендан йолташда Иеговам огыт йӧрате гын, нуно тендам Иеговалан йӧрдымӧ пашам ышташ таратен кертыт. Тиде тыланда, ешланда да Иеговаланат шӱм-чон корштымашым конда (Притчи 17:21, 25). Сандене Иеговам йӧратыше еҥ-влак дене йолташ лияш кӱлеш (1 Коринфян-влаклан 15:33).

17. Юмо ешыште кажныж деч мом вуча?

¹⁷ Ешыште кажныже Юмын принципше-влакым шотыш налеш гын, еш шуко ойго деч аралыме лиеш. Марий-влак, ватыдам йӧратыза да нунын дене эре поро лийза. Вате-влак, марийдам пагалыза да нуным колыштса. Притчи 31:10—31 почеламутлаште уш-акылан вате нерген примерым возымо. Тудым шотыш налын, тыгаяк лияш тыршыза. Ача-ава-влак, йочадам Юмым йӧраташ туныктыза (Притчи 22:6). Ача-влак, ешдам моштен вуйлаташ тыршыза (1 Тимофейлан 3:4, 5; 5:8). Йоча-влак, ача-авадам колыштса (Колоссян-влаклан 3:20). Ешыште кажныже йоҥылышым ыштен кертеш манын шарныза. Сандене тыматле да ӱҥышӧ лийза да титакдам кудалташ икте-весе деч йодса. Чын, Юмо Библий гоч кажнылан уш-акылан каҥашым пуа.