1, 2. Yehova onafuna wi murala dhikanne ddi?

YEHOVA MULUGU, dipaddusile matelo owambela. Bibliya onihina, numpaddusa mwihiyana obajha “omwinkelela mulobwana.” Adawu nudhiveliwa vamoniliye mwihiyana wera: “Vano ola, anakale nikuva na makuva aaga ni nyamanyama ya nyama yaga.” (Génesis 2:22, 23) Ela enatonyihedha wi Yehova onafuna anamatelana ekale ohagalala.

² Enowukuliha niwaga yegi athu owinjhiva kinakannege murala wohagalala. Mbwenye malabwene Bibliya onovaha dholaga dhinakavihera murala dhowinjhiva okanna ohagalala ni ojhavo murenddele vamodha.—Lucas 11:28.

3, 4. (a) Mulobwana ootela amweddihege aavi mwariye? (b) Olevelelana muwari mwa matelo, ekalele ddi yego yapama?

³ Mulobwana ootela, Bibliya onomukongomedha omweddiha pama mwariye nuudhivela vamodha ni nriho. Kawerena omwileri Efésios 5:25-29. Mulobwana, onamudhivela mwariye malabwene onomweddiha pama. Ohiya eyo, oliye kanamuukula, mbwenye onomukabelela ni onomuhagalasa murima.

⁴ Kito akala mwihiyana ohuviriganiha, mulobwana ere ddi? Yolaga enihina: “Odidele omudhivela mwariyo, kahi omunyanyuwelaga bure bure.” (Colossenses 3:19)  Mulobwana ootela, ubuwelege wi nuliyeya onoviriganiha. Akala onofuna oleveleliwa ni Mulugu, niweya onone omulevelela mwariyo. (Mateus 6:12, 14, 15) Matelo enedda pama, mulobwana ni mwihiyana yanona olevelelana.

5. Ekalele ddi yathima mulobwana ootela omuriha mwariye?

⁵ Yehova onajhehera wi mulobwana ootela amurihege mwariye. Mulobwana ootela, anone wakwaneliha dhatedhene dhinahoowela mwariye. Muselu ola, kahiyo wamasika. Mulobwana ohunamweddiha pama mwariye, malobelo aye podi ohuvuruwaniwa ni Yehova. (1 Pedro 3:7) Yehova onowadhivela athu atene enanvaha thima. Oliye kanamusakula muthu, naari akale mulobwana obe mwihiyana atene ehikanna thima.

6. Enatapulela ddi mwihiyana ni mulobwana okala ‘nyama modha?’

⁶ Yesu ohutapulelamo wi mulobwana ni mwihiyana, “kiri athu abili, mbwenye nyama modha.” (Mateus 19:6) Eyo enatapulela wi athu yala, ekale oororomelana mmodha ni mukwaye. (Provérbios 5:15-21; Hebreus 13:4) Mulobwana ni mwihiyana ekale oorihana wodhela muselu wogonihana. (1 Coríntios 7:3-5) Mulobwana ootela onofwanelela wubuwela wi ‘kawo muthu onidda mwiili waye, mbwenye onojhiha ni onoosamalela.’ Ahiyana enafuniiwa, fukanna mulobwana apama ni oodhivela.—Efésios 5:29.

7. Murala wafuna okala wowiwanana, were ddi?

⁷ Murala wafuna okala wowiwanana, enofuneya olaba vamodha yaparaga mabasa vamuralani. Bibliya onosoriha va 1 Coríntios 11:3 egi: “Musolo wamulobwana di kiristu, musolo wamwihiyana di mulobwana, musolo wa Kiristu di Mulugu.”

8. Mwihiyana ooteliwa onatonyihedhe addi wi onomuriha mamune?

 ⁸ Kito akala mulobwana ohuviriganiha? Yereya ndo, mwihiyana amulevelele ni amukavihere mamune aafunaga osakula ethu, wilibihera werana ndo murala watene onere okavihereya. (1 Pedro 3:1-6) “Mwihiyana akanne nriho navati vamurima ni mamune.” (Efésios 5:33) Kivano akala mulobwana, dhinarumedhiye kahiyo dhimodhave dhinarumedha mwariye? Podive dhigarive ndo, mwihiyana kahiye omuriha. Bibliya onihina: “We mwihiyana oteliwe, omukuluvelege mamuno, akala oliye kaafuna wiwelela madhu, abajhe wiwelela ahilaleyiwe, wodhela mweddelo wa mwariye, ‘mwaha wokala namona ampubula wodhela mweddelo wawo wapama ni nriho na vati vamurima.” (1 Pedro 3:1, 2) Mwihiyana akanna mweddelo wapama, podi omukukusela mamune okanna munigwa wonona nde dhinarumedha mwariye.

9. (a) Akala mwihiyana ooteliwa kanarumedha dhinafuna mamune, enahoweleya ere ddi? (b) Yolaga baani enafwanyeya va Tito 2:4, 5 enafwanelela mwihiyana ooteliwa ohara?

⁹ Mwariye ahirumedhaga nde dhinafuna mamune,  ere ddi? Oliye podi ovaha mubuwelo waye, mbwenye erena ni nriho. Motajhiha, Sara ahisoriha muselu, wahamudhivele Abaraawu, mbwenye Yehova wera: ‘Kanvuruwane awogiliye.’ (Génesis 21:9-12) Malabo mamodha akala mukiristawu ootela onothoma yego eniwanana ni Bibliya, enofwanelela mwariye amukavihere ni nriho. (Atos 5:29; Efésios 5:24) Mwihiyana apama ooteliwa ohunona osamalela muralaye. (Omwileri Tito 2:4, 5.) Mamune ni anamwani yawonaga mabasa amatene onaapariye, odhivela ni nriho enniwana nuuliye nnerege othabwa.—Provérbios 31:10, 28.

10. Bibliya onawoga ddi wodhela muselu wosukumana obe omwalana?

¹⁰ Malabo mamodha nnowiwesa yeraga anamatelana ale ehisukumana obe ehimwalana. Mbwenye Bibliya onihina: ‘Mwihiyana ateliwe kamwihiye mamune’ wenjhedhedhave egi ‘mulobwana kamwihiye mwariye.’ (1 Coríntios 7:10, 11) Ehe, ehikalawo makathamiho enaathukulela anamatelana omwalana, mbwenye osakula omwalana kahi yokweya. Ehikalele ddi ethu yapama omwalana? Bibliya onowenya wi anamatelana emwalane, akala mulobwana obe mwihiyana ohuraruwa.—Mateus 19:9.

11. Anawo enojhehera wi wahudhihe ddi?

¹¹ Ababi atene enna anamwani, enofuneya ojha mudhidhi ni aliwa. Anawo enodhiveliwa okala ni we mudhidhi watene, ohiya eyo, enojhehera wi wahudhihe wodhela Yehova.—Deuteronómio 6:4-9.

12. Mutholo baani enna ababi wodhela anamwani?

¹² Elabo ela ya Saddana enna woopiha kadda labo ni dhego dhabure, athu amodha enokala nuwawerela dhego dhabure anamwani ninga wararusa. Ababi amodhaya enowarusa  owoga ni aniwa wodhela muselu yola. Mbwenye ababi, enofuneya wawaddela aninyu makalelo owarabela athu yala ni ethu enafuniiwa wera yafwanyiwa. Ababi ehikanna mutholo wowabarela aniwa. *—1 Pedro 5:8.

13. Ababi enande addi wahudhiha aniwa okanna mweddelo wapama?

¹³ Ababi ehikanna mutholo wowahudhiha aniwa okanna mweddelo wapama. Ababi enande addi werana eyo? Aninyu enohowela oxagihiwa ni osumululiwa, mbwenye mwasumululege ni makalelo apama.  (Jeremias 30:11) Muhasumululege anamwani muganyanyuwile. Nyu kamuwogege madhu enasuva enaligana ninga ‘okakathiwa ni supadda.’ (Provérbios 12:18) Mwahudhihege aninyu wonelamo mwahaya egahowela okala owiwelela.—Efésios 6:4; Hebreus 12:9-11; Osugwe wonelamo 30.

14, 15. Muzombwe akala owiwelela onamuhagalasa aani?

¹⁴ Malabo amatene Yesu omwiwelela babe, podive yahili yokweya. (Lucas 22:42; João 8:28, 29) Yehova onajhehera wi anamwani atene yawiwelelege abaabiwa.—Efésios 6:1-3.

¹⁵ Muzombwe, naari egari yorusa wawiwelela makolo awo, wubuwelege wi wakala owiwelela onere omuhagalasa Yehova vamodha ni ababo. *—Provérbios 1:8; 6:20; 23:22-25.

16. (a) Ddiyabo onamulabihedha aani wi utujele werana ethu yabure? (b) Mwahaya bwaddi ekala yathima wasakula akwawo enamudhivela Yehova?

¹⁶ Ddiyabo podi walabihedha akwawo ni athu amodha wi yutujele werana ethu yabure. Oliye ohunona wi enere wurusa othawa yoweha yela. Motajhiha, Dina mwana a Jako, ahikanna akwaye yahanna odhivela ni Yehova. Eyo yahimutotela makathamiho vamodha ni amudhaaye. Génesis 34:1, 2) Akala akwawo kinamudhivela Yehova, aliwa podi wutujela werana ethu enamutakalela Yehova, eyo yere wuthukulela omuukula Yehova ni ofwanyiwa makathamiho vamodha ni amudhawo. (Provérbios 17:21, 25) Wi eyo ehipadduwe, sapama wasakula akwawo enamudhivela Yehova.—1 Coríntios 15:33.

17. Kadda muthu vamuralani onna mutholo baani?

¹⁷ Kadda muthu vamuralani aharihaga dholaga dha Mulugu, murala watene onakala wohagalala, eyo enowakavihera orabela makathamiho owinjhiva. Akala oli mulobwana ootela, omudhivelege mwariyo ni omweddihege pama. Akala oli mwihiyana ooteliwa, omurihege mamuno ni omwiwelelege oharihaga makalelo apama omutajhihaga mwihiyana olebiwe va Provérbios 31:10-31. Babi, wahudhihege anawo omudhivela Mulugu. (Provérbios 22:6) Akala oli babi, weddihege ‘pama murala wawo.’ (1 Timóteo 3:4, 5; 5:8) Anamwani, mwawiwelelege makolo enyu. (Colossenses 3:20) Mubuwelege wi kadda muthu vamuralani kapaddusiwe ni makalelo mamodhave, mowindala nikale owiyeviha ni oonona olevelelana. Hee, Mbibliyani dhihikalamo dhoholela dhinamukavihera kadda muthu vamuralani.