1, 2. A Zeova ratame tɩ zagsã rãmb vɩɩm yɩ wãn-wãna?

WẼNNAAM A ZEOVA n kẽes d yaab a Ãdem ne a Hawa kãadem. Biiblã yetame t’a naana a Hawa n tall-a n wa kõ a Ãdem. A Ãdem sũurã yɩɩ noog hal t’a yeel yaa: “Yõwã yaa mam kõabã kõbre, la mam yĩngã neongo.” (Sɩngre 2:22, 23) Woto wilgdame t’a Zeova ratame tɩ sẽn kẽ-b kãadmã vɩɩm yɩ noogo.

² Bʋko, neb wʋsg pa tar sũ-noog b zagsã pʋsẽ ye. La sagls wʋsg n be Biiblã pʋg n tõe n sõng zakã nebã fãa tɩ b bãng n vɩɩmd ne taaba, tɩ b zĩid-n-taarã noome.—Luk 11:28.

3, 4. a) Manesem bʋg la rao segd n tall ne a paga? b) Bõe yĩng tɩ tar yõod tɩ pag ne a sɩd kõt taab sugri?

³ Biiblã yetame tɩ sɩd-sõng tog n nonga a pagã la a waoogd-a. Karm-y Efɛɛs-rãmb 5:25-29. Rao tog n geta a pag yell ne nonglem wakat fãa, n ges tɩ bũmb da maan-a, n da maand bũmb sẽn sãamd a sũuri, bɩ n nams-a ye.

⁴ Rao manesem segd n yɩɩ wãna, a pagã sã n tudgi? Ad b sẽn sagend sɩdbã bũmb ninga: “Pʋg-sɩdbã, bɩ yãmb ned kam fãa nong a paga, la y ra maan gãgs ne-a ye.” (Koloos-rãmbã 3:19) Rapã,  ra yĩm-y tɩ yãmb me tudgdame ye. Y sã n dat tɩ Wẽnnaam kõ-y sugri, yãmb me segd n kõta y pagã sugri. (Matye 6:12, 14, 15) Rao ne pag sã n sakd n kõt taab sugri, na n sõngame tɩ b zĩid-n-taarã yɩ noogo.

5. Bõe yĩng tɩ rao segd n nand a paga?

⁵ A Zeova ratame tɩ rao nand a paga. Rao tog n gesame t’a pagã paam bũmb nins fãa sẽn yaa tɩlɛ ne-a wã. Woto pa reem yell ye. Rao sã n pa nand a pag la a pa get a yell neere, a Zeova tõeeme n pa reeg a pʋʋsg ye. (1 Pɩyɛɛr 3:7) A Zeova nanda ned ning fãa sẽn nong yẽ. A pa get a soabã yaa pag bɩ rao ye.

6. B sẽn yeel tɩ rao ne a pag lebga ‘yĩng a yembrã’ võor yaa bõe?

⁶ A Zeezi wilgame tɩ rao ne a pag ‘ka leb n yaa neb a yiib ye, b yaa yĩng a yembre.’ (Matye 19:6) Rao pa segd n zãmb a paga, pag me pa segd n zãmb a sɩda. (Yel-bũnã 5:15-21; Ebre-rãmbã 13:4) Lagengã wɛɛngẽ, ned fãa tog n modgame tɩ yaa a to wã ratmã n pak-a n yɩɩd a mengã rẽnda. (1 Korẽnt-rãmbã 7:3-5) Rao pa segd n yĩm tɩ ‘ned baa a yembr zɩ n kisg a meng ye. A rɩlgda a menga, n get a meng yelle.’ Rẽ n so t’a segd n nong a pagã, n get a yelle. Pag sẽn dat n tɩ yɩɩd yaa a sɩdã nong-a, n maand-a neere.—Efɛɛs-rãmbã 5:29.

7. Bõe yĩng tɩ yaa tɩlɛ tɩ zak fãa tall zu-soaba?

⁷ Yaa tɩlɛ tɩ zak fãa tall zu-soaba, ned sẽn na n lʋɩ taoor n ges tɩ zems-n-taar beẽ. Pipi Korẽnt-rãmb  11:3 yeelame: ‘Kiris yaa rao fãa Zu-soaba, la dao yaa pag zu-soaba, tɩ Wẽnnaam yaa Kiris Zu-soaba.’

8. Bõe la pag tõe n maan n wilg t’a waoogda a sɩda?

⁸ Rao buudã fãa tudgdame. La a pagã sã n teend-a a yam-yãkr fãa pʋgẽ, nafda zakã neb fãa. (1 Pɩyɛɛr 3:1-6) Biiblã yetame: “Bɩ pag fãa waoog a sɩda.” (Efɛɛs-rãmbã 5:33) La a sɩdã sã n pa tũud a Zeova? Baa ne rẽ, a segd n kell n waoog-a lame. Biiblã yetame: ‘Pagba, bɩ yãmb ned kam fãa sak a sɩda, tɩ baa bãmb neb kẽer sẽn ka sakd Wẽnnaam koɛɛgã, bɩ b sẽn yãt b pagbã yel-manesmã sẽn yaa sõama wã, la sẽn waoogd bãmbã, kɩt tɩ b sak Wẽnnaam, tɩ ka tũ ne goam ye.’ (1 Pɩyɛɛr 3:1, 2) Pag sã n tar manesem sõngo, tõe n kɩtame t’a sɩdã yɩ wʋmda, n pa namsd-a a tũudmã yĩng ye.

9. a) Bõe la pag tõe n maane, a sɩdã sã n wa maan bũmb tɩ pa ta a yam? b) Sagl-bʋg n be Tit 2:4, 5 pʋgẽ pagbã yĩnga?

⁹ Bõe la pag tõe n maane, a sɩdã sã n wa yeel  bũmb bɩ n maan bũmb tɩ pa ta a yam? A tõe n togsa a sẽn tagsde, la segd n yɩɩ ne waoogre. Wala makre, a Saara ra yeela bũmb sẽn pa noom a Abrahaam, la a Zeova yeela a Abrahaam yaa: “Maan bũmb nins fãa a Saara sẽn kot foomã.” (Sɩngre 21:9-12) Rao sã n yãk yam n na n maan bũmb tɩ pa kɩɩsd Biiblã sẽn yetã, a pagã tog n teel-a lame. (Tʋʋmã 5:29; Efɛɛs-rãmbã 5:24) Pʋg-sõng geta a zakã neb yell neere. (Karm-y Tit 2:4, 5.) A sɩdã ne a kambã sã n yã t’a tʋmda wʋsg b neer yĩnga, b na n maneg n nong-a lame la b waoogd-a.—Yel-bũnã 31:10, 28.

10. Bõe la Biiblã yet welg-taabã la kãadmã kaoob wɛɛngẽ?

¹⁰ Kẽer sã n wa tar zu-loees kãadmã pʋgẽ, b yɩta tao-tao n welg taaba, bɩ n kao kãadmã. Biiblã yaool n yeelame tɩ ‘pag ra bas a sɩda,’ la tɩ “rao me ra yiis a pag ye.” (1 Korẽnt-rãmbã 7:10, 11, Wẽnnaam Sebre, 1983) Yell ninga tõe n wa kɩtame tɩ pag ne a sɩd welg taaba. Welgrã yaool n pa reem yell ye. La kãadmã kaoob yẽ? Biiblã wilgdame tɩ yaa pagã bɩ a sɩdã sã n yo bal la b tõe n kao kãadmã.—Matye 19:9.

11. Bõe la kambã rat n yɩɩda?

¹¹ Roagdba, bao-y sẽk wʋsg n sõsd ne y kambã. Y kambã ratame tɩ y be ne-ba. La b sẽn dat n yɩɩd yaa y zãms-b tɩ b bãng a Zeova.—Tõodo 6:4-9.

12. Bõe la roagdbã segd n maan n kogl b kambã?

¹² A Sʋɩtãan dũniyã lebgda wẽng n paasdẽ. Neb kẽer tõe n wa rat n maana yãmb kambã wẽnga,  wall n baood n na n kẽ ne-ba. Roagdb kẽer getame tɩ yaa toog tɩ b gom rẽ yell ne b kambã. La b segd n togsa b kambã nin-kãens sẽn maandã, la b sõng-b tɩ b bãng b sẽn tõe n zãag b mens ne-b to-to. Roagdba, yãmb tog n kogla y kambã. *—1 Pɩyɛɛr 5:8.

13. Kambã wubrã segd n yɩɩ wãn-wãna?

¹³ Roagdbã n tog n sõng b kambã tɩ b bãng b sẽn segd n zã b mens to-to. La wubrã segd n yɩɩ  wãn-wãna? Yaa sɩd tɩ biig toga ne kiblgu, la pa segd n yɩ weoogre, bɩ ne wẽnem ye. (Zeremi 30:11) Dẽnd y pa segd n kibl biig sũ-yikr pʋgẽ ye. Pa segd tɩ y no-goamã yɩ wa “zabr sʋʋga,” n pogend y kambã ye. (Yel-bũnã 12:18) Sõng-y kambã tɩ b bãng b sẽn segd n yɩ sakdbã võore.—Efɛɛs-rãmbã 6:4; Ebre-rãmbã 12:9-11; ges-y Vẽnegr 29 wã.

14, 15. Bõe yĩng tɩ kambã segd n sak b roagdbã?

¹⁴ A Zeezi saka a Ba wã wakat fãa, baa sã n da wa pa nana. (Luk 22:42; Zã 8:28, 29) A Zeova ratame tɩ kambã me sak b roagdbã.—Efɛɛs-rãmbã 6:1-3.

¹⁵ Kamba, baa y sã n wa getẽ tɩ yaa toog tɩ y sak y roagdbã, bɩ y tẽeg tɩ y sã n kell n sake, a Zeova ne y roagdbã sũy na n yɩɩ noogo. *—Yel-bũnã 1:8; 6:20; 23:22-25.

16. a) A Sʋɩtãan tũnugda ne bõe n dat tɩ kambã maan sẽn yaa wẽnga? b) Bõe yĩng tɩ y zo-rãmbã tog n yɩ neb sẽn nong a Zeova?

¹⁶ A Sʋɩtãan tõe n tũnuga ne y zo-rãmb bɩ kom-bɩɩs a taaba, n na n pirs yãmb tɩ y maan sẽn yaa wẽnga. A miime tɩ yɩl n tõog n da maan wẽngã yaa toogo. Wala makre, a Zakoob bi-pugl a Dina ra tara zo-rãmb sẽn pa nong a Zeova. La rẽ waa ne yɛl n kõ yẽ mengã la a zakã rãmba. (Sɩngre 34:1, 2) Yãmb zo-rãmbã sã n pa nong a Zeova, b tõe n wa ratame tɩ y maan bũmb a Zeova sẽn kisi, tɩ rẽ yaool n tõe n sãam yãmb ne y zakã rãmb sũyã, la sãam  Wẽnnaam sũuri. (Yel-bũnã 17:21, 25) Yaa rẽ yĩng la sẽn yaa tɩlɛ tɩ y zo-rãmbã yɩ neb sẽn nong a Zeova wã.—1 Korẽnt-rãmbã 15:33.

17. Bõe la zakã ned fãa segd n maane?

¹⁷ Zak neb sã n tũud Wẽnnaam sẽn yet bũmb ningã, b tõogd n gila sũ-sãams la zu-loees wʋsgo. Y sã n yaa pʋg-sɩda, bɩ y nong y pagã, la y ges a yelle. Y sã n yaa paga, bɩ y sak y sɩdã n waoog-a, la y rɩk pag ning yell b sẽn gom Yel-bũn 31:10-31 wã mak-sõngã. Y sã n yaa roagda, bɩ y sõng y kambã tɩ b nong a Zeova. (Yel-bũnã 22:6) Y sã n yaa ba, ‘ges-y y zakã yell neere.’ (1 Tɩmote 3:4, 5; 5:8) Kamba, sak-y y roagdbã. (Koloos-rãmbã 3:20) Ra yĩm-y tɩ zakã ned fãa tudgdame ye. Dẽ wã, bɩ y yɩ sik-m-mens rãmba, la y kot taab sugri. Hakɩɩka, a Zeova kõta zakã ned fãa sagls ne Biiblã maasem.