1, 2. Niki eki Yehova arikwendeza amaka?

YEHOVA RUHANGA niwe yaakozire omukoro gw’obushwere bw’okubanza. Baibuli neeyoreka ngu akahanga omukazi w’okubanza kandi “yaamureetera” omushaija. Adamu akashemererwa munonga reero yaagira ati: “Ogu n’eigufa eryaruga omu magufa gangye, kandi n’omubiri ogwaruga omu mubiri gwangye.” (Okutandika 2:22, 23) Eki nikyoreka ngu Yehova naayenda ngu abashweraine bashemererwe.

² Eky’obusaasi, abantu baingi tibaine kushemererwa omu maka gaabo. Kwonka Baibuli erimu emisingye mingi erikuhwera boona omu ka kutunga okushemererwa, kandi bakaba abasinguzi barikutuura hamwe.—Luka 11:28.

3, 4. (a) Omushaija ashemereire kutwariza ata omukazi we? (b) Ahabw’enki ni kikuru omushaija n’omukazi kusaasirana?

³ Baibuli neegira ngu omushaija murungi naatwariza omukazi we omu muringo gwa rukundo kandi ogw’ekitiinisa. Nyabura ’we shoma Abaefeso 5:25-29. Omushaija aine kuguma naatwariza omukazi we omu muringo gwa rukundo. Kandi naarinda omukazi we, amureeberera, kandi tarikumuhutaaza.

⁴ Kwonka shi omushaija ashemereire kukora ki omukazi we yaakora enshobe? Abashaija nibagambirwa bati: “Mukunde abakazi baanyu, murekye kubaitsa omwaga.” (Abakolosai 3:19) Abashaija, mwijukye ngu naimwe nimukora enshobe. Waaba nooyenda ngu Ruhanga akusaasire, oine  kusaasira omukazi waawe. (Matayo 6:12, 14, 15) Omushaija n’omukazi we baaba beteekateekire kusaasirana, nikiija kubahwera kugira obushwere oburimu okushemererwa.

5. Ahabw’enki omushaija aine kuha omukazi we ekitiinisa?

⁵ Yehova naayenda ngu omushaija ahe omukazi we ekitiinisa. Omushaija ashemereire kuteekateeka n’obwegyendesereza aha byetengo by’omukazi we. Eki ti kintu ky’okuzaanisa. Omushaija yaaba atarikutwariza omukazi we gye, Yehova naabaasa kwanga kuhurira okushaba kwe. (1 Petero 3:7) Yehova naatwara abantu nk’ab’omuhendo, ahabw’okugira ngu nibamukunda. Tarikukunda abashaija okukira abakazi.

6. Nikimanyisa ki omushaija n’omukazi kuba “omwe”?

⁶ Yesu akashoboorora ngu omushaija n’omukazi we nibaba ‘batakiri babiri kureka omwe.’ (Matayo 19:6) Buri omwe naaba ahamiire ahari mugyenzi we kandi barikwesigana. (Enfumu 5:15-21; Abaheburaayo 13:4) Abashaija n’abakazi bashemereire kufayo aha kyetengo ky’okuteerana batarikweyendeza. (1 Abakorinso 7:3-5) Omushaija aine kwijuka ngu ‘tihariho muntu oyanga omubiri gwe, kureka aguriisa, agucuma.’ N’ahabw’ekyo ashemereire kukunda omukazi we kandi akamureeberera. Okukira ekindi kintu kyona, omukazi naaba naayenda ngu iba amutwarize omu muringo gw’embabazi kandi ogwa rukundo.—Abaefeso 5:29.

7. Ahabw’enki eka eshemereire kugira orikugyebembera?

⁷ Buri ka eshemereire kugira omutwe, orikugyebembera kugira ngu abagirimu bakwatanise. Omu 1 Abakorinso 11:3 nihagira hati: “Mumanye ku omutwe gw’omushaija ari Kristo, n’omutwe gw’omukazi ku ari iba, kandi omutwe gwa Kristo ku ari Ruhanga.”

8. Omukazi naabaasa kuha ata iba ekitiinisa?

 ⁸ Buri mushaija naakora enshobe. Kwonka omukazi ku arikushagika ebi iba arikuba acwiremu kandi akakwatanisa nawe ayekundiire, eka yoona neegasirwa. (1 Petero 3:1-6) Baibuli neegira eti: “N’omukazi nawe ashemereire kutiina iba.” (Abaefeso 5:33) Kandi shi omushaija ku yaakuba atari mu nyikiriza emwe n’omukazi we? Nabwo omukazi ashemereire kuha iba ekitiinisa. Baibuli neegira eti: ‘Naimwe abakazi, mworobere mutyo baabaroimwe; ku haraabe hariho abatarikworobera kigambo kya Ruhanga, bahindurwe emitwarize y’abakazi baabo, bataine kigambo kyona eki babagambiire, ahabw’okureeba emitwarize yaanyu mirungi ey’okutiina Ruhanga.’ (1 Petero 3:1, 2) Eky’okureeberaho kirungi ky’omukazi nikibaasa kuhwera iba kwetegyereza kandi akaha ekitiinisa ebi arikwikiriza.

9. (a) Omukazi ashemereire kukora ki yaaba ataikirizaine na iba? (b) Ni buhabuzi ki oburikuhwera abakazi oburi omu Tito 2:4, 5?

⁹ Omukazi naabaasa kukora ki yaaba ataikirizaine na iba? Ashemereire kuhayo ekiteekateeko kye omu muringo ogurikworeka ngu naamuha ekitiinisa.  Nk’eky’okureeberaho, Saara akagamba ekintu eki Abrahamu atarakunzire, kwonka Yehova akamugira ati: “Omworoobere.” (Okutandika 21:9-12) Abashaija Abakristaayo tibarikukira kucwamu ebirikuhenda emisingye ya Baibuli, n’ahabw’ekyo abakazi baabo bashemereire kubashagika. (Ebyakozirwe 5:29; Abaefeso 5:24) Omukazi murungi naareeberera eka. (Shoma Tito 2:4, 5.) Iba n’abaana baaba nibareeba oku arikukora n’amaani ahabwabo, nibaija kweyongyera kumukunda n’okumuha ekitiinisa.—Enfumu 31:10, 28.

10. Baibuli neegamba ki aha kwangana n’okugaitururwa?

¹⁰ Obumwe abashweraine nibarahuka kucwamu kwangana nari kutaana. Kwonka, Baibuli neegira eti: “Omukazi arekye kutaana na iba” kandi “omushaija atarishenda omukazi we.” (1 Abakorinso 7:10, 11) Hariho embeera zigumire ezirikubaasa kureetera omwe aha bashweraine kwangana, kwonka egi ti nshonga y’okuzaanazaanisa. Kandi shi okutaana nari okugaitururwa? Baibuli neeyoreka ngu enshonga yonka ehikire erikubaasa kureetera abashweraine kugaitururwa, n’omwe aharibo yaashambana.—Matayo 19:9.

11. Niki eki abaana barikwetenga okukira ekindi kintu kyona?

¹¹ Abazaire baine kumara obwire bwingi n’abaana baabo nk’oku kirikubaasika. Abaana baabo nibabeetenga, kandi okukira ekindi kintu kyona, baine kubeegyesa ebirikukwata ahari Yehova.—Eky’Ebiragiro 6:4-9.

12. Abazaire bashemereire kukora ki kurinda abaana baabo?

¹² Ensi ya Sitaane neeyeyongyera kuba mbi, kandi nihabaasa kuba hariho abantu abarikwenda kukora kubi abaana baitu, nangwa n’okubatoroboza. Abazaire abamwe nikibagumira kugamba aha nshonga egi. Kwonka  abazaire baine kurabura abaana baabo aha bikwatiraine n’abantu nk’abo kandi bakabeegyesa oku baine kubeetantara. Buzima, abazaire mwine kurinda abaana baanyu. *—1 Petero 5:8.

13. Abazaire nibabaasa kwegyesa bata abaana baabo?

¹³ Abazaire baine obujunaanizibwa bw’okwegyesa abaana baabo oku baine kutwaza. Noobaasa kwegyesa ota abaana baawe? Oine kubatendeka, kwonka toine kubahana omu muringo gw’omwaga. (Yeremia 30:11)  N’ahabw’ekyo toshemereire kuhana abaana baawe oine ekiniga. Ebigambo byawe tibishemereire kuba “ebirikucumita nka rurara” kandi ebirikukora kubi. (Enfumu 12:18) Yegyesa abaana baawe kwetegyereza ahabw’enki baine kukworobera.—Abaefeso 6:4; Abaheburaayo 12:9-11; reeba Ebirikukiraho 30.

14, 15. Ahabw’enki abaana baine kworobera abazaire baabo?

¹⁴ Yesu akaba ayorobera Ishe n’obu kyabaire kiba kitoorobi. (Luka 22:42; Yohaana 8:28, 29) Kandi Yehova naayenda ngu abaana boorobere abazaire baabo.—Abaefeso 6:1-3.

¹⁵ Abaana, n’obu mwakuba nimureeba ngu kigumire kworobera abazaire baanyu, mwijukye ngu mwaborobera, nikibashemeza hamwe na Yehova. *—Enfumu 1:8; 6:20; 23:22-25.

16. (a) Sitaane naateeraho ata kureetera abaana kwohibwa kukora ebibi? (b) Ahabw’enki kiri kikuru kutoorana abanywani abarikukunda Yehova?

¹⁶ Omuregi naabaasa kukoresa banywani baawe n’abantu abandi abato kukureetera kukora ekitahikire. Naamanya ngu nikibaasa kuguma kwangira okugyemeserezibwa. Nk’eky’okureeberaho, muhara wa Yakobo orikwetwa Dina akaba aine abanywani abaabaire batarikukunda Yehova. Eki kikamureetera oburemeezi bwingi n’eka ye. (Okutandika 34:1, 2) Banywani baawe baaba batarikukunda Yehova, nibabaasa kuteeraho kukureetera kwohibwa kukora ekintu eki Yehova arikwanga, ekirikubaasa kukureetera obusaasi bwingi, kikashaasha ab’eka  yaanyu, na Ruhanga. (Enfumu 17:21, 25) Egi niyo nshonga ahabw’enki oshemereire kutunga abanywani abarikukunda Yehova.—1 Abakorinso 15:33.

17. Buri omwe omu ka aine bujunaanizibwa ki?

¹⁷ Abari omu ka boona baakuratira obuhabuzi bwa Ruhanga, nibeetantara oburemeezi bwingi. N’ahabw’ekyo, ku oraabe ori omushaija oshwaire, kunda omukazi waawe kandi omutwarize gye. Ku oraabe ori omukazi oshwairwe, yorobera baro kandi omuhe ekitiinisa otooreze n’omukazi orikugambwaho omu Enfumu 31:10-31. Ku oraabe ori omuzaire, yegyesa abaana baawe kukunda Ruhanga. (Enfumu 22:6) Ku oraabe ori omuzaire, yebeembera eka yaawe omu muringo murungi. (1 Timoseo 3:4, 5; 5:8) Kandi abaana, mworobere abazaire baanyu. (Abakolosai 3:20) Ijuka ngu buri omwe omu ka naabaasa kukora enshobe, n’ahabw’ekyo mube abacureezi kandi musaasirane. Buzima, Baibuli erimu obuhabuzi bwa Yehova oburikuhwera buri omwe omu ka.