1, 2. Кӕцӕй ӕй зонӕн, Йегови уотӕ ке фӕндуй, цӕмӕй бийнонтӕ амондгун уонцӕ?

ЙЕГОВӔ фиццаг нӕлгоймаг ӕма силгоймаги цард ку байеу кодта, уӕд бундор ӕрӕвардта бийнонти цардӕн. Библий финст ӕй, зӕгъгӕ, Хуцау фиццаг силгоймаги ку сфӕлдиста, уӕд ӕй «адӕймагмӕ ӕрбакодта». Адам хъӕбӕр бацийнӕ кодта ӕма загъта: «Айӕ ӕй стӕг ме стӕгӕй, ӕма бауӕр мӕ бауӕрӕй» (Райдайӕн 2:22, 23). Бӕрӕг ӕй, Йегови уотӕ ке фӕндуй, цӕмӕй лӕг ӕма уосӕ амондгун цард кӕнонцӕ.

² Гъигагӕн ӕй берӕ адӕн зонгӕ дӕр нӕ кӕнунцӕ, бийнонти медӕг амондгун цард кӕнун ци ӕй, уой. Фал Библий ес берӕ хуарз унаффитӕ бийнонтӕй алкӕмӕндӕр. Ӕма уонӕмӕ гӕсгӕ ку архайонцӕ, уӕд уодзӕнцӕ ӕнгом ӕма кӕрӕдзей уарздзӕнцӕ (Лукай 11:28).

3, 4. а) Лӕг ӕ уосӕн куд гъӕуама уа? б) Лӕг ӕма уосӕ кӕрӕдземӕн цӕмӕн гъӕуама хатир кӕнонцӕ?

³ Библи куд зӕгъуй, уомӕ гӕсгӕ хуарз лӕг гъӕуама ӕ уоси уарза ӕма ин кадӕ кӕна. Дӕ хуарзӕнхӕй, бакӕсай Ефесӕгтӕмӕ 5:25–29. Лӕг гъӕуама ӕ уоси алкӕддӕр уарза, гъӕуай ӕй кӕна ӕма ибӕл тухса. Удта ин гъӕуама ӕфхуӕрӕн дзубандитӕ ма кӕна ӕма имӕ ӕ къох ма еса.

 ⁴ Фал уосӕ рӕдуйгӕ ку кӕна, уӕдта? Хуцау лӕгтӕн зӕгъуй: «Алкӕддӕр уарзетӕ уӕ уостити ӕма сӕмӕ карз ма уотӕ» (Колоссӕгтӕмӕ 3:19). Лӕгтӕ, уӕхуӕдтӕ дӕр рӕдуйгӕ ке кӕнтӕ, уой ма иронх кӕнтӕ. Ӕма уӕ кӕд фӕндуй, цӕмӕй уин Хуцау хатир кӕна, уӕд сумах дӕр гъӕуама уӕ уоститӕн хатир кӕнайтӕ (Матфеййи 6:12, 14, 15). Лӕг ӕма уосӕ кӕрӕдземӕн сӕ рӕдудтитӕ ку хатир кӕнонцӕ, уӕд амондгундӕр уодзӕнцӕ.

5. Лӕг ӕ уосӕн цӕмӕн гъӕуама кадӕ кӕна?

⁵ Йеговӕ лӕгтӕн фӕдзӕхсуй, цӕмӕй сӕ уоститӕн кадӕ кӕнонцӕ. Лӕг гъӕуама сагъӕс кӕна, ӕ бийнойнаги ци гъӕуй, уобӕл, зӕгъӕн, хуӕруйнаг кенӕ дарӕс. Удта гъӕуама ӕ хӕццӕ радзубандитӕ кӕнунмӕ рӕстӕг ера, цӕмӕй ин ӕ сагъӕстӕ хуӕздӕр лӕдӕра. Лӕг ӕ уосӕн лӕгъуз ку уа ӕма ибӕл ку нӕ мӕтӕ кӕна, уӕд ин Йеговӕ ӕ кувдтитӕ дӕр нӕбал игъосдзӕй (1 Петури 3:7). Йеговӕн хъазар ӕнцӕ, уарзгӕ ’й ка кӕнуй, етӕ. Ӕма ӕ цӕсти нӕлгоймагӕн ци кадӕ ес, уӕхӕн кадӕ ес силгоймагӕн дӕр.

6. Лӕг ӕма уосӕ еу бауӕр ке ’нцӕ, е куд лӕдӕргӕ ’й?

⁶ Йесо загъта, зӕгъгӕ, лӕг ӕма уосӕ «дууӕ нӕбал ӕнцӕ, фал – еу бауӕр» (Матфеййи 19:6). Етӕ гъӕуама кӕрӕдзебӕл еузӕрдон уонцӕ ӕма кӕрӕдзебӕл гадзирахаттӕй макӕд цӕуонцӕ (Ӕмбесӕндтӕ 5:15–21; Дзиуиттӕгтӕмӕ 13:4). Нӕлгоймаг ӕма силгоймаги астӕу ка фӕууй, еци гъуддаги лӕг ӕма уосӕ гъӕуама кӕрӕдзей сагъӕс кӕнонцӕ, алке ӕхе сагъӕс нӕ, фал (1 Коринфӕгтӕмӕ 7:3–5). Лӕг гъӕуама ӕ зӕрдӕбӕл дара, «ӕ бауӕрӕй е ’сӕфт [ке] некӕд неке уидта, фал имӕ алкедӕр зелуй ӕма ’й боц даруй». Ӕма уӕд  ӕ уоси дӕр гъӕуама уарза ӕма ’й боц дара. Уосӕн уомӕй ӕхцӕуӕндӕр неци фӕууй, ӕ лӕг имӕ фӕлмӕнӕй ку фӕдздзоруй ӕма ’й берӕ ку фӕууарзуй, уӕд (Ефесӕгтӕмӕ 5:29).

7. Бийнонтӕн хестӕр цӕмӕн гъӕуама уа?

⁷ Алли бийнонтӕн дӕр гъӕуама уа хестӕр, кенӕ хецау, гъома син разамунд ка дӕтдзӕй, е, цӕмӕй бийнонтӕй алкедӕр ӕ ихӕстӕ хуарз ӕнхӕст кӕна. Библий 1 Коринфӕгтӕмӕ 11:3 финст ӕй: «Алли нӕлгоймагӕн дӕр ӕ хецау ӕй Киристе, силгоймагӕн ӕ сӕрихецау ӕй нӕлгоймаг, Киристейӕн ба ӕ хецау ӕй Хуцау».

8. Уосӕн ӕ бон куд ӕй ӕвдесун, ӕ лӕги ке нимайуй, уой?

⁸ Рӕдуйгӕ ка нӕ кӕнуй, уӕхӕн адӕймаг нӕййес. Фал уосӕ, ӕ лӕг ци унаффӕ рахӕссуй, уой хӕццӕ ку исарази уй ӕма ин ку фенхус кӕнуй, уӕд е пайда ӕрхӕссуй ӕгас бийнонтӕн дӕр (1 Петури 3:1–6).  Библий финст ӕй: «Уосӕ... гъӕуама ӕ лӕги нимайа» (Ефесӕгтӕмӕ 5:33). Фал лӕг ӕндӕр динбӕл хуӕст ку уа кенӕ Хуцаубӕл ку не ’ууӕнда, уӕдта? Уӕд дӕр ӕй ӕ бийнойнаг гъӕуама нимайа. Библий финст ӕй: «Уоститӕ, уӕ лӕгти коммӕ кӕсетӕ, цӕмӕй, Хуцауи дзурдӕн си коммӕгӕс ка нӕй, етӕ ӕнӕ дзурдтӕй уӕ уагӕ ӕма уе ’гъдауи фӕрци исуонцӕ коммӕгӕс, хуӕрзӕгъдау ке айтӕ ӕма сӕ ке нимайетӕ, уой уингӕй» (1 Петури 3:1, 2). Уосӕ Библий уагӕвӕрдтӕмӕ гӕсгӕ ку цӕра, уӕд лӕги дӕр, ка ’й зонуй, бафӕнддзӕй ӕ дини туххӕй фулдӕр базонун ӕма ин ӕ гъуди нимайун райдайдзӕй.

9. а) Уосӕ ӕ сӕрихецауи хӕццӕ арази ку нӕ уа, уӕд куд гъӕуама бакӕна? б) Титмӕ 2:4, 5 финст дзурдти уоститӕн цӕхуӕн унаффӕ ес?

⁹ Уосӕ ӕ лӕги хӕццӕ арази ку нӕ уа, уӕд ӕ бон ци ӕй бакӕнун? Ӕ бон ӕй ӕ гъуди уӕзданӕй балӕдӕрун кӕнун. Зӕгъӕн, еухатт Сарри гъудитӕ Авраами зӕрдӕмӕ нӕ фӕццудӕнцӕ, фал Йеговӕ Авраамӕн загъта: «Ба имӕ игъосӕ» (Райдайӕн 21:9–12). Лӕг ци унаффӕ рахӕсса, е Библий нихмӕ ку нӕ уа, уӕд ибӕл уосӕ гъӕуама исарази уа (Гъуддӕгтӕ 5:29; Ефесӕгтӕмӕ 5:24). Уомӕй уӕлдай ма, хуарз уосӕ тухсуй ӕ бийнонтӕбӕл. (Бакӕсӕ Титмӕ 2:4, 5.) Ӕма ӕ бийнонтӕбӕл куд тухсуй, уой ӕ лӕг ӕма ӕ сувӕллӕнттӕ ку уинонцӕ, уӕд ӕй фулдӕрӕй-фулдӕр уарздзӕнцӕ ӕма ин сӕ цӕсти фулдӕр кадӕ уодзӕй (Ӕмбесӕндтӕ 31:10, 28).

10. Библий хецӕн кӕнуни ӕма хецӕнтӕй цӕруни туххӕй ци финст ес?

¹⁰ Фӕууй уотӕ, ӕма лӕг ӕма уосӕ сагъӕс нӕ ракӕнунцӕ,  уотемӕй кенӕ еугур хецӕн раунцӕ кенӕ ба хецӕнтӕй цӕрун райдайунцӕ. Фал Библий финст ӕй, «уосӕ ӕ лӕгӕй ма рандӕ уӕд» ӕма «лӕг дӕр ӕ уоси ма ниууадзӕд», зӕгъгӕ (1 Коринфӕгтӕмӕ 7:10, 11). Еуӕй-еу уавӕрти лӕг ӕма уосӕ хецӕнтӕй цӕрун райдайунцӕ. Фал уӕхӕн унаффӕ рахӕссуни размӕ бал гъӕуама лӕмбунӕг расагъӕс кӕнонцӕ. Хецӕн кӕнуни туххӕй ба Библи ци зӕгъуй? Библи куд зӕгъуй, уомӕ гӕсгӕ лӕг ӕма уосӕн хецӕн кӕнуни барӕ ес ӕрмӕстдӕр еунӕг гъуддаги туххӕй – дӕ цардӕмбал дӕбӕл гадзирахаттӕй ку рацӕуа, уӕд (Матфеййи 19:9).

11. Сувӕллӕнтти тӕккӕ хъӕбӕрдӕр ци гъӕуй?

¹¹ Ниййергутӕ, уӕ сувӕллӕнтти хӕццӕ фулдӕр рӕстӕг ӕрвететӕ. Уӕ сувӕллӕнтти гъӕуй, цӕмӕй сӕ фарсмӕ уайтӕ. Тӕккӕ ӕхсидзгӕдӕр ба син ӕй, цӕмӕй син Йегови базонунмӕ ӕнхус кӕнайтӕ (Дуккаг закъон 6:4–9).

12. Ниййергути ци гъӕуй кӕнун, цӕмӕй сӕ сувӕллӕнтти багъӕуай кӕнонцӕ?

¹² Сайтани дуйне фуддӕрӕй-фуддӕр ке кӕнуй, уомӕ гӕсгӕ берӕ ес, сувӕллӕнтти гъӕуай кӕнун кӕмӕй гъӕуй, уӕхӕн адӕн. Кадӕртӕ си сувӕллӕнттӕн тухмиуӕ дӕр бакӕнунцӕ. Кӕд еуӕй-еу ниййергутӕн уӕхӕн гъуддӕгтӕбӕл дзорун зин фӕууй, уӕддӕр гъӕуама сӕ сувӕллӕнттӕн амононцӕ, уӕхӕн адӕнӕй сӕ бон куд ӕй сӕхе багъӕуай кӕнун, уой. Ниййергутӕ, уӕ сувӕллӕнтти гъӕуай кӕнтӕ * (1 Петури 5:8).

13. Ниййергутӕ сӕ сувӕллӕнтти куд гъӕуама ахур кӕнонцӕ?

¹³ Ниййергути ихӕс ӕй сӕ сувӕллӕнтти ахур кӕнун, цӕмӕй сӕхе дзӕбӕх дарун зононцӕ. Уомӕн куд ес гӕнӕн? Уӕ сувӕллӕнттӕн зунд амонетӕ, фал ӕнахъӕл ӕма гурумухъ ма уотӕ (Йереми 30:11). Мадта син зунд мӕстгунӕй макӕд амонетӕ. Уӕ дзурдтӕ «карди цӕфи хузӕн» ма уӕнтӕ ӕма син сӕ зӕрдитӕ ма ресун кӕнтӕ (Ӕмбесӕндтӕ 12:18). Уӕ сувӕллӕнттӕн лӕдӕрун кӕнтӕ, игъосгӕ уӕмӕ цӕмӕн гъӕуама кӕнонцӕ, уой (Ефесӕгтӕмӕ 6:4; Дзиуиттӕгтӕмӕ 12:9–11; кӕсӕ 30 уӕлӕнхасӕн).

14, 15. Сувӕллӕнттӕ сӕ ниййергутӕмӕ цӕмӕн гъӕуама игъосонцӕ?

¹⁴ Йесо алкӕддӕр ӕ Фидӕмӕ игъуста, е ин ӕнцон ку нӕ уидӕ, уӕд дӕр (Лукай 22:42; Иоанни 8:28, 29). Ӕма Йеговӕ сувӕллӕнттӕн дӕр фӕдзӕхсуй, цӕмӕй сӕ ниййергутӕмӕ игъосонцӕ (Ефесӕгтӕмӕ 6:1–3).

¹⁵ Сувӕллӕнттӕ, кӕд уин уӕ ниййергутӕмӕ игъосун зин ӕй, уӕд уин еу цидӕр банхус кӕндзӕй. Уӕ зӕрдӕбӕл даретӕ: уӕ ниййергутӕмӕ ку фегъосетӕ, уӕд Йегови зӕрдӕ дӕр рохс кӕнтӕ ӕма уони зӕрдитӕ дӕр * (Ӕмбесӕндтӕ 1:8; 6:20; 23:22–25).

16. а) Сайтан куд архайуй, цӕмӕй сувӕллӕнтти фӕррӕдуйун кӕна? б) Йегови ка уарзуй, уӕхӕн ӕмбӕлттӕ иссерун ӕхсидзгӕ цӕмӕн ӕй?

¹⁶ Сайтани бон ӕй де ’мбӕлттӕй ӕма иннӕ сувӕллӕнттӕй испайда кӕнун, цӕмӕй дин ести лӕгъуз  гъуддаг бакӕнун кӕна. Е ӕй зонуй, сӕ нихмӕ фӕллӕуун хъӕбӕр зин ке фӕууй. Зӕгъӕн, Иакови кизгӕ Динӕн адтӕй, Йегови ка нӕ уарзта, уӕхӕн ӕмбӕлттӕ. Ӕма уой туххӕй ӕхуӕдӕг дӕр ӕма ӕ бийнонтӕ дӕр устур маст бавзурстонцӕ (Райдайӕн 34:1, 2). Кӕд де ’мбӕлттӕ Йегови нӕ уарзунцӕ, уӕд дин тӕссаг ӕй, ке дӕ фӕррӕдуйун кӕндзӕнцӕ ӕма дин, Йеговӕ е ’сӕфт цӕмӕй уинуй, уӕхӕн ести ке бакӕнун кӕндзӕнцӕ. Е устур маст ӕрхӕсдзӕй дӕхецӕн дӕр, дӕ бийнонтӕн дӕр ӕма Хуцауӕн дӕр (Ӕмбесӕндтӕ 17:21, 25). Уомӕ гӕсгӕ дӕ гъӕуй, Йегови ка уарзуй, уони хӕццӕ лимӕн кӕнун (1 Коринфӕгтӕмӕ 15:33).

17. Бийнонтӕй алкӕбӕлдӕр цӕхуӕн ихӕстӕ ес?

¹⁷ Бийнонтӕй алкедӕр Хуцауи амундтӕмӕ гӕсгӕ ку архайа, уӕд сӕхе берӕ бӕллӕхтӕй ӕма зиндзийнӕдтӕй багъӕуай кӕндзӕнцӕ. Лӕгтӕ, уӕ уостити уарзетӕ, ӕма е уӕ гъуддӕгтӕй бӕрӕг уӕд. Уоститӕ, уӕ лӕгти нимайетӕ ӕма сӕмӕ игъосетӕ. Ӕмбесӕндти 31:10–31 ци хуарз уоси кой цӕуй, е уин фӕнзуйнаг уӕд. Ниййергутӕ, уӕ сувӕллӕнттӕн ӕнхус кӕнтӕ, цӕмӕй Йегови бауарзонцӕ (Ӕмбесӕндтӕ 22:6). Фидтӕлтӕ, уӕ бийнонтӕн хуарз унаффӕгӕнгутӕ уотӕ (1 Тимофеймӕ 3:4, 5; 5:8). Сувӕллӕнттӕ, сумах ба уӕ ниййергутӕмӕ игъосетӕ (Колоссӕгтӕмӕ 3:20). Алкедӕр ни рӕдуйгӕ ке кӕнуй, уой ма иронх кӕнтӕ, ӕма уомӕ гӕсгӕ сӕрниллӕг уотӕ ӕма кӕрӕдземӕй хатир коретӕ. Мадта куд фӕууидтан, уотемӕй Библий ӕцӕгӕйдӕр ес Йегови разамунд бийнонтӕй алкӕмӕндӕр.