1, 2. Antoy labay nen Jehova parad saray pamilya?

SI JEHOVA a Dios so angasal ed inmunan sanasawa. Ibabaga na Biblia ya ginawa to so unonan bii tan “inyakar tod laki.” Malikeliket si Adan kanian nibaga to: “Saya so pukel na saray pukel ko.” (Genesis 2:22, 23) Ipapanengneng na saya a labay nen Jehova ya maliket iray sanasawa.

² Makapaermen balet ta agbalot asali na dakel ya totoo so awalaan na maliket a pamilya. Balet, nabasa ed Biblia so dakel a prinsipyo ya makatulong ed amin ya membro na pamilya pian maliket ira tan walay pankakasakey da.​—Lucas 11:28.

3, 4. (a) Panon so nepeg ya pantrato na laki ed asawa to? (b) Akin et importante ya manperdonaan so sanasawa?

³ Ibabaga na Biblia a say maong ya asawan laki et nepeg ton aroen tan respetoen so asawa to. Ipangasin basaen so Efeso 5:25-29. Say asawan laki et nepeg a lanang ya maaro so pantrato to ed asawa to. Protektaan to, asikasoen to, tan agmanggawa na pakasakitan na asawa to.

⁴ Balet antoy gawaen na laki no nalingo so asawa to? Oniay bilin parad asawan lalaki: “Itultuloy yon aroen so kaasawaan yo tan agkayo magmamaliw a mapaspasnok ed sikara.” (Colosas 3:19) Asawan lalaki, tandaan yon nalilingo kayo met. Tan no labay yon perdonaen kayo na Dios, nepeg yon perdonaen so asawa yo. (Mateo 6:12, 14, 15) No mabulos ya manperdonaan so sanasawa, magmaliw a maliket so pamilya da.

5. Akin et nepeg ya pagalangan na laki so asawa to?

 ⁵ Labay nen Jehova ya pagalangan na laki so asawa to. Nepeg a nonoten ton maong iray pankaukolan na asawa to. Seryoso itan a bengatla. No aliwan maabig so pantrato na laki ed asawa to, ompan agdengelen nen Jehova iray pikakasi to. (1 Pedro 3:7) Papablien nen Jehova iray mangaaro ed sikato. Agto ipapasen ya mas importante iray lalaki nen saray bibii.

6. Akin ya say sanasawa et nibagan “sakey a laman”?

⁶ Impaliwawa nen Jesus ya say sanasawa et “aliwa la ran duara, noagta sakey a laman.” (Mateo 19:6) Matoor irad sakey tan sakey, tan agdan balot lokoen so asawa ra. (Proverbio 5:15-21; Hebreo 13:4) Nepeg ya agda isisiblet so seksual ya pankaukolan na balang sakey. (1 Corinto 7:3-5) Nepeg a tandaan na asawan laki ya “anggapoy toon bubusolen toy dilin laman to, noag ingen papakanen tan papablien to itan.” Kanian nepeg ton aroen tan pablien so asawa to. Manuna ed amin, labay na asawan bii ya naliknan inar-aro na asawa to tan maomaong ed sikato.​—Efeso 5:29.

7. Akin ya diad kada pamilya et kaukolan a walay ulo?

⁷ Diad kada pamilya et kaukolan a walay ulo ya mangigiya pian nagawaan na balang sakey so responsabilidad da. Ibabaga na Biblia diad 1 Corinto 11:3: “Say ulo na balang laki et say Kristo; tan say ulo na bii et say laki; tan say ulo na Kristo et say Dios.”

8. Panon ya nipanengneng na asawan bii ya talagan rerespetoen toy asawa to?

⁸ Amin ya asawan laki et nalilingo. Balet no suportaan na bii so desisyon na asawa to tan agnapipilitan ya mitulongan, nagunggonaan so interon pamilya. (1 Pedro 3:1-6)  Ibabaga na Biblia: “Say asawan bii et nepeg a walaan na aralem a respeto ed asawa to.” (Efeso 5:33) Panon to no dumay relihyon na asawa to? Kaukolan to nin siansia ya ipanengneng ya talagan rerespetoen toy asawa to. Ibabaga na Biblia: “Sikayo ran asawan bibii, manpasakop kayo ed asawa yo, pian no wala ray aliwan matulok ed salita, nayarin natangguyor ira ed kagagawa yo anggano agkayo mansalita, ta nanenengneng day maabig a kagagawa yo ya atekepan na aralem a respeto.” (1 Pedro 3:1, 2) No unoren na asawan bii iray prinsipyo na Biblia, nayarin natalosan na asawan laki ya importante iray papanisiaan na asawa to tan respetoen to iratan.

9. (a) Antoy nepeg ya gawaen na asawan bii no say desisyon na asawa to et duma ed labay to? (b) Anton bilin parad saray asawan bibii so nabasa ed Tito 2:4, 5?

⁹ Antoy nayarin gawaen na asawan bii no say desisyon na asawa to et duma ed labay to? Kaukolan ton ibaga so liknaan to diad marespeton paraan. Alimbawa, si Sara et walay imbaga ton aglabay nen Abraham, balet say kuan nen Jehova ed si Abraham: “Dengel ka ed  sikato.” (Genesis 21:9-12) Say Kristianon asawan laki et matalag ya manggawa na desisyon ya kontra ed Biblia, kanian nepeg ya onsuporta so asawan bii. (Gawa 5:29; Efeso 5:24) Say maong ya asawan bii et aasikasoen to so pamilya to. (Basaen so Tito 2:4, 5.) No nanenengneng na asawa tan ananak to ya sikatoy makulikulin mankikimey parad sikara, mas aroen tan respetoen da.​—Proverbio 31:10, 28.

10. Antoy ibabaga na Biblia nipaakar ed pansian tan pandiborsyo?

¹⁰ No maminsan, mandedesisyon ya tampol iray sanasawa ya mansian odino mandiborsyo ira. Balet ibabaga na Biblia ya “say asawan bii et nepeg ya agmisian ed asawa to” tan “say asawan laki et nepeg ya agto taynanan so asawa to.” (1 Corinto 7:10, 11) Wala ray nikaduman situasyon ya nayarin mansian so sanasawa, balet seryoso itan ya desisyon. Say pandiborsyo balet ey? Ipapanengneng na Biblia ya say saksakey a makatunongan a rason ya nayarin mandiborsyo so sanasawa et no say sakey ed sikara et akisekso ed agto asawa.​—Mateo 19:9.

11. Antoy manunan kaukolan na ananak?

¹¹ Atateng, anggad posible et dakel komon so panaon yon nakaiba iray ananak yo. Kaukolan kayo na ananak yo, tan say manunan kaukolan da ed sikayo et say pangibangat yo ed sikara na nipaakar ed si Jehova.​—Deuteronomio 6:4-9.

12. Antoy nepeg ya gawaen na atateng pian naprotektaan da iray ananak da?

¹² Lalon onuuges so mundo nen Satanas, tan wala ray totoo ya ompan labay dan sakitan iray ananak tayo tan abusoen ira ed seksual a paraan. Wala ray atateng ya mairap dan itongtong iya ed ananak da. Balet nepeg ya  pasakbayan na atateng iray ananak da nipaakar ed ontan iran totoo, tan ibangat ira no panon iran makapaliis. Atateng, nepeg yon protektaan iray ananak yo. *—1 Pedro 5:8.

13. Panon ya bangatan na atateng iray ananak da?

¹³ Responsabilidad na atateng ya ibangat so maong ya ugali ed ananak da. Panon yon bangatan iray ananak yo? Kaukolan na ananak so panangipasal, balet nepeg ya aliwan maruksa odino ansakit so panangipetek yo.  (Jeremias 30:11) Kanian agyo didisiplinaen iray ananak yo no onsasanok kayo ni. Agkayo mangibabalikas na saray salita ya “singa saray saksak na espada” tan nasakitan ira. (Proverbio 12:18) Bangatan yo ray ananak yon natalosan no akin ya kaukolan day magmaliw ya maunor.​—Efeso 6:4; Hebreo 12:9-11; nengnengen so Kaaruman ya Impormasyon 30.

14, 15. Akin et nepeg ya unoren na ananak iray atateng da?

¹⁴ Lanang ya uunoren nen Jesus so Ama to, anggano no maminsan et aliwan mainomay. (Lucas 22:42; Juan 8:28, 29) Labay nen Jehova ya unoren na ananak iray atateng da.​—Efeso 6:1-3.

¹⁵ Ananak, anggano naiirapan kayon unoren iray atateng yo, tandaan yo ya no maunor kayo, naliketan ed sikayo si Jehova tan saray atateng yo. *—Proverbio 1:8; 6:20; 23:22-25.

16. (a) Panon ya tutuksoen nen Satanas iray kabataan ya manggawa na aliwa? (b) Akin et importante ya say pikaaroan mo et saramay inaro day Jehova?

¹⁶ Sarag ya usaren na Diablo iray kakaarom tan arum nin kabataan pian tuksoen kan manggawa na aliwa. Amta to ya mairap itan ya labanan. Singa bilang, say anak nen Jacob ya si Dina et wala ray kaaro ton agmangaaro ed si Jehova. Nanresulta itan ed dakel ya problema to tan ed pamilya to. (Genesis 34:1, 2) No saray kaarom et agda inaro si Jehova, ompan tuksoen da ka ya manggaway aglabay nen Jehova, tan nayarin lapud satan et nasakitan kan maong, pati say pamilyam, tan say Dios. (Proverbio 17: 21, 25) Kanian importantin maong ya say pikaaroan mo et saramay inaro day Jehova.​—1 Corinto 15:33.

17. Antoy responsabilidad na kada membro na pamilya?

¹⁷ No unoren na kada membro na pamilya iray instruksion na Dios, napaliisan so gulo pati saray dakel ya problema. Kanian no sakey kan asawan laki, arom so asawam tan ipatnag moy panangarom diad panagtratom ed sikato. No sakey kan asawan bii, respetom so asawam tan manpasakop kad sikato, tan alig moy alimbawa na asawan bii ya abitla ed Proverbio 31:10-31. No sakey kan ateng, ibangat mo ray anak mo ya aroen so Dios. (Proverbio 22:6) No sakey kan ama, nepeg ya ‘maabig so panangidaulom’ ed pamilyam. (1 Timoteo 3:4, 5; 5:8) Tan sikayo ran ananak, unor yo ray atateng yo. (Colosas 3:20) Tandaan ya nalilingo so kada membro na pamilya, kanian kaukolan so manpaabeba tan onkerew na panamerdona. On, nabasa ed Biblia so bilin nen Jehova parad kada membro na pamilya.