1،‏ 2.‏ یہوواہ خدا ہر گھرانے لئی کیہہ چاہندا اے؟‏

دُنیا دی سب توں پہلی شادی کنہے کرائی؟‏ یہوواہ خدا نے۔‏ خدا سب توں پہلی عورت حوا نُوں بنا کے آدم کول لیایا۔‏ آدم اوس عورت نُوں ویکھ کے اینے خوش ہوئے کہ اوہناں نے کہیا کہ ہُن تے ایہہ میری ہڈیاں وچوں ہڈی تے میرے گوشت وچوں گوشت اے۔‏ (‏پیدایش 2:‏22،‏ 23‏)‏ ایس توں پتہ چلدا اے یہوواہ خدا چاہندا اے کہ ویائےورے لوک خوش رہن۔‏

² ایہہ بڑے دُکھ دی گل اے کہ اَج کل بوہت سارے ویائےورے لوک اپنی زندگی توں خوش نئیں۔‏ پر خدا دے کلام چ بوہت سارے ایہو جہے اصول پائے جاندے نیں جنہاں تے عمل کر کے خاوند،‏ بیوی تے بچے اپنے گھرانے نُوں خوشیاں نال بھر سکدے نیں۔‏—‏لُوقا 11:‏28‏۔‏

3،‏ 4.‏ (‏الف)‏ اِک خاوند نُوں اپنی بیوی نال کِنج پیش آؤنا چاہی دا اے؟‏ (‏ب)‏ میاں بیوی نُوں اِک دُوجے دِیاں غلطیاں نُوں معاف کیوں کرنا چاہی دا اے؟‏

³ پاک کلام دَسدا اے کہ خاوند نُوں اپنی بیوی نال پیار تے عزت نال پیش آؤنا چاہی دا اے۔‏ اِفسیوں 5:‏25-‏29 نُوں پڑھو۔‏ اوہنوں چاہی دا اے کہ اپنی بیوی نُوں پیار کرے،‏ اوہدی حفاظت کرے،‏ اوہدا خیال رکھے تے کوئی ایہو جیہا کم نہ کرے جدے توں بیوی نُوں نقصان ہووے۔‏

⁴ پر جے بیوی کولوں کوئی غلطی ہو جائے تے فیر؟‏ بائبل چ خاونداں نُوں ہدیت کیتی گئی اے کہ اپنی اپنی بیوی نال پیار کردے رہن تے اوہدے تے سختی نہ کرن۔‏ (‏کُلسّیوں 3:‏19‏)‏ اِک خاوند نُوں یاد رکھنا چاہی دا اے کہ اوہدے کولوں وی غلطی ہو سکدی اے تے جے اوہ چاہندا اے کہ خدا اوہنوں معاف کرے تے فیر اوہنوں وی اپنی بیوی نُوں معاف کرنا چاہی دا اے۔‏ (‏متی 6:‏12،‏ 14،‏ 15‏)‏ جدوں میاں بیوی اِک دُوجے نُوں معاف کردے نیں تے اوہناں دی زندگی چ خوشیاں آ سکدیاں نیں۔‏

5.‏ اِک خاوند نُوں اپنی بیوی دی عزت کیوں کرنی چاہی دی اے؟‏

 ⁵ یہوواہ خدا چاہندا اے کہ اِک خاوند اپنی بیوی دی عزت کرے۔‏ اوہنوں ایس گل دا خیال رکھنا چاہی دا اے کہ اوہدی بیوی دِیاں لوڑاں کیہہ نیں۔‏ ایہہ بڑی اہم گل اے کیونکہ جے اوہ اپنی بیوی نال چنگا سلوک نئیں کردا تے شاید یہوواہ خدا اوہدی دُعا نہ سُنے۔‏ (‏1-‏پطرس 3:‏7‏)‏ یہوواہ خدا ہر اوس انسان نُوں پسند کردا اے جیہڑ‌ا اوہنوں پیار کردا اے بھانویں اوہ کوئی بندہ ہووے یاں عورت۔‏

6.‏ ایس گل دا کیہہ مطلب اے کہ میاں بیوی دو نئیں سگوں اِک نیں؟‏

⁶ یسوع مسیح نے کہیا سی کہ میاں بیوی دو نئیں سگوں اِک نیں۔‏ (‏متی 19:‏6‏)‏ ایہدا مطلب اے کہ میاں بیوی نُوں ہمیشاں اِک دُوجے دے وفادار رہنا چاہی دا اے۔‏ (‏امثال 5:‏15-‏21؛‏ عبرانیوں 13:‏4‏)‏ اوہناں نُوں جنسی معاملے چ وی اِک دُوجے لئی عزت وکھاؤنی چاہی دی اے۔‏ (‏1-‏کُرنتھیوں 7:‏3-‏5‏)‏ خاوند نُوں یاد رکھنا چاہی دا اے کہ کوئی وی بندہ اپنے جسم توں نفرت نئیں کردا سگوں اوہنوں پیار کردا تے کھواندا پیاندا اے۔‏ ایس توں پتہ چلدا اے اِک خاوند نُوں اپنی بیوی نال پیار کرنا چاہی دا اے تے اوہدی فکر کرنی چاہی دی اے۔‏ اِک بیوی لئی ایس توں ودھ ہور کیہڑی گل ہو سکدی اے کہ اوہدا خاوند اوہنوں پیار کرے تے اوہدا خیال رکھے۔‏—‏اِفسیوں 5:‏29‏۔‏

7.‏ ہر گھرانے دا اِک سربراہ کیوں ہونا چاہی دا اے؟‏

⁷ پاک کلام چ لکھیا اے کہ ہر مرد دا سربراہ مسیح اے،‏ ہر عورت دا سربراہ مرد اے تے مسیح دا سربراہ خدا اے۔‏ (‏1-‏کُرنتھیوں 11:‏3‏)‏ ایس ایت توں ایہہ اصول سامنے آؤندا اے کہ ہر گھرانے دا اِک سربراہ ہونا چاہی دا اے جیہڑ‌ا ایہدی رہنمائی کرے تے ایہنوں اِک مُٹھ رکھے۔‏

8.‏ اِک بیوی کیویں ظاہر کر سکدی اے کہ اوہ اپنے خاوند دا دِلوں احترام کردی اے؟‏

⁸ غلطیاں تے ہر خاوند کولوں ہو سکدیاں نیں۔‏ پر جدوں بیوی اپنے خاوند دے فیصلے من دی اے تے خوشی نال اوہدا ساتھ دیندی اے تے گھر دے سارے جیاں نُوں فائدہ ہوندا اے۔‏ (‏1-‏پطرس 3:‏1-‏6‏)‏ بائبل چ لکھیا اے کہ بیوی اپنے خاوند دا دِلوں احترام کرے۔‏ (‏اِفسیوں 5:‏33‏)‏ پر جے خاوند دا  ایمان بیوی نالوں فرق ہووے تے فیر؟‏ بیوی نُوں فیر وی اپنے خاوند دا احترام کرنا چاہی دا اے۔‏ بائبل چ دَسیا گیا اے کہ بیوی اپنے خاوند دے تابع رہوے تاکہ جے اوہدا خاوند کلام نُوں نہ من دا ہووے تے اوہ اوہنوں کوئی گل کہے بغیر اپنے چال‌چلن نال جت لوے کیونکہ اوہ اپنیاں اَکھاں نال ویکھے گا کہ اوہدی بیوی نیک اے تے اوہدا احترام کردی اے۔‏ (‏1-‏پطرس 3:‏1،‏ 2‏)‏ جے بیوی بائبل دے اصولاں تے چلے گی تے فیر شاید خاوند وی اوہدے عقیدیاں نُوں سمجھن تے اوہدی عزت کرن لگ پوے۔‏

9.‏ (‏الف)‏ جے بیوی اپنے خاوند دے کسے فیصلے نال راضی نہ ہووے تے اوہنوں کیہہ کرنا چاہی دا اے؟‏ (‏ب)‏ طِطُس 2:‏4،‏ 5 چ بیویاں نُوں کیہہ مشورہ دِتا گیا اے؟‏

⁹ جے بیوی اپنے خاوند دے کسے فیصلے نال راضی نہ ہووے تے اوہنوں کیہہ کرنا چاہی دا اے؟‏ اوہ اپنے خاوند نُوں اپنی گل بڑے پیار تے عزت نال دَس سکدی اے۔‏ مثال دے طور تے اِک واری سارہ نے ابراہام نُوں کوئی گل کہی جیہڑ‌ی ابراہام نُوں پسند نہ آئی۔‏ پر یہوواہ خدا نے ابراہام نُوں کہیا کہ اوہ سارہ دی گل منن۔‏ (‏پیدایش 21:‏9-‏12‏)‏ جے خاوند دا فیصلہ پاک کلام دے اصولاں دے خلاف نئیں تے فیر بیوی نُوں اوہدا ساتھ دینا چاہی دا اے۔‏ (‏اعمال 5:‏29؛‏ اِفسیوں 5:‏24‏)‏ اِک چنگی بیوی اپنے  گھرانے دی ودھیا طریقے نال دیکھ‌بھال کردی اے۔‏ ‏(‏طِطُس 2:‏4،‏ 5 نُوں پڑھو۔‏)‏ جدوں اوہدا خاوند تے بچے ویکھدے نیں کہ اوہ اوہناں واسطے کِنّی محنت کردی اے تے اوہ اوہنوں ہور زیادہ پیار کردے نیں تے اوہدی ہور وی زیادہ عزت کردے نیں۔‏—‏امثال 31:‏10،‏ 28‏۔‏

10.‏ پاک کلام چ میاں بیوی دے اِک دُوجے توں وَکھرے ہون یاں طلاق لین بارے کیہہ دَسیا گیا اے؟‏

¹⁰ کدی کدار کجھ ویائےورے لوک سوچے سمجھے بغیر ای اِک دُوجے توں وَکھرے ہون یاں طلاق لین دا فیصلہ کر لیندے نیں۔‏ پر بائبل چ دَسیا گیا اے کہ بیوی اپنے خاوند نُوں چھڈ کے چلی نہ جائے تے خاوند وی اپنی بیوی نُوں چھڈ کے چلا نہ جائے۔‏ (‏1-‏کُرنتھیوں 7:‏10،‏ 11‏)‏ کدی کدی میاں بیوی کجھ بوہت ای خراب حالتاں چ اِک دُوجے توں وَکھرے ہون دا فیصلہ کر سکدے نیں۔‏ پر اوہناں نُوں ایہہ فیصلہ بوہت ای سوچ سمجھ کے کرنا چاہی دا اے۔‏ جتھوں تک طلاق لین دی گل اے تے ایہدے بارے پاک کلام چ دَسیا گیا اے کہ میاں بیوی صرف اوسے صورت چ طلاق لے سکدے نیں جے اوہناں وچوں کوئی اِک اپنے ساتھی دے علاوہ کسے ہور نال جنسی تعلق قائم کرے۔‏—‏متی 19:‏9‏۔‏

11.‏ بچیاں نُوں ماں پیو دی سب توں زیادہ لوڑ کیوں ہوندی اے؟‏

¹¹ بچیاں نُوں ماں پیو دی سب توں زیادہ لوڑ ہوندی اے تاکہ اوہ بچیاں نُوں یہوواہ خدا بارے سکھاؤن۔‏ ایس لئی ماں پیو نُوں چاہی دا اے کہ اوہ اپنے بچیاں نال زیادہ توں زیادہ وقت گزارن۔‏—‏اِستثنا 6:‏4-‏9‏۔‏

12.‏ ماں پیو نُوں اپنے بچیاں دی حفاظت کرن لئی کیہہ کرنا چاہی دا اے؟‏

¹² شیطان دی ایس دُنیا چ بُرائی ودھدی جا رہی اے۔‏ اَج کل کجھ لوک بچیاں نُوں نقصان پونچا سکدے نیں،‏ ایتھوں تک کہ اوہناں نال جنسی زیادتی وی کر سکدے نیں۔‏ کجھ لوکاں نُوں اپنے بچیاں نال ایس موضوع تے گل کرنا اوکھا لگدا اے۔‏ پر اپنے بچیاں نُوں خبردار کرنا ماں پیو دی ذمےداری  اے۔‏ اوہناں نُوں بچیاں نُوں سکھاؤنا چاہی دا اے کہ اوہ ایہو جہے لوکاں توں کیویں بچ سکدے نیں۔‏ ماپیو،‏ اپنے بچیاں دی حفاظت جی‌جان نال کرو۔‏ *‏—‏1-‏پطرس 5:‏8‏۔‏

13.‏ ماں پیو نُوں اپنے بچیاں نُوں چنگے طورطریقے کیویں سکھاؤنے چاہی دے نیں؟‏

¹³ ماں پیو دی ذمےداری اے کہ اوہ اپنے بچیاں نُوں چنگے طورطریقے سکھاؤن۔‏ پر اوہ اِنج کیویں کر سکدے نیں؟‏ اوہناں نُوں بچیاں دی تربیت پیار نال کرنی چاہی دی اے،‏ غصے تے سختی نال نئیں۔‏ (‏یرمیاہ 30:‏11‏)‏ ایس لئی جدوں توانوں غصہ چڑھیا ہووے تے اوہدوں بچیاں دی درستی نہ کرو کیونکہ تُسی  کدی وی نئیں چاہوو گے کہ تواڈیاں گلاں تواڈے بچیاں دے دِل نُوں تلوار وانگوں چیر دین۔‏ (‏امثال 12:‏18‏)‏ اپنے بچیاں نُوں سمجھاؤ کہ جے اوہ تواڈے فرمانبردار رہن گے تے اوہناں نُوں فائدہ ہوئے گا۔‏—‏اِفسیوں 6:‏4؛‏ عبرانیوں 12:‏9-‏11‏؛‏ کتاب دے آخر چ نکتہ نمبر 30 نُوں ویکھو۔‏

14،‏ 15.‏ بچیاں نُوں اپنے ماں پیو دی گل کیوں مننی چاہی دی اے؟‏

¹⁴ یسوع مسیح نے ہمیشاں اپنے باپ دی گل منی،‏ اوہدوں وی جدوں اوہناں واسطے اِنج کرنا اوکھا سی۔‏ (‏لُوقا 22:‏42؛‏ یوحنا 8:‏28،‏ 29‏)‏ یہوواہ خدا چاہندا اے کہ تُسی وی اپنے ماں پیو دی گل منو۔‏—‏اِفسیوں 6:‏1-‏3‏۔‏

¹⁵ کدی کدار شاید توانوں اپنے ماں پیو دا کہنا مننا اوکھا لگے۔‏ پر یاد رکھو کہ جے تُسی فرمانبردار رہوو گے تے صرف تواڈے ماں پیو ای نئیں سگوں یہوواہ خدا وی خوش ہوئے گا۔‏ *‏—‏امثال 1:‏8؛‏ 6:‏20؛‏ 23:‏22-‏25‏۔‏

16.‏ (‏الف)‏ شیطان،‏ بچیاں نُوں غلط کم کرن دی ہلاشیری کیویں دے سکدا اے؟‏ (‏ب)‏ ایہہ کیوں ضروری اے کہ تُسی یہوواہ خدا نال پیار کرن والے لوکاں نال دوستی کرو؟‏

¹⁶ شیطان تواڈے دوستاں دے ذریعے توانوں غلط کم کرن دی ہلاشیری دے سکدا اے۔‏ اوہنوں پتہ اے کہ دوستاں یاں ہانیاں نُوں نہ کہنا سوکھا نئیں ہوندا۔‏ مثال دے طور تے یعقوب دی دِھی دینہ نے ایہو جہے لوکاں نال دوستی کر لئی جیہڑ‌ے یہوواہ خدا نُوں پیار نئیں کردے سن۔‏ ایہدی وجہ توں دینہ تے اوہناں دے گھر والیاں نُوں چوکھا نقصان ہویا۔‏ (‏پیدایش 34:‏1،‏ 2‏)‏ جے تواڈے دوست وی یہوواہ خدا نُوں پیار نئیں کردے تے شاید اوہ توانوں کوئی ایہو جیہا کم کرن لئی کہن جیہڑ‌ا خدا نُوں پسند نئیں۔‏ جے تُسی اوہناں دے آکھے لگ جاؤ گے تے دُکھ صرف توانوں تے تواڈے ماں پیو نُوں ای نئیں سگوں  یہوواہ خدا نُوں وی ہوئے گا۔‏ (‏امثال 17:‏21،‏ 25‏)‏ ایس لئی ایہہ بوہت ضروری اے کہ تُسی اوہناں لوکاں نال دوستی کرو جیہڑ‌ے یہوواہ خدا نُوں پیار کردے نیں۔‏—‏1-‏کُرنتھیوں 15:‏33‏۔‏

17.‏ گھر دے ہر جی نُوں کیہہ کرنا چاہی دا اے؟‏

¹⁷ جدوں گھر دے سارے جی خدا دے کلام چ دِتے گئے اصولاں مطابق چلن گے تے اوہ بوہت ساریاں مشکلاں تے پریشانیاں توں بچ جان گے۔‏ ایس لئی اِک خاوند اپنی بیوی نُوں پیار کرے۔‏ بیوی اپنے خاوند دا احترام کرے تے اوہدے تابع رہوے۔‏ اوہ اپنے اندر اوس بیوی ورگیاں خوبیاں پیدا کرے جدا ذکر امثال 31:‏10-‏31 چ کیتا گیا اے۔‏ ماں پیو اپنے بچیاں نُوں خدا نال پیار کرنا سکھاؤن۔‏ (‏امثال 22:‏6‏)‏ اِک پیو اپنے گھرانے دی چنگی طرحاں رہنمائی کرے۔‏ (‏1-‏تیمُتھیُس 3:‏4،‏ 5؛‏ 5:‏8‏)‏ بچے اپنے ماں پیو دا کہنا منن۔‏ (‏کُلسّیوں 3:‏20‏)‏ یاد رکھو کہ غلطیاں گھر دے ہر جی کولوں ہو سکدیاں نیں ایس لئی اِک دُوجے نُوں معاف کرن تے اِک دُوجے توں معافی منگن لئی تیار رہوو۔‏ بےشک خدا دے کلام بائبل چ گھر دے ہر جی لئی ایہو جہے اصول دِتے گئے نیں جنہاں تے عمل کر کے گھرانے نُوں خوشیاں نال بھریا جا سکدا اے۔‏