1, 2. Tata Yaya, ¿imátaj familiáspaj munan?

 JEHOVÁ matrimoniút ʼruara. Biblia niáysh huámaj huarmít ʼruara y ckarípaj pusapora. Adán ancha cusicora y nera: «Cá al fin tullu tullusniymanta can y aicha aichaymanta» (Génesis 2:22, 23). Jehová munan casarasckas cusisckas canancunata.

² Pero, ashca persunas ni aicappas suj familia cusiscka aperancu. Pero Biblia ashca principius y consejus apin ima yanapacuyta atincu tucuycunát familiamanta allít pusacunancunápaj y cusisckas canancunápaj (Lucas 11:28).

3, 4. a) ¿Imaina ckosa huarminta tratanan tían? b) ¿Imajchus importante can ckosa y huarmin sujuan sujuan perdonacuchuncu?

³ Biblia nin suj alli ckosa huarminta munayuan y respetuan tratanan tían (Efesios 5:25-29 léey). Ckosa túcuy tiempu huarminuan munácoj canan tían. Protegenanpas tían, cuidanan tían y mana dañút ʼruapuyta.

⁴ Ckosa, ¿imátaj ʼruanan tían huarmin suj errorta cometeptin? Biblia ckosasta nipucun: «Huarmisniyquishta munas seguiychis y ama paycunaan sajrata piñacuychis» (Colosenses 3:19). Ckosas, yuyaychis ckamcunapas erroresta cometenquísh. Nátaj, munaspá Tata Yaya ckamcunata perdonananta, ckamcuna huarmisniyquishta perdonanayquísh tían (Mateo 6:12,  14, 15). Si ckosa y huarmin dispuestus tiancu perdonacuyta, astaan fácil caj ʼrin suj matrimoniu cusiscka apiyta.

5. ¿Imajchus ckosa huarminta honra ckonan tían?

⁵ Jehová suyan ckosa huarminta honra ckochun. Ckosa ancha cuentapi apinan tían huarmin precisasckanpi. Cá suj asuntu ancha seriu can. Si pay mana allít huarminta tratan, Jehová atin oraciunesninta mana uyaripuyta (1 Pedro 3:7). Jehová mana pensan ckaris astaan importantes casckancunata huarmismanta. Páypaj túcuy persunas ima payta munancu ancha valiosas cancu.

6. ¿Imát ninaan áicap nin ckosa y huarmin «sujlla aicha» canancunata?

⁶ Jishu yachachera ckosa y huarmin «na mana íshcay cancu, manapé sujlla aicha» (Mateo 19:6) Ckosa y huarmin sujuan sujuan leales cancu, y mana pipasuan engañanacuncu (Proverbios 5:15-21; Hebreos 13:4). Sujuan sujuan necesidares sexualesta complacecunancu tían y mana egoísta cayta (1 Corintios 7:3-5). Ckosa yuyanan tían «ni pipas ni aicappas cuerpunta chejnera, manapé, cariciasta ʼruapun y allít micuchin». Chayraycu ckosa huarminta munanan tían, y munayuan tratayta. Astaan desias suj huarmi ckosan amable y llullu payuan cachun (Efesios 5:29).

7. ¿Imajchus túcuy familias suj jefe precisan?

⁷ Túcuy familia precisan pillapas guiachun tucuycuna familiamanta ʼruanasta huasimanta ʼruanancunápaj, niyta munan, suj jefe. Biblia nin 1 Corintiospi 11:3 «Uma túcuy ckarimanta Cristo can; astaanpas, uma huarmimanta ckari can; y uma Cristomanta Tata Yaya can».

8. ¿Imaina suj huarmi ckosanta ashca respetu ckaachin?

 ⁸ Ciertu can túcuy ckosas erroresta cometencu. Pero, áicap huarmi ckosanpa decisionesninuan de acuerdu tían y dispuesta tían payta yanapayta, túcuy familia beneficiacun (1 Pedro 3:1-6). Biblia nin: «Huarmi ckosanta ashca respetút apinan tían» (Efesios 5:33). Pero, ¿si ckosan mana quiquin creencias apin? Pay igualllata ashca respetu ckaachinan tían. Biblia ninpas: «Huarmis, ckosasniyquishta casucuychis, chayna si huaquincunas mana casúcoj palabranta cancu, ganasckas canancunápaj mana nis ni suj palabra manapé huarmisníncup conductancunaraycu, paycuna testigus presenciales cas alli conductancumanta pura y ashca respetu» (1 Pedro 3:1, 2). Huarminpa alli ejemplun payta yanapayta atin paypa creenciasninta respetayta.

9. a) Huarmi, ¿imát ʼruayta atin mana de acuerdu tiaspá ckosanuan? b) ¿Ima consejus huarmíspaj taríysh Titopi 2:4, 5?

⁹ Huarmi, ¿imát ʼruayta atin mana de acuerdu tiaspá ckosanuan? Pensasckanta ninan tían pero respetuan. Por ejemplu, Sara Abrahanta suj imasti payta  mana gustapusckanta nipora. Pero Jehová Abrahanta nipora: «Nisckanta uyáriy» (Génesis 21:9-12). Huarmi ckosanpa decisionesninpi yanapanan tían, pero mana contranpi tiachun Biblia nisckanmanta (Hechos 5:29; Efesios 5:24). Astaanpas, suj alli huarmi familianmanta cuidanan tían (Tito 2:4, 5 léey). Áicap ckosan y huaasnin ckaancu túcuy ʼruasckanta paycunaraycu, astaan múnaj ʼrincu y astaan respétaj ʼrincu (Proverbios 31:10, 28).

10. Biblia, ¿imátaj nin separacuymanta y divurciacuymanta?

¹⁰ Huaquin matrimonius apuracuncu separacúypaj o divurciacúypaj. Pero Biblia nin «huarmi ckosanmanta mana ʼrinan tían» y «ckosa mana huarminta sackenan tían» (1 Corintios 7:10, 11). Ciertu can huaquin cutis ancha sajras problemas matrimoniupi tiayta atin cay ckosata y huarmít afectayta atin y separacuncu, pero cá decisión ancha seriu can. * Y, ¿divurciumanta imát nicun? Biblia yachachin suj rasonlla tiasckanta divurciacunancunápaj, can si suj persuna casarascka engañan siricus sujuan mana ckosa ni huarmi cas (Mateo 19:9).

11. Huaasniyquísh, ¿imátaj precisancu?

¹¹ Tatas, huaasniyquishuan tiaychis túcuy tiempu atisckayquishta, paycunami precisasunquísh. Huaasniyquísh precisancu ckamcuna Jehovamanta yachachicunayquishta (Deuteronomio 6:4-9).

12. Tatas, ¿imátaj ʼruanancu tían huaasnincunata cuidanancunápaj?

¹² Sapa punchau astaan maldar tían Supaypa mundunpi. Ashca persunas huaasniyshta dañút ʼruapucuyta munancu. Huahuitas hasta abusos sexuales usuyta  atincu. Huaquin tatáspaj mana chaynalla can huaasnincunaan chá imastismanta ʼrimayta. Pero tatas cá persunasmanta ʼrimapucunancu tían y yachachicuyta paycunamanta cuidacunancunápaj. Tatas, huaasniyquishta cuidanayquísh tían (1 Pedro 5:8). *

13. ¿Imaina tatas huaasnincunata yachachinancu tían?

¹³ Tatas responsables cancu huaasnincunata yachachiyta allít portacuyta. ¿Imaina ckam chayta ʼruayta atinqui? Aunque huaas precisancu reprendesckas cayta, pero ni aicappas sajrát reprendenayqui tían o ancha  sinchi cayta (Jeremías 30:11). Chaypachá ni aicappas reprendenayqui tían piñacus tiaspá. Dejuru mana dañút ʼruapucuyta munanqui sajras palabrastas nipucus y nanachipucus huajtas suj espada ina (Proverbios 12:18). Yanapácuy unanchayta imajchus casúcoj canancuna tían (Efesios 6:4; Hebreos 12:9-11; Ckáay Astaan yacháypaj 30, paginapi 223).

14, 15. ¿Imajchus huaas tatasnincunata casúcoj canancuna tían?

¹⁴ Jishu siempre Tatanta casúcoj cara, y hasta mana chaynalla captin (Lucas 22:42; Juan 8:28, 29). Jehová suyan huaas tatasnincunata casúcoj canancunata (Efesios 6:1-3).

¹⁵ Huaa ina, mana deben chaynalla cayta tatasniyquita casucuyta. Pero yuyanayqui tían: casúcoj captiyqué, Jehová y tatasniyqui ashcát cusiconckancu (Proverbios 1:8; 6:20; 23:22-25). *

16. a) ¿Imaina Súpay intentan mositus mana alli imastistas ʼruanancunápaj? b) ¿Imajchus alli can yanasusniyqui Jehovát munachuncu?

¹⁶ Súpay yanasusniyquita utilisayta atin y sujcuna mositusta intentáypaj mana alli imastistas ʼruanayquípaj. Pay yachan mana chaynalla cayta atin aguantayta ñitisuptincuna. Ckáaj ʼríysh Dínap ejemplunta, Jacob sipasnin. Pay apera yanasus ima mana Jehovát múnaj carancu y cay ashca problemas payta y familianta apamupora (Génesis 34:1, 2). Si yanasusniyqui Jehovát mana munancu, animásoj ʼrincu ʼruanayquípaj imastis ima Jehová chejnin. Chay ashca nanayta ckamta apamusoncka, familiayquita y Jehovatapas  (Proverbios 17:21, 25). Chayraycu ancha alli can yanasusniyqui canancunata persunas Jehovát munachuncu (1 Corintios 15:33).

17. ¿Ima responsabilidar apin sapa suj familiamanta?

¹⁷ Áicap familiamanta cajcuna Tata Yáyap consejusninta casucuncu, ashca problemastas evitancu. Chayraycu, si ckam ckosa canqui, huarmiyquita múnay y cariñuan trátay. Si huarmi canqui, ckosayquít respétay, decisionesninpi yanápay y huármip ejemplunta Proverbiosmanta 31:10-31 yachápiay. Huaas apispá, yachachícuy Tata Yayát munayta (Proverbios 22:6). Si ckosa y tata canqui, suj alli jefe familiamanta cay (1 Timoteo 3:4, 5; 5:8). Y ckamcuna huaas, tatasniyquishta casucuychis (Colosenses 3:20). Yuyanáysh tían tucuycuna familiamanta errores cometéysh, chayraycu humildes canáysh tían y perdonta mañanáysh tían. Imaina ckaaráysh, Biblia Jehóvap yachachinasnin apin familiápaj.