1, 2. Сар мангела о Јехова те овен о фамилие?

О ДЕВЕЛ керѓа о прво брако. И Библија вакерела аменге кај ов керѓа е прво џувља хем „анѓа ла е манушеске“. О Адам сине бут бахтало хем вакерѓа: „Аке кокало таро мло кокало хем мас таро мло мас“ (1. Мојсеева 2:22, 23). Акава сикавела аменге кај о Јехова мангела о мануша сој ко брако те овен бахтале.

² Жално тано со авдиве бут мануша нане лен бахтали фамилија. Ама, ки Библија иси бут советија со шај те поможинен сариненге ки фамилија те овен бахтале хем те уживинен заедно (Лука 11:28).

3, 4. а) Сар ваљани те понашинел пе о ром е ромњаја? б) Соске тано важно о ром хем и ромни те простинен јекх јекхеске?

³ И Библија вакерела кај о шукар ром ваљани те мангел пле ромња хем те поштујнел ла. (Читин Ефешаните 5:25-29.) О ром ваљани секогаш пле ромњаја те постапинел љубезно. Ов исто аѓаар ваљани те заштитинел ла, те аракхел ла, хем те на керел нешто со ка поврединел ла.

⁴ Со ваљани те керел о ром кеда и ромни керела грешке? И Библија вакерела е роменге: „Манген тумаре ромњен хем ма понашинен тумен ленцар грубо“ (Колошаните 3:19). Ма бистрен кај тумен да сар рома керена грешке. Адалеске, ако мангена о Девел те простинел туменге, тумен да мора те простинен тумаре ромњенге (Матеј 6:12, 14, 15). Кеда о ром хем  и ромни спремно простинена јекх јекхеске, тегани ка овел лен бахтало брако.

5. Соске ваљани о ром те поштујнел пле ромња?

⁵ О Јехова мангела о ром те поштујнел пле ромња. О ром ваљани те грижинел пе башо лакере потребе. Акава тано бут важно. Ако о ром на понашинела пе шукар пле ромњаја, тегани о Јехова нане те шунел лескере молитве (1. Петрово 3:7). Е Јеховаске тане скапоцена о мануша кола со мангена ле. Англо лескере јакхја о мурш хем и џувли тане иста.

6. Со значинела адава со ром хем и ромни тане „јекх тело“?

⁶ О Исус објаснинѓа кај о ром хем и ромни „нане повише дуј, него јекх тело“ (Матеј 19:6). Ола тане верна пле брачно партнереске хем никогаш нане те изневеринен јекх јекхе (Изреки 5:15-21; Евреите 13:4). О рома хем о ромња ваљани несебично те грижинен пе башо пумаре сексуална потребе (1. Коринќаните 7:3-5). Е роме ваљани те овел ле ки годи кај „никој на мрзинела пло тело, него хранинела ле хем аракхела ле“. Адалеске ов ваљани те мангел хем бут те ценинел пле ромња. Најважно јекхе ромњаке тано лакоро ром те овел љубезно лаја хем те мангел ла (Ефешаните 5:29). Кеда о ром хем и ромни тане законски венчиме, адава керела и фамилија те овел бахтали хем анела сигурност ленгере чхавенге. О христијања ваљани те поштујнен о законија ки држава хем законски те овен венчиме (Лука 2:1, 4, 5).

7. Соске секоле фамилијаке ваљани поглавари?

⁷ Секоле фамилијаке ваљани поглавари, некој со ка водинел и фамилија те шај те соработинен сарине заедно. И Библија ко 1. Коринќаните 11:3 вакерела: „Поглавари секоле ромеске тано о Христос, поглавари  е ромњаке тано о ром, а поглавари е Христосеске тано о Девел“.

8. Сар шај о ромња те сикавен хор поштовање пумаре роменге?

⁸ Секова ром керела грешке. Ама, кеда и ромни поддржинела е ромескири одлука хем спремно поможинела ле тегани цело фамилија иси ла корист (1. Петрово 3:1-6). Ки Библија пишинела: „И ромни ваљани хор те поштујнел пле роме“ (Ефешаните 5:33). Со ако о ром нане ле исто верување сар е ромњакоро? Ој ваљани понадари да хор те поштујнел ле. И Библија вакерела: „Аѓаар тумен, ромњален, шунен тумаре ромен, те шај тумаре понашибаја те добинен лен бизо лафи адален со на шунена е Девлескоро Лафи, кеда ка дикхен тумаро шукар понашање хем тумаро хор поштовање“ (1. Петрово 3:1, 2). О ромња пле шукар примереа шај те поможинен пумаре роменге те хаљовен хем те поштујнен ленгири вера.

9. а) Со ваљани те керел и ромни кеда на согласинела пе пле ромеа? б) Кова тано о совет башо ромња таро Тит 2:4, 5?

⁹ Со шај те керел и ромни кеда на согласинела пе пле ромеа? Ој ваљани те вакерел со мислинела  ко начин со ка сикавел кај поштуњела пле роме. На пример, и Сара вакерѓа нешто со е Авраамеске на свиџинѓа пе, ама о Јехова вакерѓа леске: „Шун лакоро гласо“ (1. Мојсеева 21:9-12). Кеда о ром анела одлука која со нане против адава со вакерела и Библија, тегани лескири ромни ваљани те поддржинел ле (Дела 5:29; Ефешаните 5:24). И шукар ромни грижинела пе пле фамилијаке. (Читин Тит 2:4, 5.) Кеда лакоро ром хем о чхаве ка дикхен кобор ој трудинела пе баши ленде, тегани панда повише ка манген ла хем ка поштујнен ла (Изреки 31:10, 28).

10. Со вакерела и Библија башо одвојбе хем башо развод?

¹⁰ Некогаш несаве брачна парија бут сигате одлучинена те одвојнен пе или те развединен пе. Ама, и Библија вакерела кај „и ромни на ваљани те џал песке пле роместар“ хем кај „о ром на ваљани те мукхел пле ромња“ (1. Коринќаните 7:10, 11). Ко несаве бут пхаре ситуацие о брачна парија шај те одвојнен пе, ама, адаја тани сериозно одлука. Кеда шај некој те развединен пе? И Библија вакерела аменге кај и единствено причина кеда шај некој те развединен пе тани ако јекх таро партнерија керела прељуба (Матеј 19:9).

11. Која тани најважно бути со ваљани те керен ла о родителија?

¹¹ О родителија ваљани те накхавен кобор со шај повише време пумаре чхавенцар. Тумаре чхавенге сиен потребна хем и најважно бути со ваљани те керен ла тани те сикавен лен башо Јехова (5. Мојсеева 6:4-9).

12. Со ваљани те керен о родителија те шај те заштитинен пумаре чхавен?

¹² О свето е Сатанаскоро овела са повише хем повише румимо хем иси несаве мануша со шај ка манген  те наштетинен тумаре чхавенге, чак шај сексуално те малтретиринен лен. Несаве родителенге тано пхаро те керен лафи пле чхавенцар баши акаја тема. Ама, о родителија ваљани те предупрединен пле чхавен баши асавке мануша хем те сикавен лен сар те избегинен лен. Тумен сар родителија мора те заштитинен тумаре чхавен (1. Петрово 5:8). *

13. Сар на ваљани о родителија те воспитинен пумаре чхавен?

¹³ Е родителен иси лен и одговорност те сикавен е чхавен сар те понашинен пе. Сар ваљани те керен  адава? О чхаве ваљани те воспитинен пе, ама адава на ваљани те керел пе ко јекх грубо или сурово начин (Еремија 30:11). Адалеске никогаш ма воспитин е чхавен кеда сиан хољамо. Сигурно ту на мангеа тле лафија „те посавен сар мачи“ хем те поврединен лен (Изреки 12:18). Сикав е чхавен те хаљовен соске ваљани те овен послушна (Ефешаните 6:4; Евреите 12:9-11). (Дикх и 30 фуснота.)

14, 15. Соске о чхаве ваљани те шунен пле родителен?

¹⁴ О Исус сине послушно пле Дадеске чак кеда сине леске бут пхаро (Лука 22:42; Јован 8:28, 29). О Јехова исто аѓаар родела е чхавендар те шунен пумаре родителен (Ефешаните 6:1-3).

¹⁵ Чхавален, чак кеда туменге пхаро те шунен тумаре родителен, ма бистрен, кеда сиен послушна, тегани о Јехова хем тумаре родителија тане бут бахтале (Изреки 1:8; 6:20; 23:22-25). *

16. а) Сар о Сатана пробинела те чхивел е тернен те керен нешто сој лошно? б) Соске тано важно те аракхе амала кола со мангена е Јехова?

¹⁶ О Сатана шај те користинел тле амален хем јавере тернен те чхивен ту те кере лошна буќа. Ов џанела кај тегани шај те овел туке пхаро те издржине. На пример, е Јаковескири чхај и Дина, сине ла амала со на мангена е Јехова. Адава анѓа баре проблемија лаке хем лакере фамилијаке (1. Мојсеева 34:1, 2). Ако иси тут амала кола со на мангена е Јехова, ола шај те теринен тут те кере нешто со мрзинела о Јехова, а адава ка анел бари дукх туке, тле фамилијаке  хем е Девлеске (Изреки 17:21, 25). Адалеске тано бут важно те аракхе амала кола со мангена е Јехова (1. Коринќаните 15:33).

17. Со ваљани секова члени ки фамилија те керел?

¹⁷ Кеда секова члени тари фамилија шунела о советија со авена таро Девел, тегани ка избегинен бут проблемија. О ром ваљани те мангел пле ромња хем те понашинел пе лаја љубезно. И ромни ваљани те поштујнел е роме хем те овел леске подложно, те овел сар и ромни сој опишими ко Изреки 31:10-31. О родителија ваљани те сикавен пумаре чхавен те манген е Девле (Изреки 22:6). О дад ваљани те водинел пле фамилија ко шукар начин (1. Тимотеј 3:4, 5; 5:8). О чхаве ваљани те шунен пумаре родителен (Колошаните 3:20). Ма бистрен кај секој ки фамилија грешинела, адалеске овен понизна хем простинен јекх јекхеске. Оја, ки Библија иси советија таро Јехова башо секова члени ки фамилија.