1. Правилно ли си йекх мруш тай йекх жувли те живинен заедно англал те подпишинен?

О ЙЕХОВА кергяс о първо семейство. И Библия сикавел, кай ов кергяс е първоне жувля тай „ингалгяс ла ко мануш“. О Адам зомкха бут лошангяс, кай пхенгяс: „Аке, давкха най–после си кокали ме кокалендар тай телос ме телостар.“ (Битие 2:22, 23) Кана кергяс давкха, о Йехова пранденкяргяс е Адамиес тай е Ева. Авдиес–да о Дел мангел о мруш тай и жувли те керен по браки законно, англал те започнинен те живинен заедно.

2. Со мангел о Йехова е семействоненге?

² О Йехова мангел о прандеме мануша те овен щастлива. Ама буте манушен нисар на уло щастливо семейство. Анди Библия иси бут съвекя, колато ка помагинен саворенге таро семейство те овен щастлива тай те лошанен те овен заедно. (Лука 11:28)

3, 4. а) Сар о ром требе те икерел пес пе ромняса? б) Соске си важно о ром тай и ромни те простинен йекх авереске?

³ И Библия пхенел, кай о лачшо ром требе те дехел тай те уважинел пе ромня. Четине Ефесяни 5:25–29. О ром винаги требе те сикавел дехиба кариг пе ромняте. Ов требе те защитинел ла, те дикхел лаке тай нисар те на дукхавел ла хоратенца, нито те марел ла.

⁴ Ама со требе те керел йекх ром, кана лескери ромни керел грешкес? И Библия пхенел е роменге: „Дехен тумаре ромниен тай ма нерверинен тумен лендар.“  (Колосяни 3:19) Ромален, ма бистерен, кай туме–да керен грешкес. Ако манген о Дел те простинел туменге, тогава туме–да требе те простинен тумаре ромниенге. (Матей 6:12, 14, 15) Кана о ром тай и ромни си готова те простинен йекх авереске, давкха ка помагинел те овел лен щастливо семейство.

5. Соске о ром требе те уважинел пе ромня?

⁵ О Йехова мангел о ром те уважинел пе ромня. О ром требе те мислинел сар те помагинел пе ромняке. Требе те грижинел пес те овел ла хабе тай шехя. Също требе те отделинел време, за те хоратинел ласа тай те опитинел пес те ахальовел лакере чувства. Давкха си бут важно. Ако о ром на икерел пес лачшес пе ромняса, о Йехова ащи те на шунел лескере молитвес. (1 Петър 3:7) О Йехова на керел разлика машкар о мруша тай о жувля. Он си ценна леске, ашал далкхеске кай дехен лес.

6. Со означинел о ром тай и ромни те овен „йекх телос“?

⁶ О Исусес пхенгяс, кай о ром тай и ромни „вече нанай дуй, а йекх телос.“ (Матей 19:6) Адалкхеске он требе те овен верна йекх авереске тай нисар те на пхирен йекх упрал авересте. (Притчи 5:15–21; Евреи 13:4) О рома тай о ромня требе те овен загрижиме далкхеске саве си ленгере партньориескере сексуална нуждес, а ма те дикхен само песке. (1 Коринтяни 7:3–5) О ром требе те помнинел, кай „никхой на мразинел по телос, но напротив, парварел лес тай дикхел леске“. Адалкхеске требе те дехел пе ромня тай те дикхел лаке. Най–важно йекхе ромняке си лакоро ром те икерел пес ласа мило тай дехимнаса. (Ефесяни 5:29)

7. Соске секоне семействосте требе те овел шеро?

⁷ Секоне семействосте требе те овел шеро, декхой, ковато помагинел секоне йекхеске те керел со требе,  за те овел щастливо о семейство. Андо 1 Коринтяни 11:3 и Библия пхенел: „Секоне ромескоро шеро си о Христос, е ромнякоро шеро си о ром, а е Христоскоро шеро си о Дел.“

8. Сар ащи и ромни те сикавел, кай бут уважинел пе ромес?

⁸ Секо ром керел грешкес. Ама кана и ромни подкрепинел пе ромескере решения тай вогиестар помагинел леске, саворен андо семейство ка овел полза. (1 Петър 3:1–6) И Библия пхенел: „И ромни требе бут те уважинел пе ромес.“ (Ефесяни 5:33) А ако лакере ромес нанай о съща вярвания? Ой пак требе бут те уважинел лес. Анди Библия пишинел: „Ромнялен, подчининен тумен тумаре роменге, за те ащи далкха, колато нанай послушна е словоске, те овен спечелиме би хоратенгоро, а далкхеса сар икерен тумен, като он дикхен тумаро лачшо поведение тай о дълбоко уважение, ковато сикавен.“ (1 Петър 3:1, 2) Е ромнякоро лачшо примери ащи те помагинел лакере ромеске те ахальовел, кай лакери вяра си важно лаке тай те уважинел ла.

9. а) Со ащи те керел и ромни, кана нанай съгласно пе ромеса? б) Саво съвети е ромниенге иси андо Тит 2:4, 5?

 ⁹ Со ащи те керел и ромни, кана нанай съгласно пе ромеса? Ащи те пхенел пе ромеске со мислинел, ама лакере хоратес требе те сикавен, кай уважинел лес. Например и Сара пхенгяс е Авраамиеске варесо, ковато ов на дехингяс, ама о Йехова пхенгяс леске: „Шун со пхенел туке.“ (Битие 21:9–12) Кана о ром решинел варесо, ковато нанай против далкхесте со сикавел и Библия, и ромни требе те подкрепинел лес. (Деяния 5:29; Ефесяни 5:24) И лачши ромни ка дикхел пе семействоске. (Четине Тит 2:4, 5.) Кана лакоро ром тай лакере чшаве дикхен кизом бут бути керел ой ленге, ка дехен тай ка уважинен ла панда по–бут. (Притчи 31:10, 28)

10. Со пхенел и Библия далкхеске о рома тай о ромня те мукен пес или те развединен пес?

¹⁰ Подекхана о рома тай о ромня хариестар мукен пес или развединен пес. Ама и Библия пхенел: „И ромни те на мукел пе ромес, ... о ром–да те на мукел пе ромня“. (1 Коринтяни 7:10, 11) Иси бут пхаре ситуациес, ашал коленге о ром тай и ромни ащи те решинен те мукен пес, ама давкха си сериозно решение. * А ащи ли те развединен пес? И Библия сикавел, кай давкха ащи те ачшол само ако йекх таро дуй жене пхирел упрал околесте. (Матей 19:9)

11. Со требел е чшавенге най–бут?

¹¹ Дадален тай даялен, овен тумаре чшавенца кизом ащи по–бут. Тумаре чшавен иси нужда тумендар тай о най–важно, ковато ащи те керен ленге, си те сикавен лен е Йеховаске. (Второзаконие 6:4–9)

12. Со требе те керен о дада тай о дая, за те пазинен пе чшавен?

 ¹² Е Бенгескоро светос ачшол са по–кханило тай иси десаве мануша, колато манген те керен кханилипе амаре чшавенге, даже те тормозинен лен сексуално. Десаве родителенге си пхаро те хоратинен далкхеске. Ама он требе те пхенен пе чшавенге, кай иси салка мануша тай те сикавен лен те нашен лендар. Дадален тай даялен, требе те пазинен тумаре чшавен. * (1 Петър 5:8)

13. Сар о дада тай о дая требе те сикавен пе чшавен?

¹³ Е даден тай е дайен иси и отговорност те сикавен пе чшавен те икерен пес лачшес. Сар ащи те  керес давкха? Въпреки кай ка требе те поправинес те чшавен, на требе те керес давкха грубо тай жестоко. (Йеремия 30:11) Адалкхеске нисар на требе те накажинес те чшавен, кана синян нервериме. На мангес тере хоратенца все едно те „хевлярес чшуряса“ тай те дукхавес лен. (Притчи 12:18) Помагине те чшавенге те ахальовен соске требе те овен послушна. (Ефесяни 6:4; Евреи 12:9–11; дикх и 30 бележка ко крайос далкхе лилесте)

14, 15. Соске о чшаве требе те шунен пе дадес тай пе дая?

¹⁴ О Исусес винаги шунелас пе Дадес даже кана на сине леске локо. (Лука 22:42; Йоан 8:28, 29) О Йехова мангел о чшаве–да те шунен пе дадес тай пе дая. (Ефесяни 6:1–3)

¹⁵ Чшавален, даже ако дикхьол туменге пхаро те шунен тумаре родителен, ма бистерен, кай кана синьен послушна, о Йехова тай тумаре родителя бут лошанен. * (Притчи 1:8; 6:20; 23:22–25)

16. а) Сар о Бенг изкушинел е тернен те керен кханиле букя? б) Соске си важно те аракхес амален, колато дехен е Йеховас?

¹⁶ О Бенг ащи те използвинел тере амален тай авере терне манушен, за те изкушинел тут те керес кханиле букя. Ов жанел, кай чука ка овел туке пхаро те издържинес. Например е Яковескере чшая, е Дина, сине амала, колато на дехенас е Йеховас. Давкха ангяс бут баро пхарипе лаке тай лакере семействоске. (Битие 34:1, 2) Ако тере амала на дехен е Йеховас, ащи те траден тут те керес варесо, ковато о Йехова мразинел тай ковато ка анел бари дукх туке, те семействоске тай е Девлеске. (Притчи 17:21, 25) Адалкхеске си бут важно те  аракхес амален, колато дехен е Йеховас. (1 Коринтяни 15:33)

17. Со требе те керел секо йекх таро семейство?

¹⁷ Кана саворе таро семейство керен давкха со пхенел аменге о Дел, ка нашен таро кханиле букя тай таро проблемя. Адалкхеске ако синян ром, дехе те ромня тай сикав то дехиба кариг лате. Ако синян ромни, уважине тай шун те ромес тай ов сар и ромни, колаке хоратинел пес андо Притчи 31:10–31. Ако синьен родителя, сикавен тумаре чшавен те дехен е Девлес. (Притчи 22:6) Ако синян дад, „ръководине лачшес“ то семейство. (1 Тимотей 3:4, 5; 5:8) Тай туме о чшаве, шунен тумаре дадес тай тумаре дая. (Колосяни 3:20) Ма бистерен, кай секо йекх таро семейство керел грешкес, адалкхеске требе те овен смирена тай те простинен йекх авереске. Ва, анди Библия си е Йеховаскере съвекя секоне йекхеске таро семейство.