1, 2. Bici Yehova alongîze omulala?

YEHOVA ye warhondezâgya obuhya bw’omulume n’omukazi murhanzi. Ebibliya edesire oku alêma omukazi murhanzi “anacimuhêkera nyamuntu.” Adamu acishînga bwenene, adêrha ntya: “Oyu lero, ali kavuha k’oku rhuvuha rhwani, na mubiri gw’oku mubiri gwani.” (Omurhondêro 2:22, 23) Oko kurhuyigirizize oku Yehova abalonzize abarholine babe n’omwishingo.

² Eby’okugayisa, kuli kubona oku bantu banji barhalamiri n’omwishingo omu milala yabo. Cikoki, omu Bibliya muli amakanuni gakarhabala abantu b’omulala boshi balame omu mwishingo.​—Luka 11:28.

3, 4. (a) Gurhi omulume ashinganine okukajirira mukage? (b) Bulya gurhi omulume n’omukazi bashinganine okukababalirana?

³ Ebibliya edesire oku omulume akwanine azigire mukage anamukenge. Osome Abefezi 5:25-29. Ensiku zoshi, omulume akwanine akajirira mukage ebintu byoshi n’obuzigire, amulange anamushibirire. Arhakag’imujira kubi.

⁴ Gurhi omulume akwanine ajire erhi mukage akajira amagosa? Ebibliya ebwizire abalume ntya: “Mugendekere mwazigira bakinywe, murhanabayumvizagya oburhe.” (Abakolosi 3:19, NWT) Akaba oli mulume, okakengera ensiku zoshi oku nawe, onajire amagosa. Erhi wakalonza Nnamahanga akubabalire, nawe okwanine okababalira mukawe. (Mateyo 6:12, 14, 15) Ly’omulala gwinyu guba  n’omwishingo, omulume n’omukazi bashinganine babe babidu okubabalirana.

5. Bulya gurhi omulume akwanine akenge mukage?

⁵ Yehova ahunyîre abalume bakenge bakabwo. Omulume ashinganine arhanye bwenene gurhi akahikiriza amalagirire ga mukage g’omubiri n’ag’ekandalala. Kuli kwa bulagirire bwenene. Bulya erhi akaba omulume arhali akolera mukage n’obuzigire, Yehova arhakayumvirhiza ensegero zage. (1 Petro 3:7) Oku Yehova azigira abalume, kw’anazigira abakazi. Arhali okuba mulume erhi mukazi, kw’okujira omuntu abe wa bulagirire emunda Yehova ali, cikoki obuzigire omuntu amugwerhekwo.

6. Omulume n’omukazi okuba “mubiri muguma,” kw’okuderha gurhi?

⁶ Yezu ahugwîre oku omulume n’omukazi “barhaciri babirhi, ci muguma yenene.” (Mateyo 19:6) Ngasi muguma mulibo, akwanine okuba mwishwekerezi okuwabo. (Emigani 5:15-21; Abahabraniya 13:4) Omulume ntabuhashe agwerhe oku mubiri gwage, ali wamukage. Omukazi naye ko n’oko ntabuhashe agwerhe oku mubiri gwage, ci ali w’iba. (1 Abakorinti 7:3-5) Omulume akwanine akengere oku: “Ntaye osag’igaya omubiri gwage yenene, cikoki anakagulisa n’okugushibirira.” Omulume akwanine azigire mukage n’okumushibirira. Kanji kanji ebi omukazi ashagalukira, kuba kumurhonya n’okumusima.​—Abefezi 5:29.

7. Bulya gurhi omulala guba gulagirire oku murhegesi?

⁷ Ly’omulala gukola haguma omu cinyabuguma, guba gulagirire oku muntu wakagurhegeka. Rhusomire ntya omu 1 Abakorinti 11:3: “Ngasi mulume Kristu ye Nnawabo; n’omukazi nnawabo ye mulume; naye Kristu nnawabo ye Nyamuzinda.”

8. Gurhi omukazi akayerekanamwo oku akenzire iba bwenene?

 ⁸ Abalume boshi banajire amagosa. Cikoki erhi omukazi akakalunga okuboko emihigo y’iba n’okukamuganiza, obo borhere bwanayungula omulala goshi. (1 Petro 3:1-6) Ebibliya edesire ntya: “Omukazi akwanine akenge iba bwenene.” (Abefezi 5:33) Gurhi byakaba nkw’omulume n’omukazi barhagwerhi bwemere buguma? Omukazi akwanine akenge bwenene omulume wage. Ebibliya edesire ntya: ‘Ntyola ninyu mwe bakazi, mukayumva babalo, lyo ciru hankajira abarhalonza okuyemera oluderho, balerhwe n’olwiganyo lwa bakabo buzira binwa, basinza obucêse n’obukenge bunene bw’olugenzi lwinyu.’ (1 Petro 3:1, 2) Olugenzi lwinja lw’omukazi mukristu, lw’anashumya iba orhali mukristu, ahugûkwe bwinja obwemere bwage anabukenge.

9. (a) Erhi omukazi akaba arhayemiri ebi omulume wage ahizîre, gurhi akajira? (b) Mahano gahi gayerekire abakazi gali omu Tito 2:4, 5?

⁹ Erhi omulume akarhola emihigo erhasimisizi mukage, gurhi omukazi akajira? Anamubwira entanya zage n’obukenge. Rhurhole olwiganyo lwa Sara, muka Abrahamu. Lusiku luguma, abwîra Abrahamu enderho zirhamusimisagya. Cikwone Yehova abwîra Abrahamu ntya: “Ngasi oku Sara  akanakuhûna onakuyemere.” (Omurhondêro 21:9-12) Omulume mukristu arhalug’irhola emihigo eri lubero n’Ebibliya. Omu ntyo mukage analunga okuboko emihigo y’iba. (Ebijiro by’Entumwa 5:29; Abefezi 5:24) Omukazi w’entimanya nyinja, anakashibirira omulala gwage. (Osome Tito 2:4, 5) Omulume wage n’abana bage, erhi babona gurhi ali akolera omulala, banamuzigire bwenene n’okumukenga.​—Emigani 31:10, 28.

10. Gurhi Ebibliya edesire okubiyerekire okulekana n’okuvuna obuhya?

¹⁰ Hali amango, abarholine bahiga duba-duba okulekana erhi okuvuna obuhya. Cikwone, Ebibliya edesire ntya: “Omukazi amanye ankaleka iba.” Ebibliya eshubir’iderha ntya: “naye omulume amanye ankahulusa mukâge. (1 Abakorinti 7:10, 11) Hali amango abarholine barhigana bali omu kanga kazibu, mw’ako kasanzi banahige okulekana. Cikwone bakwanine barhanye buzibu-zibu, embere barhole ogo muhigo. Gurhi Ebibliya edesire okubiyerekire okuvuna obuhya? Erhubwizire kantu kaguma kone kakarhuma abarholine bavuna obuhya: Abarholine banavuna obuhya, erhi akaba muguma mulibo, omulume erhi omukazi, akajira eby’enshonyi/bugonyi, kw’okuderha ajire ecijiro c’obuhya n’owundi-wundi muntu orhali mukage erh’iba.​—Mateyo 19:9.

11. Bici abana balagirirekwo bwenene?

¹¹ Akaba ogwerhe abana, ojire okwawe koshi okageza kasanzi kanji haguma n’abo. Bakulagirirekwo bwenene. Balagirire bwenene oku burhabale bwawe lyo bamanya Yehova.​—Olushika 6:4-9.

12. Bici ababusi bakwanine bajire lyo balânga abana babo?

¹² Igulu ly’omurhegesi Shetani ligendekire lyaba libi lusiku oku lundi. Bantu banji banalonza okujirira abana bawe  amabi, ciru n’okubayanka n’emisi/kubabaka. Babusi banji, banakayumva enshonyi z’okuganiza abana babo okubiyerekire ecijiro c’obuhya. Cikwone, bakwanine bahanîze abana babo, banabahugûlire, gurhi bakaciyasa abo bantu bantyo. Akaba ogwerhe abana, ogwerhe omukolo gw’okubalânga. *​​—1 Petro 5:8.

13. Gurhi ababusi bakwanine okuyigiriza abana babo?

¹³ Ababusi bashinganine bayigirize abana babo gurhi bakaba n’olugenzi lwinja. Gurhi wakayigirizamwo abana  bawe? Abana binyu balagirire oku mahano ginyu, cikoki nka mukola mwabahanûla, murhakag’ijira ntyo n’obuminya. (Yeremiya 30:11) Orhahiraga wahana omwana wawe omu burhe. (olole amahugûlo nomero 30 gali oku bukurasa bwa 223) Orhabavunaga omurhima omukubabwira enderho ‘ziyagaza nka ngôrho.’ (Emigani 12:18) Obahugûlire bulya gurhi bashinganine okuba bakurhumukira.​—Abefezi 6:4; Abahabraniya 12:9-11.

14, 15. Bulya gurhi abana bakwanine barhumikire ababusi babo?

¹⁴ Yezu arhumikîre Ishe ensiku zoshi, ciru n’omu kanga kazibu. (Luka 22:42; Yowane 8:28, 29) Ntyo kwo n’abana bakwanine bakakenga ababusi babo, bulya ntyo kwo Yehova alonzize.​—Abefezi 6:1-3.

¹⁵ Akaba oli mwana, hali amango oyumva kuli kuzibu okukenga ababusi bawe. Cikwone okengere ntya: Erhi wakaba wakurhumikira, wanashagalula Yehova n’ababusi bawe. *​—Emigani 1:8; 6:20; 23:22-25.

16. (a) Gurhi Shetani ashumikamwo emisole ejire ebintu bibi? (b) Bulya gurhi kuli kwa bulagirire obe n’abira bazigîra Yehova?

¹⁶ Shetani anakolesa abira bawe erhi eyinyu misole, lyo bakushumika ojire ebintu bibi. Ayishi oku kanji kanji kurhaba kulembu okuhima enshumi z’abira. Rhurhole olwiganyo lwa Dina, mwali wa Yakobo. Agwêrhe abira barhâl’izigîre Yehova. Abo bira bage barhûma acilerhera yene amazibu haguma n’omulala gwage. (Omurhondêro 34:1, 2) Erhi akaba ogwerhe abira barhazigira Yehova, banakakushumika okajira ebi Yehova ashomba. Okujira amabi, kwanagayisa Nnamahanga n’omulala gwawe, ciru nawe wene  wanalibûka. (Emigani 17:21, 25) Kw’okurhumire oshinganine obe n’abira bazigira Yehova.​—1 Abakorinti 15:33.

17. Bici Nnamahanga ahunyîre ngasi muntu w’omu mulala?

¹⁷ Erhi ngasi muguma omu mulala akakajira ebi Nnamahanga amuhunyire, amazibu garhakaba manji omu mulala. Akaba oli mulume, ozigire mukawe onamukombêre. We mukazi nawe, okenge balo onamurhumukire. Oyige olwiganyo lw’omukazi oganirirwe omu Emigani 31:10-31. Akaba oli ishe w’abana erhi nnina w’abana, oyigirize abana bawe gurhi bakazigira Nnamahanga. (Emigani 22:6) Akaba oli mushamuka, “orhegeke bwinja” omulala gwawe. (1 Timoteyo 3:4, 5; 5:8) We mwana nawe, orhumikire ababusi bawe. (Abakolosi 3:20) Ensiku zoshi mukakengera oku: rhweshi rhurhali bimana, rhunakajira amagosa. Rhukwanine rhube birhohye, rhukahunana obonjo. Omu Bibliya muli amahano Nnamahanga ahire ngasi muntu w’omumulala.