1, 2. Teà i Jehovah hanao akore ty keleiagne?

I JEHOVAH Andrianagnahare ty namboatse ty fanambaliagne voaloha’e. Rehafe ty Baiboly fa namboaren’Andrianagnahare ty ampela voaloha’e vaho “nindese’e mbamy i lahilahỳ mbeo.” Nifale ty Adama, le hoe reke: “Ela ty ela ta itoy ty taolagne boake amy ty taolako naho ty nofotse boake amy ty nofoko.” (Genesisy 2:22, 23) Atoro io tie teà i Jehovah ho sambatse ty mpirovaly.

² Mampanahelo fa maro ty keleiagne tsy sambatse. Faie, maro ty fanoroagne agnate Baiboly ao afake magnampe ty tsikiraidraike amy ty keleiagne mba ho sambatse amy ty fiaignagne naho fa miharo.—Lioka 11:28.

3, 4. a) Akore ty toko’e hindesa ty lahilahy ty vali’e? b) Nagnino ro mahasoa ty mpivaly ty mifamela heloke?

³ Rehafe ty Baiboly, fa toko’e ho tea naho hagnaja ty vali’e ty lahilahy manambaly. Vakio ty Efesianina 5:25-29. Soa naho indese ty lahilahy aman-katea lognandro ty vali’e. Arova’e naho karakarae’e sady tsy manao raha mampanahelo aze ka reke.

⁴ Faie ino ty toko’e hatao ty lahilahy naho manao hadisoagne ty vali’e? Hoe ty Baiboly: “Teào lognandro ty vali’areo sady ko ibosehagne loatse reke.” (Kolosianina 3:19) Ry lahilahy, ko haligno fa manao  hadisoagne ka nareo. Tsy maintsy mamela ty hadisoa i vali’o rehe naho teà’o ty hamelan’Andrianagnahare ty hadisoa’o. (Matio 6:12, 14, 15) Magnampe ty mpivaly ho sambatse ty fahavognona iareo hifamela heloke.

5. Nagnino ty lahilahy ro toko’e hagnomey voninahitse ty vali’e?

⁵ Teà i Jehovah hagnomey voninahitse ty vali’e ty lahilahy. Toko’e hamantatse ze raha ilae ty vali’e ty lahilahy, fa raha lahibey ty fanoagne izay. Tsy hijanjigne ty vavake anoe ty lahilahy ty Jehovah naho raty ty fomba indesa’e i vali’e. (1 Petera 3:7) Sarobily amy i Jehovah ty ndaty naho tea aze, ndra lahilahy ndra ampela.

6. Inogne ty dika tihoe “nofotse raike” avao ty mpivaly?

⁶ Nihazavae i Jesosy fa tsy roe sasa ty lahilahy naho ty ampela naho fa mpivaly, “fa nofotse raike avao.” (Matio 19:6) Mifampatoky iareo sady sambe tsy mivalike. (Ohabolana 5:15-21; Hebreo 13:4) Sambe toko’e hanao ze hahafam-po ty raike ty mpivaly naho fa miharo lamba. (1 Korintianina 7:3-5) Toko’e hahatsiaro ty lahilahy “fa tsy misy ndaty malaigne ty nofo’e, kanao mamelogne aze naho tea aze.” Toko’e ho teà’e naho ho mamie’e ty vali’e. Mihoatse ty raha hafa, le teà ty ampela naho soa fagnahy sady tea aze ty vali’e.—Efesianina 5:29.

7. Inogne ty anto’e ipalià ty keleiagne loha’e hitarike aze?

⁷ Sambe mipay loha’e hitarike aze ty keleiagne tsikiraidraike mba ho soa ty fiharoa iareo. Hoe ty Baiboly amy 1 Korintianina 11:3: “I Kirisity ty loha ze lahilahy, ty lahilahy ty loha ty ampela, sady Andrianagnahare ka ty loha i Kirisity.”

8. Akore ty hanoroa ty ampela tie miasy i vali’e reke?

⁸ Manao hadisoagne ndra ty lahilahy. Hahazo fitahiagne i keleiagney naho manohagne ty fanapaha-keve i vali’e ty ampela sady miharo asa ama’e. (1 Petera 3:1-6) Hoe ty Baiboly: “Miasia valy nareo ampela.” (Efesianina 5:33) Akore naho tsy mitovy finoagne amy i vali’e i ampelay? Mbe toko’e hiasy i vali’e avao reke. Hoe ty Baiboly: “Inareo ampela, magnekea ty vali’areo soa tie voatari’areo tsy amy ty rehake reke, naho misy ty tsy magnorike ty rehake masigne fa amy ty findesam-batagne ro hahatreava’e ty findesam-batagne malio anagna’areo naho ty fiasiagne laleke atoro’areo.” (1 Petera 3:1, 2) Hagnampe ty vali’e hahatakatse sady hagnaja ty raha inoa’e ty ampela ohatse soa.

9. a) Akore ty toko’e hatao ty ampela naho tsy mitovy hevetse amy i vali’e? b) Inogne ty torohevetse hoahy ty ampela manambaly amy Titosy 2:4, 5?

⁹ Ino ty toko’e hatao ty ampela naho tsy mitovy hevetse amy i vali’e? Toko’e hagnaja aze reke naho fa mirehake ty heve’e. Niheje i Abarahama ohatse  ty reha i Saraha, faie hoe ty Jehovah tama’e: “Tsanogno ty reha’e.” (Genesisy 21:9-12) Azo ty ampela Kirisitianagne atao ty manohagne ty fanapaha-keve i vali’e naho mbe tsy mifanohetse amy ty raha rehafe ty Baiboly. (Asan’ny Apostoly 5:29; Efesianina 5:24) Mikarakara ty keleia’e ty valy soa. (Vakio Titosy 2:4, 5.) Ho tea naho hagnaja aze ty valy aman’ana’e naho mahatrea ty asa mafe atao’e.—Ohabolana 31:10, 28.

10. Inogne ty raha rehafe ty Baiboly miomba ty lia lefa naho ty fisarahagne?

¹⁰ Tsy ela mandeha lefa ndra misarake ty mpirovaly. Faie izao ty raha rehafe ty Baiboly: “Ao tsy hisintake ty vali’e ty ampela, le tsy toko’e hisintake amy ty vali’e ka ty lahilahy.” (1 Korintianina 7:10, 11) Misy anto’e lahibey kanao mifampisintake ty mpirovaly, faie fanapaha-kevetse lahibey izay. Akore ka ty fisarahagne? Rehafe ty Baiboly fa anto’e raike avao ty toko’e hisarahagne. Mahazo misarake iareo naho nila ty ndaty tsy vali’e ty raike amy iareo.—Matio 19:9.

11. Inogne vata’e ty raha paliae ty anake?

¹¹ Manokana fotoagne hiharoagne amy ty ana’areo nareo, fa izay ty paliae’e. Ambone ze kila raha, le inareo ro tavandrae’e hagnanatse aze ty miomba i Jehovah.—Deoteronomia 6:4-9.

12. Ino ty toko’e hatao ty rae aman-drene hiarova’e ty ana’e?

¹² Miharaty ty tontolo i Satana toy. Te hagnoho-doza amo o anantikagneo ty ndaty ila’e, ndra te hila aze. Misy rae aman-drene tsy mahavany mirehake ty  miomba izay amy ty ana’e. Faie toko’e hampitao ty ana’e amy ty ndaty te hagnoho-doza aze ty rae aman-drene sady hampianatse ty fomba hilaisagne izay. Ry rae aman-drene, arovo ty ana’areo. *—1 Petera 5:8.

13. Akore ty toko’e hagnanara ty rae aman-drene ty ana’e?

¹³ Andraiky ty rae aman-drene ty mampianatse ty ana’e mba ho soa findesam-batagne. Akore ty hanoa’o izay? Mila ampiofagnegne sady sazeagne amy ty antogno’e iareo, fa tsy ampijalegne loatse. (Jeremia 30:11)  Ko anaregne ty ana’o naho mbe boseke rehe. Sady ko manao rehake mandratse, ndra mahavoa fo iareo rehe fa hoe ‘mesa atomboke’ ndaty ty fanoagne izay. (Ohabolana 12:18) Ampahafantaro iareo ty anto’e toko’e hagnoriha iareo ty fagnanara’o.—Efesianina 6:4; Hebreo 12:9-11; henteo ty Fagnazavagne 30.

14, 15. Nagnino ty anake ro toko’e hagnorike ty fagnanara ty rae aman-drene?

¹⁴ Nagnorike ty fagnanaran-dRae’e avao ty Jesosy ndra tie tsy mora ty nanao izay. (Lioka 22:42; Jaona 8:28, 29) Také i Jehovah ka ty hagnoriha ty anake ty fagnanara ty rae aman-drene.—Efesianina 6:1-3.

¹⁵ Va’e tsy ho mora ama’areo ty hagnorike ty fagnanara ty rae aman-drene. Faie ko haligno, fa hampifale i Jehovah naho ty rae aman-drene’areo nareo naho manao izay. *—Ohabolana 1:8; 6:20; 23:22-25.

16. a) Akore ty andrisiha i Satana ty tanora mba hanao raha raty? b) Inogne ty mahasoa ty mifily ragnetse tea i Jehovah?

¹⁶ Ampiasae i Satana ty ragne’o naho ty tanora ila’e mba handrisihagne azo hanao raty. Fanta’e fa ho sarotse ama’o ty handietse iareo. Nanan-dragnetse ndaty tsy mpanompo i Jehovah ohatse ty Dina ana i Jakoba. Niterake hasahiragnagne ho aze naho hoahy ty keleian-drae’e ze raha zay. (Genesisy 34:1, 2) Va’e hitaogne azo hanao raty ka ty ragnetse tsy mpanompo i Jehovah. Hisy voka’e raty ama’o ty fagnorihagne iareo sady hampanahelo i Jehovah naho ty longo’o. (Ohabolana  17:21, 25) Izay ty anto’e toko’e hiragneta’o amy ze ndaty tea i Jehovah.—1 Korintianina 15:33.

17. Ino iaby ty andraiky ty tsikiraidraike agnate ty keleiagne ao?

¹⁷ Hahafiatreke ze raha manahiragne ty keleiagne naho magnorike ty fanoroan’Andrianagnahare ty tsikiraidraike amy iareo. Ry lahilahy, teào ty vali’o sady indeso aman-katea. Ry ampela, miasia naho magnekea ty vali’o, sady manahafa ty ampela soa toetse rehafe ty Ohabolana 31:10-31. Ry rae aman-drene, ampianaro ho tea an’Andrianagnahare ty ana’areo. (Ohabolana 22:6) Ry rae, ‘mahaia magnoloholo’ ty keleia’o. (1 Timoty 3:4, 5; 5:8) Ry anake, oriho ty fagnanara ty rae aman-drene’o. (Kolosianina 3:20) Mahaia miambane sady mangataha famelan-keloke, fa sambe manao hadisoagne iaby ty tsikiraidraike amy ty keleiagne. Misy ty tari-dala i Jehovah hoahy ty keleiagne ty agnate Baiboly ao.