1, 2. Ginani egi Jehovha a gi vbwetago dzindrangani?

JEHOVHA NUNGUNGULU giride mutshadho nyo pheye. Bhibhiliya yo hi embeya gu khiyo uye giride nyamayi nyo pheye a bwe a mu “bikela ga mwama.” Adhamu a di tsakide ngudzu avba nya gu a ganeya khuye: “Ina na, khu woni, olu, aya marambo nya marambo yangu ni nyama nya nyama yangu.” (Genesi 2:22, 23) Isoso so hi embeya gu khiso Jehovha o vbweta gu khuye vathu va dzeganidego va tsaka.

² Egi gi si tsakisigo, khu gu vathu nya vangi gima va si mani gutsaka womini nya ndranga. Ambari ulolo, Bhibhiliya yi na ni matshina nya mangi nya milayo ma phasago satshavbo sivbango nya ndranga gu vbanya womi nya wadi si bwe si tsaka khu gu manega gumogo. — Luka 11:28.

3, 4. a) Gu vbwetega gu mwama a phara kharini mwangadzi waye? b) Khu ginani si gu sa lisima gu mwama ni ngadzi va divaleyana khu gyawe?

³ Bhibhiliya yari khiyo mwama nya wadi gu vbwetega gu a sayisa mwangadzi waye khu lihaladzo ni githawo. Gira wuhindzi u leri Vaefeso 5:25-29. Tepo yatshavbo mwama a na phara mwangadzi waye khu ndziya nya lihaladzo. A na bwe a mu vhikeya, a mu sayisa, ni gu bwe a si mu gireyi gilo nyo vivbe.

⁴ Ganiolu ginani egi mwama a yedego gu gira tepo mwangadzi waye a girago sihoso? Vama vo embedwa pwani: “[Simamani mu, NM] haladzani vagadzi vanu, mu nga va goroseli.” (Vakolosi 3:19) Vama, dundrugani gu khenu anenu mu ngu gira sihoso. Nigu wo vbweta gu khuwe Nungungulu a gu divaleya, gu vbwetega gu anuwe  u divaleya mwangadzi wago. (Matewu 6:12, 14, 15) Mwama ni nyamayi vo gola gu divaleyana, si na va phasa gu khala lipango nyo tsakise.

5. Khu ginani gu vbwetegago gu mwama a zundza mwangadzi waye?

⁵ Jehovha o vireya khuye mwama a zundza mwangadzi waye. Gu vbwetega gu mwama a khathaleya gwadi esi mwangadzi waye a si vbwetago. Isoso silo nya lisima ngudzu. A bari gu mwama kha phari gwadi mwangadzi waye, Jehovha kha na nga engiseya milombelo yaye. (1 Pedro 3:7) Egi gi girago vathu va godwa khu Jehovha khu gu avo va ngu mu haladza. Uye mwalo gihatheya, kha goli vama guvbindra vanyamayi.

6. So thula ginani gu mwama ni ngadzi va khala “nyama mweyo basi”?

⁶ Jesu tshamusede gu khuye mwama ni nyamayi “khandri vavili gambe, aholu nyama mweyo basi.” (Matewu 19:6) Gu vbwetega gu va tumbana va bwe va si thugi va diga gu tumbega ga mwangadzi mwendro mwama wawe. (Mavingu 5:15-21; Vahebheru 13:4) Gu vbwetega gu vama ni vagadzi va khathaleya gidilelego nya malawu gya moyo ni moyo wawe. (1 Vakorinto 7:3-5) Mwama gu vbwetega gu a dundruge gu khuye “mwalo muthu a vengago givili gyaye. Aholu a gu gi hodzisa ni gu gi sayisa gwadi.” Khu kharato a ngu yela gu haladza ni gu sayisa mwangadzi waye. Guvbindra satshavbo, mwangadzi o vbweta gu khuye mwama waye ari muthu nya wadi a mu haladzago. — Vaefeso 5:29.

7. Khu ginani ndrangani gu vbwetegago hungo nya ndranga?

⁷ Dzindranga dzatshavbo dzi ngu vbweta hungo, a gu muthu a na thangeyago ndranga gasi gu vatshavbo va gira silo khu gupwanana. Omu ga 1 Vakorinto 11:3, Bhibhiliya yari khiyo: “Kristo khuye hungo a fumelago vathu vatshavbo, kha nga mwama a fumelago nyamayi, kha nga Nungungulu a fumelago Kristo.”

8. Mwangadzi a nga yeyedza kharini githawo nya gikhongolo ga mwama waye?

 ⁸ Vama vatshavbo va ngu gira sihoso. Ganiolu tepo mwangadzi a seketeyago makungo ya mwama waye a bwe a thumisana naye khu gudzina, ndranga yatshavbo yo phasega. (1 Pedro 3:1-6) Bhibhiliya yari khiyo: “Nyamayi a na ninge githawo mwama waye.” (Vaefeso 5:33) Ahati a bari gu mwama kha hengeyi wukhongeli ni mwangadzi? Gu vbwetega gu mwangadzi a simama gu mu ninga githawo nya gikhongolo. Bhibhiliya yari khiyo: “Enu nenu vanyamayi mu guromo wugadzi, yingelani vama vanu, gasi va gu bani va romo vambe va si khodwigo, va ndrindrwe va ta khodwa, nasiri khu magana, aholu khu mavbvanyelo ya vagadzi vawe. Kholu va na wona mavbanyelo yanu nya yadi nya githawo.” (1 Pedro 3:1, 2) Giyeyedzo nya gyadi gya mwangadzi gi nga phasa mwama waye gu pwisisa ni gu ninga githawo gukhodwa gwaye.

9. a) Ginani gi vbwetegago gu mwangadzi a gi gira o ba a si dzumeleyani ni mawonelo ya mwama waye? b) Wusingalagadzi muni wu ningwago vagadzi omu ga Tito 2:4, 5?

⁹ Ginani egi mwangadzi a nga girago o mba dzumeleyana ni mawonelo ya mwama waye? Gu vbwetega gu a  ganeya mawonelo yaye khu ndziya nya githawo. Khu giyeyedzo, Sara ganede gilogyo gi nga mba tsakisa Abrahama, ganiolu Jehovha mu embede khuye: “Gira satshavbo esi Sara a gu lombago.” (Genesi 21:9-12) Si ngu kala gu esi si hungwago khu mwama nya muKristo si hambana ni esi si ganedwago khu Bhibhiliya, khu kharato gu vbwetega gu mwangadzi waye a mu seketeya. (Mithumo 5:29; Vaefeso 5:24) Mwangadzi nya wadi a na khathaleya ndranga yaye. (Leri Tito 2:4, 5.) Tepo mwama waye ni sanana va na gu wonago gudzigaradza gwaye gasi gu va thumeya, va na engedzeya gu mu haladza ni gu mu ninga githawo. — Mavingu 31:10, 28.

10. Yari khiyo ginani Bhibhiliya khu guhambana ni gu tshula wugadzi?

¹⁰ Dzimbe dzitepo mipatwa yi ngu vbiredzeya gu hambana mwendro gu tshula wugadzi. Ganiolu, Bhibhiliya yari khiyo “nyamayi a nga huli mwama waye” yi bwe khiyo “mwama nuye a nga huli mwangadzi waye.” (1 Vakorinto 7:10, 11) Gu nga manega siemo nyo khaguri si kodzago gu gurumedza mipatwa gu hambana, ganiolu guhambana khandri gilo nyo hagane khigyo. Ahati gu tshula wugadzi ke? Bhibhiliya yo yeyedza gu khiyo gighelo gimwegyo basi gi dzumeleyago muthu gu tshula wugadzi: khu gu ba mwama mwendro mwangadzi a hengede malawu ni mumbe muthu vbavbandze nya oyu a dzeganego naye. — Matewu 19:9, NM.

11. Ginani egi sanana si gi vbwetago guvbindra satshavbo?

¹¹ Vavelegi, khalani tepo nya yingi khavba mu si kodzago khavbo ni sanana sanu. Sanana sanu si ngu mi vbweta ngudzu, nigu guvbindra satshavbo, iso so vbweta enu gasi gu si hevbudza khu Jehovha. — Dhewuteronome 6:4-9.

12. Ginani egi gi vbwetegago gu vavelegi va gi gira gasi gu vhikeya sanana sawe?

¹² Litigo la Sathane la guya na li vivba ngudzu, nigu gu  na ni vathu va vbwetago gu gireya guvivba sanana sathu, ambari gu vbweta gu hengeya naso malawu. Vambe vavelegi si ngu va garadzeya gu ganeya khu silo soso. Ganiolu gu vbwetega gu vavelegi va gengedza sanana sawe khu vathu nya nga avovo va bwe va si hevbudza gu dzi vhikeya. Vavelegi, gu vbwetega gu mu vhikeya sanana sanu. * — 1 Pedro 5:8.

13. Vavelegi va yede gu hevbudza kharini sanana sawe?

¹³ Vavelegi va na ni thumo nyo hevbudze sanana sawe edzi si yedego gu vbanya khidzo. U nga hevbudza kharini  sanana sago? Sanana sago so vbweta gu hevbudzwa, ganiolu kha gu vbwetegi gu si kawuka khu xapi mwendro khu dzitshanisa. (Jeremiya 30:11) Khu kharato, gima u nga tsayisi gyanana gyago nu gorogide. Khu vbweti gu khuwe malito yago ma khala “magana nya gupaye kha nga litshari.” (Mavingu 12:18) Hevbudza sanana sago gu pwisisa gu khiso khu ginani gu vbwetegago gu engisa. — Vaefeso 6:4; Vahebheru 12:9-11; wona Tshamuselo 30.

14, 15. Khu ginani gu vbwetegago gu sanana si engisa vavelegi vaso?

¹⁴ Tepo yatshavbo Jesu a di gu engisa Babe waye, ambari olu dzimbe dzitepo si nga ba si si vbevbugi. (Luka 22:42; Johane 8:28, 29) Jehovha o vireya gambe gu khuye sanana si engisa vavelegi vaso. — Vaefeso 6:1-3.

¹⁵ Sanana, ambari mwa gu dzipwa na si gu mi garadzeya gu engisa vavelegi vanu, dundrugani gu khenu tepo mu engisago, Jehovha ni vavelegi vanu va na tsaka khenu. * — Mavingu 1:8; 6:20; 23:22-25.

16. a) Sathane o zama kharini gu kutsedzeya vathu vaphya gu gira silo nyo vivbe? b) Khu ginani si gu na ni lisima gu hatha dzipari dzi haladzago Jehovha?

¹⁶ Dhiyabhulosi a ngu kodza gu thumisa dzipari dzago mwendro vambe vathu vaphya gasi gu gu kutsedzeya gu gira silo nyo vivbe. A ngu dziti gu khuye kutsedzelo wowo wu ngu garadza gu wu bomba. Khu giyeyedzo, Dhina gyanana gya Jakobe a diri ni dzipari dzi nga ba dzi si mu haladzi Jehovha. Isoso si mu vangede sigaradzo nya singi uye ni ndranga yaye. (Genesi 34:1, 2) A bari gu dzipari dzago kha dzi mu haladzi Jehovha, dzi nga gu kutsedzeya gu gira gilo gi vengwago khu Jehovha, egi gi kodzago gu gu reseya wuvi nya wukhongolo uwe, ni ndranga yago, gumogo  ni Nungungulu. (Mavingu 17:21, 25) Khigyo gi girago gu siri sa lisima ngudzu gu vbweta dzipari dzi haladzago Jehovha. — 1 Vakorinto 15:33.

17. Khu wevbi rwalo wa moyo ni moyo ndrangani?

¹⁷ Tepo sivbango nya ndranga si landrisago sileletelo sa Nungungulu, si ngu dzi vhikeya sigaradzo nya singi. Khu kharato wo ba uri mwama, haladza mwangadzi wago u bwe u mu sayisa gwadi. Wo ba uri mwangadzi, ninga githawo nya gikhongolo mwama wago u bwe u dzi nogisa gwaye; pimedzeya giyeyedzo gya mwangadzi a tshamusedwago omu ga Mavingu 31:10-31. Wo ba uri muvelegi, hevbudza gyanana gyago gu haladza Nungungulu. (Mavingu 22:6) Wo ba uri babe, thangeya ndranga yago “khu ndziya nya yadi.” (1 Thimoti 3:4, 5, NM; 1 Thimoti 5:8) Nigu, enu sanana engisani vavelegi vanu. (Vakolosi 3:20) Dundrugani gu khenu muthu ni muthu ndrangani a ngu hosisa, khu kharato dzi nogiseni mu bwe mu lombana divalelo. Khu lisine, Bhibhiliya yi na ni sileletelo sa Jehovha ga moyo ni moyo ndrangani.