1, 2. Ino Jehova uyanda kuti mikwasyi kaikkala buti?

JEHOVA LEZA nguwakatalisya cikwati cakusaanguna. Bbaibbele litwaambila kuti wakalenga mukaintu wakusaanguna ‘akumuleta kumwaalumi.’ Adamu wakakkomana kapati cakuti wakaamba kuti: “Ee kaka! Ooyu lino ncifwuwa cazifwuwa zyangu anyama yanyama yangu.” (Matalikilo 2:22, 23) Eeci citwaambila kuti Jehova uyanda kuti banabukwetene kabakkomana.

² Cilausisya kuti, bantu banji tabakkomene pe mumikwasyi yabo. Nokuba boobo, Bbaibbele lilijisi njiisyo zinji izikonzya kugwasya banamukwasyi boonse kuti bazwidilile mumukwasyi wabo alimwi akukkala antoomwe calukkomano.—Luka 11:28.

3, 4. (a) Ino mulumi weelede kumulanganya buti mukaintu wakwe? (b) Nkaambo nzi ncociyandika kuti mulumi amukaintu kabalekelelana?

³ Bbaibbele lyaamba kuti imulumi mubotu weelede kulanganya mukaintu wakwe caluyando alimwi akumulemeka. Mwalombwa kuti mubale Baefeso 5:25-29. Lyoonse mulumi unakumulanganya caluyando mukaintu wakwe. Unakumukwabilila, kumubamba, alimwi akutamucita cintu cili coonse cibi.

⁴ Pele ino ncinzi mulumi ncayelede kucita ikuti mukaintu wakwe walubizya? Balumi baambilwa kuti: “Amuzumanane kubayanda bakaintu banu alimwi mutanoobanyemeni cakuzwa munzila.” (Bakolose 3:19) Nobalumi, mutalubi kuti andinywe mulalubizya. Aboobo, ikuti naa muyanda kuti Leza amulekelele, andinywe mweelede kulekelela  bakaintu banu. (Matayo 6:12, 14, 15) Ciindi boonse bobilo, mulumi amukaintu nobalisungwide kulekelelana, ciyoobagwasya kukkomana mucikwati cabo.

5. Ino nkaambo nzi mulumi ncayelede kumupa bulemu mukaintu wakwe?

⁵ Jehova uyanda kuti mulumi kamulemeka mukaintu wakwe. Mulumi weelede kuzibikkila maano kapati zintu nzyayandika mukaintu wakwe. Aaya makani mapati. Ikuti mulumi katamulanganyi kabotu mukaintu wakwe, Jehova ulakonzya kumufwutatila akutaiswiilila mipailo yakwe. (1 Petro 3:7) Ikuyanda Jehova nkokupa kuti bantu kabayandika kapati mumeso aakwe. Kunyina makani naa muntu mwaalumi naa mukaintu; boonse buyo ulabayanda.

6. Ino caamba nzi kuti mulumi amukaintu “mubili omwe”?

⁶ Jesu wakapandulula kuti mulumi alimwi amukaintu “tabacili bobilo, pele baba mubili omwe.” (Matayo 19:6) Eeci caamba kuti balasyomeka kumweenzinyina ngobakwetene limwi alimwi tabaciti bumambe pe. (Tusimpi 5:15-21; Bahebrayo 13:4) Mulumi amukaintu bayandika kupana ziyandika caboola kumakani aakoonana. (1 Bakorinto 7:3-5) Mulumi teelede kuluba kuti “kunyina muntu wakasulide kale mubili wakwe mwini, pele ulausanina akuubamba kabotu.” Aboobo weelede kumuyanda akumubamba kabotu mukaintu wakwe. Cipati ncayanda mukaintu, mulumi uumubikkila maano alimwi uumuyanda.—Baefeso 5:29.

7. Nkaambo nzi mukwasyi ncouyandika silutwe wamukwasyi?

⁷ Mukwasyi uuli woonse uyandika silutwe, nkokuti muntu uukonzya kusololela mukwasyi kutegwa banamukwasyi boonse kababelekelaamwi. Kulugwalo lwa 1 Bakorinto 11:3, Bbaibbele lyaamba kuti: “Mutwe wamwaalumi uuli  woonse ngu Kristo awalo mutwe wamukaintu mwaalumi; mpoonya mutwe wa Kristo ngu Leza.”

8. Mbuti mukaintu mbwakonzya kutondezya kuti ulamulemeka kapati mulumaakwe?

⁸ Mulumi uuli woonse ulalubizya. Pele ciindi mukaintu nazumina ncaasala mulumaakwe akubelekela antoomwe anguwe cakulisungula, mukwasyi woonse ulagwasyigwa. (1 Petro 3:1-6) Bbaibbele lyaamba kuti: ‘Mukaintu weelede kumulemeka kapati mulumaakwe.’ (Baefeso 5:33) Ino mbuti kuti mulumi katasyomi nzyasyoma mukaintu wakwe? Nomuba mubukkale oobu, mukaintu weelede kumulemeka kapati mulumaakwe. Bbaibbele lyaamba kuti: “Anywebo nobakaintu, amulibombye kubalumi banu, ikutegwa naa kuli bataliswiilili ijwi, bakonzye kukwelelezyegwa kakunyina kubelesya jwi pele kwiinda mubukkale bwabakaintu babo, akaambo kakulibonena bukkale bwanu busalala antoomwe akuba abulemu kapati.” (1 Petro 3:1, 2) Cikozyanyo cibotu camukaintu cilakonzya kumugwasya mulumaakwe kumumvwisya akulemeka nzyasyoma mukaintu wakwe.

9. (a) Ino ncinzi mukaintu ncayelede kucita ikuti kajisi muzeezo wiimpene awamulumaakwe? (b) Ino ndulayo nzi bamakaintu ndobapedwe kulugwalo lwa Tito 2:4, 5?

 ⁹ Ncinzi ncakonzya kucita mukaintu kuti kajisi muzeezo wiimpene awamulumaakwe? Cabulemu weelede kuwaamba muzeezo ngwajisi. Mucikozyanyo, Sara wakaamba cintu cimwi Abrahamu ncaatakakkomanina, pele Jehova wakamwaambila kuti: “Komuswiilila.” (Matalikilo 21:9-12) Bunji bwaziindi, ncasala mulumi Munakristo cileendelana ancolyaamba Bbaibbele, aboobo mukaintu weelede kubelekela antoomwe anguwe. (Milimo 5:29; Baefeso 5:24) Mukaintu uulomene ulaulanganya kabotu mukwasyi wakwe. (Amubale Tito 2:4, 5.) Ciindi mulumaakwe alimwi abana bakwe nobabona mbwali munkutwe kubacitila zintu, balamuyanda akumulemeka kapati.—Tusimpi 31:10, 28.

10. Ncinzi Bbaibbele ncolyaamba kujatikizya kwaandaana alimwi akulekana?

¹⁰ Zimwi ziindi banabukwetene tabajati moyo, balafwambaana kwaandaana naa kulekana. Pele, Bbaibbele lyaamba kuti “mukaintu teelede kwaandaana amulumaakwe” alimwi akuti “awalo mulumi teelede kusiya mukaintu wakwe pe.” (1 Bakorinto 7:10, 11) Kuli bukkale bumwi ibukatazya kapati eelyo banabukwetene nobakonzya kusala kuti baandaane, pele aaya makani mapati. Ino mbuti kujatikizya kulekana? Bbaibbele litondezya kuti kaambo kalikke kakulekanina ndileelyo mulumi naa mukaintu naaona amuntu umbi ngocitakwetene limwi.—Matayo 19:9.

11. Ncinzi bana ncobayandika kapati?

¹¹ Nobazyali, amujane ciindi cinji cakwiizya abana banu. Bana banu bayanda ndinywe, alimwi cintu cipati ncobayandika ncakuti kamubayiisya kujatikizya Jehova.—Deuteronomo 6:4-9.

12. Ncinzi bazyali ncobeelede kucita kutegwa bakwabilile bana babo?

 ¹² Nyika ya Saatani iyaabwiindila kubija, alimwi kuli bantu bamwi ibayanda kunyonyoona bana besu, mane buya akubatundulula mumakani aakoonana. Bamwi bazyali cilabayumina kubandika makani aaya abana babo. Nokuba boobo, bazyali beelede kubacenjezya bana babo kujatikizya bantu bali boobu alimwi akubayiisya mbobakonzya kulikwabilila. Nobazyali, mweelede kubakwabilila bana banu. *—1 Petro 5:8.

13. Ino bazyali beelede kubayiisya buti bana babo?

 ¹³ Bazyali bajisi mukuli wakuyiisya bana babo mbobeelede kulilemeka. Ino inga mwabayiisya buti bana banu? Bana banu bayandika kuyiisyigwa, pele tamweelede kubalaya calunya pe. (Jeremiya 30:11) Aboobo, tamweelede kulaya bana banu ciindi nomunyemede. Masimpe, tamweelede kwaamba majwi ‘aayasa mbuli panga’ akubacisizya moyo. (Tusimpi 12:18) Amubayiisye bana banu kuzyiba kaambo ncobeelede kuba bana ibamvwida.—Baefeso 6:4; Bahebrayo 12:9-11; amubone Bupanduluzi Buyungizyidwe 30.

14, 15. Nkaambo nzi bana ncobeelede kumvwida bazyali babo?

¹⁴ Jesu wakali kubamvwida Bausyi lyoonse, noliba leelyo nocakali ciyumu kucita boobo. (Luka 22:42; Johane 8:28, 29) Ncimwi buyo, Jehova uyanda kuti bana kabamvwida bazyali babo.—Baefeso 6:1-3.

¹⁵ Nobana, nokuba kuti mwalimvwa kuti nciyumu kumvwida bazyali banu, mutalubi kuti ciindi nomubamvwida, Jehova ulakkomana alimwi abalo bazyali banu balakkomana. *—Tusimpi 1:8; 6:20; 23:22-25.

16. (a) Ino mbuti Saatani mbwasola kusunka bana kucita cintu cibi? (b) Nkaambo nzi ncociyandika kapati ikusala balongwe ibamuyanda Jehova?

¹⁶ Diabolosi ulakonzya kubelesya beenzinyoko alimwi abakubusinyoko bambi buyo kumusunka kucita cintu cibi. Ulizyi kuti cilakonzya kumuyumina kapati kukaka kuyungwa abeenzinyoko. Mucikozyanyo, mwana musimbi wa Jakobo uutegwa Dina wakajisi beenzinyina ibatakali kuyanda Jehova. Eeci cakamuletela mapenzi mapati walo alimwi amukwasyi wakwe. (Matalikilo 34:1, 2) Ikuti beenzinyoko kabatamuyandi Jehova, balakonzya kumusunka kucita  cintu cimwi Jehova ncasulaika, calo icikonzya kumuletela mause amapenzi manji nywebo, mukwasyi wanu alimwi a Leza. (Tusimpi 17:21, 25) Nkakaambo kaako cilayandika kapati kuti mujane balongwe ibamuyanda Jehova.—1 Bakorinto 15:33.

17. Ino mukuli nzi ngwajisi muntu umwi aumwi mumukwasyi?

¹⁷ Ciindi banamukwasyi nobatobela malailile aa Leza, cibapa kutaba amause alimwi amapenzi manji. Aboobo, nobalumi, amubayande bakaintu banu alimwi akubalanganya caluyando. Nobakaintu, amubalemeke balumi banu akulibombya kulimbabo alimwi amutobele cikozyanyo camukaintu waambidwe ku Tusimpi 31:10-31. Nobazyali, amubayiisye bana banu kuyanda Leza. (Tusimpi 22:6) Nomausyi, amuusololele mukwasyi wanu ‘munzila iili kabotu.’ (1 Timoteyo 3:4, 5; 5:8) Nobana, amubamvwide bazyali banu. (Bakolose 3:20) Mutalubi kuti muntu umwi aumwi mumukwasyi ulalubizya, aboobo mweelede kulicesya akulekelelana. Masimpe, Bbaibbele lijisi makani aazwa kuli Jehova aakonzya kusololela muntu umwi aumwi mumukwasyi.