1, 2. ¿Tuku lakaskin Jehová xpalakata familias?

JEHOVÁ wa xmalakatsukina tamakgaxtokgat. Biblia kinkamasiyaniyan pi Dios tlawalh xapulana puskat chu makamaxkilh chixku. Adán lu lipaxuwalh chu asta wa: «Chatum tiku kilukut chu kiliwa» (Génesis 2:22, 23). La uku, Dios chuntiyaku lakaskin pi chatum puskat chu chatum chixku natamakgaxtokgkgo kxlakatin mapakgsinanin chu ni kaj xman nalatatawilakgo. Wa xlakata Jehová lakaskin pi tiku makgaxtokgkgo lipaxuw kalatamakgolh.

² Lu nitlan, pero lhuwa latamanin nikxni xatapaxuwan tawilakgonit kxfamiliajkan. Pero Biblia masta lhuwa tastakyaw nema nakamakgtaya putum tiku xalak familia xlakata tlan nalatalalinkgo chu xatapaxuwan natawilakgo (Lucas 11:28).

3, 4. 1) ¿La nalikatsini xachixku xpuskat? 2) ¿Tuku xlakata lu xlakaskinka pi xachixku chu xapuskat nalatapatikgo?

³ Biblia wan pi xachixku xlimasiyanit tapaxkit xpuskat chu xlimaxkit kakni (kalikgalhtawakga Efesios 5:25-29). Xachixku ankgalhin xlipaxkit xpuskat. Kuenta xlitlawat, namakgtakgalha chu ni natlawani tuku nitlan.

⁴ ¿Tuku xlitlawat xachixku akxni xpuskat tlawa tuku xla ni lakgati? Biblia kawani lakchixkuwin: «Chuntiya kakapaxkitit mimpuskatkan chu ni kakasitsinitit» (Colosenses 3:19). Wixin xalakchixkuwin, kalakapastaktit pi wixin na min kilhtamaku tlawayatit tuku nitlan. Nachuna, komo lakaskinatit pi Dios nakatapatiyan, talakaskin pi wixin na nakatapatiyatit milakpuskatinkan (Mateo 6:12, 14, 15). Komo xachixku chu xapuskat nalatapatikgo, tlakg xatapaxuwan natawilakgo.

5. ¿Tuku xlakata xachixku xlimaxkit kakni xpuskat?

 ⁵ Jehová lakaskin pi xachixku namaxki kakni xpuskat. Xachixku kuenta natlawa tuku maklakaskin xpuskat. Uma ni kaj takgaman. Komo xla nitlan likatsini xpuskat, Jehová ni katikgaxmatnilh xʼoración (1 Pedro 3:7). Jehová ni tlakg xlakaskinka liʼakxilha chixku nixawa puskat. Xla lanka xtapalh kaliʼakxilha putum latamanin tiku paxkikgo.

6. ¿Tuku kilhchanima pi xachixku chu xapuskat «akgtum makni» litaxtukgo?

⁶ Jesús lichuwinalh pi xachixku chu xapuskat «nialh chatiy, wata akgtum makni» (Mateo 19:6). Uma wamputun pi xachixku chu xapuskat lamaxki kakni chu ni laʼakgskgawikgo (Proverbios 5:15-21; Hebreos 13:4). Xchatunukan xlilakpuwanatkan komo achatum talakgxtumiputun chu ni kajwatiya nalilakpuwan tuku xʼakstu lakaskin (1 Corintios 7:3-5). Biblia wan pi «lakchixkuwin xlipaxkitkan xpuskatkan chuna la akstu paxkikgo xmaknikan». Chu wampara pi «nitiku lakgmakgan xmakni» wata «mawi chu kuentajtlawa». Wa xlakata, xachixku xlipaxkit xpuskat chu tlan nalikatsini. Tuku tlakg lakaskin chatum puskat wa pi xchixku nalimasiyani pi paxki chu nalakgalhaman (Efesios 5:28, 29).

7. ¿Tuku xlakata familias maklakaskinkgo tiku nakapulalin?

⁷ Xlakata familias tlan natawilakgo, maklakaskinkgo tiku nakapulalin, chatum tiku xa’akgxakga familia nalitaxtu. Texto xla 1 Corintios 11:3 wan: «Xʼakgxakga putum chixku wa Cristo; chu xʼakgxakga puskat wa chixku; chu xʼakgxakga Cristo wa Dios».

8. ¿La limasiya chatum puskat pi maxki kakni xchixku?

⁸ Xlikana pi putum xalakchixkuwin min kilhtamaku tlawakgo tuku nitlan. Pero akxni xapuskat tataya tuku laksaka xchixku chu makgtaya, putum xfamilia tlan kitaxtuni (1 Pedro 3:1-6). Biblia wan: «Xapuskat lu xlimaxkit kakni  xchixku» (Efesios 5:33). Pero ¿chu komo xachixku ni watiya takanajla kgalhi? Maski chuna, xla xlimaxkit kakni xchixku. Biblia nachuna wan: «Lakpuskatin, kakakgalhakgaxpattit minchixkukan, komo xachixku ni kgalhakgaxmata xtachuwin Dios, maski ni akgtum tachuwin nawanatit tlan nalimakanajliyatit minchixkukan xlakata tlan mintayatkan, xlakata xlakan akxilhkgolh skulunku mintayatkan chu lu kamaxkiyatit kakni» (1 Pedro 3:1, 2). Xliʼakxilhtit xapuskat namakgtaya xchixku naʼakgatekgsa chu namaxki kakni tuku xla kanajla.

9. 1) ¿Tuku xlitlawat xapuskat akxni ni lakgati tuku laksaknit xchixku? 2) ¿Tuku tastakyaw kamaxkikan xalakpuskatin kTito 2:4, 5?

⁹ ¿Tuku xlitlawat xapuskat akxni ni lakgati tuku laksaknit xchixku? Tlan nawani tuku xla lakpuwan, pero akxni nawani xlimasiyanit kakni. Akgtum liʼakxilhtit, Sara wi tuku litachuwinalh Abrahán pero xla ni lakgatilh. Chu Jehová wanilh Abrahán: «Kakgaxpatni tuku waniman» (Génesis 21:9-12). Xapuskat xlitatayat tuku nalaksaka xchixku komo ni lakatsala xlimapakgsin Dios (Hechos 5:29; Efesios 5:24). Nachuna, tiku tlan puskat kuenta xlitlawat xfamilia  (kalikgalhtawakga Tito 2:4, 5). Akxni xchixku chu xlakkamanan naʼakxilhkgo tuku xla tlawama xpalakatakan, tlakg napaxkikgo chu namaxkikgo kakni (Proverbios 31:10, 28).

10. ¿Tuku wan Biblia xlakata lakxtlawakan tamakgaxtokgat kxlakatin mapakgsinanin?

¹⁰ Wilakgolh latamanin tiku lakapala lamakgxtakgkgo. Pero Biblia wan pi «puskat ni xlilat namakgxtakga xchixku» chu pi «xachixku ni xlilat namakgxtakga xpuskat» (1 Corintios 7:10, 11). Xlikana pi min kilhtamaku tiku makgaxtokgkgo max wi tuku nalalimakgxtakgkgo. * Pero uma ni kaj takgaman, pulana talakaskin liwana nalakapastakkgo. ¿Chu tlan laktlawakan tamakgaxtokgat kxlakatin mapakgsinanin? Biblia kinkamasiyaniyan pi kaj xman pulaktum tuku xpalakata tlan nalakxtlawakan tamakgaxtokgat, wa komo xachixku o xapuskat natatalakgxtumi atanu puskat o atanu chixku (Mateo 19:9).

11. ¿Tuku tlakg maklakaskinkgo minkamanankan?

¹¹ Natlatni, kalimaxtutit kilhtamaku xlakata akxtum nakatatawilayatit minkamanankan, xlakan maklakaskinkgo. Tuku tlakg maklakaskinkgo minkamanankan wa pi wixin nakamasiyaniyatit xlakata Jehová (Deuteronomio 6:4-9).

12. ¿Tuku xlitlawatkan xanatlatni xlakata nakamakgtakgalhkgo xkamanankan?

¹² Chali chali taliwakatilhama tuku nixatlan kxkakilhtamaku Satanás. Wilakgolh latamanin tiku max katlawaniputunkgo tuku nitlan minkamanankan. Max asta wi tiku nakalikgamanamputun. Makgapitsi natlatni tuwa makgkatsikgo nakalitachuwinankgo xkamanankan xlakata uma.  Pero kalakgchan nakalitachuwinankgo pi wi latamanin tiku katlawaniputunkgo tuku nitlan chu talakaskin nakamasiyanikgo la natamakgtakgalhkgo. Natlatni, minkalimakgtakgalhatkan minkamanankan (1 Pedro 5:8). *

13. ¿La nakastakyawakgo xanatlatni xlakkamanankan?

¹³ Xanatlatni kalakgchan nakamasiyanikgo xlakkamanankan la tlan nalikatsikgo chu nakgalhakgaxmatnankgo. ¿La tlan natlawaya? Lakkamanan maklakaskinkgo pi nakastakyawakan,  pero nikxni namalakatsaliya la nakastakyawaya (Jeremías 30:11). Wa xlakata nikxni kakastakyawa akxni sitsipat. Ni kakawani tachuwin nema nitlan nakamamakgkatsini o asta max nakamakgalipuwan, la komo xkachukulh kgantum espada (Proverbios 12:18). Kakawani tuku xlakata xlikgalhakgaxmatnatkan (Efesios 6:4; Hebreos 12:9-11). (Kaʼakxilhti nota 30, niku wan «Stakyawanankan»).

14, 15. ¿Tuku xlakata xalakkamanan xlikgalhakgaxmatatkan xnatlatnikan?

¹⁴ Jesús ankgalhin kgalhakgaxmatli xTlat, asta maski akxni tuwa xwanit nakgalhakgaxmata (Lucas 22:42; Juan 8:28, 29). Jehová lakaskin pi xalakkamanan nakgalhakgaxmatkgo xnatlatnikan (Efesios 6:1-3).

¹⁵ Kgawasa o tsumat, max tuwa makgkatsiya nakakgalhakgaxpata minatlatni. Pero kalakapastakti: akxni kgalhakgaxpatninana, Jehová chu minatlatni lu lipaxuwakgo (Proverbios 1:8; 6:20; 23:22-25). *

16. 1) ¿Tuku maklakaskin Satanás xlakata nakamatlawi kamanan tuku nixatlan? 2) ¿Tuku xlakata xlakaskinka pi wa mi’amigos nakalimaxtuya tiku paxkikgo Jehová?

¹⁶ Satanás tlan nakamaklakaskin mi’amigos o atanu kamanan xlakata namatlawiputunan tuku nixatlan. Xla katsi pi lu tuwa tamakgkatsi ni natlawaya tuku xafuerza matlawiputunkana. Kaʼakxilhwi tuku titaxtulh Dina, chatum xtsumat Jacob. Xla xkgalhi amigos tiku ni xpaxkikgo Jehová, chu uma liminilh taʼakglhuwit chu nachuna xfamilia (Génesis 34:1, 2). Komo mi’amigos ni paxkikgo Jehová, max namatlawiputunkgoyan tuku xla xkajni. Lu nitlan katikitaxtunin, nakamakgalipuwana mifamilia chu Jehová (Proverbios 17: 21, 25). Wa xlakata, lu xlakaskinka pi wa mi’amigos nakalimaxtuya tiku paxkikgo Jehová (1 Corintios 15:33).

17. ¿Tuku xlitlawatkan chatunu chatunu tiku xalak familia?

¹⁷ Akxni chatunu chatunu tiku xalak familia lilatamakgo xtastakyaw Dios, lu tlan kakitaxtuni. Wa xlakata, lakchixkuwin, kapaxkitit mimpuskatkan chu tlan kalikatsinitit. Lakpuskatin, kamaxkitit kakni minchixkukan, katatayatit akxni wi tuku laksaka chu katlawatit tuku lichuwinan Proverbios 31:10-31, chuna lu xatlan lakpuskatin nalitaxtuyatit. Komo kgalhiyatit kamanan, kakamasiyanitit napaxkikgo Dios (Proverbios 22:6). Komo wix xatlat, tlan kapulalipi mifamilia (1 Timoteo 3:4, 5; 5:8). Chu wixin kamanan, kakakgalhakgaxpattit minatlatnikan (Colosenses 3:20). Kalakapastakwi pi putum akinin min kilhtamaku tlawayaw tuku ni xlilat, wa xlakata talakaskin nataktujuyaw chu naskinaw pi kakinkatapatikan. Chuna la akxilhwi, kBiblia tekgsaw xtastakyaw Jehová nema nakapulalin chatunu chatunu tiku xalak familia.