1, 2. Jehova i laik bai famili i stap olsem wanem?

GOD JEHOVA i wokim namba wan marit. Baibel i tok em i wokim namba wan meri na em i “bringim meri i go long man.” Adam i amamas stret na em i tok: “Em nau, bun bilong em i kamap long bun bilong mi na mit bilong em i kamap long mit bilong mi.” (Stat 2:22, 23) Dispela i kamapim klia olsem Jehova i laik bai ol marit i stap amamas.

² Sori tru, planti manmeri i no stap amamas insait long famili bilong ol. Tasol Baibel i gat planti stiatok we inap helpim olgeta insait long famili long i stap gut na stap amamas wantaim.—Luk 11:28.

3, 4. (a) Maritman i mas mekim wanem pasin long meri bilong em? (b) Bilong wanem em i bikpela samting long maritman na maritmeri long fogivim narapela narapela?

³ Baibel i tok olsem gutpela maritman i mas soim pasin laikim na tingim meri bilong em. Plis ritim Efesus 5:25-29. Oltaim maritman bai mekim pasin i soim olsem em i laikim meri bilong em. Em bai mekim ol samting bilong sambai long em na lukautim em. Na tu, em i no inap mekim ol tok i bagarapim bel bilong meri bilong em o paitim em.

⁴ Tasol maritman i mas mekim wanem taim meri bilong em i popaia? Baibel i tokim ol maritman olsem: “Yupela i mas laikim yet meri bilong yupela, na no ken belhat nogut tru long ol.” (Kolosi 3:19) Yupela ol maritman, tingim olsem yupela tu i save popaia. Sapos yupela i laik bai God i fogivim yupela, orait yupela i mas fogivim meri  bilong yupela. (Matyu 6:12, 14, 15) Taim maritman na maritmeri i redi long fogivim narapela narapela, dispela bai helpim marit bilong ol long i stap amamas.

5. Bilong wanem ol maritman i mas givim ona long meri bilong ol?

⁵ Jehova i laik bai maritman i mas givim ona long meri bilong em. Maritman i mas tingim laik na tingting bilong meri bilong em. Dispela em i bikpela samting. Sapos man i no tingim gut meri bilong em, Jehova i no inap harim ol beten bilong em. (1 Pita 3:7) Samting i mekim na ol manmeri i dia tumas long ai bilong Jehova, em pasin bilong ol long laikim em. Em i no laikim ol man tasol na ol meri nogat.

6. Tupela i kamap “wanpela bodi,” dispela i makim wanem samting long man na meri wantaim?

⁶ Jisas i kamapim klia olsem maritman na maritmeri “i no stap olsem tupela moa, ol i kamap wanpela bodi tasol.” (Matyu 19:6) Tupela bai i stap gut long narapela narapela na ol i no inap slip wantaim narapela i no poroman marit bilong ol. (Provep 5:15-21; Hibru 13:4) Maritman na maritmeri i mas tingim laik bilong narapela narapela long slip wantaim na ol i no tingim ol yet tasol. (1 Korin 7:3-5) Maritman i mas tingim olsem “i no gat wanpela man i save heitim bodi bilong em yet, nogat. Em i save givim kaikai long en na tingim olsem samting i dia tumas.” Olsem na em i mas laikim na tingim tru meri bilong em. Bikpela samting long meri, em i laik bai man bilong em i mekim gut long em na laikim em.—Efesus 5:29.

7. Bilong wanem famili i mas i gat het bilong en?

⁷ Olgeta famili i mas i gat het bilong en, em wanpela bilong stiaim famili na olgeta i ken wok gut wantaim. Long 1 Korin 11:3 Baibel i tok: “Het bilong olgeta man em Krais; na het bilong meri em man; na het bilong Krais em God.”

8. Olsem wanem maritmeri i mas soim bikpela rispek long man bilong em?

 ⁸ Olgeta maritman i save popaia. Tasol taim maritmeri i sapotim ol disisen bilong man bilong em na wok bung wantaim em, famili olgeta bai stap gut. (1 Pita 3:1-6) Baibel i tok: “Maritmeri i mas i gat bikpela rispek long man bilong em.” (Efesus 5:33) Tasol olsem wanem sapos man i no wanbilip bilong meri? Meri i mas i gat bikpela rispek yet long man bilong em. Baibel i tok: “Yupela maritmeri, yupela i mas daun long ol man bilong yupela. Na sapos sampela bilong ol i no save bihainim tok bilong God, orait ol i ken lukim pasin bilong yupela. Na maski yupela i no mekim wanpela tok, ol inap kamap bilipman, long wanem, ol i lukim gutpela pasin bilong yupela na pasin bilong yupela long rispek tru long ol.” (1 Pita 3:1, 2) Gutpela pasin bilong meri bai helpim man bilong em long kliagut long bilip bilong em na rispektim em.

9. (a) Meri i mas mekim wanem taim em i no wanbel long tingting bilong man bilong em? (b) Taitus 2:4, 5 i givim wanem tok long ol maritmeri?

⁹ Meri i mas mekim wanem taim em i no wanbel long  tingting bilong man bilong em? Long pasin rispek em i ken kamapim tingting bilong en. Olsem, Sara i kamapim tingting bilong em we Abraham i no wanbel long en, tasol Jehova i tokim em: “Harim tok bilong em.” (Stat 21:9-12) Taim man i wokim disisen long wanpela samting na dispela i no brukim lo bilong Baibel, orait meri i mas sapotim disisen bilong man. (Aposel 5:29; Efesus 5:24) Gutpela meri bai lukautim famili bilong em. (Ritim Taitus 2:4, 5.) Taim man bilong em na ol pikinini i lukim em i wok hat long lukautim ol, ol bai laikim em tru na soim rispek moa long em.—Provep 31:10, 28.

10. Baibel i tok wanem long pasin bilong seperet na divos?

¹⁰ Sampela taim ol marit i save hariap long divos o lusim poroman marit bilong ol olsem seperet. Tasol Baibel i tok olsem “maritmeri i no ken lusim man bilong em” na “maritman i no ken lusim meri bilong em.” (1 Korin 7:10, 11) Sampela taim bikpela hevi tru i kamap namel long tupela inap mekim na tupela i seperet, tasol ol i mas tingting gut long dispela disisen ol i wokim. Tasol olsem wanem long divos? Baibel i tok wanpela as tasol na man na meri i ken divos em taim wanpela i slip wantaim narapela husat i no poroman marit bilong em.—Matyu 19:9.

11. Wanem bikpela samting ol pikinini i mas kisim?

¹¹ Yupela papamama, yupela i mas lusim bikpela haptaim long stap wantaim ol pikinini bilong yupela. Ol pikinini i nidim yupela, na bikpela samting moa, yupela i mas skulim ol long Jehova.—Lo 6:4-9.

12. Ol papamama i mas mekim wanem bilong was gut long ol pikinini bilong ol?

¹² Dispela graun bilong Satan i wok long i go nogut moa, na i gat sampela manmeri i laik mekim nogut long ol pikinini bilong yumi, na mekim pasin sem tu long ol.  Sampela papamama i pilim hatwok long stori long dispela samting. Tasol ol papamama i mas givim tok lukaut long ol pikinini bilong ol long ol kain man olsem na skulim ol pikinini long olsem wanem ol i ken sakim ol. Yupela papamama, yupela i mas was gut long ol pikinini bilong yupela. *—1 Pita 5:8.

13. Olsem wanem ol papamama i ken skulim ol pikinini bilong ol?

¹³ Ol papamama i gat wok long skulim ol pikinini long pasin ol i mas bihainim. Olsem wanem yu ken skulim ol pikinini bilong yu? Tru, yu mas skulim ol pikinini bilong  yu, tasol pasin bilong stretim pikinini i no makim olsem yu mekim long hatpela pasin. (Jeremaia 30:11) Olsem na no ken stretim ol long taim yu belhat. Yu no laik bai toktok bilong yu i “olsem bainat i sutim man” na i bagarapim bel bilong ol. (Provep 12:18) Skulim ol pikinini bilong yu long kliagut long as na ol i mas bihainim tok.—Efesus 6:4; Hibru 12:9-11; lukim Futnot long pes 223.

14, 15. Bilong wanem ol pikinini i mas bihainim tok bilong papamama bilong ol?

¹⁴ Oltaim Jisas i save bihainim tok bilong Papa bilong em, maski sampela taim i hatwok. (Luk 22:42; Jon 8:28, 29) Jehova i laik bai ol pikinini i mas bihainim tok bilong papamama bilong ol.—Efesus 6:1-3.

¹⁵ Yupela ol pikinini, maski yupela i pilim hatwok long bihainim tok bilong papamama bilong yupela, tingim olsem taim yu bihainim tok bilong ol, Jehova na papamama bilong yu bai amamas long yu. *—Provep 1:8; 6:20; 23:22-25.

16. (a) Olsem wanem Satan i traim long pulim ol yangpela long mekim pasin nogut? (b) Bilong wanem em i bikpela samting long makim ol pren em ol i laikim Jehova?

¹⁶ Devil inap yusim ol pren bilong yu na ol arapela yangpela long traim yu long mekim samting i no stret. Em i save olsem dispela samting bai hatwok long sakim. Olsem, pikinini meri bilong Jekop, Daina, em i poroman wantaim ol lain i no laikim Jehova. Na dispela i kamapim planti hevi long em na famili bilong em. (Stat 34:1, 2) Sapos ol pren bilong yu i no laikim Jehova, ol inap traim yu long mekim samting em Jehova i no laikim, dispela bai kamapim bikpela hevi long yu, famili bilong yu, na God tu.  (Provep 17:21, 25) Olsem na em i bikpela samting long yu mas painim ol pren i laikim Jehova.—1 Korin 15:33.

17. Wanem wok bilong olgeta wan wan insait long famili?

¹⁷ Taim olgeta long famili i bihainim tok bilong God, ol inap abrusim planti hevi. Olsem na sapos yu wanpela maritman, yu mas laikim meri bilong yu na mekim pasin long em we i soim olsem yu laikim em. Sapos yu wanpela maritmeri, yu mas soim pasin rispek na daun long man bilong yu na bihainim pasin bilong meri em Provep 31:10-31 i stori long en. Sapos yu wanpela papa o mama, skulim ol pikinini bilong yu long laikim God. (Provep 22:6) Sapos yu wanpela papa, “bosim gut” famili bilong yu. (1 Timoti 3:4, 5; 5:8) Na yupela ol pikinini, bihainim tok bilong papamama bilong yupela. (Kolosi 3:20) Tingim olsem olgeta insait long famili inap popaia, olsem na ol i mas mekim pasin daun na askim narapela narapela long fogivim ol. Yes, Baibel i gat ol tok bilong Jehova bilong stiaim olgeta wan wan insait long famili.