1, 2. ¿Néna uékasïni Jeoba eskaksï irekaaka familiauecha?

JEOBA kueraasti temungurhirikuani. Bibliajtsïni arhisïndi eska Jeoba kueraaska orheta uarhiitini ka Adanini íntskuni. Adani xáni tsípispti enga arini ambe uandapka Eberi ambe: “I kʼóru úkata jarhasti juchiti únichani jingoni ka juchiti kʼuiripeta jingoni” (Génesis 2:22, 23). Ísï jimbo, Jeoba uékasïndi eskaksï temungurhiricha, tsípikua jingoni irekaaka.

² Joperu uánikua kʼuiripuechaksï no úsïndi tsípikua jingoni irekani imeri familia jingoni. Peru Bibliarhuksï uánikua konsejuecha jarhasti enga uáka jarhuataani iámindu familiarhu anapuechani paraksï sési pájperani ka tsípikua jingoni irekani (Lukasʌ 11:28).

3, 4. a) ¿Néna jatsiski para kámani uámba imeri témbani? b) ¿Andisï jukaparhakue eskaksï temungurhiricha puátsperantaaka?

³ Biblia arhisïndi eska ambakiti acheeti ma jatsiska para uékperakua ka janhanharhikua jingoni kámani témbani (arhinta je Efesu 5:25-29). Acheeti jatsisti para méntkisï uékperakua jingoni kámani témbani. Ístu, jatsisti para kuájchakuni, kuidarini ka no no sési ambe úkuni.

⁴ ¿Ambe jatsiski para úni acheeti enga témba no uáka sési ambe úni? Biblia arhiasïndi acheetichani: “Uéa je chári uarhiitichani, ka asï jáma je ísku jauenani ikiakuani” (Kolosasi 3:19). Cha engajtsï uámbeka, miá je eskajtsï chájtu no úsïnga iámindu ambe sési úni. Ka máteru ambe, engajtsï uéjka eskaksïni Tata Diosï puáchintaaka, chájtsï jatsiska para puákuantaani chári uarhiitichani (Mateu 6:12, 14, 15). Enga uámba ka imeri témba puátsperantaaka, i ambe jarhuatauati paraksï tsípikua jingoni irekani temungurhirini.

5. ¿Andisï jatsi para acheeti janhanharhini imeri témbani?

 ⁵ Jeoba uékasïndi eska acheeti janhanharhiaka témbani. Acheeti jatsisti para exeni jarhani ambe enga uétarhinchani jarhajka témba. I ambe kánikua jukaparhakuesti. Enga acheeti no sési kámaaka témbani, jamberi Jeoba no kurhauati imeri kómarhikuechani (1 Pedru 3:7). Jeoba no ísï exesïndi eskaksï acheeticha sánderu jukaparhakueska eska uarhiiticha. Para Jeoba, iámindu kʼuiripuecha engaksï xénchajka imani, jukaparhakuestiksï.

6. ¿Ambe arhikuekasïni eska acheeti ka imeri témba máechakua kuerpueska?

⁶ Jesusi uandaspti: “Nóteruksï tsimaniuatia —acheeti ka uarhiiti— sino solu máechakua kuerpu” (Mateu 19:6). Ni acheeti ma ni uarhiiti ma jatsi para máteru nema jingoni enganiarini (Proverbios 5:15-21; Ebreu 13:4). Enga temungurhiri ma relasioni seksuali jatsiaka, no jatsisti para acheeti o témbajku uékani sési pʼikuarherani (1 Korintu 7:3-5). Biblia arhisïndi eska “acheeti uékaaka imeri uarhiitini eska imajkumindu na uékakuarhijka”. Ka ístu arhisïndi eska ‘no nema jarhaska enga no xénchajka imeri mismu kuerpuni, sino mejori sési tʼirerani ka kuidarini’. Ísï jimbo, acheeti jatsisti para xénchani imeri uarhiitini ka uékperakua jingoni kámani. Ambe enga témba ma sánderu tsitijka jindesti eska imeri uámba sési arhiaka ka sési kámani (Efesu 5:28, 29).

7. ¿Andisï mándani familia uétarhinchajki orhejtsïkutini ma?

⁷ Mándani familia orhejtsïkutini ma uétarhinchasïndi paraksï iáminduecha úni imecheri ánchikuarhita kʼumanchikuarhu. Biblia uandasïndi ixú 1 Korintu 11:3: “Eska Jesukristu jindeska acheetiri juramuti, ka acheeti uarhiitiri ka eska Diosï jindeska Kristueri juramuti”.

8. ¿Uarhiiti ma néna xarhatakusïni imeri uámbani eska kánikua janhanharhisïnga?

⁸ Ambe enga ísïka, jindesti eskaksï iámindu uámbecha  no úsïnga iámindu ambe sési úni. Peru enga uarhiiti apoiarijka ambe enga imeri uámba erakujka úni ka tsípikua jingoni jarhuatani, iámu familia sési jarhasïndi (1 Pedru 3:1-6). Biblia arhisïndi eska uarhiiti jatsiska para kánikua janhanharhini imeri acheetini (Efesu 5:33). Peru ¿ambe uá uarhiiti ma enga uámba no májkueni ambe jakajkuaka? Nájkiruka ísïuaka, témba ístu jatsisti para kánikua janhanharhini. Biblia ístu arhisïndi: “Ka ístu uarhiiticha, janhanharhia je chári acheetichani, paraka acheeticha engaksï no jakajkujka Diosïri uandakuani, jakajkuakaksï chári sési jángua jimbo nájkirukajtsï no ma ambe aianguauaka, jimbokaksï exeaka na engajtsï xáni sési jámajka janhanharhiaparini” (1 Pedru 3:1, 2). Témberi ambakiti ejemplu, uáti jarhuatani uámbani para kurhanguni ka jurajkuni eska uáka imani ambe enga ima jakajkujka.

9. a) ¿Ambe jatsiski para úni uarhiiti enga no jaiapanhentaaka ambe enga imeri uámba erakuaka úni? b) ¿Náki konseju jarhaski para uarhiiticha ixú Titu 2:4, 5?

⁹ ¿Ambe uá úni uarhiiti enga no jaiapanhentaaka ambe enga imeri uámba erakuaka úni? Uáti arhini ambe enga eratsejka peru janhanharhikua jingoni. Por ejemplu, Sara arhispti Abraanini ambe ma enga ima no tsitipka. Peru Jeoba arhispti  Abraanini eska kurhajchapiringa Sarani (Génesis 21:9-12). Uarhiiti jatsisti para apoiarini ambe enga imeri uámba erakuaka úni joperu no apoiariuati jiáni enga no terukuntaaka imani ambe jingoni enga Biblia uandajka (Ukuecha 5:29; Efesu 5:24). Ka ístu, ambakiti uarhiiti ma jatsisti para kuidarini imeri familiani (arhinta je Titu 2:4, 5). Enga uámba ka uájpechaksï exejka ambe enga xáni újka imecha jimbo, sánderuksï xénchaati ka janhanharhini (Proverbios 31:10, 28).

10. ¿Ambe uandasïni Biblia enga temungurhiri ma uékaaka jurajperani o diborsiarikuarhini?

¹⁰ Jarhastiksï temungurhiricha engaksï sóntku jurajperajka o diborsiarikuarhini. Peru Biblia arhisïndi eska “uarhiiti no jarharintaaka imeri uámbani” ka eska ‘acheeti no chútantaaka imeri uarhiitini’ o jurajkuni (1 Korintu 7:10, 11). Ísïsti eska ménisï kánikua no sési jásï ambe jarhasïnga engaksï jimbo temungurhiricha úpiringa jurajperani, peru i ambe no chʼanakua ambesti. * ¿Ka ambechi uá uandani diborsiueri ambe? Biblia solu jiájkantku sésikua íntspisïndi para diborsiarikuarhini enga kʼuiripu ma enga tembuchatini jaka o uambuchatini, relasioni seksuali jatsiaka máteru nemani jingoni enga no uámbeuaka o témbeni (Mateu 19:9).

11. ¿Ambeksï sánderu uétarhinchasïni chári sapiicha?

¹¹ Táticha, jánguarhinta je xáni eskajtsï na xáni uáka chári sapiicha jingoni jarhani, chári sapiichaksïni uétarhinchasïndi. Ka sánderu jukaparhakua ambe, chári sapiichaksï uétarhinchasïndi eskajtsï jorhendauaka Jeobaeri ambe (Deuteronomio 6:4-9).

12. ¿Ambeksï jatsiski para úni táticha paraksï kuájchakuani imecheri sapiichani?

¹² Sánhani arhixati sánderu no sési jánhaskuarhini Noambakitiri  parhakpini jimbo. Jarhastiksï kʼuiripuecha engaksï uéjka no sési ambe úkuani juchari sapiichani. Sapiichaksï uáti ikichakueni jásï ambe úminhani (abusos sexuales). Máru tátichaksï úkua jukanchasïndi íri ambe uandontskuarheni imecheri sapiicha jingoni. Peruksï táticha jatsisti para arhiani imecheri sapiichani paraksï jingontku jámani i járhati kʼuiripuecha jingoni ka jorhendaani kuájchakukuarhini. Táticha, jatsiskajtsï para kuájchakuani chári sapiichani (1 Pedru 5:8). *

13. ¿Tátichaksï néna jatsiski para jorhendaani imecheri sapiichani?

¹³ Tátichaksï jatsisti para jorhendaani imecheri sapiichani  kurhandirani. ¿Chájtsï néna uá jorhendaani? Nájkirukaksï sapiicha uétarhinchajka eskaksï jurhimberanhantaaka, asï méni no sési kaa je no sési ambe úkupariani (Jeremías 30:11). Ísï jimbo, asï jurhimberantaa je jiáni engajtsï ikiani jauaka. Seguru eskajtsï no uékasïnga no sési pʼikuastaani imani uandakuechani úrapariani engaksï ísïka komueska espada ma jingoni chʼurhuriani jarhani (Proverbios 12:18). Jarhuataa je chári sapiichani kurhanguni andiksïsï jatsi para kurhandirani (Efesu 6:4; Ebreu 12:9-11, TNM). (Exe je nota 30).

14, 15. ¿Andiksïsï sapiicha jatsi para kurhajchaani táti jémbechani?

¹⁴ Jesusi méntkisï kurhajchaspti imeri Táti jémbani, asta jiáni enga úkua japka (Lukasʌ 22:42; Juanu 8:28, 29). Jeoba uékasïndi eskaksï sapiicha kurhajchauaka táti jémbechani (Efesu 6:1-3).

¹⁵ Sapi, jamberiri úkua jukanchajka kurhajchaani chíti tátichani. Peru miá eska Jeoba ka chíti tátichaksï kánikua sési pʼikuarherasïnga engari kurhandirajka (Proverbios 1:8; 6:20; 23:22-25). *

16. a) ¿Ambe úrasïni Noambakiti paraksï tumbiicha imani ambe úni enga no sési jaka? b) ¿Andisï jukaparhakue eskari imani amiguechani jatsiauaka engaksï xénchajka Jeobani?

¹⁶ Satanasi uáti chíti amiguechani úraani ka máteru tumbiichani parari imani ambe úni enga no sési jaka. Noambakiti mítesti eska uáka kánikua úkua jukani engaksïni nema afuersa úrani jauaka ambe ma. Ju je exeni Dineri ejemplu, enga Jakobu uájpepka. Dina, imani amiguechani jatsiaspti engaksï no xénchenga Jeobani ka i ambe úspti eska uánikua uandanhiatechani jatsiapiringa ima ka imeri familia (Génesis 34:1, 2). Engaksï chíti amiguecha no xénchajka Jeobani, jamberiksïni uáti pʼímarhini parari imani ambe úni enga Jeoba kurhunhijka. Inde ambe úpirindi kánikua no sési pʼikuastani Jeobani, chíti  familiani ka tʼunguini (Proverbios 17:21, 25). Ísï jimbo, kánikua jukaparhakuesti eskari imani amiguechani jatsiauaka engaksï xénchajka Jeobani (1 Korintu 15:33).

17. ¿Ambeksï jatsiski para úni mándani arhini familiarhu anapuecha?

¹⁷ Engaksï iámindu familiarhu anapuecha újka ambe enga Tata Diosï uandajka, nóksï xáni uandanhiatechani jatsiasïndi. Ísï jimbo, engajtsï cha uámba máeka, xéncha je chári uarhiitini ka uékperakua jingoni káma je. Engajtsï cha témba máeka, janhanharhi je chári acheetini, apoiari je ambe enga ima erakuaka úni ka jánguarhinta je xásï uarhiiti máeni eska Proverbios 31:10-31 na arhijka. Engajtsï cha sapiichani kánguarhiajka, jorhendaa je xénchani Tata Diosïni (Proverbios 22:6). Enga cha uámba máeka ka tátini, sési orhejtsïku je chári familiani (1 Timoteo 3:4, 5; 5:8). Ka cha sapiicha, kurhajchaa je chári tátichani (Kolosasi 3:20). Ju je miáni eskachi iámindu familiarhu anapuecha no úsïnga iámindu ambe sési úni, ísï jimbo, jatsiskachi para kaxumbitini ka tekaantskua kurhajkuarhini. Jiájkani, eskachi na exekia, Bibliarhuksï jarhasti Jeobaeri konsejuecha para mándani arhini familiarhu anapuecha.