1, 2. Иегова өг-бүлелерниң аас-кежиктиг болурун күзеп турар деп чүге чугаалап болурул?

БИР дугаар өг-бүлени Бурган тургускан. Иегова херээжен кижини чаяагаш, эр кижиге Адамга эккелген деп Библияда бижип турар. Ынчан Адам: «Бо дээрге мээң сөөгүмден үнген сөөк, эът-бодумдан үнген эът-бот-тур» деп аажок өөрээн (Эге дөс 2:22, 23). Моон алырга Иегова өг-бүлелерниң аас-кежиктиг болурун күзеп турар.

² Харааданчыг чүүл, шупту өг-бүлелерни аас-кежиктиг деп болбас. Ынчалза-даа библейжи дүрүмнер өг-бүлениң аас-кежиктиг болурунга дузалыг. Ол дүрүмнерни өг-бүлениң кежигүн бүрүзү ажыглаар болза, өг-бүлеге тайбың болгаш ынакшыл туруп болур (Лука 11:28).

3, 4. а) Ашаа кадайынга кандыг хамаарылгалыг болур ужурлуг? б) Ашак-кадай улуска бот-боттарын өршээри чүге чугулал?

³ Ашаа кадайынга ынак болгаш ону хүндүлээр ужурлуг деп, Библияда бижээн. Эфесчилерге 5:25—29-ту номчуптуңар. Ашаа кадайынга кезээде чылыг-чымчак хамаарылгалыг боор ужурлуг. Ол ону камгалаар, ол дээш сагыш човаар база кадайының сеткилин хомудадыптар чүүлдү кылбас.

⁴ Чамдыкта кадайы ашаанга таарышпас чүүлдү  кылып болур. Мындыг байдалда ашаа канчаар алдынар ужурлуг? Өгнүң эр ээзинге Библияда мындыг сүме бар: «Кадайларыңарга ынак болуңар, оларны кадыг-дошкун аажылаваңар» (Колосчуларга 3:19). Өгнүң эр ээлери, силерге база частырыглар туруп болур деп утпаңар. Силерни Бурган өршээзин деп бодаар болзуңарза, кадайыңарны база өршээңер (Матфей 6:12, 14, 15). Бир эвес ашак-кадай улус бот-боттарын кезээде өршээр болза, оларның өг-бүлези аас-кежиктиг болур.

5. Ашаа кадайын чүге хүндүлээр ужурлугул?

⁵ Ашаа кадайынга ханы хүндүткелдиг болурун Иегова күзеп турар. Ол ооң шупту хереглелдерин бодаар ужурлуг, бо дээрге чугула чүүл-дүр. Бир эвес ашаа кадайын багай аажылаар болза, Иегова ооң мөргүлдерин дыңнавайн барып болур (1 Пётр 3:7). Иегова эр улусту херээжен улустан үнелиг деп санавайн турар. Ол Аңаа ынак улустуң дөгерезинге ынак.

6. «Чаңгыс мага-бот боор» дээрге чүү дээни ол?

⁶ Эр биле херээжен кижи өг-бүле туткан соонда «ийи эвес, а чаңгыс мага-бот боор», азы оларның аразында харылзаазы дыка чоок апаар деп, Иисус чугаалаан (Матфей 19:6). Ашак-кадай улус бот-боттарынга бердинген болуп, кады чурттаан эжинге кажан-даа өскерилбес ужурлуг (Чугаалар 5:15—21; Еврейлерге 13:4). Олар эр-херээжен харылзаага хамаарыштыр чүгле бодунуң ажыын сүрбейн, бот-боттарының хереглелдерин кичээнгейге алыр ужурлуг (1 Коринфичилерге 7:3—5). Библияда: «Бодунуң мага-бодун көөр хөңнү чок чаңгыс-даа эр кижи кажан-даа туруп көрбээн, харын ол оозун чемгерер, ажаап-тежээр  болгай» — дээн. Ол дээрге ашаа кадайынга чүгле ынак боор эвес, а эрге-чассыы-биле сагыш човаар ужурлуун көргүскен. Кадайы ашааның аңаа ынак болгаш чылыг-чымчак хамаарылгалыг болурун күзээр (Эфесчилерге 5:29).

7. Өг-бүлеге баштың чүге херегил?

⁷ Быжыг болгаш найыралдыг өг-бүлелиг болур дизе, аңаа эки удуртукчу, азы баштың, херек. «Христос эр кижи бүрүзүнге „баш“ боор, эр кижи — херээжен кижиге „баш“ боор, а Бурган — Христоска „баш“ боор» — деп Библияда бижээн (1 Коринфичилерге 11:3).

8. Ашаан ханы хүндүлеп турарын кадайы канчаар көргүзүп болурул?

⁸ Ийе, ашаа чазып болур. Ынчалза-даа кадайы ашааның шиитпирлери-биле чөпшээрежип, ону деткиир болза, бүдүн өг-бүле аас-кежиктиг бооп болур (1 Пётр 3:1—6). Библияда: «Кадайы ашаан хүндүлезин» — дээн  (Эфесчилерге 5:33). Бир эвес ашаа Бурганга бүзүревес азы шажын-чүдүлгези өске болза, кадайы аңаа кандыг хамаарылгалыг болур ужурлугул? Дөмей-ле ону ханы хүндүлээр ужурлуг. «Херээжен улус, ашактарыңарга чагыртыңар. Оларның чамдыызы Бурганның сөзүн тооп дыңнавас-даа болза, силерниң Бурганны хүндүлээр, арыг амыдыралыңар көргеш, артык чугаа-сөзүңер чокка-ла, Ооң улузу апаар кылдыр бодуңарны ап чоруңар» деп, кадайларынга Библияда ындыг кыйгырыг бар (1 Пётр 3:1—2). Бир эвес кадайы бодун төлептиг алдынар болза, ашаа ооң чүдүлгезин сонуургап, ооң бүзүрелинге хүндүткелдиг апаар чадавас.

9. а) Кадайы бир-ле айтырыгга ашаа-биле чөпшээрешпейн турар болза, ол бодун канчаар алдынар ужурлуг? б) Титке 2:4, 5-те өг-бүлелиг херээжен улуска кандыг сүме бердингенил?

⁹ Бир эвес кадайы ашаа-биле бир-ле айтырыгга чөпшээрешпейн турар болза, бодунуң үзел-бодалын чугаалап болур. Ынчалза-даа хүндүткелдиг чугаалаары чугула. Чижээ, Сарра бир айтырыгга хамаарыштыр Авраамга бодунуң саналын чугаалаан. Ол санал Авраамның сеткилинге кирбээн, ынчалза-даа Иегова Авраамга мынча дээн: «Сарраның чугаалааны хевээр күүсет» (Эге дөс 21:9—12). Бир-тээ, христиан эр ээлер Библияга дүүштүр шиитпирлер хүлээп алыр болганда, кадайлары оларның шиитпирлерин деткиир ужурлуг (Ажыл-чорудулга 5:29; Эфесчилерге 5:24). Өг-бүлениң эки херээжен ээзи бодунуң өг-бүлези дээш, кезээде сагыш човап чоруур. (Номчуптуңар: Титке 2:4, 5.) Өг-бүлези дээш ооң сагыш човангырын көргеш, ашаа, ажы-төлү аңаа оон-даа артык ынак апарып, хүндүлээрлер (Чугаалар 31:10, 28).

10. Ашак-кадай улус бот-боттарындан аңгы чурттап азы чарлып болур бе?

 ¹⁰ Чамдыкта ашак-кадай улус дүрген-не чарлып алыр азы аңгы чурттаар деп шиитпирни үндүрүп болур. Ынчалзажок Библияда: «Кадайы ашаандан чарылбас ужурлуг... Ашаа, бодунуң ээлчээнде, кадайындан чарылбас ужурлуг» — дээн (1 Коринфичилерге 7:10, 11). Чамдык байдалдарда ашак-кадай улус аңгы чурттаарын шиитпирлеп болур, ынчалза-даа ол дээрге аажок шыңгыы шиитпир-дир. А Библияда чарлырының дугайында чүү деп турар? Чарлып болур чаңгыс чылдагаан — ашаанга азы кадайынга өскерлир чорук (Матфей 19:9).

11. Ажы-төлге чүү эң-не чугулал?

¹¹ Ада-иелер, ажы-төлүңер-биле, аргалыг-ла болза, үргүлчү чугаалажып туруңар. Силер ажы-төлүңерге дыка херек силер. Ажы-төлүңерге кылып болур чүүлдериңерниң эң-не чугулазы — Иегованың дугайында оларга чугаалап бээри-дир (Ыдыктыг хоойлуну катаптааны 6:4—9).

12. Ажы-төлүн камгалаар дээш, ада-иелер чүнү канчаар ужурлугул?

¹² Эрликтиң делегейи хүнден-хүнче каржы апарып бар-ла чыдар. Хомуданчыг чүүл, чамдык улус силерниң ажы-төлүңерге хора чедирип болур. Күштеп-күчүлээри база маңаа хамааржыр. Чамдык ада-иелерге мындыг темаларны ажы-төлү-биле сайгарары ындыг-ла амыр эвес. Ынчалза-даа ада-иелер ажы-төлүн айыылдан оваарындырып, ындыг улус-биле канчаар алдынарын өөредир ужурлуг. Ада-иелер, ажы-төлүңерни камгалаар хүлээлгелиг силер * (1 Пётр 5:8).

13. Ажы-төлүн өөредип тургаш, ада-иелер чүнүң дугайында сактыр болза эки?

¹³ Ада-иелер ажы-төлүн шын алдынарынга өөредир харыысалгалыг. Олар ону канчаар кылып болурул? Ажы-төлдү үргүлчү чагып-сургап кижизидер болза эки, а ону кылырда ада-иелер доңгун азы каржы болбас ужурлуг (Иеремия 30:11). Ажынып турар үеңерде оларның шын эвес алдынганын сайгарбаңар. Оон башка силерниң сөстериңер, хылыш дег, балыглап, төлүңерни хомудадып болур (Чугаалар 12:18). Ада-иезинге дыңнангыр болуру чугула деп билип алырынга,  ажы-төлүңерге дузалаңар (Эфесчилерге 6:4; Еврейлерге 12:9—11; 30 дугаар Капсырылганы көрүңер).

14, 15. Ажы-төл ада-иезинге чүге дыңнангыр болур ужурлуг?

¹⁴ Иисус кезээде, берге үелерде-даа, Адазынга дыңнангыр чораан (Лука 22:42; Иоанн 8:28, 29). Иегова ажы-төлдүң ада-иезинге дыңнангыр болурун күзеп турар (Эфесчилерге 6:1—3).

¹⁵ Ажы-төл, ада-иеңерге дыңнангыр болуру берге болза, мону утпаңар: дыңнангырыңар-биле чүгле ада-иеңерни эвес, а Иегованы база өөртүр силер * (Чугаалар 1:8; 6:20; 23:22—25).

16. а) Аныяктарны шын эвес чүүл кылырынче Эрлик канчаар ыдалап болур? б) Иеговага ынак улус-биле эдержири чүге чугула?

¹⁶ Эштериңер болгаш таныыр улузуңар таварыштыр силерни шын эвес чүүл кылырынче Эрлик  ыдалап болур. Чүге дизе оларның силерже кайы хире салдар чедирип болурун ол дыка эки билир болгай. Иаковтуң уруу Динаны сактып келиңер даан. Ол Иеговага ынак эвес улус-биле эдержип турганындан бодунга-даа, өг-бүлезинге-даа хөй-ле хилинчек чедирген (Эге дөс 34:1, 2). Иеговага ынак эвес эштериңер бар болза, олар силерни Иегованың көөр хөңнү чок чүүлүн кылырынче ыдалап болур. Ол чүүл силерниң бодуңарга, өг-бүлеңерге база Бурганга аарышкыны эккээр (Чугаалар 17:21, 25). Ынчангаш Иеговага ынак улус-биле эдержири эргежок чугула (1 Коринфичилерге 15:33).

17. Иегова өг-бүлениң кежигүн бүрүзүнден чүнү манап турарыл?

¹⁷ Бир эвес өг-бүлениң кежигүн бүрүзү Бурганны өөртүрүн кызып, шын алдынар болза, ол чүүл өг-бүлени хөй-ле бергелерден камгалап болур. Ашактар, кадайларыңарга ынак болуп, кезээде оларга чылыг-чымчак хамаарылгалыг болуңар. Кадайлар, ашактарыңарны хүндүлеңер база оларга дыңнангыр болуңар. Чугаалар 31:10—31-де бижээни дег өгнүң херээжен ээзинге дөмей болурун кызыңар. Ада-иелер, ажы-төлүңерни Бурганга ынак болур кылдыр өөредиңер (Чугаалар 22:6). Адалар, өг-бүлеңерни эки башкарарын кызыңар (1 Тимофейге 3:4, 5; 5:8). Ажы-төл, ада-иеңерге дыңнангыр болуңар (Колосчуларга 3:20). Өг-бүледе кым-даа болза частырыгны кылыптып болур деп сактыры чугула. Ынчангаш бот-боттарыңарны өршээп, хүндүлежип чоруңар. Өг-бүлениң кежигүн бүрүзүнге мерген угаанныг сүмелер Библияда бар дээрзин көрдүвүс.