1, 2. Малы вераны луоз, Иеговалэн потэ, семьяос шудоесь мед луозы шуыса?

НЫРЫСЕТӤ семья Инмарен кылдытэмын вал. Библиын верамын, Иегова кышномуртэз кылдытӥз но сое пиосмурт доры, Адам доры, вайиз шуыса. Сое адӟыса, Адам шумпотыса вераз: «Тани, та лы мынам лыосы пӧлысь, та мугор но мынам мугорылэсь пӧрмытэмын» (Улон-вылон 2:22, 23). Со возьматэ, Иеговалэн потэ, семьяос шудоесь мед луозы шуыса.

² Жаляса верано луэ, ваньмыз шудо семьяосын ӧз будэ. Озьы ке но Библиысь возетъёс юрттыны быгато картъёслы но кышноослы, анай-атайёслы но нылпиослы сыӵе семья кылдытыны, кудаз котькудӥз шӧдоз, сое ярато но гажало шуыса (Лука 11:28).

3, 4. а) Кызьы карт ассэ кышноеныз возьыны кулэ? б) Малы картлы но кышнолы ог-огзэс простить карыны дась луоно?

³ Библиын верамын, карт кышнозэ яратыны но гажаны кулэ шуыса. Лыдӟе Ефесъёслы 5:25—29. Умой карт аслаз кышноеныз ассэ котьку но лякытэн возе. Со кышнозэ уте но сюлмаське со сярысь но кышнозэ ноку но вӧсь уг кары.

⁴ Куддыръя кышно лэсьтыны быгатэ сое, мар картэзлы уз кельшы. Кызьы карт ассэ возьыны  кулэ сыӵе учыре? Тани кыӵе визь-кенеш сётэ Библия картъёслы: «Асьтэлэсь кышноостэс яратэлэ, лекъяськыса-уродъяськыса соосын эн улэ» (Колоссыослы 3:19). Картъёс, тодады возе: тӥ но куддыръя янгышаны быгатӥськоды. Нош тӥляд потэ ке, Инмар тӥледыз простить мед кароз шуыса, тӥледлы но кышноостэс простить кароно (Матфей 6:12, 14, 15). Карт но кышно ог-огзэс простить карыны дась луизы ке, соослэн семьязы шудо луоз.

5. Малы карт кышнозэ гажаны кулэ?

⁵ Иеговалэн потэ, карт кышнозэ мед гажалоз шуыса. Карт кышноезлэсь кулэяськонъёссэ лыдэ басьтыны кулэ. Со туж кулэ луись юан. Карт ассэ кышноеныз умойтэм возе ке, Иегова солэсь вӧсяськонъёссэ кылзэмысь дугдыны быгатэ (1 Пётр 3:7). Иегова пиосмуртъёсты кышномуртъёслэсь умойгес шуыса уг лыдъя. Со яратэ ваньзэс, кинъёс сое ярато.

6. Кызьы валано, кузпалъяськемзы бере карт но кышно «одӥг лулмугор» луо шуыса?

⁶ Иисуслэн верамезъя, пиосмурт но кышномурт кузпалъяськемзы бере «кык ӧвӧл, одӥг лулмугор ини». Мукет кылъёсын вераса, кузпалъяськемзы бере соослэн кусыпъёссы туж матынэсь луо (Матфей 19:6). Кузпалъёс ог-огзылы котьку оскымон луыны кулэ (Мадёнъёс 5:15—21; Еврейёслы 13:4). Куке вераськон мынэ кузпалъёслэн ӵош кӧланзы сярысь, карт но кышно ог-огзылэсь кулэяськонъёссэс лыдэ басьтыны кулэ — ачид сярысь гинэ малпаськоно ӧвӧл (1 Коринфъёслы 7:3—5). Библиын верамын: «Нокин но, ноку но аслэсьтыз мугорзэ синазькыль ӧз на кары, котькудӥз адями ас мугорзэ  сюдэ, шунтэ». Со возьматэ, карт кышнозэ яратыны но со сярысь сюлмаськыны кулэ шуыса. Кышнолэн тужгес но потэ, солэн картэз лякыт сямо но яратӥсь мед луоз шуыса (Ефесъёслы 5:29).

7. Малы семьяын йыр луыны кулэ?

⁷ Семья юн мед луоз но огкылысь мед улоз шуыса, солы кивалтӥсь, яке йыр, кулэ. Библиын верамын: «Котькудӥзлы пиосмуртлы йыр — Христос, кышномуртлы йыр — кузпалыз, нош Христослы йыр — Инмар» (1 Коринфъёслы 11:3).

8. Кызьы кышно картэзлы аслэсьтыз гажамзэ возьматыны быгатоз?

⁸ Веранэз ӧвӧл, котькуд карт янгышаны быгатэ. Нош кышно картэзлэн кутэм ужпумъёсыныз соглаш кариське но солы юрттэ ке, со быдэс семьялы пайда вае (1 Пётр 3:1—6). Библиын верамын: «Кышномурт аслэсьтыз картсэ гажаса, сӥлы карыса мед улоз» (Ефесъёслы 5:33). Нош карт Инмарлы уг оскы яке солэн осконэз мукет ке? Соку но кышно картсэ  гажаса, сӥлы карыса улыны кулэ. Библия ӧте кышноосты: «Тӥ но, кышномуртъёс, асьтэлэн кузпалъёстылы тэрытскыса улэ. Инмар кыллы тэрытскытэк улӥсь воргоронъёс, кышнооссылэсь улонзэс адӟыса, кылъёсын индылытэк, Инмар пала берытскозы, адӟизы ке тӥлесьтыд чылкыт, Инмарлэсь кышкаса улондэс» (1 Пётр 3:1, 2). Кышно ассэ гажамон возиз ке, со картэзлэсь мылкыдзэ ӝутыны быгатоз кышноезлэн осконэз сярысь тросгес тодыны но солэсь осконзэ гажаны.

9. а) Мар кароно кышнолы, со картэныз соглаш ӧвӧл ке? б) Кыӵе визь-кенеш сётэмын кышноослы Титлы 2:4, 5?

⁹ Нош мар кароно, кышно картэныз соглаш ӧвӧл ке? Соку со картэзлы шонерак, но гажан мылкыдын со сярысь вераны кулэ. Кылсярысь, одӥг пол Сарра Авраамлы аслэсьтыз малпанъёссэ вераз. Солэн малпанъёсыз Авраамлы ӧз кельше. Но Иегова шуиз Авраамлы: «Солэсь верамзэ кабыл басьты» (Улон-вылон 21:9—12). Куке карт кутэ ужпум, кудӥз Библилы пумит ӧвӧл, кышно картэзлэсь кылзӥськыны кулэ (Апостолъёслэн ужъёссы 5:29; Ефесъёслы 5:24). Умой кышно но анай семьяез сярысь сюлмаське. (Лыдӟе Титлы 2:4, 5.) Кышномуртлэн картэз но нылпиосыз адӟизы ке, соос понна со троссэ лэсьтэ шуыса, соос сое эшшо но юнгес гажалозы но яратозы (Мадёнъёс 31:10, 28).

10. Яра-а кузпалъёслы люкиськытэк нимаз улыны яке люкиськыны?

¹⁰ Куддыръя кузпалъёс умой уг малпасько но люкиськыны яке люкиськытэк нимаз улыны ужпум дыртыса куто. Нош Библиын верамын: «Кышномуртлы картэныз люкиськыны уг яра. ...Пиосмуртлы но аслэсьтыз кышнозэ куштыны уг яра»  (1 Коринфъёслы 7:10, 11). Со возьматэ, кузпалъёслы люкиськыны уг яра шуыса. Куд-ог нимысьтыз учыръёсы кузпалъёс люкиськытэк нимаз улыны ужпум кутыны быгато, но сыӵе ужпумез кутэмлэсь азьло туж умой малпаськоно. Нош мар верамын Библиын люкиськон сярысь? Одӥг гинэ муг, кудӥзъя кузпалъёс люкиськыны быгато,— со азон-калгон сьӧлык (Матфей 19:9).

11. Мар самой кулэез луэ нылпиос понна?

¹¹ Анай-атайёс, нылпиосыныды ӵемгес дырдэс ортчытъялэ. Тӥ туж кулэ нылпиостылы. Вералэ  соослы Иегова сярысь — со самой кулэез, мар тӥ соос понна лэсьтыны быгатӥськоды (Кыкетӥ Закон 6:4—9).

12. Мар кароно анай-атайёслы, нылпиоссэс утён понна?

¹² Шайтанлэн дуннеез лекгес но лекгес луэ. Жаляса верано луэ, куд-ог адямиос тӥлесьтыд нылпиостэс вӧсь карыны быгато, кылсярысь, эриктэманы. Куд-ог анай-атайёслы капчи ӧвӧл сыӵе юанъёс сярысь вераськыны. Озьы ке но соос азьло ик вераны кулэ нылпиоссылы, кыӵе кышкытлык кылдыны быгатэ, но дышетыны соосты, кызьы соос асьсэды возьыны кулэ сыӵе адямиосын. Анай-атайёс, асьтэлэсь нылпиостэс тӥ утьыны кулэ * (1 Пётр 5:8).

13. Мае анай-атайёслы тодазы возёно, куке соос нылпиоссэс дышето?

¹³ Анай-атайёс нылпиоссэс дышетыны кулэ асьсэды шонер возьыны. Со понна соос кыл куто. Кызьы соос нылпиоссэс дышетыны быгатозы? Нылпиосты ялан визьмано-нодъяно. Но анай-атайёслы нылпиосынызы лек но жалясьтэм луыны уг яра (Иеремия 30:11). Ноку но пиналэныды солэн янгышез сярысь эн вераське, куке тӥляд вожды потэмын, малы ке шуоно сыӵе дыре тӥляд кылъёсты пуртэн кадь вандозы но пиналдэс вӧсь карозы (Мадёнъёс 12:18). Юрттэ нылпиостылы валаны, малы соос тӥлесьтыд кылзӥськыны кулэ (Ефесъёслы 6:4; Еврейёслы 12:9—11; учке 30-тӥ ватсам валэктонэз).

14, 15. Малы нылпиос анай-атайзылэсь кылзӥськыны кулэ?

¹⁴ Иисус котьку Атаезлэсь кылзӥськиз, соку но, куке кылзӥськыны капчи ӧй вал (Лука 22:42; Иоанн 8:28, 29). Иеговалэн потэ, нылпиос анай-атайзылэсь мед кылзӥськозы шуыса (Ефесъёслы 6:1—3).

¹⁵ Нылпиос, тӥледлы анай-атайдылэсь кылзӥськыны капчи ӧвӧл ке, тодэ: тӥляд кылзӥськемды, анай-атайдэс сяна, Иеговаез но шумпоттэ * (Мадёнъёс 1:8; 6:20; 23:22—25).

16. а) Кызьы Шайтан косыны быгатэ егитъёсты лэсьтыны сое, мар шонертэм луэ? б) Малы туж кулэ эшъяськыны Иеговаез яратӥсь адямиосын?

¹⁶ Кызьы Шайтан тӥледыз косыны быгатэ лэсьтыны мае ке шонертэмзэ? Кылсярысь, эшъёсты  яке тодмоосты пыр, малы ке шуоно со тодэ, макем секыт луэ соослы пумит сылыны. Тодады вае Динаез, Иаковлэсь нылзэ. Со эшъяськиз адямиосын, кудъёсыз Иеговаез уг ярато вал. Сыӵе эшъяськон трос куректон вайиз аслыз но, семьяезлы но (Улон-вылон 34:1, 2). Тӥ эшъяськиськоды ке адямиосын, кудъёсыз Иеговаез уг ярато, соос тӥледыз косыны быгатозы лэсьтыны сое, мае Иегова адӟемпотостэм каре. Со куректон ваёз тӥледлы, тӥляд семьядылы но Инмарлы (Мадёнъёс 17:21, 25). Соин ик туж кулэ эшъяськыны Иеговаез яратӥсь адямиосын (1 Коринфъёслы 15:33).

17. Мае возьма Инмар семьяысь котькудӥзлэсь?

¹⁷ Семьяын котькудӥз тыршиз ке лэсьтыны сое, мае Инмар возьма, со юрттоз семьялы трос шуг-секытъёслэсь палэнскыны. Картъёс, котьку кышноостэс яратэ но асьтэды соосын лякытэн возе. Кышноос, картъёстэс гажалэ но соослэсь кылзӥське. Тырше сыӵе кышно луыны, кудӥз сярысь верамын Мадёнъёсын 31:10—31. Анай-атайёс, дышетэ нылпиостэс Инмарез яратыны (Мадёнъёс 22:6). Атайёс, тырше семьядылы «ӟеч кузё» луыны (1 Тимофейлы 3:4, 5; 5:8). Нылпиос, анай-атайдылэсь кылзӥське (Колоссыослы 3:20). Тодамы возьыны кулэ, семьяысь котькудӥз янгышаны быгатэ шуыса. Соин ик зӥбыт-востэмесь луэ но ог-огдэс простить карыны куре. Кызьы адӟиське, Библия семьяысь котькудӥзлы визь-кенеш сётэ.