1, 2. Ano an karuyag ni Jehova para ha mga pamilya?

HI Jehova nga Dios an naghimo han siyahan nga kasal. An Biblia nagsusumat ha aton nga iya ginhimo an siyahan nga babaye ngan “gindara hiya ha lalaki.” Nalipay gud hi Adan salit nakasiring hiya: “Ini gud an tul-an han akon mga tul-an ngan unod han akon unod.” (Genesis 2:22, 23) Iginsusumat hini ha aton nga karuyag ni Jehova nga magin malipayon an mga mag-asawa.

² Makasurubo nga damu an waray gud makaeksperyensya hin malipayon nga kinabuhi sugad nga pamilya. Pero, an Biblia may damu nga prinsipyo nga mabulig ha ngatanan nga membro han pamilya basi magin malampuson an ira pamilya ngan magin malipayon ha ira pag-urupod.​—Lucas 11:28.

3, 4. (a) Paonan-o sadang trataron han bana an iya asawa? (b) Kay ano nga importante nga magpinasayloay ha usa kag usa an bana ngan asawa?

³ An Biblia nasiring nga an usa nga maopay nga bana sadang magtratar ha iya asawa ha paagi nga may gugma ngan respeto. Alayon basaha an Efeso 5:25-29. An usa nga bana pirme magtatratar ha iya asawa ha mahigugmaon nga paagi. Iya liwat puproteksyonan ngan aatamanon an iya asawa, ngan diri magbubuhat hin bisan ano nga makakadaot ha iya asawa.

 ⁴ Pero ano an sadang buhaton han bana kon nakakasayop an iya asawa? An mga bana ginsisidngan: “Padayon nga higugmaa an iyo asawa ngan ayaw kasina hin sobra ha iya.” (Colosas 3:19) Mga bana, hinumdumi nga nakakasayop liwat kamo. Ngan kon karuyag niyo nga pasayloon kamo han Dios, kinahanglan pasayloon niyo an iyo asawa. (Mateo 6:12, 14, 15) Kon an bana ngan asawa pariho andam magpasaylo, mabulig ito nga magin malipayon an ira pag-asawa.

5. Kay ano nga sadang pasidunggan han bana an iya asawa?

⁵ Hi Jehova naglalaom nga papasidunggan han bana an iya asawa. Sadang magin mahunahunaon an bana ha mga panginahanglan han iya asawa. Seryoso gud ini nga butang. Kon diri maopay an pagtratar han bana ha iya asawa, mahimo magdumiri hi Jehova nga pamatian an iya mga pag-ampo. (1 Pedro 3:7) Nagigin birilhon kan Jehova an mga tawo kon nahigugma hira ha iya. Diri niya ginpapaurog an lalaki kay ha babaye.

6. Ano an karuyag sidngon han pagin “usa nga unod” han bana ngan asawa?

⁶ Hi Jesus nagsiring nga an bana ngan asawa “diri na . . . duha, kondi usa nga unod.” (Mateo 19:6) Maunungon hira ha usa kag usa ngan diri gud hira mag-aadulteryo. (Proberbios 5:15-21; Hebreo 13:4) An bana ngan asawa diri sadang magin makikalugaringon ha paghatag han seksuwal nga panginahanglan han usa kag usa. (1 Corinto 7:3-5) Sadang hinumdoman han bana nga “waray pa tawo nga nangalas ha iya kalugaringon nga lawas, lugod iya ginpapakaon ngan ginmamayuyo ito.” Salit sadang niya higugmaon ngan mayuyoon an iya asawa. Labaw han  bisan ano, karuyag han asawa nga an iya bana magin buotan ngan mahigugmaon ha iya.​—Efeso 5:29.

7. Kay ano nga kinahanglan nga may-ada ulo han pamilya?

⁷ An tagsa nga pamilya kinahanglan may-ada ulo, usa nga maggigiya ha pamilya basi magin mahapsay ito. An Biblia nasiring ha 1 Corinto 11:3: “An ulo han tagsa nga lalaki amo an Kristo; ngan an ulo han babaye amo an lalaki; ngan an ulo han Kristo amo an Dios.”

8. Paonan-o maipapakita han asawa an iya daku nga respeto ha iya bana?

⁸ An tagsa nga bana nakakahimo hin mga sayop. Pero kon an asawa nasuporta ha mga desisyon han iya bana ngan kinaburut-on nga nakooperar ha iya, nagpapahimulos an bug-os nga pamilya. (1 Pedro 3:1-6) An Biblia nasiring: “An asawa sadang magkaada daku nga respeto ha iya bana.” (Efeso 5:33) Ano man kon an relihiyon han bana iba ha iya asawa? An asawa kinahanglan la gihapon magkaada daku nga respeto ha iya. An Biblia nasiring: “Kamo nga mga asawa, magpasakop kamo ha iyo bana, basi kon may bisan hin-o nga diri masinugtanon ha pulong, makabig hira nga waray pulong pinaagi han panggawi han ira asawa, tungod kay mga testigo hira nga nakakita han iyo putli nga panggawi nga may daku nga respeto.” (1 Pedro 3:1, 2) An maopay nga susbaranan han asawa makakabulig ha bana nga masabtan ngan respetuhon an pagtoo han iya asawa.

9. (a) Ano an sadang buhaton han asawa kon diri hiya nauyon ha iya bana? (b) Ano an sagdon ha Tito 2:4, 5 para ha mga asawa?

⁹ Ano an mahimo buhaton han asawa kon diri hiya  nauyon ha iya bana? Sadang niya ipahayag an iya opinyon ha paagi nga may respeto. Pananglitan, hi Sarah may ginsiring nga waray maruyagi ni Abraham, pero hi Jehova nagsiring kan Abraham: “Pamati ha iya.” (Genesis 21:9-12) Talagsa la nga an desisyon han usa nga Kristiano nga bana diri uyon ha ginsisiring han Biblia, salit sadang sumuporta ha iya an iya asawa. (Buhat 5:29; Efeso 5:24) An usa nga maopay nga asawa nag-aataman han ira pamilya. (Basaha an Tito 2:4, 5.) Kon nakikita han iya bana ngan mga anak an iya maduruto nga pag-asikaso ha ira, mas hihigugmaon ngan rirespetuhon nira hiya.​—Proberbios 31:10, 28.

10. Ano an ginsisiring han Biblia may kalabotan ha pagbulag ngan pagdiborsyo?

¹⁰ Usahay, nagdidesisyon dayon an mga mag-asawa nga magbulag o magdiborsyo. Pero an Biblia nasiring nga “diri sadang bulagan han asawa an iya bana” ngan “diri sadang bayaan han bana an iya asawa.”  (1 Corinto 7:10, 11) May pipira nga sobra na gud nga mga sitwasyon nga an mga mag-asawa mahimo magbulag, pero seryoso ini nga desisyon. Kumusta man an pagdiborsyo? Iginpapakita han Biblia nga an amo la nga makatadunganon nga rason ha pakigdiborsyo amo an pakighilawas ha iba han bana o asawa.​—Mateo 19:9.

11. Ano an kinahanglan han mga anak labaw kay ha bisan ano?

¹¹ Mga kag-anak, paggahin hin mas daku nga panahon tubtob nga posible kaupod an iyo mga anak. Kinahanglan kamo han iyo mga anak, ngan labaw kay ha bisan ano, kinahanglan kamo nira basi magtutdo ha ira mahitungod kan Jehova.​—Deuteronomio 6:4-9.

12. Ano an sadang buhaton han mga kag-anak basi maproteksyonan an ira mga anak?

¹² An kalibotan ni Satanas nagtitikaraot na gud, ngan may mga tawo nga bangin karuyag magbuhat hin maraot ha aton mga anak, bangin karuyag pa ngani nira nga seksuwal nga abusuhon hira. An pipira nga kag-anak nakukurian ha pag-istorya mahitungod hini nga topiko. Pero kinahanglan pahamangnoan han mga kag-anak an ira mga anak mahitungod ha sugad nga mga tawo ngan tutdoan kon paonan-o makakalikay ha ira. Mga kag-anak, kinahanglan proteksyonan niyo an iyo mga anak. *​—1 Pedro 5:8.

13. Paonan-o sadang tutdoan han mga kag-anak an ira mga anak?

 ¹³ Responsabilidad han mga kag-anak nga tutdoan an ira mga anak kon paonan-o magawi. Paonan-o mo tututdoan an imo mga anak? Kinahanglan han imo mga anak an pagbansay, pero an pagdisiplina diri gud sadang magin madarahog o mapintas. (Jeremias 30:11) Salit ayaw gud disiplinaha an imo mga anak kon nasisina ka. Diri mo karuyag nga an imo mga pulong magin pariho “han mga buno hin espada” ngan makasakit ha ira. (Proberbios 12:18) Tutdui an imo mga anak basi masabtan nira kon kay ano nga kinahanglan  nira magin masinugtanon.​—Efeso 6:4; Hebreo 12:9-11; kitaa an Endnote 30.

14, 15. Kay ano nga sadang magin masinugtanon an mga anak ha ira mga kag-anak?

¹⁴ Hi Jesus pirme nasugot ha iya Amay, bisan ha panahon nga diri ito masayon. (Lucas 22:42; Juan 8:28, 29) Hi Jehova naglalaom liwat nga an mga anak masugot ha ira mga kag-anak.​—Efeso 6:1-3.

¹⁵ Mga anak, bisan kon makuri para ha iyo an pagsugot ha iyo mga kag-anak, hinumdumi nga kon masinugtanon kamo, nalilipay ha iyo hi Jehova ngan an iyo mga kag-anak. *​—Proberbios 1:8; 6:20; 23:22-25.

16. (a) Paonan-o naniniguro hi Satanas nga sulayon an mga batan-on nga magbuhat hin maraot? (b) Kay ano nga importante nga magpili hin kasangkayan nga nahigugma kan Jehova?

¹⁶ Mahimo gamiton han Yawa an imo kasangkayan ngan an iba pa nga batan-on basi sulayon ka nga magbuhat hin sayop. Maaram hiya nga ini nga pagsulay makuri gud atohan. Pananglitan, an anak ni Jacob nga hi Dina may kasangkayan nga diri nahigugma kan Jehova. Tungod hito, hiya ngan an iya pamilya nagkaada damu nga problema. (Genesis 34:1, 2) Kon an imo kasangkayan diri nahigugma kan Jehova, bangin sulayon ka nira nga magbuhat hin ginkakangalasan ni Jehova, nga magriresulta hin duro nga kasakit ha imo, ha imo pamilya, ngan ha Dios. (Proberbios 17:21, 25) Salit importante gud nga mamiling ka hin kasangkayan nga nahigugma kan Jehova.​—1 Corinto 15:33.

17. Ano an responsabilidad han tagsa nga membro han pamilya?

¹⁷ Kon ginsusunod han mga membro han pamilya an mga instruksyon han Dios, nalilikyan nira an kasamok ngan damu nga problema. Salit kon usa ka nga bana, higugmaa an imo asawa ngan tratara hiya ha mahigugmaon nga paagi. Kon usa ka nga asawa, respetoha an imo bana ngan magin mapinasakupon ha iya ngan subara an ehemplo han asawa nga iginsasaysay ha Proberbios 31:10-31. Kon usa ka nga kag-anak, tutdui an imo mga anak nga higugmaon an Dios. (Proberbios 22:6) Kon usa ka nga amay, giyahi “hin maopay” an imo pamilya. (1 Timoteo 3:4, 5; 5:8) Ngan mga anak, sugta niyo an iyo mga kag-anak. (Colosas 3:20) Hinumdumi nga an tagsa nga membro han pamilya nakakasayop, salit magin mapainubsanon ngan pangaro hin pasaylo ha usa kag usa. Oo, an Biblia nagsusulod han giya ni Jehova para ha tagsa nga membro han pamilya.