1. Mi yí ɖo anu lé mìasɛn Mawu do nɔ mìɔ?

SƐNSƐNHA sugbɔ nunɔ mɔ, yewokplanɔ nyɔnɔnwi ci yí kudo Mawu nu amɛwo. Vɔ datɛnŋ anyi nyɔnɔnwi o, ɖo enu ciwo yí sɛnsɛnhawo kplanɔ amɛwo kudo mɛ ci yí Mawu nyi koɖo lé mìɖo asin do nu tonɔ akpo. Lé mìawɛ ajeshi emɔ nywitɔ ci ji mìato asɛn Mawuɔ? Yehowa ɖekɛ kpaŋ yí atɛnŋ anu lé mìɖo asin do nɔ mì.

2. Lé àwɛ ajeshi emɔ nywitɔ ci ji àto asɛn Mawuɔ?

² Yehowa na Bibla mì nɔ mìatɛnŋ akpla emɔ nywitɔ ci ji mìato asiin. Eyi taɖo kpla Bibla lɔ, Yehowa akpedo eo nu yí nakpɔ nyɔna so yi nukplakplawo mɛ, ɖo ésɔnɔ ɖe le mɛ nɔ eo sugbɔ.​—Ezai 48:17.

3. Nyi yí Mawu ji mɔ mìwo le waɔ?

³ Amɛ ɖewo nunɔ mɔ Mawu da shi do sɛnsɛnhawo pleŋ ji, vɔ denyi enu ci yí Yesu kpla mì nɛ o. Énu mɔ: “Denyi amɛshiamɛ ci yí nukɔ nɔŋ mɔ, ‘Axwetɔ, Axwetɔ,’ yí ayi Jeŋkwimɛ fyɔɖuxu lɔ mɛ o. Vɔ, mɛ ci yí wakɔ Danyɛ ci yí le jeŋkwimɛ dro ɖekɛ yí ayi.” Eyi taɖo ele veviɖe mɔ mìajeshi Mawu dro ɖɛ yí awɛ. Ecɛ le veviɖe, ɖo Yesu sɔ mɛ ciwo yí deɖokɔ to Mawu sɔ koɖo tamɛsɛnnuwatɔwo koɖo “esejimawatɔwo.”​—Matie 7:​21-23, nwt.

4. Enyɔ ci Yesu nu kudo Mawu dro wawa nuɔ?

⁴ Yesu kanxle mì mɔ nɔ mìji mɔ mìawa Mawu droɔ, mìado go cukaɖawo. Énu mɔ: “Míɖo mɛ to agbo hwɛhwɛtɔ ji; ɖo agbo lɔ keke yí emɔ ci yí kplɔnɔ amɛ yi  gugu mɛ lɔ le gbajaa, yí amɛ sugbɔ ɖonɔ mɛ to nɔ; vɔ agbo lɔ hwe yí emɔ ci yí kplɔnɔ amɛ yi agbe mɛ lɔ gbele cɔnjwin, eyi amɛ hwɛɖeka kpoŋ yí kpɔɛni.” (Matie 7:​13, 14, nwt) Emɔ cɔnjwin, alo Mawu sɛnsɛn le emɔ nywi ji kplɔnɔ amɛ yi agbe mavɔ mɛ. Emɔ gbajaa, alo Mawu sɛnsɛn le emɔ masɔgbe ji, kplɔnɔ amɛ yi eku mɛ. Vɔ Yehowa deji mɔ mɛɖekpokpui aku o. Éna mɔnukpɔkpɔ amɛshiamɛ mɔ wo le kpla nu so ye nu.​—2 Piɛ 3:9.

5. Lé àwɛ ado jeshi mɛ ciwo yí sɛnkɔ Mawu le emɔ nywitɔ jiɔ?

⁵ Yesu nu mɔ, mìatɛnŋ ado jeshi mɛ ciwo yí sɛnkɔ Mawu le emɔ nywitɔ ji. Mìawa ecɛ to ŋkuvilelé do wowo jixɔsewo koɖo wowo gbenɔnɔ nu ji. Énu mɔ: ‘Míajeshi wo ɖɛ sɔ to wowo kusɛnsɛnwo mɛ.’ Yí enu kpe ni mɔ: “Nɛnɛke yí aci nywi ɖeshaɖe sɛnnɔ eku nywiwo nɛ.” (Matie 7:​16, 17) Ecɛ dedasɛ mɔ, mɛ ciwo yí sɛnkɔ Mawu nyi amɛ kpekpewo o. Vɔ Mawu sɛntɔwo tenɔ kpɔ mɔ, yewoawa enujɔjɔɛ gashiagamɛ. Ecɛ yɛɔ, na mìakpɔ enu ci yí akpedo mì nu yí mìado jeshi mɛ ciwo yí sɛnkɔ Mawu le emɔ nywitɔ ji.

6, 7. Nyi yí taɖo sɛnsɛn adodwi lɔ mɛ tɔwo cunɔ wowo nukplakplawo do Bibla jiɔ? Nyi yí mìkpla so Yesu kpɔwɛ lɔ mɛɔ?

⁶ Mìɖo acu mìwo nukplakplawo do Bibla ji. Bibla nu mɔ: “Ŋwlɛnŋwlɛn blebu lɔ so Mawu gbɔngbɔn mɛ, yí enyɔ nɔ enukplakpla, nɔ enyɔgbenamɛ, nɔ enuwo dradrado, nɔ etodɔndɔnnamɛ le jɔjɔɛnyinyi mɛ. Nɔ Mawu mɛ aje pleŋpleŋ, yí ale gbesɔsɔ nɔ edɔ nywi ɖeshiaɖe wawa.” (2 Timɔte 3:​16, 17, nwt) Apostolo Pɔlu ŋwlɛn nɔ Kristotɔwo mɔ: “Mìwo gbɔ yí mí se eŋɛ lɔ so, yí mí xɔɛ shigbe Mawu nyɔ enyi ɛnɛ. Dé nyi agbetɔ ŋɛ yɔ o. Mawu ŋɛ yí é nyi nyɔnɔnwitɔ.”  (1 Tɛsalonikitɔwo 2:13) Mawu Nyɔ, Bibla ɖekɛ ji yí wocunɔ sɛnsɛn adodwi lɔ nukplakplawo do. Wodecunɔ wo do agbetɔwo susuwo, kɔnuwo, alo nu bu ɖe ji o.

⁷ Yesu cu enu ciwo pleŋ yí ekpla amɛwo do Mawu Nyɔ ji. (Hlɛn Ʒan 17:17.) Éyɔ nyɔ so Ŋwlɛnŋwlɛn lɔwo mɛ zenɛniɖe. (Matie 4:​4, 7, 10) Mawu sɛntɔ adodwiwo srannɔ Yesu kpɔwɛ lɔ, yí cunɔ enushianu ci wokplanɔ amɛwo do Bibla ji.

8. Nyi yí Yesu kpla mì kudo Yehowa sɛnsɛn nuɔ?

⁸ Mìɖo asɛn Yehowa ɖekɛ kpaŋ. Ehajiji Wema 83:18 nu mɔ: “Na woajeshi mɔ eo, mɛ ci ŋkɔ yí nyi Yehowa, eo ɖekɛ kpaŋ yí nyi Ejiɖaatɔ le nyigban lɔ keŋkeŋ ji.” Yesu ji mɔ amɛwo le jeshi mɛ ci yí Mawu adodwi lɔ nyi teŋ, yí ena amɛwo jeshi Mawu ŋkɔ lɔ. (Hlɛn Ʒan 17:6.) Yesu nu mɔ: “[Yehowa] ao Mawu lɔ ɖekɛ kpaŋ yí a sɛn, eyi a sumɔ.” (Matie 4:10) Eyi taɖo ci mìnyi Mawu sɛntɔwoɔ, mìsrannɔ Yesu kpɔwɛ lɔ. Yehowa ɖekɛ kpaŋ yí mìsɛnnɔ, mìzannɔ yi ŋkɔ lɔ, mìkplanɔ Mawu ŋkɔ lɔ amɛwo yí gbenunɔ enu ci Mawu avawa nɔ mì nɔ wo.

9, 10. Lé mìdanasɛ mɔ mìlɔn mìwonɔnɔwo doɔ?

⁹ Mìɖo aɖo lɔnlɔn akun-akun nɔ amɛwo. Yesu kpla yi dokplɔtɔwo mɔ wo le lɔn wowonɔnɔwo. (Hlɛn Ʒan 13:35.) Denyi fini yí mìso, mìwo kɔta, dɔkunɔnyinyi alo wamɛnɔnyinyi mìwo tɔ yí mìakpɔ o. Lɔnlɔn ci mìɖo nɔ mìwonɔnɔwo ɖo ana mìawa ɖeka shigbe nɔjinɔwo hannɛ. (Kolosetɔwo 3:14) Eyi taɖo mìdeyinɔ ahwa yí awu amɛ o. Bibla nu mɔ: “Hunnɔ tɔxu yí wo a jeshi Mawu viwo koɖo Satan viwo le nɛ. Amɛ ɖekpokpwi ci yí de wanɔ enu jɔjwɛ ɔ, dé nyi Mawutɔ o. Nɛnɛke yí é nyi nɔ amɛ ci yí de lɔnnɔ nɔviɛ nɛ.” Yí egbenu mɔ: “Mì ɖo a lɔn mìwonɔnɔwo. Mì ŋgbe wɛ shigbe Kayɛn ɛnɛ o.  Kayɛn nyi enuvwinwatɔ ci yí wu nɔviɛ.”​—1 Ʒan 3:​10-12; 4:​20, 21.

¹⁰ Mìzannɔ mìwo gamɛ, mìwo ŋsɛn koɖo enu ciwo yí le mì shi yí sɔ kpenɔdo mìwonɔnɔwo nu, yí gbedonɔ ŋsɛn mìwonɔnɔwo. (Ebretɔwo 10:​24, 25) Mìwanɔ “enywi nɔ amɛwo pleŋ.”​—Galatitɔwo 6:​10, nwt.

11. Nyi yí taɖo mìxɔɛ se mɔ Yesu ɖekɛ ji yí mìato akpɔ hwlɛngan ɔ?

¹¹ Eʒan mɔ mìase tonu nɔ Yesu, ɖo eyi ji mìato ayi Mawu gbɔ. Bibla nu mɔ: “Hwlɛngankpɔkpɔ degbele mɛbu ɖe mɛ o, ɖo ŋkɔ bu ɖekpokpui degbele jeŋkwi gɔnmɛ, yí wona agbetɔwo, ci ji mìato akpɔ hwlɛngan o.” (Edɔwawawo 4:​12, nwt) Le Eta 5 tɔ lɔ mɛ nɔ wema cɛɔ, mìkpla nu mɔ Yehowa dɔ Yesu ɖaɖa yí evasɔ yi gbe cu tafɛn do ta nɔ tonusetɔwo. (Matie 20:28) Yehowa sɔ Yesu ɖo Efyɔ nɔ akpa cɛ do nyigban lɔ ji. Eyi taɖo Bibla nu nɔ mì mɔ, mìɖo ase tonu nɔ Yesu nɔ mìji mɔ mìanɔ agbe tɛgbɛɛ.​—Hlɛn Ʒan 3:36.

12. Nyi yí taɖo mìdedonɔ nu politiki nyɔwo mɛɔ?

¹² Mìdeɖo ado nu politiki nyɔwo mɛ o. Yesu dedo nu politiki nyɔwo mɛ o. Hwecinu yí woɖokɔ kojo niɔ, énu nɔ Rɔma cɛkpatɔ Pilati mɔ: “Anyi Fyɔɖuxu denyi xexe cɛ kpaxwe ɖe o.” (Hlɛn Ʒan 18:​36, nwt.) Shigbe Yesu hannɛɔ, mìle gbeji nɔ Mawu Fyɔɖuxu ci yí le jeŋkwimɛ, eyi taɖo fiɖekpokpui ci yí mìleɔ, mìdedonɔ nu politiki nyɔwo mɛ o. Ele ahan gan, Bibla kpla mì mɔ, mìwo le “na bubu acɛkpakpa gawo,” ciwo yí nyi efyɔhawo. (Rɔmatɔwo 13:1) Mìwanɔ do eju ci mɛ mìle sewo ji. Vɔ nɔ eju lɔ mɛ se ɖe dewa ɖeka koɖo Mawu sewoɔ, mìsrannɔ apostolowo, mɛ ciwo yí nu mɔ: “Mìɖo aɖo to Mawu shigbe acɛkpatɔ nɛ wu agbetɔwo.”​—Edɔwawawo 5:​29, nwt; Maki 12:17.

13. Eŋɛnywi ci yí mìdrakɔ kudo Mawu Fyɔɖuxu lɔ nuɔ?

 ¹³ Mìxɔɛ se mɔ Mawu Fyɔɖuxu lɔ ɖekɛ kpaŋ yí avakpɔ xexeɛ mɛ cukaɖawo gbɔ. Yesu nu mɔ, “Wo a dra Mawu fyɔju ŋɛnywi lɔ le xexe lɔ pleŋ mɛ.” (Hlɛn Matie 24:14.) Agbetɔ cɛkpakpa ɖekpokpui datɛnŋ awa enu ci Mawu Fyɔɖuxu lɔ avawa nɔ mì o. (Ehajiji Wema 146:3) Yesu kpla mì mɔ mìwo le do gbe ɖaɖa abiɔ Mawu Fyɔɖuxu lɔ, hwecinu yí enu mɔ: “Ao fyɔju mɛ le va. Ao dro le nyi wawa le nyigban ji shigbe le hanci yí é nyi wawa le jeŋkwi mɛ ɛnɛ.” (Matie 6:10) Bibla nu nɔ mì mɔ Mawu Fyɔɖuxu lɔ avagu agbetɔwo cɛkpakpawo pleŋ si, yí yi Fyɔɖuxu ɖekɛ yí ‘akpɔtɔ ali keke asɔyi mavɔmavɔ.’​—Daniɛli 2:44.

14. Miwo yí èbu mɔ wosɛnnɔ Mawu le emɔ nywitɔ jiɔ?

¹⁴ Ci èkpla enu cɛwo ɖegbɔ ɖe, biɔ eoɖeki se mɔ: ‘Miwo yí cunɔ wowo nukplakplawo do Bibla jiɔ? Miwo yí xonɔ nuxu so Mawu ŋkɔ nu nɔ amɛwoɔ? Miwo yí ɖonɔ lɔnlɔn akun-akun nɔ wowonɔnɔwo, yí xɔɛ se mɔ Mawu dɔ Yesu ɖaɖa nɔ avahwlɛn mì gan ɔ? Miwo yí dedonɔ nu politiki nyɔwo mɛɔ? Miwo yí ɖenɔ kunu mɔ Mawu Fyɔɖuxu lɔ ɖekɛ kpaŋ yí avakpɔ mìwo cukaɖawo gbɔɔ?’ Yehowa Kunuɖetɔwo ɖekɛ kpaŋ yɔ.​—Ezai 43:​10-12.

15. Nyi yí mìɖo awa nɔ mìji mɔ sɛnsɛn mìwo tɔ ajeŋ nɔ Mawuɔ?

¹⁵ Woaxɔɛ se mɔ Mawu li ɖekɛ desun o. Gbɔngbɔnvɔnwo can xɔɛ se mɔ Mawu li, vɔ wodesenɔ tonu ni o. (Ʒaki 2:19) Nɔ mìji mɔ sɛnsɛn mìwo tɔ ajeŋ nɔ Mawuɔ, mìɖo axɔɛ se mɔ yɛli yí agbewanɔ do enyɔ ciwo yí enu ji.

16. Nyi yí taɖo mìɖo agbe ŋsusɛnsɛnhawoɔ?

 ¹⁶ Nɔ mìwo sɛnsɛn ajeŋ nɔ Mawuɔ, mìɖo agbe ŋsusɛnsɛnhawo. Enyɔnuɖɛtɔ Ezai ŋwlɛn mɔ: “Mí so le afi hunnɔ! . . . Mí klɔ míwoɖekiwo.” (Ezai 52:11; 2 Korɛntitɔwo 6:17) Eyi taɖo mìɖo agbe enuɖekpokpui ci yí ca eka koɖo ŋsusɛnsɛnhawo.

17, 18. Nyi yí “Babiloni Gangan lɔ” nyiɔ, yí nyi yí taɖo eʒan kpata mɔ woato le mɛɔ?

¹⁷ Nyi yí ŋsusɛnsɛnha nyiɔ? Ényi sɛnsɛnha ɖekpokpui ci yí kplanɔ nu mɔ, mìwo le sɛn Mawu le emɔ ci yí dewa ɖeka koɖo yi Nyɔ lɔ ji. Bibla yɔ ŋsusɛnsɛnhawo pleŋ mɔ, “Babiloni Gangan lɔ.” (Enyɔdasɛ 17:5) Nyi yí taɖoɔ? Le Nowe hwenu shiɖɔɖɔ lɔ goduɔ, wotɔ ŋsusɛnsɛnhawo nukplakplawo ji le eju ci yí nyi Babiloni mɛ. Ŋsukankan nukplakpla ŋtɔ́wo so eju ŋtɔ́ mɛ yí kaka do nyigban lɔ pleŋ ji. Le kpɔwɛ mɛ, Babilonitɔwo sɛnnɔ mawu-amɛtɔn-xoxu hamɛhamɛwo. Le egbɛmɛɔ, sɛnsɛnha sugbɔ kplanɔ nu amɛwo mɔ, Mawu-amɛtɔn-nyi-ɖeka (Trinité) yí Mawu nyi, vɔ Bibla kpla mì mɔ Mawu adodwi kuɖeka kpaŋ yí li, eyi nyi Yehowa yí Yesu nyi Eviɛ. (Ʒan 17:3) Babilonitɔwo xɔɛ se hɛnnɛ mɔ nɔ agbetɔ kuɔ, yi kpaxwe ɖe gbekpɔtɔ nɔnɔ agbe, yí wogbenunɔ mɔ akpaxwe ŋtɔ́ atɛnŋ akpe fun le zomavɔ mɛ. Ecɛ denyi nyɔnɔnwi o.​—Kpɔ enumɛɖeɖe bu 14, 17, koɖo 18 tɔ.

¹⁸ Mawu nu ɖɛ mɔ sabaaɖe yɛɔ, woagu ŋsusɛnsɛnhawo pleŋ. (Enyɔdasɛ 18:8) Èdo jeshi enu ci yí taɖo eʒan kpata mɔ woato le ŋsusɛnsɛnha mɛa? Yehowa Mawu ji mɔ eo le wɛ gbɔxwe nɔ gamɛ ayi.​—Enyɔdasɛ 18:4.

19. Lé Yehowa ale bu nɔ eo do, nɔ èsɔ gbeta mɔ yeasin ɔ?

¹⁹ Nɔ èsɔ gbeta mɔ yeato le ŋsusɛnsɛnha mɛ keŋ asɛn  Yehowaɔ, ao xlɔ alo ao xomumɛtɔ ɖewo datɛnŋ amɔnŋje ao gbetasɔsɔ lɔ mɛ o, yí woatɛnŋ aci yumɛ nɔ eo. Vɔ Yehowa dagbe eo ɖɛ o. Àvanyi xexeɛ pleŋ mɛ xomumɛtɔ ci mɛ yí amɛ miliɔn nɛniɖe le, xomu ci mɛ tɔwo yí ɖonɔ lɔnlɔn akun-akun nɔ wowonɔnɔwo, yí agbe mavɔ nɔnɔ mɔkpɔkpɔ le Mawu xexe yoyu lɔ mɛ asun eo shi. (Maki 10:​28-30) Taŋfuin ao xlɔ alo ao xomumɛtɔ ciwo yí ci yumɛ nɔ eo hwecinu èsɔ gbeta mɔ yeasɛn Yehowa, domɛtɔ ɖewo atɛnŋ avasɔ gbeta mɔ yewoakpla Bibla.

20. Nyi yí taɖo ele veviɖe mɔ woasɛn Mawu le emɔ nywitɔ lɔ jiɔ?

²⁰ Le majinjinɖe mɛɔ, Mawu agu nuvɔnwatɔwo, yí yi Fyɔɖuxu akpa cɛ do nyigban lɔ pleŋ ji. (2 Piɛ 3:​9, 13) Jijɔ hwenu teŋ yí ecɛ anyi! Amɛshiamɛ asɛn Yehowa le emɔ nywitɔ ci ji eji mɔ mìwo le sɛn ye le. Eyi taɖo ele veviɖe mɔ, àsɔ gbeta yí asɛn Mawu le emɔ nywitɔ lɔ ji le kakacɛ mɛ.