1. ¿Iney müten feypiafeiñmu chumngechi poyeafiel ta Chaw Dios?

EPE kom religion feypikey: “Iñchiñ rüf kimeltukeiñ Chaw Dios ñi dungu”. Welu rüf femkelayngün. Fillke dungu kimeltukeyngün Chaw Dios ñi chumngen ka chumngechi tañi poyengeal. Welu, ¿kimafuiñ chumngechi rüf mew taiñ serfiafiel ta Chaw Dios? Kimafuiñ llemay. Jewba müten feypiafeiñmu chumngechi taiñ poyeafiel.

2. Tami kimal chumngechi küme serfiafiel ta Jewba, ¿chumaymi?

² Jewba elueiñmu ti Biblia, tüfa kimeltukeeiñmu chumngechi taiñ küme serfiafiel. Feymu chillkatufinge Biblia. Chaw Jewba duamnieeymu, fey kelluaeymu tami adümafiel ka inayafiel Biblia ñi kimeltun (Isaías 48:⁠17).

3. ¿Chem duamfali taiñ femal?

³ Kiñeke che feypikey: “Chaw Ngünechen ayükey chem feyentun kam religion rume”. Welu Jesus, Chaw Ngünechen ñi Fotüm, kimeltulay tüfa. Kidu feypi iney ñi koneltual Chaw Ngünechen ñi gobierno mew. Koneltulayay tati pu re feypikelu ñi poyekefiel ta Chaw Dios. Welu may koneltuay tati femkelu Chaw Dios ñi ayükeelchi dungu. Feymu duamfali taiñ kimal ka femal Chaw Dios ñi ayükeel. Tüfa müna falin-ngey. Femnoliyiñ, “wesake dungu femkelu” pingeaiñ, femngechi pengeli Jesus (Matew 7:⁠21-23).

4. Jesus, ¿chem kimeltulelfi pu küpa femkelu Chaw Dios ñi ayükeel?

⁴ Jesus kiñe falin dungu kimeltulelfi pu küpa femkelu Chaw Dios ñi ayükeel: kiñeke mu küdawngeafuy femal tüfa. Feymu feypi: “Konpuaymün tati pichi rupachi wülngiñ mew. Alü rupay [...] tati wülngiñ ka tati rüpü  yeniefilu ta che welulkawün mew, fey rume fentren che amuley feychi rüpü mew. Welu tati wülngiñ ka ti rüpü yeniefilu ta che rumel mongen mew, pichi rupay ka müna küdawngey ñi inangeael, fey rume pichin che konpukey tüfachi wülngiñ mew” (Matew 7:⁠13, 14). Tati pichi rupachi rüpü, fey tati rüfngechi religion. Inafiliyiñ, nieaiñ rumel mongen. Ka ti alü rupachi rüpü, fey tati koylake religion, koylake feyentun. Inafiliyiñ, nielayaiñ mongen. Welu taiñ Wenu Chaw ayükelay iney no rume ñi layal. Feymu elukefi itrokom che tañi kimaetew (2 Pedro 3:⁠9).

5. ¿Chumngechi kimafuiñ iney engün rüf poyekefi ta Chaw Dios?

⁵ Iñchiñ kimafuiñ iney engün am rüf poyekefi ta Chaw Dios. ¿Chumngechi? Jesus feypi taiñ ngüneduamal kidu engün ñi feyentukeel ka femkeel. Kafey Jesus trürümfi tati pu rüf poyekefilu ta Chaw Dios kiñe küme anümka reke, fey feypi: “Kom kümeke anümka wülkey kümeke fün” (Matew 7:⁠16, 17). Tüfa rakiduamelkelaeiñmew ñi welulkawkenon pu rüf poyekefilu ta Chaw Ngünechen. Welu may yafüluwkeyngün ñi femal Chaw Dios ñi ayükeel. Fey, ¿chem kelluaeiñmu taiñ kimal iney engün ngen? Fewla inaduamaiñ.

6, 7. 1) Pu rüf serfikefilu ta Chaw Dios, ¿chumngelu (chemu) Biblia mu entukey ñi kimeltun? 2) ¿Chem kimeltueiñmu Jesus ñi femken?

⁶ Biblia mu entukeiñ taiñ kimeltun. Biblia feypi: “Kom tati wirikonkülechi dungu ti Wirin Chillka mew wiringey Ngünechen tañi adkünuel ka ñi piel mew, feymew rume kümey ñi kimeltulngeael ta che ka ñi ngülamtungeael ti welulkawkülelu, ka yafülngeael ka ñi kimelngeael ta che, fey ñi nieael ta kiñe küme lif mongen” (2 Timotew 3:⁠16, 17). Kafey apostol Pablo feypifi tati pu kristiano: “Eymün allkütulu Ngünechen ñi küme dungu iñchiñ taiñ wewpiel,  llowfimün rüf dungu mew Ngünechen ñi küme dungu, fey re che ñi werkün dungu no tati” (1 Tesalonisense 2:⁠13). Biblia fey ta Chaw Ngünechen tañi Dungu, feymu pu rüf serfikefilu ta Chaw Dios entukey ñi kimeltun Biblia mu. Inakelayngün pu che ñi rakiduam kam wimtun.

⁷ Jesus entukefuy ñi kimeltukeel Chaw Dios tañi Wirin Chillka mew (papeltunge Juan 17:⁠17). Kimeltuchelu, rumel feypikefuy: “Tati Wirin Chillka ta feypiley” (Matew 4:⁠4, 7, 10). Pu rüf poyekefilu ta Chaw Jewba inakeiñ Jesus ñi femken, feymu Biblia mu entukeiñ taiñ kimeltukeel.

8. Taiñ poyeafiel ta Jewba, ¿chem kimeltuy Jesus?

⁸ Serfikefiyiñ ta Jewba müten. Salmo 83:⁠18 feypi: “Eymi müten tami Alüpüralen itrokom Mapu mu, Jewba pingey tami üy”. Jesus ayükefuy tati pu che ñi küme kimal ineyngen ti rüf Chaw Ngünechen. Feymu kimeltulelkefi Chaw Dios tañi üy. Kidu feypi: “Fey ti pu che Mapu mew tami elufiel, iñche kimeltulelfiñ tami üy. Kidu engün eymi ngekefulu, eluen ta iñche, fey allkütuyngün tami dungu” (Juan 17:⁠6, TNM). Kafey feypi: “Püramyeafimi ngillatun mew ka poyeafimi tami Ñidol Ngünechen [Jewba müten, TNM]” (Matew 4:⁠10). Iñchiñ kay, pu serfikefilu ta Chaw Dios, inayentukeiñ Jesus ñi femün. Feymu, Jewba müten poyekefiyiñ, üytukefiyiñ, ka kimeltulelkefiyiñ pu che Chaw Dios ñi üy ka chumngechi kümelkayaeiñmu.

9, 10. ¿Chumngechi pengelkeiñ taiñ welukontu piwkeyewken?

⁹ Welukontu rüf piwkeyewkeiñ. Jesus kimeltufi tañi pu inanieetew ñi welukontu piwkeyewal (papeltunge Juan 13:⁠35). Iñchiñ piwkeyewkeiñ, feymu kiñewküleiñ. Ngüneduamkelaiñ ñi chem chengen, ñi tuwün ka tunten plata niey. Kom iñchiñ peñi ka lamngen reke yewkeiñ (Kolosense 3:⁠14). Feymu weychakelaiñ, awkakelaiñ ka langümchekelaiñ. Biblia feypiley: ‘Kimfali ineyngen ta Ngünechen ñi pu chengen, ka ineyngen ta weküfü ñi  ngünenkanieetew: iney rume ta nienole tati küme fürenechen ka piwkeyenole tañi peñi kam lamngen, Ngünechen ñi pu che no’. Fey ka feypi: “Taiñ welukonkechi piwkeyewael. Welu Kain reke taiñ femngenoael, kisu mew ngenkawürkey ta weküfü fey langümürkey ñi peñi” (1 Juan 3:⁠10-12; 4:⁠20, 21).

¹⁰ Kafey wülkeiñ taiñ antü, taiñ newen, ka nieelchi fillem taiñ welukontu kelluwal ka yafültukuwal (Ebrew 10:⁠24, 25). ‘Kümeke dungu femkeiñ ta itrokom che mew’ (Galata 6:⁠10).

11. ¿Chumngelu inakeiñ Jesus ñi feypin?

¹¹ Jesus ñi duam mew müten montuaiñ, feymew inakeiñ Jesus ñi feypin. Biblia feypiley: “Kom mapu mew ngelay kangelu Montulchefe, Ngünechen am üytunofilu kangelu. Jesus mew müten müley montun” (Hecho 4:⁠12). Chumngechi ngüneduamiyiñ 5 chillkatun mu, Jewba werküfi ta Jesus mapu mew ñi wülal tañi mongen, femngechi ñi montulafiel pu che femkelu Jewba ñi feypin (Matew 20:⁠28). Jewba dullifi ta Jesus ñi longko ülmen-ngeal, fey ñi ngünenieafiel ti Mapu. Feymu ñi afnoal taiñ mongen, inayafiyiñ ñi feypin Jesus. Femngechi feypi Biblia (papeltunge Juan 3:⁠36).

12. ¿Chumngelu konkelaiñ politiko dungu mew?

¹² Konkelaiñ politiko dungu mew. Jesus konkelay politiko dungu mew. Kiñe rupa kiñe wentru ngünenielu, Pilato pingelu, ramtukadungufi ta Jesus. Fey kidu wiñoldungueyew: “Iñche ñi longko ülmenngemum [iñche ñi gobierno] tuwlay tüfachi mapu mew” (papeltunge Juan 18:⁠36). Iñchiñ Jesus reke femkeiñ. Ayükeiñ Chaw Ngünechen tañi gobierno müten ñi müleal. Feymu konkelaiñ politiko dungu mew, chew müleliyiñ rume. Welu Biblia feypieiñmew taiñ feyentuafiel “tati mülechi pu awtoridad” (Romanu 13:⁠1). Inakeiñ ti ley ñi mülen ti pais mew. Welu kiñe ley dungu kiñewkülenole Chaw Dios tañi feypin mu, ¿chumaiñ? Inayentuafiyiñ  pu kuyfike apostol, kidu feypingün: ‘Iñchiñ feley taiñ doy feyentuafiel ta Ngünechen ta che mew’ (Hecho 5:⁠29; Marku 12:⁠17).

13. ¿Chem amuldungukeiñ Chaw Ngünechen ñi gobierno mu?

¹³ Chaw Ngünechen tañi gobierno müten norümafi wedake dungu, iñchiñ amuldungukeiñ tüfa. Jesus feypi: “Tüfachi kümeke dungu ñi Ngünenien mu, kimelngeay ta kom Mapu mew, femngechi kom trokiñke mapu ñi kimael engün; fey wüla akuay ñi afael ta antü” (Matew 24:⁠14, TNM). Kom iñchiñ ayükeiñ taiñ nieal küme mongen, nienoal wedake dungu ka rüf kümelkaleal. Welu kiñe wentru ñi gobierno no rume elulayaeiñmu tüfa, Chaw Dios tañi gobierno müten (Salmo 146:⁠3). Jesus kimeltueiñmu taiñ famngechi ngillatual: “Küpape tami Ngünenien. Femngepe tami feypin wenu mapu mew, ka femngechi Mapu mu” (Matew 6:⁠10, TNM). Biblia kimeltukey Chaw Ngünechen ñi Ngünenien apümkayafi pu che ñi gobierno, ka tüfa müten “aflayay” (Daniel 2:⁠44).

14. ¿Iney engün rüf serfikefi ta Chaw Ngünechen? ¿Chem pimi kay?

¹⁴ Küme ngüneduamnge kom tüfa, fey ramtuwnge: “¿Iney engün entukey ñi kimeltun Biblia mu müten? ¿Iney engün kimeltukey Chaw Dios ñi üy? ¿Iney engün welukontu rüf piwkeyewkey? ¿Iney engün feyentukey Chaw Dios ñi werküfiel ta Jesus taiñ montulaetew? ¿Iney engün konkelay politiko dungu mew? ¿Iney engün amuldungukey Chaw Ngünechen ñi gobierno müten taiñ kümelkayaetew?”. Pu Dungukelu Iney Ngen Jewba müten femkeyngün kom tüfachi dungu (Isaías 43:⁠10-12).

15. Küpa ayüwelfiliyiñ Jewba taiñ poyefiel mu, ¿chumaiñ?

¹⁵ Kimnieiñ ñi rüf mülen Chaw Ngünechen. Welu fey ka müten duamniengelay taiñ femal. Pu weküfü ka kimniey ñi mülen ta Chaw Ngünechen, welu allkütukelafingün (Santiaw 2:⁠19). Feymu küpa ayüwelfiliyiñ Jewba taiñ  poyefiel mu, re feyentulayaiñ kidu ñi mülen, doy may femaiñ taiñ feypietew.

16. ¿Chumngelu famentuafiyiñ koylake religion?

¹⁶ Taiñ rüf poyeafiel ta Chaw Dios, famentuafiyiñ ti koylake religion. Kuyfi kiñe wentru küdawelkefuy ta Chaw Dios, Isaia pingefuy, fey wirintukuy: “Tripamün tüfa mew, lifkülemün” (Isaías 52:⁠11; 2 Korintio 6:⁠17). Fey chem rume nüwkülele koylake religion mu, famentuafiyiñ.

17, 18. 1) ¿Chem am ‘Tati Fütra Babilonia’? 2) ¿Chumngelu fente falin-ngey tami tripayal koylake religion mu?

¹⁷ Fillke religion ka feyentun feypikefi ta che chumngechi poyeafiel ta Chaw Ngünechen, welu ñi kimeltukeel rüf kiñewkülelay Biblia ñi feypin mu. Kom tüfa koylake religion tati. Biblia mu, ‘Tati Fütra Babilonia’ pingekey tati koylake religion (Apokalipsi 17:⁠5). ¿Chumngelu femngechi pingekey? Dew rupalu ti Fütra Mangin Ko Noe ñi antü mu, fentren koylake dungu kimeltungekefuy Babilonia waria mu. Rupalu chi tripantu, feychi koylake kimeltun puwi kom Mapu mu. Kuyfi Babilonia mu, pu che poyekefuy külangechi dios kiñewkülelu. Famülke mu ka femngekey. Fentren religion kimeltukey ti Chaw, ti Fotüm, ka ti lif küme püllü kiñe Ngünechen-ngey müten. Tüfachi kimeltun Trinidad pingey. Welu Biblia feypi kiñengey müten rüfngechi Ngünechen, Jewba pingey, ka Jesus fey tañi Fotüm (Juan 17:⁠3). Babilonia mu, pu che ka feyentukefuy ñi lakenon ti am ka püllü, ka ‘kutrankawafuy kütral mapu mu’ pikefuy. Welu tüfa rüfngelay (inaduamnge ti kimelün dungu 12, 15 ka 16).

¹⁸ Pichilewey ñi apümkangeal koylake religion, koylake feyentun. Tüfa feypikünuy taiñ Wenu Chaw (Apokalipsi 18:⁠8). Feymu fente falin-ngey tami tripayal koyla religion mu. Chaw Jewba ayüniey tami femal tüfa petu mülewele tiempo (Apokalipsi 18:⁠4).

19. Koneltulmi rüf religion mu, ¿chem eluaeymu Jewba?

 ¹⁹ Elkünulmi ti koyla religion ka koylake feyentun, ka koneltulmi rüf religion mu, tami pu che kam weni kangentuafeymu. Yewelkayafeymu engün, kayñetuafeymu kam kiñepülekünuafeymu. Welu Chaw Jewba kidukünulayaeymu. Eluaeymu kiñe fütra familia, tüfa kom pu serfikefilu ta Jewba, fey rüf piwkeyeaeymu engün. Kafey tami Wenu Chaw eluaeymu maneluwün, fey aflayay tami mongen küme mülewe ngetule ti Mapu (Marku 10:⁠28-30). Kafey rupale chi antü, feychi pu che tami kayñetumekeetew küpa chillkatuafuy chi ti Biblia.

20. ¿Chumngelu fente falin-ngey tami rüf poyeafiel ta Chaw Ngünechen?

²⁰ Müna falin-ngey tami küdawküleal fewla, femngechi tami rüf poyeafiel ta Chaw Ngünechen. Pichin mu, Chaw Jewba apümafi wedake dungu, fey tañi gobierno müten ngünenieafi ti Mapu (2 Pedro 3:⁠9, 13). ¡Afmatulaeiñmu feychi antü! Rupale tüfa, kom pu che Mapu mu rüf poyeafi ta Jewba.