1. Njee a nlama kal bés bañga njel inyu bégés Djob?

LIBIM li bibase li nkadba le li niiga maliga inyu Djob. Ndi hala a nla bé ba maliga inyule mam ngim bibase i niiga inyu Djob ni inyu lelaa di nlama bégés nye, ma yé mahéñha ngandak ni mam bibase bipe bi niiga. Lelaa ni di nla yi bañga njel inyu bégés Djob? Yéhôva nyetama nyen a nla kal bés lelaa di nlama bégés nye.

2. Lelaa u nla nigil bañga njel inyu bégés Djob?

² Yéhôva a bi ti bés Bibel le i hôla bés i nigil bañga njel inyu bégés nye. Jon nigil Bibel, ni Yéhôva a ga hôla we i kôhna bisai biniigana gwé bi nti, inyule a ntôñ toi we.​—Yésaya 48:17.

3. Kii Djob a ngwés le di boñ?

³ Bôt bape ba nkal le Djob a neebe bibase gwobisôna, ndi hala bé nyen Yésu a bi niiga. A bi kal le: “Ha hi mut bé nu a nsébél me le, ‘A Nwet, a Nwet,’ nyen a’ jôp Ane ngii, ndik nu a mboñ sômbôl Tata.” Jon i yé nseñ le di nigil i yi kii yé sômbôl i Djob, ni le di boñ ki yo. Hala a yé jam li yé nseñ ngandak inyule Yésu a bi hégha bôt ba ntjél nôgôl mambén ma Djob ni bibéba bi bôt, tole bôt ba “mboñ mam ma liyanmbén.”​—Matéô 7:21-23.

4. Kii Yésu a bi kal inyu boñ sômbôl i Djob?

⁴ Yésu a bi béhe bés le ibale di nyéñ boñ sômbôl i  Djob, di ga kôhna mandutu. A bi kal le: “Bé jublana nwemel ntitigi, inyule nwemel u yé nkeñi, njel ki i néhi, i nke yimil, ngandak yon i njubul mu. Inyule nwemel u yé ntitigi, njel ki i nke niñ i yé hipagda; ndék yon i nléba yo.” (Matéô 7:13, 14) Nwemel ntitigi, tole bañga njel inyu bégés Djob, i nkena i niñ boga. Nwemel nkeñi tole béba njel inyu bégés Djob, i nkena i nyemb. Ndi Yéhôva a ngwés bé le mut nye ki nye a wo. A nyible hiki mut njel i nigil i yi nye.​—2 Pétrô 3:9.

5. Lelaa u nla yimbe bôt ba ngwélél bañga njel inyu bégés Djob?

⁵ Yésu a bi unda lelaa di nla yimbe bôt ba ngwélél bañga njel inyu bégés Djob. Inyu yimbe bo, di nlama wan biniigana ba nhémle ni maboñog map. Yésu a bi kal le: “N’a yil bo inyu matam map.” A kônde ki kal le: “Hi e lam i num matam malam.” (Matéô 7:16, 17) Hala a nkobla bé le bôt ba mbégés Djob, ba yé peles. Ndi ngéda yosôna, bagwélél ba Djob ba mboñ biliya i boñ loñge. Nano, di ga béñge kii i nla hôla bés i yimbe i bôt ba ngwélél bañga njel inyu bégés Djob.

6, 7. Inyuki base i maliga i nyôñôl ndik biniigana gwé ikété Bibel? Kii ndémbél i Yésu i niiga bés?

⁶ Bibégés gwés bi nlama yôñna ikété Bibel. Bibel i nkal le: “Tilna yosôna i nlôl ni Nyambe, i mbahal, inyule i nti maéba, i yoiyak, i béhge, i niigaga ki telepsép, le ndi mut Nyambe a ba nyonok, nkôôbaga inyu hi nson nlam.” (2 Timôtéô 3:16, 17) Ñôma Paul a bi tilna bikristen le: “Ngéda ni bi leege bañga i Nyambe, i ni bi nok ni bés, ni bi leege bé yo wengoñle i bôt  ba binam, ndi kiki bañga i Nyambe, lakii i yé ntiik hala.” (1 Tésalônika 2:13) Base i maliga i nyôñôl ndik biniigana gwé ikété Bañga i Djob le Bibel. I nyôñôl bé gwo mu mahoñol ma bôt ba binam, to i bilem bi loñ, to i yom ipe yo ki yo.

⁷ Hiki jam Yésu a bé niiga li bé lôl ikété Bañga i Djob. (Añ Yôhanes 17:17.) A bé béna sima Bitilna. (Matéô 4:4, 7, 10) Bañga bagwélél ba Djob ba noñ ndémbél Yésu: Ba nyôñôl biniigana gwap gwobisôna ikété Bibel.

8. Kii Yésu a bi niiga bés inyu bégés Yéhôva?

⁸ Di nlama ndik bégés Yéhôva nyetama. Kaat Tjémbi 83:19 i nkal le: “Nu jôl jé li yé Yéhôva, u yé Nungingii ngii ’isi hiosôna.” Yésu a bé gwés le bôt ba yi yaga njee bañga Djob a yé, a niiga ki bôt jôl li Djob. (Añ Yôhanes 17:6.) Yésu a bi kal le: “Yéhôva Nyambe woñ nyen u nlama bégés, u gwéélak ndik nyetama.” (Matéô 4:10, MN) Jon kiki di yé bagwélél ba Djob, di noñ ndémbél Yésu. Di mbégés ndigi Yéhôva nyetama, di ngwélél jôl jé, di niigaga ki bôt bape jôl li Djob, ni mam a ga boñ inyu yés.

9, 10. Lelaa di ñunda le di ngwéhna?

⁹ Di nlama bana bañga gwéha inyu bôt. Yésu a bi niiga banigil bé le ba gwéhna. Nlélém jam won di mboñ. (Añ Yôhanes 13:35.) Di ngwéhna ibabé béñge bahoma di nlôl, bilem bi biloñ gwés, too di yé mingwañ mi bôt tole di yé diyeyeba. Gwéha di gwé ikété yés i ñat bés, bôlôm ni bôda, kiki lisañ li bôt. (Kôlôsé 3:14) Jon di nke bé i gwét, di nol bé ki to bôt bape. Bibel i nkal le: “Ikété jam lini nyen bon ba Nyambe ni bon ba Nsohop ba nyina, le tonjee a  mboñ bé mam ma téé sép, to ni nu ki a ngwés bé maasañ, a ta bé nu Nyambe.” Bibel i nkônde ki kal le: “Di gwéhna. Ndi ha kiki Kain bé, nu a ba ndik man mut mbe, a nol manyañ.”​—1 Yôhanes 3:10-12; 4:20, 21.

¹⁰ Di ngwélél ngéda yés, ngui yés ni bigwel moo gwés inyu hôlna ni tina makénd. (Lôk Héber 10:24, 25) Di mboñ ‘ndigi bôt bobasôna loñge.’​—Galatia 6:10.

11. Inyuki di neebe le Yésu nyen a yé njel i nkena yak Djob?

¹¹ Di nlama nôgôl Yésu inyule a yé njel i nkena yak Djob. Bibel i nkal le: “Ndi tohi i tane bé ni numpe, inyule jôl lipe li ntina bôt li ta bé hana isi, le jon di nlama noñ.” (Minson mi baôma 4:12) Ikété Pes 5 munu kaat ini, di bi nigil le Yéhôva a bi ep Yésu le a ti niñ yé kiki binoñ inyu bôt ba binam ba ba nôgôl nye. (Matéô 20:28) Yéhôva a bi pohol ki Yésu inyu ane kiki Kiñe ngii nkoñ isi. Inyu hala nyen Bibel i nkal bés le di nlama nôgôl Yésu ibale di ngwés niñ i boga ni boga.​—Añ Yôhanes 3:36.

12. Inyuki di nyoñ bé ngaba i mam ma pôlitik?

¹² Di nlama bé yoñ ngaba i mam ma m’bô (tole mam ma pôlitik). Yésu a bé yoñ bé ngaba i mam ma pôlitik. Ngéda a bé bikééhene i bisu bi ñane Rôma le Pilatô, Yésu a bi kal nye le: “Ane yem i ta bé i nkoñ isi unu.” (Añ Yôhanes 18:36.) Kiki Yésu, di ntéñbe ni Ane Djob i ngii. Inyu hala nyen to numbe homa di nyééne, di nyoñ bé ngaba ni mam ma pôlitik. Ndi Bibel i nti bés oda le di nôgôl “baane ba kéhi” ngii yés, hala wee bangomén. (Rôma 13:1) Di nôgôl mambén ma loñ het di niñil. Ndi ngéda mbén i bôt ba binam i  nkolba mambén ma Djob, di nkôna baôma ba ba bi kal le: “Di nlama nôgôl Nyambe iloo bôt.”​—Minson mi baôma 5:29; Markô 12:17.

13. Kii di añal inyu Ane Djob?

¹³ Di nlama hémle le Ane Djob yotama yon i nla mélés mandutu ma nkoñ isi. Yésu a bi kal le “miñañ minlam mi Ane” mi ga añlana ni nkoñ isi wonsôna. (Añ Matéô 24:14.) Ane i mut binam to yada i nla bé boñ mam Ane Djob i ga boñ inyu yés. (Tjémbi 146:3) Yésu a bi niiga bés i soohe inyu Ane Djob le: “Ane yoñ i loo. Sômbôl yoñ i bôña ’isi kiki ngii.” (Matéô 6:10) Bibel i bi bôk kal le Ane Djob i ga tjé biane bi bôt ba binam gwobisôna, “ndi yomede y’a tééba mba ni mba.”​—Daniel 2:44.

14. Inyu yoñ, bonjee ba ngwélél bañga njel inyu bégés Djob?

¹⁴ Nano le u mal wan matode mana, badba le: ‘Bonjee ba nyôñôl biniigana gwap ikété Bibel? Bonjee ba niiga bôt bape jôl li Djob? Bonjee ba ñunda le ba gwé yaga bañga gwéha ikété yap, ba hémlege ki le Djob a bi ep Yésu inyu tohol bés? Bonjee ba nyoñ bé ngaba ni mam ma pôlitik? Bonjee ba ñañal le Ane Djob yotama yon i nla mélés mandutu més?’ Ndik Mbôgi Yéhôva yotama.​—Yésaya 43:10-12.

15. Kii di nlama boñ ibale di ngwés le Djob a neebe bibégés gwés?

¹⁵ I hémle ndik le Djob a yé, i nkola bé. Ngo yak mimbuu mimbe mi hémle le Djob a yé, ndi mi nôgôl bé nye. (Yakôbô 2:19) Ibale di ngwés le Djob a neebe bibégés gwés, di nlama ndik bé hémle le a yé, ndi di nlama ki boñ mam a mbat.

16. Inyuki di nlama tjél base bitembee?

 ¹⁶ Inyu boñ le Djob a neebe bibégés gwés, di nlama tjél base bitembee. Mpôdôl Yésaya a bi tila le: “Pama yaga ikété yé! . . . pubhana bébomede.” (Yésaya 52:11; 2 Korintô 6:17) Inyu hala nyen i yé bés nseñ i tjél kii yosôna, i gwé maada ni base bitembee.

17, 18. Kii i yé “Babilôn Nunkeñi,” ni inyuki di nlama pala pam mu?

¹⁷ Kii i yé base bitembee? I yé to imbe base i niiga bés i bégés Djob i nya i yé le i nkolba Bibel. Bibel i nsébél bibase bi bitembee gwobisôna le “Babilôn Nunkeñi.” (Masoola 17:5) Inyuki? Mbus Ntida Malép i dilo di Nôa, ngandak biniigana bi bitembee, bi bibase bi ngwélél, bi bi bôdôl i tison i Babilôn. Bi biniigana bi bitembee, bi bi yon ni nkoñ isi wonsôna. Kii héga, i bôt ba bé niñil i Babilôn ba bé bégés mop maa, ndi ba yoñok mo kiki djob jada. Yak i len ini, ngandak bibase i niiga le Djob a yé Trinitas. Ndi Bibel i ntibil yaga niiga le Bañga Djob a yé ndik wada le Yéhôva, ni le Yésu a yé Man wé. (Yôhanes 17:3) Bôt ba bé yééne i Babilôn ba bé hémle ki le ngim yom i yé ikété mut binam. Ba bé hémle le i yom i, i nkônde niñ ngéda mut a nwo, ni le i nla son njonok i bee hié. Ndi hala a ta bé maliga.​—Béñge Ndoñi 14, Ndoñi 17, ni Ndoñi 18, i mamélél ma kaat.

¹⁸ Djob a bi bôk pot le ndék ngéda, bibase bi bitembee gwobisôna bi ga tjiba. (Masoola 18:8) Baa u ntibil yaga nok inyuki u nlama pala nyodi ikété base i bitembee? Yéhôva Djob a ngwés le u boñ hala ilole ngéda i mal tagbe.​—Masoola 18:4.

19. Ngéda u nyoñ makidik i gwélél Yéhôva, lelaa a ga tôñ we?

¹⁹ Ngéda u ga yoñ makidik i tjôô base i bitembee  inyu gwélél Yéhôva, bebeg le bôt boñ ba lihaa tole mawanda moñ mape, ba ga nok bé makidik moñ. Bebeg ki le ba nla lona we mandutu, ndi Yéhôva a ga tjôô bé we. U ga jôp ikété lihaa likeñi li li gwé didun di bôt ni nkoñ isi wonsôna, bôt ba ba ñunda le ba gwé bañga gwéha ipôla yap. U ga bana ki botñem i niñ i boga ni boga ikété hisi yondo hi Djob. (Markô 10:28-30) Bebeg le ngim mawanda tole bôt boñ ba lihaa, ba ba nkolba makidik moñ i gwélél Djob i len ini, ba ga yoñ makidik mbus ngéda i nigil Bibel.

20. Inyuki i yé nseñ le u gwélél bañga njel inyu bégés Djob?

²⁰ Ndék ngéda, Djob a ga mélés béba yosôna, yak Ane yé i ga énél nkoñ isi wonsôna. (2 Pétrô 3:9, 13) Kinje loñge ngéda di ga bana! Hiki mut a ga bégés Yéhôva i nya i nlémél nye. Jon i yéne we nseñ ngandak le u yoñ makidik nano, ni le u gwélél bañga njel inyu bégés Djob.