UHUNMWU EBE 15
Odẹ Nọ Khẹke Ne Ima Ya Gha Ga Osanobua
1. De ọmwa nọ khẹke nọ tama ima odẹ nọ khẹke ne ima khian ya gha ga Osanobua?
EMWA ugamwẹ nibun yayi wẹẹ, iran ẹre ọ rre odẹ ọghe ẹmwata. Sokpan ọna i re ẹmwata, rhunmwuda, iyayi ughughan ẹre ugamwẹ ughughan mwẹ, odẹ ughughan ẹre iran vbe ya ga Osanobua. Vbe ima khian ya rẹn odẹ nọ khẹke ne ima khian ya gha ga Osanobua? E Jehova ẹre ọ khẹke nọ tama ima odẹ ne ima khian ya gha gae.
2. Vbua khian ya rẹn odẹ nọ khẹke ne u gha ya ga Osanobua?
2 E Jehova keghi kpemehe Baibol, ne ima mieke na rẹn odẹ nọ khẹke ne ima ya gha gae. Nọnaghiyerriọ, gha tie Baibol vbe ẹghẹ hia. U ghaa ru vberriọ, e Jehova gha ru iyobọ nuẹn ya rẹn otọ emwi ne u tie rhunmwuda, ọ hoẹmwẹ ruẹ.—Aizaia 48:17.
3. De emwi ne Osanobua hoo ne ima ru?
3 Emwa eso keghi kha wẹẹ, ugamwẹ hia ẹre Osanobua kpasẹ yi, sokpan ọna i re emwi ne Jesu maa ima re. Jesu keghi kha wẹẹ: “Ẹi re emwa hia ni tie mwẹ ‘Nọyaẹnmwa, Nọyaẹnmwa’ ẹre ọ gha la Arriọba Osanobua, sokpan emwa ni ru iho Erha mwẹ nọ rre ẹrinmwi.” Nọnaghiyerriọ, ọ khẹke ne ima rẹn ahoo ọghe Osanobua, a ghi vbe zowẹ lelẹe. Ọna i zẹdẹ emwi na ya rhẹghẹrẹ, rhunmwuda, izigan ẹre Jesu ya gie emwa ne ẹi họn ẹmwẹ ne Osanobua ra emwa “ni winna iwinna orukhọ.”—Matiu 7:21-23.
4. De emwi ne Jesu khare vbekpae emwa ni hoo ni ru ahoo ọghe Osanobua?
4 Jesu gi ima rẹn wẹẹ, ima gha werriẹ aro daa isievẹn nibun, deghẹ ima hoo ne ima ru ahoo ọghe Osanobua. Ọ keghi kha wẹẹ: “Wa la onurho ne wẹnrẹn la owa, rhunmwuda, te onurho ọfuan ye gbodoo, odẹ na la sọe vbe rriẹ, emwa ni lae wa vbe bun. Sokpan te onurho arrọọ ye wẹnrẹn, odẹ na la sọe ma vbe rriẹ, ibozẹghẹ ẹre ọ vbe lae.” (Matiu 7:13, 14, NW) Odẹ ne wẹnrẹn ọre odẹ ugamwẹ ne Osanobua kpasẹ yi, odẹ na, ẹre ọ su rrie arrọọ ọghe etẹbitẹ. Sokpan odẹ nọ vbẹe gbodoo, ọre ugamwẹ ohoghe, odẹ na, ẹre ọ su rrie ọfuan. E Jehova ma hoo ne ọmwa rhọkpa fuan, ọni ẹre ọ si ẹre nọ na kie ẹkpotọ yọ, ne emwa hia do rẹn odẹ ọghe ẹmwata.—2 Pita 3:9.
ODẸ NỌ KHẸKE NE IMA YA GHA GA OSANOBUA
5. Vbua khian ya sẹtin rẹn emwa ni ga Osanobua vbe odẹ nọ khẹke?
5 Jesu khare wẹẹ, ma gha sẹtin rẹn emwa ni ga Osanobua vbe odẹ nọ khẹke. Vbe ima khian ya sẹtin rẹn iran hẹ? Ma ghi mu ukpa mu uwerhẹn ghee iyayi ọghe iran kevbe vbene iran ru emwi hẹ. Jesu khare wẹẹ: “Uyinmwẹ iran ọre uwa gha ya rẹn iran.” Ọ na vbe rhie tẹ wẹẹ: “Erhan esi ẹre ọ mọ ọmọ esi.” (Matiu 7:16, 17) Ọna ma rhiema wẹẹ, emwa ni ga Osanobua i mwẹ abakuru. Sokpan, iran keghi hia ne iran gha ru emwi esi vbe ẹghẹ hia. Nia, gi ima guan kaẹn ama eso na ya rẹn emwa ni ga Osanobua vbe odẹ nọ khẹke.
6, 7. Vbọzẹe ne ugamwẹ ẹmwata na hẹnhẹn egbe yan ilele ni rre Baibol? Vbe ima miẹn ruẹ vbe igiemwi Jesu?
6 Ọ khẹke ne ugamwẹ ọghomwa hẹnhẹn egbe yan ilele ni rre Baibol. E Baibol khare wẹẹ: “Rhunmwuda, Osanobua ẹre ọ rhiẹre ye iran ekhọe ighẹ emwa ni gbẹnnẹ avbe Ebe nii hia, ọ keghi vbe re emwi esiesi na ya ma emwa emwi ẹmwata nii, na ya gbe ọmwa hin ọkhọ rre, na ya rhie emwi na ma ru ẹse ye vbe nọ te ke yi, kevbe na ya bu ọmwa ude na gha yin ẹse. Na miẹn ehe na miẹn wẹẹ, ọmwa nọ ga Osanobua ghi gha re nọ [gbegba] kevbe nọ sẹ nọ gha winna iwinna nọ maan hia.” (2 Timoti 3:16, 17) Ukọ e Pọl khare wẹẹ: “Ugbẹnvbe ima do kporhu ẹmwẹ Osanobua ma uwa, wa họn rẹn, wa keghi vbe miẹn ọnrẹn ye ehọ, ẹi re zẹvbe ẹmwẹ emwa nagbọn kẹkan, sokpan zẹvbe ẹmwẹ Osanobua nọ gele khin.” (1 Tẹsalonaika 2:13) Te ugamwẹ ẹmwata hẹnhẹn egbe yan Ẹmwẹ Osanobua, ẹi re iziro ra ilele ọghe emwa nagbọn.
7 Ẹmwẹ Osanobua ẹre Jesu wa gha loo ya maa emwa emwi. (Tie Jọn 17:17, NW.) Ẹghẹ hia ẹre ọ ya gha sunu ye Evbagbẹn Nọhuanrẹn. (Matiu 4:4, 7, 10) Te eguọmwadia Osanobua wa vbe ya egbe tae Jesu. E Baibol ẹre iran ya maa emwa emwi.
8. De emwi ne Jesu khare vbekpae ugamwẹ Osanobua?
8 E Jehova ọkpa ẹre ọ khẹke ne ima gha ga. Ebe Psalm 83:18, NW khare wẹẹ: “Uwẹ ne eni ẹnrẹn re Jehova, uwẹ ọkpa ọre Nọ Yo Sẹ nọ mwẹ asẹ yan otagbọn hia.” Te Jesu wa gha hoo ne emwa rẹn aro ọmwa ne Osanobua gele khin, ọni ẹre ọ si ẹre nọ na maa iran eni Osanobua. (Tie Jọn 17:6.) Jesu keghi kha wẹẹ: ‘Osanobua ruẹ ọkpa uwẹ gha ga, irẹn ẹre u gha vbe ya uhunmwu rhanmwa otọ na.’ (Matiu 4:10) Zẹvbe eguọmwadia Osanobua, ọ khẹke ne ima gha ya egbe tae Jesu. De odẹ nọkhin? Ma ghi gha rhie ugamwẹ ne Jehova ọkpa, ma ghi gha loo eni ẹnrẹn, ma ghi vbe gi emwa rẹn eni Osanobua kevbe emwi nọ khian ru ne ima vbe odaro.
9, 10. De vbene ima ya rhiẹre ma wẹẹ ima hoẹmwẹ egbe?
9 Ọ khẹke ne ima ya ekhọe hia hoẹmwẹ emwa ọvbehe. Jesu keghi tama erhuanegbe ẹre ne iran gha hoẹmwẹ egbe. (Tie Jọn 13:35.) Ọna rhiema wẹẹ, ọ khẹke ne ima hoẹmwẹ emwa ọvbehe ọ gha khọnrẹn wẹẹ, ivbi ẹvbo ọvbehe ẹre iran khin, iran fe ra iran ma fe. Ahoẹmwọmwa na ẹre ọ khẹke nọ ku ima kugbe zẹvbe etẹn vbe ugamwẹ Osanobua. (Kọlose 3:14) Ọna ẹre ọ si ẹre ne ima i na mwẹ obọ vbe okuo. E Baibol khare wẹẹ: “Ọnọna ọrọre alughaẹn ne egbe ne aro dae, nọ rre ẹkpo ivbi Osanobua kevbe ivbi Esu. Ọmwakọmwa ne ẹi ru emwi nọ gbae, ra ne ẹi hoẹmwẹ etiọnrẹn, ẹi re ovbi Osanobua.” E Baibol ye vbe kha wẹẹ: “Ọ ma kei ne ima gha ye vbe Keni, ọghe ọmwa dan nii [ẹre] irẹn khin, ọ keghi gbe ọtiọnrẹn ne okpia rua.”—1 Jọn 3:10-12; 4:20, 21.
10 Nọnaghiyerriọ, gi ima gha loo ẹghẹ, ẹrhiọn kevbe emwi ewe ọghomwa ya ru iyobọ ne egbe. (Hibru 10:24, 25) Ma ghi vbe “gha ru emwa hia ẹse.”—Galatia 6:10.
11. Vbọzẹe nọ na khẹke ne ima gha họn ẹmwẹ ne Jesu?
11 Ọ khẹke ne ima gha lele adia ọghe Jesu rhunmwuda, obọ re ma khian la miẹn imiẹnfan. E Baibol khare wẹẹ: “Obọ ẹre ọkpa ọre a la miẹn imiẹnfan rhunmwuda, eni ọvbehe i rrọọ, vbe agbọn na, ne Osanobua rhie ne emwa wẹẹ, a gha lae miẹn imiẹnfan.” (Iwinna 4:12) Vbe Uhunmwu Ebe 5 ọghe ebe na, ma ruẹ ọre wẹẹ, te Jehova gie Jesu gha die agbọn na, nọ do ya arrọọ ọghẹe dẹ ima werriegbe. (Matiu 20:28) Jesu ẹre Jehova zẹ nọ gha kha yan agbọn na. Ọna ẹre ọ zẹe ne Baibol na wẹẹ, ne ima gha họn ẹmwẹ ne Jesu deghẹ ima hoo ne ima gha rrọọ vbe etẹbitẹ.—Tie Jọn 3:36.
12. Vbọzẹe ne ima i na mwẹ obọ vbe otu azẹ?
12 Ọ ma khẹke ne ima gha mwẹ obọ vbe otu azẹ. Jesu ma gha mwẹ obọ vbe otu azẹ. Vbe ọ rre uwu ibavbaro, ọ keghi tama e Pailet ne gọvina ọghe Rom wẹẹ: ‘Arriọba mwẹ i re ọghe agbọn na.’ (Tie Jọn 18:36.) Vbe na ghee Jesu, ọ khẹke ne ima gha ye Arriọba Osanobua ike. Ehe ne ima rhirhi gha ye, ọ ma khẹke ne ima deba otu azẹ. Vbọrhirhighayehẹ, e Baibol wẹẹ ne ima gha gbe uhunmwu kotọ ne emwa ni khaevbisẹ vbe agbọn na. (Rom 13:1) Ọ khẹke ne ima gha lele uhi ẹvbo ne ima ye. Sokpan, uhi emwa ni khaevbisẹ gha gbodan ye uhi ọghe Osanobua, ọ khẹke ne ima ya egbe taa avbe ukọ, ni khare wẹẹ: “Ne Osa khare ọre ima ra ya ru emwi ighẹ ẹi re ne emwa ne agbọn khare.”—Iwinna 5:29; Mak 12:17.
13. De emwi ne ima maa emwa re vbekpae Arriọba Osanobua?
13 Ma yayi wẹẹ, Arriọba Osanobua ọkpa ẹre ọ khian sẹtin sọfurre ye ọlọghọmwa ne emwa werriẹ aro daa. Jesu khare wẹẹ, a gha kporhu “iyẹn nọ maan ọghe Arriọba na la otọ agbọn hia.” (Tie Matiu 24:14.) Arriọba emwa nagbọn rhọkpa i rrọọ nọ gha sẹtin ru emwi ne Arriọba Osanobua khian ru ne ima. (Psalm 146:3) Jesu wẹẹ, ne ima gha na erhunmwu ne Arriọba Osanobua rre. Ọ keghi kha wẹẹ: “Gi Arriọba ruẹ rre. Gia gha ru iho ruẹ vbe agbọn vbe ne iran ru vbe ẹrinmwi.” (Matiu 6:10) E Baibol gi ima rẹn wẹẹ, Arriọba Osanobua gha fuẹn arriọba emwa nagbọn hia rua kevbe wẹẹ, arriọba Osanobua “ghi gha rrọọ ẹdẹdẹmwẹdẹ.”—Daniẹl 2:44.
14. De emwa ne uwẹ yayi wẹẹ ọ ga Osanobua vbe odẹ nọ khẹke?
14 Ma ziro yan emwi eso nẹ na ya rẹn ugamwẹ ẹmwata. Inọta nọ ghi khẹke ne u nọ egbuẹ re nia ọre wẹẹ: ‘De ugamwẹ ne imamwaemwi ọghe iran hẹnhẹn egbe yan ilele ni rre Baibol? De emwa ugamwẹ ni maa emwa eni Osanobua? De emwa ugamwẹ ni ya ekhọe hia hoẹmwẹ egbe, kevbe ni yayi wẹẹ, Osanobua ẹre ọ gie Jesu gha die agbọn do miẹn ima fan? De ugamwẹ ne ẹi mwẹ obọ vbe otu azẹ? De emwa ugamwẹ ni tama emwa wẹẹ, Arriọba Osanobua ọkpa ẹre ọ khian sẹtin sọfurre ye ọlọghọmwa hia?’ Avbe Osẹe Jehova ọkpa nọ.—Aizaia 43:10-12.
DE EMWI NỌ GHI KHẸKE NE U RU NIA?
15. De emwi nọ khẹke ne ima ru deghẹ ima hoo ne Osanobua miẹn ugamwẹ ọghe ima yi?
15 Ma sẹtin yayi wẹẹ Osanobua rrọọ vbọrhirhighayehẹ, iyayi nii ma sẹ rhunmwuda, avbe orhiọn dan vbe yayi wẹẹ, Osanobua rrọọ sokpan iran i họn ẹmwẹ nẹẹn. (Jems 2:19) Ma gha hoo ne Osanobua miẹn ugamwẹ ọghe ima yi, te ima gha yayi wẹẹ irẹn rrọọ, ma ghi vbe gha lele adia ọghẹe.
16. Vbọzẹe nọ na khẹke ne ima gban egbe ne ugamwẹ ohoghe?
16 Ne Osanobua mieke na miẹn ugamwẹ ọghe ima yi, te ima gha fi iyeke gbe ugamwẹ ohoghe. Aizaia ne akhasẹ keghi kha wẹẹ: “Wa wannọ egbe hin uwu iran rre. Wa ghẹ mwẹ obọ vbe emwi nọ ma huan.” (Aizaia 52:11; 2 Kọrinti 6:17) Ọna ẹre ọ si ẹre nọ na khẹke ne ima gban egbe ne emwi ke emwi nọ kaẹn ugamwẹ ohoghe.
17, 18. Vbọ re “Babilọn Nọkhua”? Vbọzẹe nọ na khẹke ne ima rherhe kpa hin vbọ rre?
17 Vbọ re ugamwẹ ohoghe? Ọ keghi re ugamwẹ ne imamwaemwi ọghe iran gbodan ghee imamwaemwi ẹmwata ni rre Ẹmwẹ Osanobua. E Baibol keghi tie ugamwẹ ohoghe hia “Babilọn Nọkhua.” (Arhie Maan 17:5) Vbọzẹe? Vbe iyeke Okpamẹ nọ rhọọ re vbe ẹghẹ Noa, ugamwẹ ohoghe nibun keghi suẹn vbe ẹvbo na tie ẹre Babilọn. Erriọ ugamwẹ ohoghe ghi ya do gba ehe hia vbe uhunmwu otagbọn. Vbe igiemwi, vbe ẹghẹ nẹdẹ, te Ivbi e Babilọn ghaa ga osa ne agbeha nibun. Erriọ ugamwẹ nibun vbe ya mwẹ imamwaemwi ọghe Osa Ne Agbeha vbe ẹdẹnẹrẹ. Sokpan e Baibol maa ima re wẹẹ, Osanobua ọghe ẹmwata ọkpa ẹre ọ rrọọ, eni ẹnrẹn ọre Jehova kevbe wẹẹ, Jesu ọre Ovbi ẹre. (Jọn 17:3) Ivbi e Babilọn vbe yayi wẹẹ, ọmwa gha wu, ọ mwẹ emwi ne ẹi wu, nọ kpa hin egbe ẹre rre, emwi nii sẹtin ya gha rri oya vbe ẹrinmwi erhẹn. Ọna i re ẹmwata.—Ya ghee Ifiẹmwẹ Nọ Rre Ufomwẹ Ebe na 14, 17 kevbe 18.
18 Osanobua tae yotọ nẹ wẹẹ, vbe ne ẹi khian ghi kpẹẹ gbe, irẹn gha fuẹn ugamwẹ ohoghe rua. (Arhie Maan 18:8) Ọna ẹre ọ si ẹre nọ na khẹke ne u rherhe kpa hin ugamwẹ ohoghe rre. E Jehova hoo ne u ru vberriọ nia. Ghẹ zẹdẹ si obọ ẹgogo ghee iyeke.—Arhie Maan 18:4.
U ghaa ga e Jehova, u ghi do gha re ọkpa vbe usun eguọmwadia re ni rre uhunmwu otagbọn hia
19. De vbene Jehova khian ya gbaroghe ruẹ hẹ, vbe u gha suẹn gha gae?
19 U ra khian kpa hin ugamwẹ ohoghe rre, ne u suẹn gha ga e Jehova, emwa eso vbuwe ẹgbẹe ra avbe ọse sẹtin suẹn gha zẹ ruẹ kpokpo, rhunmwuda iran ma rẹn evbọzẹe ne u na ru azẹ vberriọ. Sokpan, e Jehova i khian yangbuẹ. U ghi do gha re ọkpa vbe usun eguọmwadia Osanobua ni mwẹ ahoẹmwọmwa daa egbe vbe uhunmwu otagbọn hia, u ghi vbe do gha mwẹ ayayẹro ọghe arrọọ etẹbitẹ vbe agbọn ọgbọn nọ dee. (Mak 10:28-30) Ọ gha sẹ ẹghẹ, avbe ọse ra etẹn vbuwe ẹgbẹe ni te gha gbodan ye azẹ ne u ru, sẹtin vbe do khian eguọmwadia e Jehova.
20. Vbọzẹe nọ na ru ekpataki ne u gha ga Osanobua vbe odẹ nọ khẹke?
20 Vbe ne ẹi khian ghi kpẹẹ gbe, Osanobua gha wabọ emwi dan hia rua, iyeke ọni, Arriọba Osanobua ghi suẹn gha kha yan otagbọn na. (2 Pita 3:9, 13) Ẹghẹ nii gha rhiẹnrhiẹn gbe! Emwa hia ghi do gha ga e Jehova vbe odẹ ne irẹn gualọe yi. Ọ khẹke ne u zẹ emwi ru nia, ne u do gha ga Osanobua vbe odẹ ne irẹn kpasẹ yi.
