1. Ise si arusna nentuken cara si benar i bas nembah Dibata?

MBUE agama ngataken maka agamana ngajarken kebenaren kerna Dibata. Tapi enda la mungkin, erkiteken la seri kerina ajaren agama kerna ise Dibata ras cara nembah Ia. Uga carana gelah banci sieteh cara si benar nembah Dibata? Jahwe ngenca si banci mpebetehkenca man banta uga kita arus nembah Ia.

2. Uga carana kam banci erlajar kerna cara si benar i bas nembah Dibata?

² Jahwe mereken Pustaka si Badia gelah kita banci erlajar kerna cara si benar nembah Ia. Pelajarilah Pustaka si Badia gelah isampati Jahwe kam ndatken manfaat i bas pengajarenNa nari erkiteken iperdiatekenNa kal kam.​—Jesaya 48:17.

3. Ate Dibata kita ngelakoken kai?

³ Piga-piga kalak ngatakenca maka ialoken Dibata kerina agama, tapi labo bage si iajarken Jesus man banta. Nina, ”Labo kerina kalak si erlebuh man bangku, ’O Tuhan, Tuhan!’ bengket ku Kinirajan Surga, tapi kalak si ngelakoken rikutken si ngena ate bapangku i Surga nge bengket ku bas Kinirajan e.” Emaka, penting sipelajari kai peraten Dibata janah ndalankenca. Enda hal si serius erkiteken ikataken Jesus kalak si la patuh man Dibata bali kap bagi ”kalak jahat”.​—Matius 7:21-23.

4. Kai si ikataken Jesus kerna ngelakoken peraten Dibata?

⁴ Jesus mpersingeti maka pasti siadapi tantangen adi  silakoken peraten Dibata. Nina, ’Bengketlah arah pintun si kitik, sabap mbelang me pintun dingen mbelang pe dalan ku kematen, janah nterem kalak arah e erdalan. Pintun si kitik dingen dalan si mesera nuju ku kegeluhen si rasa lalap, janah piga-piga kalak ngenca ngasup arah e erdalan.’ (Matius 7:13, 14) Dalan si mesera, ntah pe cara si benar nembah Dibata, nuju ku kegeluhen si rasa lalap. Dalan si mbelang, ntah pe cara si salah nembah Dibata, nuju ku kematen. Tapi la ate Jahwe sekalak jelma pe mate. IberekenNa kesempaten man kerina jelma erlajar kerna Ia.​—2 Petrus 3:9.

5. Uga carana gelah banci sitandai kalak si tuhu-tuhu nembah Dibata?

⁵ Nina Jesus banci sitandai kalak si tuhu-tuhu nembah Dibata. Carana alu mereksa kai si itekina ras si ilakokenna. Nina, ”Itandaindu nge ia arah perbahanenna.” Janah nina, ”Batang si mehuli tentu mehuli nge buahna.” (Matius 7:16, 17) Enda labo ertina kalak si nembah Dibata kalak si sempurna. Tapi lalap iusahaken juak-juak Dibata ngelakoken kai si benar. Mari sinehen ise si nembah Dibata alu cara si benar.

6, 7. Engkai maka pengajaren agama si benar arus erpalasken Pustaka si Badia? Kai usihen si itadingken Jesus?

⁶ Penembahenta arus erpalasken Pustaka si Badia. Nina Pustaka si Badia, ”Kerina si tersurat i bas Pustaka si Badia rehna i bas Dibata nari janah erguna i bas ngajari kalak kerna si ngena ate Dibata, mandang si lepak, pekena si salah dingen erguna i bas mereken pedah-pedah gelah nggeluh alu mehuli. Gelah kalak si nehken sura-sura Dibata cukup saratna ras ilengkapi guna erbahan kerina perbahanen si mehuli.”  (2 Timotius 3:16, 17) Isuratken rasul Paulus man kalak Kristen, ”Asum iberitaken kami man bandu Kata Dibata, ibegikenndu dingen ialokenndu Kata e labo bagi kata si rehna i bas manusia nari tapi bagi Kata si rehna i bas Dibata nari.” (1 Tesalonika 2:13) Agama si benar erpalasken Kata Dibata. Labo erpalasken perukuren manusia, tradisi, ntah pe si debanna.

⁷ Kerina ajaren Jesus erpalasken Kata Dibata. (Oge Johanes 17:17.) Rusur igunakenna ayat-ayat i bas Pustaka si Badia nari. (Matius 4:4, 7, 10) Umat Dibata si tuhu-tuhu ngikuti usihen Jesus janah kerina si iajarken kalak enda erpalasken Pustaka si Badia.

8. Kai si iajarken Jesus kerna nembah Jahwe?

⁸ Dibata Jahwe ngenca si arus si sembah. Nina Masmur 83:19, ”Gelah ngaku ia maka Kam, si ergelar Jahwe, Kam saja si Meganjangna i bas kerina doni enda.” (Padan si Ndekah, si Nipegendek) Ate Jesus gelah kerina manusia meteh ise Dibata si tuhu-tuhu e. Iajarkenna ka gelar Dibata. (Oge Johanes 17:6.) Nina Jesus, ’Sembahlah Jahwe Dibatandu, janah Ia saja ngenca patut man sembahen!’ (Matius 4:10) Emaka, selaku juak-juak Dibata, siikuti usihen Jesus. Dibata Jahwe saja sisembah, sigunaken gelarNa, janah siajari kalak si deban kerna gelar Dibata ras peratenNa.

9, 10. Uga caranta ncidahken kekelengen man sada ras si debanna?

⁹ Tuhu-tuhu sikelengi kerina kalak. Jesus ngajari ajar-ajarna gelah sikeleng-kelengen. (Oge Johanes 13:35.) La soal janari asalta, suku kai kita, bayak ntah musil kita. Kekelengenta sada ras si debanna mpersada kita jadi turang ras senina. (Kolose 3:14) Emaka kita la nggit erperang ntah pe munuh. Nina Pustaka si Badia, ”Enda me lainna anak-anak Dibata ras anak-anak  Iblis: ise si la ngelakoken si ngena ate Dibata, ntah pe la ikelengina seninana ia labo anak Dibata.” Janah nina, ”Kita arus sikeleng-kelengen; ola bagi Kain si jadi anak Iblis, agina pe ibunuhna.”​—1 Johanes 3:10-12; 4:20, 21.

¹⁰ Sigunaken waktunta, gegeh, ras kai pe si lit bas kita guna nampati janah mpegegehi sada ras si debanna. (Heber 10:24, 25) ”Sibahanlah si mehuli man kerina manusia.”​—Galati 6:10.

11. Engkai maka kita tek Jesus e dalan nuju ku Dibata?

¹¹ Sipatuhi Jesus erkiteken ia me dalan ku Dibata. Nina Pustaka si Badia, ”Arah Jesus ngenca kita banci terkelin; sabap i belang-belang doni enda la lit itetapken Dibata gelar si deban si erbahanca kita terkelin.” (Perbahanen Rasul-Rasul 4:12) I bas Pasal 5 buku enda, nggo sipelajari maka Jahwe ngutus Jesus guna mereken kegeluhenna jadi tebusen man manusia si patuh. (Matius 20:28) Jahwe pe nggo milih Jesus jadi Raja guna merentah doni. Enda sabapna arus sipatuhi Jesus gelah banci nggeluh si rasa lalap.​—Oge Johanes 3:36.

12. Engkai maka la kita ikut i bas politik?

¹² La kita ikut politik. Jesus la muat bagin i bas politik. Paksa ia iadili, ikatakenna man Pilatus, penguasa Roma, ”Kinirajanku labo i bas doni enda nari asalna.” (Oge Johanes 18:36.) Bali bagi Jesus, kita setia man Kinirajan Dibata, janah erkiteken alasen si e, la soal i ja kita tading la kita nggit terlibat politik. Tapi, Pustaka si Badia merentahken kita gelah patuh man ”si erkuasa,” eme kap pemerentah. (Roma 13:1) Kita patuh man hukum i bas negerinta. Tentu saja, paksa hukum i bas negerinta ertentangen ras hukum Dibata, kita ”arus  ngikutken Dibata, labo manusia”.​—Perbahanen Rasul-Rasul 5:29; Markus 12:17.

13. Kai berita kerna Kinirajan Dibata si arus siberitaken?

¹³ Tek kita maka Kinirajan Dibata ngenca si banci nasapken perbeben doni. Ikataken Jesus maka ”berita si meriah kerna Kinirajan e” iberitaken man manusia i belang-belang doni enda. (Oge Matius 24:14.) La lit pemerentahen manusia si banci ngelakoken kai si nandangi ilakoken Kinirajan Dibata man banta. (Masmur 146:3) Jesus ngajarken gelah sitotoken Kinirajan Dibata, paksa ikatakenna, ”Reh min KinirajanNdu; sehlah min peratenNdu, i bas doni enda bagi ni Surga.” (Matius 6:10) Pustaka si Badia ngataken maka Kinirajan Dibata pagi ngkernepken kerina pemerentahen manusia janah kenca e ”pajek ia rasa lalap”.​—Daniel 2:44.

14. Menurutndu, ise si nembah Dibata alu cara si benar?

¹⁴ Kenca mpelajari enda kerina, sungkun dirindu, ’Ise si pengajarenna erpalasken Pustaka si Badia? Ise si mpebetehken man kalak si deban kerna gelar Dibata? Ise si ncidahken kekelengen situhu-tuhu man sada ras si debanna janah tek maka Dibata ngutus Jesus guna nelamatken kita? Ise si la terlibat i bas politik? Ise si mberitaken maka Kinirajan Dibata ngenca si banci nasapken perbebenta?’ Saksi-Saksi Jahwe ngenca.​—Jesaya 43:10-12.

15. Kai si arus silakoken gelah penembahenta ialoken?

¹⁵ La bias terjeng tek saja maka Dibata e lit. Begu-begu pe tek Dibata e lit, tapi ia la patuh man baNa. (Jakup 2:19) Gelah ialoken Dibata penembahenta, la  bias terjeng tek saja maka Dibata e Iit, tapi silakoken ka kai si ipindoNa.

16. Engkai arus situlak agama palsu?

¹⁶ Gelah ialoken Dibata penembahenta, arus situlak agama palsu. Isuratken nabi Jesaya, ”Ndaratlah kam i tengah-tengahna nari, janah peserap bandu i bas ia nari.” (Jesaya 52:11; 2 Korinti 6:17) Enda sabapna ngkai maka arus situlak kerina si lit hubungenna ras agama palsu.

17, 18. Kai kin ”Babilon si Mbelin” e, janah ngkai maka seh kal pentingna nadingken agama palsu gundari?

¹⁷ Kai agama palsu e? Agama si ngajarken cara nembah Dibata tapi ertentangen ras Kata Dibata. Kerina agama palsu e igelari ”Babilon si Mbelin”. (Ketang-kasen 17:5) Engkai? Kenca Banjir si Mbelin i jaman Nuah, mulai lit agama palsu i kota Babilon janah reh mbarna ku belang-belang doni. Contohna, kalak si tading i Babilon nembah Dibata telu serangke. Gundari pe bage. Melala agama ngajarken Dibata Si Telu Sada, tapi Pustaka si Badia alu tangkas ngajarken maka sada ngenca Dibata si tuhu-tuhu, Jahwe. Janah Jesus e anakNa. (Johanes 17:3) Kalak Babilon pe tek maka lit sada bagin i bas diri manusia si tetap nggeluh kenca ia mate janah bagin i bas jelma enda banci isiksa i neraka. Tapi enda labo tuhu.​—Nehen Penjelasen tambahen 14, 17, ras 18.

¹⁸ Nina Jahwe kentisik nari kerina agama palsu ikernepken. (Ketangkasen 18:8) Angkaindu nge ngkai maka seh kal pentingna nadingken agama palsu gundari? Lakoken e sope lenga terlambat.​—Ketangkasen 18:4.

19. Sanga kam erban keputusen guna ngelayani Jahwe, uga Ia ngelindungi kam?

 ¹⁹ Sanga kam erban keputusen nadingken agama palsu janah ngelayani Jahwe, piga-piga teman ntah kade-kadendu mungkin la iangkaina keputusenndu janah banci saja ibahanna tantangen. Tapi, Jahwe la pernah nadingken kam. Kam banci jadi bagin i bas keluarga si mbelin arah jutan kalak i belang-belang doni si ncidahken kekelengen si tuhu-tuhu man sada ras si debanna, kam pe banci ndatken arapen nggeluh si rasa lalap. (Markus 10:28-30) Mbera teman ras kade-kadendu si nentang kam dungna erlajar.

20. Engkai maka penting nembah Dibata alu cara si benar?

²⁰ Kentisik nari, Dibata ngkernepken kerina kalak jahat janah KinirajanNa merentah doni enda. (2 Petrus 3:9, 13) Enda pagi jadi sada masa si luar biasa! Kerina pagi nembah Jahwe alu cara si ngena ateNa. Emaka, seh kal pentingna erbahan tindaken gundari janah nembah Dibata alu cara si benar.