1. I mani a nga hi gelako nzila ya yinene yo khozela Txizimu?

WUKHONGELI wo tala wu womba ti to wu gondisa ditshuri mayelana ni Txizimu. Kambe eto hi nga ditshuri, nguko wu gondisa timhaka to hambana ngutu mayelano ni ti to Txizimu i mani ni nzila yo txi khozela. Hi nga yi zivisa ku txani nzila ya yinene yo khozela Txizimu? Jehovha ngene basi awu a nga hi gelako ati hi nga mu khozelisako tona.

2. Hi nga gondisa ku txani nzila ya yinene yo khozela Txizimu?

² Jehovha a hi ningile Bhiblia ku na gonda nzila ya yinene yo mu khozela. Gonda Bhiblia, se Jehovha a na kuvhuna ti to u wuyelwa ngu tigondo takwe nguko ene wa khatala ngutu ngu ngawe.—Isaya 48:17.

3. Nji txani ati Txizimu txi lavako ti to hi maha?

³ Vathu vamwane va womba ti to Txizimu txi tumela wotshe wukhongeli, kambe eto hi nga tona ati Jesu a nga gondisa tona. Ati khene: “Hi nga votshe va va wombako kwango va txi ‘Mkoma, Mkoma,’ ava va no wulela Mfumoni ka nzumani, aniko ngu wule a mahako kuranda ka Tate wangu a ku nzumani.” Se ti ndina laveka ti to hi ziva ti to ngu kuhi kuranda ka Txizimu se hi gwita hi kumaha. Atiya hi nga msakano nguko Jesu a fananisile vathu va va si engisiko Txizimu ni vawonhi, “vamahi va siwonho”.—Matewu 7:21-23.

4. Nji txani atxi Jesu a nga txi womba mayelana ni kumaha kuranda ka Txizimu?

⁴ Jesu a hi alakanyisile ti to hi txi lava kumaha kuranda ka Txizimu, hi na manana ni siduko. Ati khene: “Wulelani  ngu txike txo songa, nguko txike txo anama ni nzila ya kuanama si yisa kulovani; se mbavangi va va wulelako ngu sona, ngukuva txi nga songa ni nzila ya kona yi nga khwela, ayi yisako wutomini, mbadotho va yi manako.” (Matewu 7:13, 14) Nzila yo khwela, i ku nzila ya yinene yo khozela Txizimu, yi yisa wutomini wo mbi guma. Nzila yo anama, i ku nzila yi i ku singa yona yo khozela Txizimu, yi yisa kufani. Kambe Jehovha kha lavi ti to ku lova ni wammweyo. A hi ninga mkama wo gonda mayelana ni nene.—2 Pedro 3:9.

5. Hi nga va tumbulisa ku txani ava va khozelako Txizimu ngu nzila ya yinene?

⁵ Jesu ati khene hi nga ti kota kuwona ti to i mani a khozelako Txizimu ngu nzila ya yinene. Hi nga maha toneto ngu kuwona ati va ti tumelako ni ti va timahako. Ati khene: “Mi na va ziva ngu mihando yawe.” A tshumete a txi khene: “Wotshe mndonga wa wunene wu veleka mihando ya yinene.” (Matewu 7:16, 17) Eto hi nga ti to ava va khozelako Txizimu va hetisekile. Kambe malanda a Txizimu ma duketa kumaha ti i ku ta tinene. Hi na ti wona konkuwa ti to nji txani txi no hi vhuna kutumbula ava va khozelako Txizimu ngu nzila ya yinene.

6, 7. Ngu ku txani wukhozeli wa ditshuri wu txi seketelwa mu ka Bhiblia? Txikombiso txa Jesu txi hi gondisa txani?

⁶ Wukhozeli wathu wu seketetwe mu ka Bhiblia. Bhiblia yi khene: “Yotshe Mibhalo yi pimisilwe ngu Txizimu, ya vhuna kugondisa, kulaya, ni kukawuka ni kutolovetisa tinzila to lulama, kasiku m’thu wu i ku wa ka Txizimu ava a di hetisekile, a txi lulamiselwa ka yotshe mithumo ya yinene.” (2 Timoti 3:16, 17) Mpostoli Paulo a bhalete Makristu a txi khene: “Msana ka ku va mi di amukete Dipswi da Txizimu, adi hi nga mi txhumayela, mi di amukete kota  Dipswi da Txizimu mpela, i singa ku di fananisa ni dipswi da kuhuma ka m’thu.” (1 Vatesalonika 2:13) Wukhozeli wa ditshuri wu seketetwe amu ka Dipswi da Txizimu basi, i ku Bhiblia. Kha wa seketelwa ka mapimo ya m’thu, sihena so kari mwendo simwane so fana ni soneso.

⁷ Totshe ati Jesu a nga ti ti gondisa ti ti seketetwe mu ka Dipswi da Txizimu. (Lera Johane 17:17.) Ene a ti tshumela e womba ni Mibhalo. (Matewu 4:4, 7, 10) Malanda a ditshuri a Txizimu, ma londisela txikombiso txa Jesu ni kuseketela ati ma ti gondisako amu ka Bhiblia.

8. Ngu tihi ati Jesu a nga hi gondisa mayelana ni kukhozela Jehovha?

⁸ Hi khozela Jehovha dwe. Masalmu 83:18, Tradução do Novo Mundo, yi khene: “Ditina dako ngawe wekha u ku Jehovha, ngawe wekha u ku Nyatxitimwi ha mafuni kotshe.” Jesu a lavile ti to vathu ve ziva ti to i mani Txizimu txa ditshuri, se a gondisile vathu ditina da txona. (Lera Johane 17:6.) Jesu a ti khene: “U na khizamela Mkoma, Txizimu txako, ngene ekha u na ku mu khozela.” (Matewu 4:10) Se malanda a Txizimu ma londetela txikombiso txa Jesu. Ona ma khozela Jehovha basi, ma thumisa ditina dakwe me tshumela me gondisa vamwane ditina da Txizimu ni ti txi no ta hi mahela.

9, 10. Hi ti kombisisa ku txani ti to ha va randa vamwane?

⁹ Hi kombisa lirando la ditshuri ka vathu. Jesu a gondisile vagondiswa vakwe ti to ve randana, se nathu hi maha toneto. (Lera Johane 13:35.) Kha ti nga ni mhaka ni ti to hi va hani, ngu wuhi m’dhawuko wathu hi ganyile mwendo nem. Lirando lathu li fanete ku hi tshanganisa kota vanathu ni tindiyathu. (Vakolosa 3:14) Se kha hi yi yimbini ti to yi ya dayela vathu. Bhiblia yi khene: “Txikombiso txa vanana va Txizimu ni txa vanana va Sathane ngu txiya: Votshe vale va si mahiko to lulama ni vale va si randiko vanawe  kha va lumbi Txizimu.” Yi engetela yi txi: “Ti to hi randana; hi nga faneni ni Kayimi, awuwa ngu ku va i di m’bihi, a date mnanda wakwe.”—1 Johane 3:10-12; 4:20, 21.

¹⁰ Hi thumisa mbimo yathu, mtamo wathu ni silo sathu ti to hi tsanisa vamwane. (Vahebheru 10:24, 25) Athu “hi maha wunene ka votshe”.—Vagalatiya 6:10.

11. Ngu ku txani hi txi tumela Jesu kota nzila yo ya ka Txizimu?

¹¹ Hi lava kuengisa Jesu nguko ene i nzila yo ya ka Txizimu. Bhiblia yi khene: “Ku walo mmwane a si kotako kuhanyisa, kha di nga ho dimwane ditina, hahatshi ka nzuma adiya vathu va nga ningwa, kasi ku va txi hanyiswa ngu dona.” (Mithumo 4:12) Ka ndima 5 hi gondile ti to Jehovha a rumete mwanana wakwe ti to e ta ningela wutomi wakwe ti to e va mterulo wa vathu va va engisako. (Matewu 20:28) Ni ku Jehovha a sawute Jesu ti to e fuma kota Mkoma ha mafuni kotshe. Ngu toneto Bhiblia yi wombako, ti to hi ta hanya kala kupinduka hi fanete hi engisa Jesu.—Lera Johane 3:36.

12. Ngu ku txani hi si beleli ka timhaka ta politika?

¹² Kha hi pateki ka timhaka ta politika. Jesu kha nga maneka ka timhaka ta politika. Mbimo yi a nga ti ka txikarato a gete mfumeli wa Roma a txi khene: “Wukoma wangu hi nga wa ditikoni muwa.” (Lera Johane 18:36.) Ku fana ni Jesu athu hi thembekile ka Mfumo wa Txizimu, se ngu mhaka yoneyo, ti singa ni mhaka ni ti to hi zumba hani, kha hi ti beti ka ta politika. Hambi keto Bhiblia yi hi gela ti to hi engisa “wukoma wo guleka”, i ku wukoma wa vathu. (Varoma 13:1) Ha engisa milayo ya ditikoni mu hi hanyako kona. Kambe, ngako milayo ya kona yi txi lwisana ni milayo ya Txizimu, hi tekelela txikombiso txa vaapostoli, va nga khona: “Ti ni fanelo kuengisa milayo ya Txizimu kupinda ya vathu.”—Mithumo 5:29; Marku 12:17.

13. Ngu tihi ati hi ti txhumayelako mayelana ni Mfumo wa Txizimu?

 ¹³ Hi tumela ti to Mfumo wa Txizimu ngu wona basi wu no heta sikarato sa mafu. Jesu a ti khene “mahungu awa a manene a Mfumo” ma ndina txhumayelwa ha mafuni kotshe. (Lera Matewu 24:14.) Ku walo wukoma wa vathu awu wu hi mahelako ati Mfumo wa Txizimu wu no hi mahela. (Masalmu 146:3) Jesu a hi gondisile ti to hi khongelela Mfumo wa Txizimu: “Wu na te kwathu Mfumo wako. Ku na mahwe kuranda kwako, ha mafuni, nga nzumani.” (Matewu 6:10) Bhiblia yi profetile ti to Mfumo wa Txizimu wu na lovisa yotshe mifumo ya vathu se wona “wu na nzumba kala kupinduka”.—Dhanieli 2:44.

14. Mba mani ava awe u kholwako ti to va khozela Txizimu ngu nzila ya yinene?

¹⁴ Msana ko gonda timhaka tiya, ti wotise: ‘Mba mani ava va seketelako tigondo tawe mu ka Bhiblia? Mba mani ava va gelako vamwane ngu ta ditina da Txizimu? Mba mani ava va randanako ngu ditshuri ni kukholwa ti to Txizimu txi rumete Jesu ti to a ta hi ponisa? Mba mani ava va si beleliko ka ta politika? Mba mani ava va txhumayelako ti to Mfumo wa Txizimu ngu wona basi awu wu no lulameta sikarato sathu?’ Ngu tona Tifakazi ta Jehovha basi.—Isaya 43:10-12.

15. Nji txani atxi hi felako kumaha ngako hi txi lava ti to Txizimu txi amukela wukhozeli wathu?

¹⁵ Kha ti eneli kukholwa Txizimu basi. Hambi madhimoni ma kolwa ka Txizimu, kambe kha ma txi engisi. (Jakobe 2:19) Hi txi lava ti to Txizimu txi amukela wukhozeli wathu, kha ha fanela kukholwa basi ka txona, kambe hi fanete hi maha ati txi ti wombako.

16. Ngu ku txani hi di fanete kulamba wukhozeli wa makuhu?

¹⁶ Ti to Txizimu txi amukela wukhozeli wathu, hi fanete  hi lamba wukhongeli wa makuhu. Mprofeti Isaya a ti khene: “Humani ka Bhabhilona, mi nga gweseni txo mbi basa, zumbani mi di basile.” (Isaya 52:11; 2 Vakorinto 6:17) Ngu toneto hi lavako kulamba txihi ni txihi atxi txi nga patana ni wukhozeli wa makuhu.

17, 18. Nji txani “Bhabhilona wa Hombe”, ni ku ngu ku txani i di ta txikuluveta ku mu siya?

¹⁷ Nji txani wukhozeli wa makuhu? Ngu wotshe wukhongeli awu wu gondisako kukhozela Txizimu ngu nzila yi yi lwisanako ni Dipswi da txona. Bhiblia yi dhana wukhongeli wa makuhu ku i “Bhabhilona wa Hombe”. (Mtuletelo 17:5) Ngu ku txani? Msana ka ndhambi ya masiku a Nowa, tigondo ta tingi ta makuhu ta wukhongeli ti khatile ka didhoropa da Bhabhilona. Tigondo toneto ti hangalakile ni mafu otshe. Ngu txikombiso vathu va Bhabhilona va ti khozela mitxawa ya sizimu siraru. Ni nyamsi, wukhongeli wo tala wu gondisa ti to Txizimu txa ditshuri i sizimu siraru ka wukhalo wa wumwewo, kambe Bhiblia yi ti veka ha kubasani ti to txona i Txizimu tximwetxo txa ditshuri, i ku Jehovha, ni ti to Jesu i Mwanana wa txona. (Johane 17:3) Vathu vo zumba Bhabhilona va ti kholwa kambe ti to mbimo yi mmidi wa m’thu wu fako, ku ni txi txi salako txi hanya ka wukhalo wumwane ni ku txonetxo txi nga hya mndiloni. Eto ya so va makuhu.—Wona Titxhamuselo to gwitisa 14, 17, ni 18.

¹⁸ Txizimu txi wombile ti to wutomi wa m’thu wu fana ni mwando. (Mtuletelo 18:8) Ina wa ti pfisisa ti to ngu ku txani kusiya wukhongeli wa makuhu i di ta txikuluveta? Jehovha a lava ti to u maha toneto u si se swelwa ngu ditambu.—Mtuletelo 18:4.

19. Mbimo yi u lavako kuthumela Jehovha, ene a na kuñola ngu nzila yihi?

¹⁹ Ngako u txi lava kuleka wukhongeli wa makuhu se u  thumela Jehovha, vamwane va vangana vako mwendo va mwayani kwako ku tilava kha va na ku txi tsakela txisungo txako se va nga ku wusela txivhunyi. Kambe Jehovha kha na mbi kuleka. U na va txiro txa mwaya wa ha mafuni kotshe awu wu randanako ngu ditshuri, futshi u na va ni themba yo hanya kala kupinduka ka mafu a maphya a Txizimu. (Marku 10:28-30) Ti nga maha vamwane vamwayani kwako ava va ku kanetako ngu ko na ha ko thumela Jehovha ditshiku dimwane va nga tsakela kugonda Bhiblia.

20. Ngu ku txani ti di ni lisima kukhozela Txizimu ngu nzila ya yinene?

²⁰ I singa kale, Txizimu txi na gumisa wubihi wotshe se Mfumo wa txona wu fuma ha mafuni kotshe. (2 Pedro 3:9, 13) Ayiya i na va i di mbimo yo tsakisa! Eho ku na va ni nzila yimweyo basi yo khozela Txizimu. Vathu va na khozela Txizimu nga ti Jehovha a ti lavisako tona. Se nda lisima ti to awe u maha txo kari konkuwa se u khozela Txizimu ngu nzila ya yinene.