1. Ni oha ori kubasa kutugambira oburyo burungi bw’okuramya Ruhanga?

AMADINI mingi nigagamba ku nigegesa amazima ga Ruhanga. Konka eco tikiri kubasika, ahabw’okuba nigegesa ebintu bitari kushushana ahari Ruhanga n’oburyo bw’okumuramya butari bumwe. Mbwenu shi tukamanya tuta oburyo burungi bw’okuramya Ruhanga? Yehova ni we wenka ori kutugambira oburyo burungi bw’okumuramyamu.

2. Ni bata oku ori kubasa kumanya oburyo burungi bw’okuramya Ruhanga?

² Yehova akatuha Bibuli kugira ngu twege oburyo burungi bw’okumuramya. Obwe rero, yega Bibuli, kandi Yehova nayija kukukwasa kushoborocerwa ebiri omuri Bibuli n’okubita omu nkora aha kuba nakufaho munonga.—Isaaya 48:17.

3. Ni enki eki Ruhanga ari kwenda ngu tukore?

³ Abantu bamwe nibagamba ku Ruhanga ari kusima amadini gona, konka eco ti co eki Yesu yatwegesize. Akagira ngu: ‘Omuntu wena ori kungira ati: Mukama wange, ukama wange, ti we oritaha omu bukama bw’omu iguru, kureka ori kukora ebi Tata ow’omu iguru akunda.’ Obwe rero, tushemerire kwega ebi Ruhanga ari kwenda kandi tukabikora. Eki ti ec’okuzanisa aha kuba Yesu akageranisa abantu abatari korobera Ruhanga nk’enkozi z’ebibi kandi “abakora eby’obugomi.”—Matayo 7:21-23.

4. Ni enki eki Yesu yagambire aha kukora ebi Ruhanga ari kwenda?

⁴ Yesu akaturabura ngu ku turigezaho kukora ebi Ruhanga  ari kwenda turyabugana ebizibu. Akagira ngu: ‘Mutahire omu irembo erifunzire; aha kuba irembo eriri kutasya omu kucwecerera rigarami, n’omuhanda gwaryo guba muhango, kandi n’abagutoramu baba bingi; konka irembo eriri kutasya omu magara rifunzire, n’akahanda karyo kagumire, n’abakazora baba bace.’ (Matayo 7:13, 14) Akahanda akafunzire, ninga shi oburyo burungi bw’okuramya Ruhanga, nibutasya omu magara agatahwaho. Omuhanda muhango, ninga shi oburyo bubi bw’okuramya Ruhanga, nibutasya omu kucwecerera. Konka Yehova tari kwenda ngu hagire omuntu owafa. Akaha buri omwe omugisha g’okwega Bibuli, akamumanya ge.—2 Petero 3:9.

5. Ni bata oku ori kubasa kumanya abari kuramya Ruhanga omu buryo buhikire?

⁵ Yesu akagamba ku turi kubasa kumanya abari kuramya Ruhanga omu buryo buhikire. Kugira ngu tubamanye, tushemerire kushwijuma enyikiriza n’ebikorwa byabo. Yesu akagira ngu: ‘Muryabamanyira aha byana byabo.’ Akongeraho ngu: ‘Omuti gona omurungi gwana ebyana birungi.’ (Matayo 7:16, 17) Eco tikiri kumanyisa ku abantu abari kuramya Ruhanga bahikirire. Konka abahereza ba Ruhanga burijo nibagezaho kukora ebirungi. Hati twaza kureba ebiri kutukwasa kumanya abari kuramya Ruhanga omu buryo buhikire.

6, 7. Ahabw’enki enyegesa zitu zishemerire kuba ziri kuruga omuri Bibuli? Ni enki eki turi kwegera ahari Yesu?

⁶ Enyegesa zitu zishemerire kuba ziri kuruga omuri Bibuli. Bibuli negira ngu: ‘Ebyahandikirwe byona, ebihandikisibwe [omwika] gwa Ruhanga, byine omugasho g’okwegesa omuntu, n’okumuhana, n’okumuhabura, n’okumutendeka omu by’okuhikirira, ngu omuntu wa Ruhanga abone kuba ohikire buzima, oyine byona ebishemerire  omurimo gona omurungi.’ (2 Timoseo 3:16, 17) Entumwa Paulo akahandikira Abakristo ngu: ‘Ku mwahurire ekigambo c’engiri ya Ruhanga eki twabagambire, mwacakira; kandi timwacakira nk’ekigambo c’abantu, kureka nk’ekigambo ca Ruhanga.’ (1 Abatesalonika 2:13) Okuramya okw’amazima nikuruga omu Kigambo ca Ruhanga, Bibuli. Tikushemerire kuruga omu bitekateko by’abantu, emigenzo ninga shi ekindi kintu cona ekitari Bibuli.

⁷ Ebintu byona ebi Yesu yabire nayegesa bikaba nibiruga omuri Bibuli. (Shoma omuri Yohaana 17:17.) Akaba nakunda kugarukamu Ebyahandikirwe. (Matayo 4:4, 7, 10) Abahereza ba Ruhanga nibatoreza Yesu kandi ebi bari kwegesa byona nibiruga omuri Bibuli.

8. Ni enki eki Yesu yatwegesize aha bikwatirine n’okuramya Yehova?

⁸ Tushemerire kuramya Yehova wenka. Zaaburi ya 83:18 negira ngu: ‘Ni iwe wenka, ori kwetwa Yehova, okira bona, kandi otegeka ensi yona.’ Yesu akaba ari kwenda ngu abantu bamanye owu Yehova ari we mazima, kandi akabegesa izina rya Ruhanga. (Shoma omuri Yohaana 17:6.) Yesu akagira ngu: ‘Oramye Mukama Ruhanga wawe, obe ni we wahereza wenka.’ (Matayo 4:10) Ni ahabw’eco, itwe abahereza ba Ruhanga, nitutoreza ecokureberaho ca Yesu. Nituramya Yehova wenka, tukoresa izina ryeye, kandi twegesa abandi izina rya Ruhanga n’ebi arije kutukorera.

9, 10. Ni bata oku turi kwereka abandi rukundo?

⁹ Tushemerire kukunda abandi twihire aha mutima. Yesu akegesa abegi beye kukundana. (Shoma omuri Yohaana 13:35.) Ahu twakuba turi hona, yaba twine emicwe etari kushushana, yaba turi abagiga ninga aboro, rukundo eyi twine eshemerire kutubuganisiza hamwe nka benetata na banyanyazi. (Abakolosia 3:14) Obwe rero, tituri kuza omu ntaro ngu twite abantu. Bibuli negira ngu: ‘Eki ni co kimanyisa abana ba Ruhanga n’abana ba Sitaane: Wena  otakora eby’okuhikirira ti wa Ruhanga, n’obu yakuba otakunda mwene ishe.’ Kandi negaruka egira ngu: ‘Tukundane tureke kuba nka Kaini owabire ari ow’omubi, akita omurumuna.’—1 Yohaana 3:10-12; 4:20, 21.

¹⁰ Nitukoresa obwire bwitu, amani gitu, obutungi bwitu kugira ngu tuyambane kandi tugaruranemu amani. (Abaheburaayo 10:24, 25) ‘Nitukorera ge abantu bona.’—Abagalatia 6:10.

11. Ahabw’enki turi kwikiriza ku Yesu ari we muhanda oguri kuza ahari Yehova?

¹¹ Tushemerire korobera Yesu aha kuba ni we muhanda oguri kuza ahari Ruhanga. Bibuli negira ngu: ‘Kandi tihariho ondijo owu twakuboneramu okujunwa, aha kuba tihariho rindi izina aha nsi y’iguru eryahirwe abantu, erishemerire kutujuna.’ (Ebyakozirwe 4:12) Omu Kicweka ca 5 c’eki kitabo, tukega ku Yehova yatumire Yesu akahayo amagara geye ngu afire abantu abari kumworobera. (Matayo 20:28) Yehova akatorana Yesu ngu abe Omugabe w’ensi yona. Ni yo nshonga Bibuli eri kutugambira ku tushemerire korobera Yesu kugira ngu twije kubaho ebiro byona.—Shoma omuri Yohaana 3:36.

12. Ahabw’enki tutari kwejwanga omu by’obutegeki?

¹² Titushemerire kwejwanga omu by’obutegeki. Yesu akaba atari kwejwanga omu by’obutegeki. Obu yabire ari kucwerwa orubanja, akagambira Pilaato, omutegeki w’Abarooma, ngu: ‘Obugabe bwange ti obw’ensi egi.’ (Shoma omuri Yohaana 18:36.) N’itwe nitwenda ngu Obukama bwa Ruhanga bube ni bwo bwatutegeka; ni ahabw’eco, ahu twakuba turi hona, tituri kwejwanga omu by’obutegeki bw’ensi. Konka, Bibuli neturagira korobera ‘abakama abari kutegeka,’ ni okumanyisa za gavumenti. (Abarooma 13:1) Nitworobera ebiragiro eby’ihanga eri tutwiremu. Konka, ebiragiro by’abategeki byaba bitari kubuganisa na  Bibuli, nitutoreza entumwa, ezagizire ngu: ‘Tushemerire korobera Ruhanga okukira abantu.’—Ebyakozirwe 5:29; Mako 12:17.

13. Ni enki eki turi kuburira aha bikwatirine n’Obukama bwa Ruhanga?

¹³ Nitwesiga ku Obukama bwa Ruhanga ari bwo bwonka oburije kumaraho ebizibu omu nsi. Yesu akagamba ku ‘engiri y’Obukama’ yabire erije kuburirwa omu nsi yona. (Shoma omuri Matayo 24:14.) Tihariho obutegeki bw’abantu oburi kubasa kukora nk’ebi Obukama bwa Ruhanga burije kutukorera. (Zaaburi 146:3) Yesu akatwegesa kushaba ngu: ‘Obukama bwawe bwije; ebi okunda bikorwe omu nsi nk’oku bikorwa omu iguru.’ (Matayo 6:10) Bibuli netugambira ku Obukama bwa Ruhanga burije kucwecereza obutegeki bwona bw’abantu, “kandi bwo buryagumaho.”—Danieli 2:44.

14. Ni baha abari kuramya Ruhanga omu buryo buhikire?

¹⁴ Obu wamara kwega ezi nyegesa, yebuze ngu: ‘Ni baha abari kukoresa Bibuli omu kwegesa kwabo? Ni baha abari kugambira abantu izina rya Ruhanga? Ni baha abari kwerekana rukundo kandi bari kwikiriza ku Yehova yatumire Yesu ngu atucungure? Ni baha abatari kwejwanga omu by’obutegeki bw’ensi? Ni baha abari kuburira ku Obukama bwa Ruhanga ari bwo burije kutwihiraho okubonabona?’ Ni Abahamya ba Yehova bonka.—Isaaya 43:10-12.

15. Ni enki eki tushemerire kukora ngu Ruhanga ayikirize okuramya kwitu?

¹⁵ Okwikiriza kusha ngu Ruhanga ariho tikiri kumara. Nangwa na ba dayimoni nibikiriza ku Ruhanga ariho, konka tibari kumworobera. (Yakobo 2:19) Twaba turi kwenda ngu Yehova ayikirize okuramya kwitu, titushemerire kwikiriza ku ariho kusha, ahobwe tushemerire kukora ebi ari kwenda.

16. Ahabw’enki tushemerire kwetantara edini y’ekishuba?

 ¹⁶ Kugira ngu Ruhanga ayikirize okuramya kwitu, tushemerire kwetantarira kimwe okuramya kw’ebishuba. Omuhanuzi Isaaya akahandika ngu: ‘Muruge ahagati yarwo, mweyeze.’ (Isaaya 52:11; 2 Abakorinso 6:17) Eyo ni yo nshonga tushemerire kweyihaho ekintu cona ekine akakwate n’edini y’ekishuba.

17, 18. “Babulooni Orurembo Orukuru” ni enki, kandi ahabw’enki kiri ec’obwenge okururugamu juba?

¹⁷ Edini y’ekishuba ni enki? Ni edini yona erikwegesa abantu okuramya Ruhanga omu buryo obutari kubuganisa na Bibuli. Bibuli neyeta edini y’ekishuba “Babulooni Orurembo Orukuru.” (Okushuuruurwa 17:5) Ahabw’enki? Bwanyima y’omwegemure g’omu bwire bwa Noa, enyegesa nyingi z’ebishuba zikatandikira omu tawuni ya Babulooni. Ezo nyegesa z’ebishuba zikajanjara omu nsi yona. Ecokureberaho: Abantu ababire bari kutura omuri Babulooni bakaba nibaramya ba ruhanga bashatu bakwatine. Omuri obu bwire nabwo, amadini mingi nigegesa ku Ruhanga ari Obushatu, konka Bibuli neyegesa ku hariho Ruhanga omwe ow’amazima, ari we Yehova, kandi ku Yesu ari Omwana weye. (Yohaana 17:3) Abantu ababire batwire omuri Babulooni bakaba nibikiriza ngu omuntu ku ari kufa hine ekintu ekiri kumurugamu kiguma kihurire kandi ngu nikiza kubonabonera omu muriro g’omu kuzimu. Konka eco ni ekishuba.—Reba Enyongezo ya 14, 17, n’eya 18.

¹⁸ Ruhanga akaba yagambire ku arije kucwecereza amadini gona ag’ebishuba. (Okushuuruurwa 18:8) Mbwenu shi hati washoborocerwa enshonga oshemerire kuruga omu dini y’ekishuba juba juba? Yehova Ruhanga nayenda ngu okikore obwire butakahwireyo.—Okushuuruurwa 18:4.

19. Ni bata oku Yehova arije kukufaho, washaramu kumuhereza?

 ¹⁹ Washaramu kuruga omu dini y’ekishuba okahereza Yehova, bamwe omuri banywani bawe n’abanyabuzare nibabasa kwebuza eki wakora kandi nibabasa n’okukubonabonesa. Konka Yehova tarikureka. Noyija kuba omu ka y’abantu bingi bari omu nsi yona kandi bari kukundana, kandi noyija kugira amasiko g’okubaho ebiro byona omu nsi ensya. (Mako 10:28-30) Nangwa na banywani bawe n’abanyabuzare abari kukwanga ahabw’okuba wabire omuhereza wa Yehova, bwanyima na bo nibabasa kwija kwega Bibuli.

20. Ahabw’enki oshemerire kuramya Ruhanga omu buryo buhikire?

²⁰ Juba aha Ruhanga nayija kwihaho obubi, kandi Obukama bweye nibwija kutegeka ensi yona. (2 Petero 3:9, 13) Obwo buryaba buri obwire burungi munonga! Abantu bona baryaba bari kuramya Yehova nk’oku ari kwenda. Obwe rero, oshemerire kugira eki wakora kugira ngu oramye Ruhanga omu buryo buhikire.