1. Ala b’a fɛ an k’ale bato cogo min na, jɔn lo ka ɲi k’o fɔ an ye?

DIINAN caaman b’a fɔ ko olu be tiɲɛn kalan kɛ Ala koo la. Nka o tɛ tiɲɛn ye sabu Ala ye mɔgɔ min ye ani an ka ɲi k’a bato cogo min na, diinanw ka kalan tɛ kelen ye o koo la hali dɔɔni. Ala b’a fɛ an k’ale bato cogo min na, an be se k’o lɔn cogo di? Jehova Ala kelenpe lo be se k’o fɔ an ye.

2. Ala b’a fɛ an k’ale bato cogo min na, i be se k’o lɔn cogo di?

² Jehova ye Bibulu di an ma walisa an k’a lɔn ale b’a fɛ an k’a bato cogo min na. O kama, i ka Bibulu kalan. N’i y’o kɛ, Jehova bena i dɛmɛ k’a ka kalanw lɔn sabu a b’a janto i la kosɔbɛ.—Ezayi 48:17.

3. Ala b’a fɛ an ka mun lo kɛ?

³ Dɔw b’a fɔ ko diinanw bɛɛ ka di Ala ye. Nka, Yezu m’o lo fɔ an ye. A y’a fɔ ko: “Mɔgɔ minw be ne wele ko ‘Matigi, Matigi,’ olu bɛɛ tena don sankolo masaya la, fɔɔ ne Faa min be sankolo la, ale sagokɛlaw.” O kama, an ka ɲi k’a ɲini ka Ala sago lɔn ani k’o kɛ. O koo kɔrɔtanin lo kosɔbɛ sabu minw tɛ Ala sago kɛ, Yezu y’u suma ni “kojugukɛlaw” ye.—Matiyo 7:21-23.

4. Yezu ye mun lo fɔ Ala sago kɛli koo la?

⁴ Yezu y’an lasɔmi ko n’an b’a fɛ ka Ala sago kɛ, an bena gwɛlɛyaw sɔrɔ. A y’a fɔ ko: “Aw ka sirafitini ta. Siraba kɔni taama ka di, nga a be taga ni mɔgɔ ye halakiyɔrɔ la. Mɔgɔ caaman do b’o le ta. Aw ka  sirafitini ta ka taga don ni dafitini ye, a taama kɔni ka gwɛlɛ, a taabagaw man ca, nga a be taga ni mɔgɔ ye hɛrɛ [o kɔrɔ, ɲɛnamaya] yɔrɔ la.” (Matiyo 7:13, 14). Sirafitinin, o kɔrɔ, Ala batocogo min ka ɲi, o be taga ni mɔgɔ ye ɲɛnamaya banbali yɔrɔ la. Siraba, o kɔrɔ, Ala batocogo min man ɲi, o be taga ni mɔgɔ ye halaki yɔrɔ la. Nka, Jehova t’a fɛ mɔgɔ si ka halaki. A be sababu di bɛɛ ma u k’ale lɔn.—2 Piyɛri 3:9.

5. I be se ka tiɲɛn diinan faranfasi k’a lɔn cogo di?

⁵ Yezu ko an be se ka tiɲɛn diinan faranfasi k’a lɔn a ka mɔgɔw ka lannakow n’u ka kɛwalew lo fɛ. A ko: “Jiri ɲuman bɛ den ɲumanw kɛ.” (Matiyo 7:16, 17, ABM). O kɔrɔ tɛ ko minw be Ala bato, olu ye mɔgɔ dafaninw ye. Nka, Ala sagokɛlaw b’u jija tuma bɛɛ ka koo ɲuman kɛ. Minw be Ala bato cogo ɲuman na, mun lo bena an dɛmɛ k’olu faranfasi k’u lɔn? An k’o lajɛ sisan.

6, 7. Mun na tiɲɛn diinan ka kalanw basiginin be Bibulu lo kan? An be kalan juman sɔrɔ Yezu fɛ?

⁶ U ka batoli kɛcogo ka ɲi ka basigi Bibulu lo kan. Bibulu b’a fɔ ko: “Ala ka kuma bɛɛ sɛbɛnna Ala yɛrɛ ka sebagaya barika la. Nafaba b’o la ka mɔgɔw kalan n’a ye, ani ka galon ban, ani ka mɔgɔw bila siraɲuman kan, k’u tilen, waasa Ala ka baarakɛla ka kɛ mɔgɔdafanin ye ka se ka koɲuman sifa bɛɛ kɛ.” (2 Timote 3:16, 17). Ciden Pol ye sɛbɛ ci kerecɛnw ma ko: “O kama, an be barika la Ala ye tuma bɛɛ, bari, an ye Ala ka kuma min fɔ aw ye, aw m’o minɛ i n’a fɔ mɔgɔ dalakuma, nga i ko Ala ka kuma yɛrɛ yɛrɛ.” (1 Tesalonikaw 2:13). Tiɲɛn diinan ka  kalanw basiginin be Ala ka Kuma lo kan, o min ye Bibulu ye. A basiginin tɛ adamadenw ka miiriyaw, landaw wala fɛɛn wɛrɛ kan.

⁷ Yezu tun b’a ka kalanw bɛɛ basigi Ala ka Kuma kan (Zan 17:17 kalan). A tun ka teli ka Ala ka Kuma yɔrɔ dɔw fɔ (Matiyo 4:4, 7, 10). Ala sagokɛla sɔbɛw be Yezu ladegi. U b’u ka kalanw bɛɛ basigi Bibulu lo kan.

8. Yezu ye mun lo fɔ an ye Jehova batoli koo la?

⁸ U ka kan ka Jehova kelenpe lo bato. A fɔra Zaburuw kɔnɔ ko: “Walisa u k’a dɔn ko e min tɔgɔ ko Jehova, ko e kelenpe ye Kɔrɔtalen Ba ye dugukolo bɛɛ kun na.” (Zaburuw 83:19; Bible senuma, 1961). Yezu tun b’a fɛ mɔgɔw ka tiɲɛn Ala lɔn ka ɲɛ. A fana ye Ala tɔgɔ yira mɔgɔw la (Zan 17:6 kalan, ABM). Yezu y’a fɔ ko: “E ka Matigi i ka Ala bato ka baara kɛ ale kelenpe ye.” (Matiyo 4:10). O kama , an minw ye Ala sagokɛlaw ye, an be Yezu ladegi. An be Jehova kelenpe lo bato. An b’a tɔgɔ weele ani an be mɔgɔw kalan Ala tɔgɔ n’a sagonata koo la.

9, 10. An b’a yira cogo di ko an be ɲɔgɔn kanu?

⁹ U ka kan ka mɔgɔw kanu sɔbɛ la. Yezu y’a fɔ a ka kalandenw ye ko u ka ɲɔgɔn kanu (Zan 13:35 kalan). An be bɔ jamana min na, an siya ye min ye, an ye nafolotigi wala fantan ye wo, o tɛ jati. Kanuya min be an ni ɲɔgɔn cɛ, o b’a to an ye balimaw ye ani an kanbɛnnin lo (Kɔlɔsikaw 3:14). O kama, an t’an seen don marifakɛlɛw la ka mɔgɔw faga. Bibulu b’a fɔ ko: “Ala deenw ni Sutana ka mɔgɔw be lɔn ka bɔ ɲɔgɔn na kɛwali nunu le fɛ. Mɔgɔ o mɔgɔ te tilenninya sira taama, ani n’a t’a mɔgɔɲɔgɔn kanu, o tigi te Ala ta ye. An ka kan ka ɲɔgɔn kanu.” A fɔra  fana ko: “An ka kan ka ɲɔgɔn kanu.  . . . An man kan ka Kayɛn ladege, min kɛra Sutana ka mɔgɔ ye k’a dɔgɔnin faga.”—1 Zan 3:10-12; 4:20, 21.

¹⁰ An b’an ka wagati n’an fanga, n’an bololafɛnw kɛ ka ɲɔgɔn dɛmɛ ani ka ɲɔgɔn jija (Eburuw 10:24, 25). ‘An be koo ɲuman kɛ mɔgɔ bɛɛ ye.’—Galatians 6:10.

11. Mun na an lanin b’a la ko kisili tɛ sɔrɔ Yezu kɔ?

¹¹ U ka kan ka kolo Yezu ye sabu kisili sababu be bɔ ale kelen lo fɛ. Bibulu b’a fɔ ko: “Kisili te se ka sɔrɔ yɔrɔ si n’ale fɛ tɛ. Bari Ala ma mɔgɔ wɛrɛ ci diɲɛ na, adamaden be se ka kisi min tɔgɔ barika la.” (Kɛwaliw 4:12). Kalansen 5nan na, an y’a ye ko Jehova ye Yezu ci ka na a niin di k’o kɛ kunmabɔsara ye. Minw be mɛnni kɛ Ala fɛ, olu be se k’o nafa sɔrɔ (Matiyo 20:28). Jehova ye Yezu sugandi k’a kɛ Masacɛ ye dugukolo kun na. O kama, Bibulu b’a fɔ ko n’an b’a fɛ ka ɲɛnamaya kɛ fɔɔ abada, an ka ɲi ka kolo Yezu ye.—Zan 3:36 kalan ABM.

12. Mun na an t’an seen don politikikow la?

¹² U man kan k’u seen don politikikow la. Yezu m’a seen don politikikow la. Tuma min na Ɔrɔmukaw ka kuntigi Pilati tun be kiti tigɛra a kan, a y’a fɔ ko: “Ne ka masaya te diɲɛ nin ta ye.” (Zan 18:36 kalan). An be Yezu ladegi ka kantigiya kɛ Ala ka Masaya ye o min be sankolo la. O kama, an ka jamana mana kɛ min o min ye, an t’an seen don politikikow la. Nka, Bibulu b’a fɔ an ye ko an ka kolo “faamaw” ye (Ɔrɔmukaw 13:1). An be jamana min na, an b’o jamana ka sariyaw labato. Nka n’o sariya dɔ be Ala ka sariya kɛlɛ, an be Yezu ka cidenw ladegi. Olu y’a  fɔ ko: “Anw te se ka ban Ala sago la ka adamadenw ta kɛ.”—Kɛwaliw 5:29; Mariki 12:17.

13. An be mun lo fɔ mɔgɔw ye Ala ka Masaya koo la?

¹³ Olu fɛ, Ala ka Masaya dɔrɔn lo be se ka duniɲa ka gwɛlɛyaw ɲɛnabɔ. Yezu y’a fɔ ko: “Kibaru Duman waajuli na kɛ diɲɛ yɔrɔw bɛɛ la sankolo masaya ko la.” (Matiyo 24:14 kalan, ABM). Ala ka Masaya bena min kɛ an ye, adamadenw ka gofɛrɛnɛman si tɛ se k’o kɛ (Zaburuw 146:3). Yezu y’an kalan ko an ka delili kɛ Ala ka Masaya koo la. A ko: “I ka masaya ka na. I sago ka kɛ dugukolo kan i ko a be kɛ sankolo la cogo min na.” (Matiyo 6:10). Bibulu ko Ala ka Masaya bena adamadenw ka gofɛrɛnɛmanw bɛɛ halaki ani ale dɔrɔn lo bena to “tuma bɛɛ.”—Daniyɛli 2:44.

14. E ka miiriya la, jɔn lo be Ala bato cogo ɲuman na?

¹⁴ Koo nunu lajɛnin kɔ, i yɛrɛ ɲininga ko: “Diinan juman lo ka kalan basiginin be Bibulu kan? Jɔn lo be mɔgɔw dɛmɛ ka Ala tɔgɔ lɔn? Mɔgɔ jumanw lo be ɲɔgɔn kanu sɔbɛ la ani u lanin b’a la ko Ala ye Yezu ci ka na an kisi? Jɔn lo t’a seen don politikikow la? Jɔn lo be waajuli kɛ ko Ala ka Masaya kelenpe lo be se k’an ka gwɛlɛyaw ɲɛnabɔ?” Jehova Seerew dɔrɔn lo b’o kɛ.—Ezayi 43:10-12.

15. N’an b’a fɛ Ala ka sɔn an ka batoli la, an ka kan ka mun lo kɛ?

¹⁵ Ka la a la ko Ala be yen, o dɔrɔn tɛ bɔri kɛ. Hali jinaw lanin b’o la, nka u t’a sago kɛ (Zaki 2:19). N’an b’a fɛ Ala ka sɔn an ka batoli la, a daan tɛ an ka la a la ko Ala be yen. Nka, an ka kan k’a sago kɛ fana.

16. Mun na an ka ɲi ka ban ngalon diinan ka koow la?

¹⁶ N’an b’a fɛ Ala ka sɔn an ka batoli la, an ka ɲi ka  ban ngalon diinan ka koow la. Kira Ezayi y’a sɛbɛ ko: “Aw ye bɔ a kɔnɔ, k’aw yɛrɛ saniya.” (Ezayi 52:11; 2 Korɛntikaw 6:17). O kama, an ka ɲi ka ban ngalon diinan ka koow bɛɛ la.

17, 18. “Babilonɛba” ye mun lo ye, ani mun na i ka ɲi ka bɔ a kɔnɔ joona joona?

¹⁷ Ngalon diinan ye mun lo ye? Diinan o diinan ka batoli basiginin tɛ Ala ka Kuma kan, o lo ye ngalon diinan ye. Bibulu be ngalon diinanw bɛɛ weele ko “Babilonɛba” (Yirali 17:5, ABM). Mun na do? U caaman ka kalanw daminɛna Babilonɛ dugu kɔnɔ Nuhun ka wagati la, sanjiba tɛmɛnin kɔ. O ngalon kalanw jɛnsɛnna dugukolo kuru bɛɛ kan. Ɲɛyirali fɛ, Babilonɛkaw tun be ala tigiya saba caaman bato. Bi fana, diinan caaman be ala tigiya saba kalan kɛ. Nka Bibulu b’a fɔ ka gwɛ ko tiɲɛn Ala kelenpe dɔrɔn lo be yen min ye Jehova ye. Ani, Yezu ye a Dencɛ ye (Zan 17:3). Babilonɛkaw tun lanin b’a la fana ko ni mɔgɔ sara, fɛɛn dɔ be bɔ a tigi la ka to niin na yɔrɔ wɛrɛ. Olu fɛ, o fɛɛn tɔgɔla be se ka tɔɔrɔ jahanama na. Nka, o tɛ tiɲɛn ye.—Kunnafoni wɛrɛw lajɛ, 14, 17 ani 18nan.

¹⁸ Ala kɔnna k’a fɔ ko yanni dɔɔni, ngalon diinanw bɛɛ bena halaki (Yirali 18:8). Yala i y’a faamu fɛɛn min kama kɔrɔtɔko lo ka bɔ ngalon diinan na joona joona wa? Jehova Ala b’a fɛ i k’o lo kɛ sanni wagati k’i dan.—Yirali 18:4.

19. N’i y’a latigɛ ka Jehova bato, a bena mun lo kɛ i ye?

¹⁹ N’i y’a latigɛ ka bɔ ngalon diinan na ani ka Jehova bato, n’a sɔrɔ i teriw n’i somɔgɔ dɔw tɛna i faamu. U yɛrɛ be se k’i tɔɔrɔ o kosɔn. Nka Jehova tɛna  i bila. Duniɲa kuru bɛɛ kɔnɔ, mɔgɔ miliyɔn caaman be yen minw be ɲɔgɔn kanu sɔbɛ la. U kɛra denbaya kelen ye. I bena kɛ olu dɔ ye ani i bena jigiya sɔrɔ ka ɲɛnamaya kɛ fɔɔ abada Ala ka duniɲa kura kɔnɔ (Mariki 10:28-30). I teriw n’i somɔgɔ minw tun t’a fɛ i ka Jehova bato, n’a sɔrɔ olu dɔw bena sɔn ka bibulukalan kɛ kɔfɛ.

20. Mun na a kɔrɔtanin lo an ka Ala bato cogo ɲuman na?

²⁰ Yanni dɔɔni, Ala bena juguya bɛɛ ban ani a ka Masaya bena dugukolo mara (2 Piyɛri 3:9, 13). O bena kɛ hɛɛrɛ ni hɛɛrɛmugu ye dɛ! Bɛɛ bena Jehova bato i ko a b’a fɛ cogo min na. O la do, a kɔrɔtanin lo i ka dɔ kɛ dɔ ye kabini sisan walisa ka Jehova bato cogo ɲuman na.