1. Ko ai e mafai ke fakasāʼia mai le tausi leia e mālie?

KO ʼIKI a lotu, e lotou pati e māʼoki alātou akonaki o uiga mo le Atua. Kae leʼese mafai talie e lotou akonaki a anoʼaga kesekese o uiga mo le Atua ti mo le tausi leia kiate ia. E tou iloa fefeʼaki pe ko le tausi fea leia e mālie ki le Atua? Ko Seova faʼi leia e mafai ke fakasāʼia mai.

2. E tou iloa fefeʼaki le tausi leia e mālie ki le Atua?

² Na soli mai e Seova le Tosi-Tapu. Ti e tou maʼua mei ai le faigamālie ke tou ʼaga o akoʼi le tausi leia e mālie ki le Atua. Ko ia kotou akoʼi le Tosi-Tapu ti e tokoi atu loa a Seova ke kotou maʼua ni fua mālilie mei ako anā talie e alofa a ia kia koutou.—Esaia 48:17.

3. Koleā e loto le Atua ke tou ʼaga o fai?

³ Ko ʼiki fenua e lotou pati e tali e le Atua a lotu fuli. Kae leʼaise ko lona akoʼi mai a ia e Sesu. Na pati a ia: “Ko latou ala e pati mai kiate au Aliki, Aliki, e leaise lotou ulu fuli loa ki le Puleaga o Selo, kae e gato fai ki leia e fai ia le finegalo o loku Tamana leia e nofo i le lagi.” Ko ia e tonu ai ke tou iloa pe koleā le finegalo o le Atua ti mo fai a ia. Ti e maʼuiga talie na fakatatau e Sesu lātou alā e leʼese fakalogo ki le Atua ki ni kau tukipō, ko ni fenua e “fai ia le agaveli.”—Mateo 7:21-23.

4. Koleā le pati a Sesu ki le tausi ki le Atua?

⁴ Na fakasā e Sesu ki ana tisipulo, ko le fai o le finegalo o le Atua e leʼese faigaofie tuʼumaʼu loa. Na pati a ia: “Kotou ulu i le matapa lau ikiiki. Talie e lau lasi le matapa, ti  e lau lasi mo le ala leia e ano ki le maumau, ti e toka api latou ala e ulu i ai. Kae e lau ikiiki le matapa, ti e lau ikiiki mo le ala leia e ano ki le mauli, ti e toka teiki fua latou ala e maua ia a ia.” (Mateo 7:13, 14) Ko le matapā lau ʼikiʼiki leia ko le fai o tonu mālilie ke tausi ai ki le Atua, e taki a ia ki le maʼuli leʼegato. Kae ki le matapā laulasi leia ko le fai o tonu e veveli, e taki a ia ki le mate. Kae, leʼaise loto a Seova ke mate a se tasi. Ko ia leia e ʼaga a ia o soli ki tagata fuli le faigamālie ke lotou ʼaga o iloʼia a ia.—2 Petelo 3:9.

5. E mafai ke kotou iloa fefeʼaki lātou alā e tausi mālie kia Seova?

⁵ Na fakasā e Sesu e mafai ke tou iloa lātou alā e tausi mālie ki le Atua, i neʼa alā e lotou tui ki ai mo neʼa alā e lotou ʼaga o fai. Na pati a ia: “E kotou iloa loa latou i olatou fua.” Ti na toe pati a ia: “Ko laakau malilie fuli e fua malilie.” (Mateo 7:16, 17) E se fakaʼuiga loa, ko lātou alā e tausi ki le Atua e lotou māʼokiʼoki. Kae e lotou faiga tuʼumaʼu ke lotou ʼaga o fai le neʼa leia e mālie. Tou tioʼi muʼa pe fefeʼaki latātou iloʼia lātou.

6, 7. (1) Koleā e fakatafito ai le tausi māʼoki ki le Tosi-Tapu? (2) Koleā e tou ako mei le faifaitaki a Sesu?

⁶ E tonu ke fakatafito latātou tausi ki le Tosi-Tapu. E pati i le Tosi-Tapu: “E au le Tosi tapu katoa mei le tukumanava a le Atua, ti e aoga a ia ki le akonaki, mo le valoki, mo le fakatonutonu, mo le fakapotoi ki le maokioki, o tupu ke katoa le tagata a le Atua, ti ke katoa lona teuteui ki gaoi malilie fuli.” (2 Timoteo 3:16, 17) Na tosi e le apositolo ko Paulo ki le kau Kilisiteano: “I lakotou tali le folafola a le Atua leia na motou fakasa atu kia koutou, na kotou tali a ia, o leaise faipe le folafola a ni tagata, kae ofaipe le folafola totonu a le Atua, leia e gaoi ia koutou  ala e tui.” (1 Tesalonika 2:13) E tonu ki le tausi māʼoki ke fakatafito ki le Folafola a le Atua, leia ko le Tosi-Tapu. Talie e leʼese fakatafito a ia ki ni manatu fakatagata, pe ko ni talatisio pe ko ʼiki atu a faʼasiga tausi.

⁷ Ko neʼa fuli na akoi e Sesu, na fakatafito tuʼumaʼu ki le Folafola a le Atua. (Lau Soane 17:17.) Na fakaʼaogaʼi tuʼumaʼu e ia a neʼa fuli na tosi i ai. (Mateo 4:4, 7, 10) Ko lātou alā na tausi agatonu ki le Atua na lotou mulimuli ki le faifaitaki lenā. Ko neʼa fuli e lotou ʼaga o akoʼi e fakatafito ki le Tosi-Tapu.

8. O mulimuli kia Sesu, ko ai leia e tonu ke tou tausi ki ai?

⁸ E tonu ke tou tausi kia Seova. E fakasā i Pesalemo 83:19: “Ke lotou iloa ko koe toka tasi leia e igoa ko [“Seova,” MN], ko koe ko le Taualuga i le malama nei katoa !” Na loto Sesu ke iloa e le kakai pe ko ai le Atua māʼoki, ti na fakasā e ia kia lātou lona suafa. (Lau Soane 17:6.) Na pati a ia: “E ke atolasio loa [“kia Seova,” MN], lou Atua, ti e ke tausi loa kiate ia toka tasi.” (Mateo 4:10) Ko kakai māʼoki a le Atua, e lotou mulimuli ki le faifaitaki a Sesu. E lotou tausi kia Seova tokatasi mo fakasā lona suafa. Ti e lotou akonaki pe koleā ka fai loa e le Atua ma le mālamanei.

9, 10. E tou fakasā fefeʼaki ki fenua fuli e tou alofa māʼoki kia lātou?

⁹ E tonu ke tou alofa māʼoki ki fenua fuli. Na akoʼi e Sesu ki ana tisipulo ke lotou feʼalofani ia lātou. (Lau Soane 13:35.) Logo ai pe tou mou paʼaga pe tou mativa pe tou ʼau mei fenua mo agaifenua kesekese mo ʼiki atu anoʼaga, kae e tonu ke tou feʼalofaʼaki. E tonu ke fakatasiʼi tātou e lotātou alofa ti ke tou liliu ko ni fale tautaina mo fale tautuagaʼane. (Kolose 3:14) Ko ia leia e leʼese tou kau ai ki tau ti mo le mateʼi o ni ʼiki. E pati i le Tosi-Tapu: “E mailoga kesekese ai fanau a le Atua mo fanau a le Tiapolo”  talie, “ko leia e leaise mauli i le maokioki e leaise au a ia mei le Atua, tatau mo leia e leaise alofa ki lona taina.” E toe pati feneʼeki a ia: “E tonu ke tou fealofani ia tatou ; kae aua na tou faipe Kaino, leia na au mei leia e kaka, ti na tukipooi ia lona taina.”—1 Soane 3:10-12; 4:20, 21.

¹⁰ E tou fakaʼaogaʼi otātou faigamālie fuli ke tou fefakalotomakekeʼaki ti mo fetokoiʼaki. (Epeleo 10:24, 25) E tou “fai le nea leia e malie ki tagata fuli.”—Kalate 6:10.

11. Koleā e tonu ai ke tou tali, ko le faigamālie faʼi meia Sesu e mafai ai ke tou maʼua le saofaki?

¹¹ E tonu ke tou fakalogo kia Sesu talie ko ia tokatasi e mafai ke saofakiʼia tātou. E pati i le Tosi-Tapu: “E leaise fakamauli i se tasi kese, talie e leaise se tasi ake igoa i le lalo lagi nei kua soli ki le tagata, leia e tonu ke tou mauli ai.” (Tosi Gaoi 4:12) Na tou ako i le Kapite 5, na kakau mai e Seova a Sesu ki le kele ke soli lona maʼuli ke totogi ai a ʼagasala o tagata fuli. (Mateo 20:28) Na filifili e Seova a Sesu ke Sau i le kele. Ko ia e pati ai i le Tosi-Tapu: Kāpau e tou fia maʼuli o talu ai ti e tonu ke tou fakalogo kia Sesu.—Lau Soane 3:36.

12. Koleā e leʼese tou kau ai ki neʼa fakapolitike?

¹² E leʼese tonu ke tou kau ki neʼa fakapolitike. Na se kau a Sesu ki neʼa fakapolitike. I lona fakamaauʼi e le takitaki Loma ko Pilato, na pati a ia: “E leaise kau loku puleaga i le malama nei.” (Lau Soane 18:36.) O fai pe Sesu, e tou agatonu ki le Puleʼaga o le Atua leia i selo. Logo ai se gāneʼa e tou nonofo ai, e se tonu ke tou kau ki neʼa fakapolitike. Kae, e fakatotonu mai e le Tosi-Tapu ke tou fakalogo “ki pule taualuga,” ko lona fakaʼuiga, ke tou fakalogo ki puleʼaga. (Loma 13:1) E tou fakalogo ki lao o le fenua leia e tou maʼuli ai. Kae kāpau e fakafesagai se lao i  lao anā ki lao a le Atua, ti e tou faifaitakiʼi le kau apositolo i lalātou pati: “E tonu ke fakalogo ake ki le Atua i le tagata.”—Tosi Gaoi 5:29; Maleko 12:17.

13. Koleā e tou ʼaga o fakamafola o uiga mo le Puleʼaga o le Atua?

¹³ E tonu ke tou tui ko le Puleʼaga faʼi o le Atua ka fakatokatokaʼia loa a faigataʼaʼia alā e tau mo le mālamanei. Na pati a Sesu: “E fakamafola loa le logo malie leinei o le puleaga i le malama nei katoa.” (Lau Mateo 24:14.) E se mafai ke fai e se puleʼaga a neʼa fuli alā ka fai loa e le Puleʼaga o le Atua ma le mālamanei. (Pesalemo 146:3) Na akoʼi mai e Sesu ke tou faikole feneʼeki o uiga mo le Puleʼaga o le Atua: “Ke aumai lou pule, ke fai lou finegalo i le kele ofaipe i Selo.” (Mateo 6:10) E fakasā i le Tosi-Tapu e maumauʼi loa e le Puleʼaga o le Atua a puleʼaga fakatagata fuli ti e “tuu loa a ia totonu, o lee gato.”—Taniela 2:44.

14. Kia koutou, ko ai lātou alā e tausi agatonu ki le Atua?

¹⁴ I le temi nei, kotou fai a vesili anei: ‘Ko ai e fakatafitoʼia alātou akonaki ki le Tosi-Tapu? Ko ai e fakasāʼia le suafa o le Atua? Ko ai e tui na kakau mai e Seova a Sesu ki le kele ke saofaki ai a tagata fuli? Ko ai alā e leʼese kau ki neʼa fakapolitike? Ko kakai o le lotu fea alā e feʼalofani māʼoki ia lātou? Ko ai ma lātou e fakamafolaʼia, ko le Puleʼaga faʼi o le Atua e mafai ke fakatokatokaʼia a faigataʼaʼia alā e tau mo le mālamanei?’ Ko le Kau Fakamāʼoki faʼi a Seova.—Esaia 43:10-12.

15. Koleā e tonu ke tou fai ke tali ai e le Atua latātou tausi?

¹⁵ E leʼese gato fua ki le tui e maʼuli māʼoki le Atua. E toe felaʼaki foki mo le kau temonio, e lotou tui e maʼuli le Atua, kae leʼese lotou fakalogo kiate ia. (Sakopo 2:19) Ke  tali e le Atua latātou tausi, e tonu ke tou fai a neʼa alā e fakatotonu mai e ia ki ai.

16. Koleā e tonu ai ke tou mavae mei le lotu sala?

¹⁶ Ke tali e Seova latātou tausi, e tonu ke tou mavae mei le lotu sala. Na tosi feneʼeki e le polofeta ko Esaia: “Kotou mavae i loto malie o ona ! Kotou fakamea.” (Esaia 52:11; 2 Kolinito 6:17) Ko ia, e tonu ke tou ʼaga o tiʼaki a neʼa fuli alā e pipiki ki le tausi sala.

17, 18. (1) Ko ai a “Papilone lasi”? (2) Ti koleā leia e tonu ai ke tou mavae fakatavili mei le lotu sala?

¹⁷ Koleā le lotu sala? Ko kautasi alā e akonaki ki fenua ke lotou tausi ki le Atua i aga alā e se ano tasi mo le Folafola a le Atua. E fakaʼigoa i le Tosi-Tapu le lotu sala ko “Papilone lasi.” (Apokalipisi 17:5) Koleā lona tupuʼaga? Talie i le ʼoki o le Lōmaki, na kamata sā ai loa a akonaki sala i le kolo lenā o Papilone. Ti na mavetevete loa a akonaki anā i le mālamanei kātoa. Sakinake la pe kakai o Papilone, na lotou atolasio ki ni kutuga e atua tolu. I le temi nei, kua lasi a lotu kua lotou akonaki ko le Atua ko le Tasi-Tolu-Tapu. Kae e fakasā fakaʼagatonu mai i le Tosi-Tapu, ko le Atua māʼoki faʼi e tasi ko Seova ti ko Sesu ko lona Alo. (Soane 17:3) Na toe tui foki a le kakai o Papilone mokā mate a se tasi, e iai le koga iate ia e soko atu lona maʼuli pe ano a ia ki ifeli. Kae leʼaise māʼoki.—Lau le Nota Fakaʼoki 14, 17, ti mo le 18.

¹⁸ Na fakasā e le Atua kua vave faʼi le puliʼi o lotu sala. (Apokalipisi 18:8) E kotou matala ko ia pe koleā e tonu ai ke tou mavae fakatavili mei le lotu sala? E pati atu a Seova ke kotou mavae fakatavili mai mei i ai koi tautonu na tausala.—Apokalipisi 18:4.

19. Kāpau e kotou fakatotonu ke kotou tausi kia Seova, e fefeʼaki loa lana tokaga kia koutou?

¹⁹ Kāpau e kotou fakatotonu ke kotou mavae mei le  lotu sala o tausi kia Seova, lagi e leʼese matala loa okotou kauneʼa mo ʼiki i okotou fāmili ki le tonu lenā. E mafai ke lātou fakasoko ni anoʼaga ke faigataʼa ai lokotou maʼuli. Kae se ʼaga loa a Seova o tuku noaʼi koutou. E kotou kau loa ki se fāmili fakamālamanei, e ʼapi ti mo feʼalofani māʼoki. E kotou maʼua loa le amanaki ke kotou maʼuli o talu ai i le mālama foʼou. (Maleko 10:28-30) Ti lagi mafai loa ki se temi ki okoutou kausoa mo ʼiki o okoutou fāmili alā na fakafesagai ki le tonu na kotou toʼo, ke lotou ako loa mo lātou le Tosi-Tapu.

20. Koleā e maʼuiga ai ke tausi agatonu ki le Atua?

²⁰ Kua vave faʼi le ʼaga a le Atua o puliʼi a agaveveli fuli, ti e takitaki loa e lona Puleʼaga le kele. (2 Petelo 3:9, 13) Ko se anoʼaga e fakatupu fiafia loa! Ti e tausi fuli loa a fenua kia Seova o mulimuli ki neʼa alā e fakatotonu e ia ki ai. Ke kotou tausi agatonu ki le Atua, e tonu ke kotou ʼaga o fai ni fetogi ʼaoga.