1. Kimoun ki pé di-nou ka ki bon rèlijyon-la ?

ON MAJORITÉ a rèlijyon ka di kè yo ka anségné lavérité asi Bondyé. Men sa pa posib kè yotout ni rézon, pas yochak ka di dé biten diféran é yochak ka adoré Bondyé an jan a yo. Alò kijan nou pé rèkonnèt bon rèlijyon-la ? Sé Jéova tousèl ki pé di-nou sa.

2. Kijan nou pé sav ka ki bon rèlijyon-la ?

² Jéova ban-nou Bib-la. Grasa liv-lasa, nou pé rèkonnèt bon rèlijyon-la. Alò, étidyé Labib. Jéova ké édé-w konprann ansègnman a-y é i ké édé-w mété-y an pratik, pas i enmé-w (Izayi 48:17).

3. Ka Bondyé vlé nou fè ?

³ Ni moun ka di kè Bondyé ka aksèpté tout rèlijyon. Men a pa sa Jézi anségné. I di : « A pa toutmoun ki ka di-mwen : “Ségnè, Ségnè”, ki ké antré adan wayòm-la ki an syèl-la, men sé sèlman moun-la ki ka fè volonté a Pap’an mwen ki an syèl-la. » Kifè, fò-nou konnèt volonté a Bondyé é fò-nou fè-y. Sa enpòwtan toubònman, pas Jézi di kè moun ki pa ka kouté Bondyé ka touvé-yo kon kriminèl, yo pa ni pon rèspé pou lalwa (Matyé 7:21-23).

4. Ka Jézi di asi fason pou adoré Bondyé ?

⁴ Jézi té avèti disip a-y kè, délè, sa té’é rèd pou yo dè fè volonté a Bondyé. I di : « Antré pa ti pòt-la. Pas pòt-la ki ka menné a ladèstriksyon sé on pòt ki gran é  chimen-la ki ka menné a ladèstriksyon sé on chimen ki laj, é onlo moun ka pasé pa-y. Men, pòt-la ki ka menné a lavi sé on pòt ki piti, é chimen-la ki ka menné a lavi sé on chimen ki étwèt, é pa ni onlo moun ka touvé-y » (Matyé 7:13, 14). Chimen-la ki étwèt la, kivédi bon fason-la pou adoré Bondyé, ka menné a lavi étèwnèl. Chimen-la ki laj la, kivédi mové fason-la pou adoré Bondyé, ka menné a lanmò. Men Jéova pa vlé ponmoun mò. Sé pousa i ka ba toutmoun lokazyon konnèt-li (2 Pyè 3:9).

5. Kijan ou pé rèkonnèt moun ki an bon rèlijyon-la ?

⁵ Jézi di kè nou pé rèkonnèt moun ki an bon rèlijyon-la parapòt a sa yo ka kwè é parapòt a sa yo ka fè. I di : « Sèlon fwi yo ka pòté zò ké rèkonnèt-yo. » I konparé bon rèlijyon-la èvè on bon pyébwa é i di : « On bon pyébwa ka fè bèl fwi » (Matyé 7:16, 17). Sa pa vlé di kè moun ki ka adoré Bondyé kon i vlé sé dé moun pawfè. Men yo toujou ka éséyé fè sa ki byen. An-nou gadé kijan nou pé rèkonnèt-yo.

6, 7. a) Poukwa ansègnman a bon rèlijyon-la dwèt bazé-y asi Labib ? b) Ka ègzanp a Jézi ka aprann-nou ?

⁶ Fò sa nou ka anségné bazé asi Labib. Bib-la ka di : « Tout Ékriti-la, sé Bondyé ki enspiré-y é i itil pou anségné, pou korijé, pou woumèt tout biten annòd, pou fòwmé moun pou yo maché dwèt, pou moun a Bondyé ni tout kalité ki fo, tousa i bizwen pou fè tout bon biten ki ni a fè » (2 Timoté 3:16, 17). Lapòt Pòl té di sé krétyen-la : « Lè zò risivwè pawòl a  Bondyé kè nou té ka di-zòt, zò pa pran-y pou pawòl a nonm, men, zò aksèpté-y pou sa i yé vréman : pawòl a Bondyé » (1 Tésalonisyen 2:13). Ansègnman a bon rèlijyon-la bazé yenki asi Pawòl a Bondyé, Labib. I pa ka bazé-y asi lidé a lézòm, asi tradisyon, oben asi ondòt biten.

⁷ Tousa Jézi té ka anségné té bazé asi Pawòl a Bondyé (li Jan 17:17). Byensouvan, i té ka di pawòl ki maké adan Lézékriti (Matyé 4:4, 7, 10). Moun ki ka adoré Bondyé kon i vlé ka suiv ègzanp a Jézi : tousa yo ka anségné bazé asi Labib.

8. Sèlon Jézi, kimoun nou dwèt adoré ?

⁸ Sé yenki Jéova pou nou adoré. Sòm 83:18 ka di : « Vou, non a-w sé Jéova, sé-w tousèl ki Pli-Ho la asi tout latè ! » Jézi té vlé moun sav kimoun ki vré Dyé-la ègzaktèman, é i fè-yo konnèt non a-y (li Jan 17:6). I di-yo : « Sé Jéova Dyé a-w ou dwèt adoré, é sé yenki li ou dwèt sèvi » (Matyé 4:10). Moun ki ka adoré Bondyé kon i vlé ka suiv ègzanp a Jézi. Yo ka adoré yenki Jéova. Yo ka itilizé non a-y, pa ègzanp lè yo ka palé dè-y é lè yo ka priyé-y. Yo ka fè moun konnèt non-lasa é sa Bondyé ké fè pou limanité.

9, 10. Kijan nou ka montré lézòt kè nou enmé-yo ?

⁹ Nou dwèt ni on lanmou sensè pou lézòt. Jézi aprann disip a-y kè yonn dwèt enmé lòt (li Jan 13:35). Kèlkèswa nasyonalité an nou, kilti an nou, ki nou té’é rich, ki nou té’é maléré, fò-nou enmé-nou. Lanmou an nou dwèt ini-nou kon frè é sè (Kolosyen 3:14). Sé pousa nou pa ka fè lagè é nou pa ka tchouyé moun. Labib ka di kijan nou pé rèkonnèt « timoun a  Bondyé é timoun a Dyab-la ». I ka di : « On moun ki pa ka fè sa ki jis pa ka vin dè Bondyé, sila ki pa enmé frè a-y la nonplis ». I ka di osi kè fò « yonn enmé lòt, é fò pa nou kon Kayen, ki té ka vin dè méchan-la é ki tchouyé frè a-y » (1 Jan 3:10-12 ; 4:20, 21).

¹⁰ Nou ka sèvi èvè tan an nou, fòs an nou, é tousa nou ni pou nou ankourajé-nou, é pou yonn édé lòt (Ébré 10:24, 25). Nou ka « fè toutmoun dibyen » (Galat 6:10).

11. Poukwa nou dwèt kouté Jézi ?

¹¹ Nou dwèt kouté Jézi pas sé grasa-y tousèl nou pé sové. Labib ka di : « Pondòt moun pé pa sové-nou, pas [...] Bondyé pa bay non a pondòt moun pawmi lézòm pou nou pé sa sové » (Akt 4:12). Adan chapit 5 la, nou aprann kè Jéova voyé Jézi asi latè pou i bay vi a-y an ranson pou moun-obéyisan (Matyé 20:28). Jéova chwazi Jézi pou i vin Wa a latè. Sé pousa Labib ka di kè si nou vlé viv pou touttan, nou dwèt kouté Jézi (li Jan 3:36).

12. Poukwa nou pa ka mélanjé-nou adan politik ?

¹² Nou pa dwèt fè politik. Jézi pa té ka fè politik. Lè Pilat, chèf women la, jijé-y, Jézi réponn-li : « Wayòm an mwen pa ka fè pati a mond-lasa » (li Jan 18:36). Kon Jézi, nou vlé kè sé yenki wayòm a Bondyé ki dominé latè. É sé pousa, kèlkanswa koté-la nou ka rété la, nou pa ka mélanjé-nou adan politik. Pawkont, Labib ka mandé-nou kouté sé otorité-la ki ka dirijé-nou la, kivédi kouté sé gouvènman-la (Women 13:1). Nou ka suiv lwa a péyi an nou. Men lè ni on  lwa ki pa kay an sans a lwa a Jéova, nou ka fè kon sé apòt-la ki di : « Nou dwèt kouté Bondyé olyé nou kouté lézòm » (Akt 5:29 ; Mawk 12:17).

13. Lè nou ka préché, ka nou ka di asi wayòm a Bondyé ?

¹³ Nou ka kwè kè sé yenki wayòm a Bondyé ki ké réglé pwoblèm a limanité. Jézi di kè yo té ké préché « bon nouvèl a Wayòm-la » toupatou asi latè (li Matyé 24:14). Sa wayòm a Bondyé ké fè pou limanité, pon gouvènman pé ké pé fè-y (Sòm 146:3). Jézi aprann-nou kijan pou nou priyé pou wayòm a Bondyé. I di : « Fò wayòm a-w vini. Fò volonté a-w fèt asi latè, kon an syèl-la » (Matyé 6:10). Labib ka di kè wayòm a Bondyé ké détwi tout gouvènman lézòm mèt anplas é i ké ègzisté pou touttan (Danyèl 2:44).

14. Sèlon vou, kimoun ki ka adoré Bondyé konm i fo ?

¹⁴ Aprézan, pran on tan pou réfléchi asi sa : « Kimoun ki ka bazé ansègnman a yo asi Labib ? Kimoun ki ka fè moun konnèt non a Bondyé ? Adan ki rèlijyon, yonn enmé lòt vréman ? Kimoun ka kwè kè Bondyé voyé Jézi asi latè pou sové limanité ? Kimoun ki pa ka fè politik ? Kimoun ka préché kè sé wayòm a Bondyé tousèl ki ké réglé pwoblèm a limanité ? » Sé yenki Témwen a Jéova (Izayi 43:10-12).

15. Pou Bondyé dakò èvè jan nou ka adoré-y, ka nou dwèt fè ?

¹⁵ Apatoudi kwè kè Bondyé ka ègzisté. Sé démon-la ka kwè kè Bondyé ka ègzisté osi, men apapousa yo ka kouté-y (Jak 2:19). Pou Bondyé dakò èvè jan nou ka adoré-y, fò-nou fè sa i ka mandé-nou osi.

16. Poukwa fò-nou ba fo-rèlijyon-la do ?

 ¹⁶ Pou Bondyé dakò èvè jan nou ka adoré-y, fò-nou ba fo-rèlijyon-la do. Mi sa Izayi, on pwofèt, maké : « Sòti anmitan a-y, fè ansòt pou rété pwòp » (Izayi 52:11 ; 2 Korentyen 6:17). Donk, fò-nou débarasé-nou dè tousa ki ni on rapò èvè fo-rèlijyon-la.

17, 18. a) Ka ki « Gran Babilòn-la » ? b) Poukwa fò-w pòté mannèv pou sòti adan fo-rèlijyon-la ?

¹⁷ Ka ki fo-rèlijyon-la ? Sé tout sé rèlijyon-la ki pa ka aprann moun adoré Bondyé kon sa maké an Bib-la. Adan Bib-la, yo ka kriyé fo-rèlijyon-la « Gran Babilòn-la » (Révélasyon 17:5). Poukwa ? Pas apré délij-la, sé adan on vil yo té ka kriyé Babilòn, kè onlo ansègnman ki pa té vré sòti. Aprésa, yo simé sé ansègnman-lasa toupatou asi latè. Pa ègzanp, moun ki té ka rété Babilòn té ka adoré plizyè séri dyé. Chak séri té ni twa dyé adan-y. É jòdila, onlo rèlijyon ka di kè Bondyé an twa pèwsòn. Men Bib-la klè : ni onsèl vré Dyé, sé Jéova, é Jézi sé gason a-y (Jan 17:3). Moun ki té ka rété Babilòn té ka kwè adan ondòt biten ankò. Pou yo, lè on moun té ka mò, ni on biten adan-y ki té ka kontinyé viv, é délè i té ka soufè an lanfè. Men sa pa vré (gadé sé nòt n^o 14 la, 17 la é 18 la, paj 213, 214 é 215).

¹⁸ Bondyé anonsé kè, talè, i kay détwi fo-rèlijyon-la (Révélasyon 18:8). Ès ou ka vwè poukwa fò-w pòté mannèv pou sòti adan fo-rèlijyon-la ? Jéova ka mandé-w fè sa avan twota maré-w (Révélasyon 18:4).

19. Si ou désidé sèvi Jéova, kijan i ké pran swen a-w ?

 ¹⁹ Si ou désidé sòti adan fo-rèlijyon-la é sèvi Jéova, zanmi a-w é fanmi a-w pa oblijé konprann désizyon a-w. Yo pé jous touné-w do, é sa pé rivé kè yo pa anvi frékanté-w ankò. Men Jéova pé ké lésé-w tonbé. Ou ké fè pati a on fanmi entèwnasyonal ki ni plizyè milyon moun adan-y, moun ki ni on lanmou sensè yonn pou lòt. Ou ké ni lèspwa viv pou touttan adan mond nouvo la (Mawk 10:28-30). É ou pa jen sav, pétèt on jou, zanmi a-w é fanmi a-w ki pa té dakò èvè désizyon a-w ké étidyé Labib.

20. Poukwa sa enpòwtan kè nou adoré Bondyé kon i vlé ?

²⁰ Talè, Bondyé ké fè laméchansté disparèt, é wayòm a-y ké dirijé latè (2 Pyè 3:9, 13). Sa ké bèl toubònman ! Toutmoun ké adoré Jéova kon i vlé yo adoré-y. Alò, dépi alè, chanjé sa ki ni a chanjé pou adoré Bondyé kon i vlé.