1. Antai ae riai ni kaota nakoira te Aro ae koaua?

ANGIA Aaro a taku bwa a reirei te koaua ibukin te Atua. Ma e aki kona n riki anne, ibukina bwa a rangi ni kaokoro aia reirei Aaro ni kaineti ma antai te Atua ao arora ae ti riai n taromauria iai. Ti na kangaa ni kinaa te Aro ae koaua? Bon tii Iehova ae kona ni kaota nakoira te Aro ae koaua.

2. Ko na kangaa ni kinaa te Aro ae koaua?

² E a tia Iehova n anganira te Baibara bwa ti aonga ni kinaa te Aro ae koaua. Ngaia are reiakina te Baibara, ao ane e na buokiko Iehova ni karekei kakabwaia man ana reirei, ibukina bwa e mumutiakiniko.—Itaia 48:17.

3. Tera ae e tangiria te Atua bwa ti na karaoia?

³ A taku tabeman bwa e butimwaei Aaro ni kabane te Atua, ma tiaki anne ae e reireinira Iesu. E taku: “A na aki bane n rin n te Tautaeka n Uea ae bwaini karawa akana kangai nakoiu, ‘Te Uea, te Uea,’ ma e na tii rin iai ane e kakaraoa nanon Tamau.” Ngaia are ti bon riai n ataa nanon te Atua ao ti na kakaraoia. E kakawaki karaoan aei, bwa Iesu e kabotauia aomata aika aki ongeaba iroun te Atua bwa taani kamwarua aika “taani kakaraoa ae buakaka.”—Mataio 7:21-23.

4. Tera ae e taekinna Iesu ni kaineti ma kakaraoan nanon te Atua?

⁴ E anga te kauring Iesu nakoira bwa ngkana ti kani kakaraoa nanon te Atua ao ti na boni kaaitara ma kangaanga. E taku: “Riin n te mataroa ae wariki, bwa e raababa te mataroa ma ni mwawaawa te kawai ae tiki nakon te kamaunanakoaki,  ao a mwaiti aika rin iai. Ma e wariki te mataroa ao e reme te kawai ae tiki nakon te maiu, ao a karako akana kunea.” (Mataio 7:13, 14) Te kawai ae reme, ke te Aro ae koaua, e kairiri nakon te maiu ae aki toki. Te kawai ae mwawaawa, ke te Aro ae kewe, e kairiri nakon te mate. Ma e aki tangira maten temanna Iehova. E angania aomata nako aia tai bwa a na reiakina taekana.—2 Betero 3:9.

5. Ko na kangaa ni kinaa te Aro ae koaua?

⁵ E taku Iesu bwa ti kona ni kinaa te Aro ae koaua. Ti na kinaa ngkana ti neneri aia koaua kaaina ao baika a kakaraoi. E taku Iesu: “Kam na kinaia n uaaia.” Ao e reitia ni kangai: “Kainnamwarake aika raraoi a karikii uaaia aika raraoi.” (Mataio 7:16, 17) E aki nanonaki n aei bwa a kororaoi taan taromauria te Atua. Ma a kekeiaki n taai nako ana toro te Atua ni karaoa ae riai. Ti na noria ngkai bwa tera ae e na buokira ni kinaia taan taromauria te Atua n te aro ae riai.

6, 7. E aera ngkai e boto aia reirei kaain te Aro ae koaua i aon te Baibara? Tera reireiara man ana katoto Iesu?

⁶ E riai ni boto ara reirei i aon te Baibara. E taku te Baibara: “E kairaki korean te Koroboki ae Tabu ni kabane iroun te Atua ao e manena ibukin te angareirei, ao ibukini boaan te aomata, ibukini kaetani bwaai, ao ibukin te reirei ni kaetieti ae boraoi ma ana kaetieti te Atua, bwa e aonga n taubobonga iai ana aomata te Atua, ma n tauraoi raoi nakoni mwakuri aika raraoi ni kabane.” (2 Timoteo 3:16, 17) E korea ae kangai te abotoro Bauro nakoia Kristian: “Ngke kam butimwaea ana taeka are kam ongoraeakinna mairoura, ao kam butimwaeia bwa ana taeka te Atua, ao tiaki aia taeka aomata, bwa bon ana taeka raoi te  Atua.” (1 I-Tetaronike 2:13) A kabotoa aia reirei tii i aon Ana Taeka te Atua ae te Baibara. E aki boto i aon aia iango aomata, aia katei, ke te bwai riki teuana.

⁷ A bane ni boto i aon Ana Taeka te Atua ana angareirei Iesu. (Wareka Ioane 17:17.) E aki toki ni mwanewea kanoan te Koroboki ae Tabu. (Mataio 4:4, 7, 10) A kakairi ana toro ni koaua te Atua n ana katoto Iesu ao a kabotoi aia angareirei i aon te Baibara.

8. Tera reireiara mairoun Iesu ni kaineti ma taromaurian Iehova?

⁸ Ti riai n taromauria Iehova n tii ngaia. E kangai Taian Areru 83:18: “Iehova aram, bwa bon tii ngkoe Teuare Moan te Rietata n te aonnaba ni kabutaa.” E tangiriia aomata Iesu bwa a na ataa raoi te Atua ae koaua, ao e reireinia aran te Atua. (Wareka Ioane 17:6.) E taku Iesu: “Ko riai n taromauria Iehova ae Atuam, ao ko riai n toro irouna n tii ngaia.” (Mataio 4:10) Ngaia are ngkai ana toro te Atua ngaira, ti kakairi n ana katoto Iesu. Tii Iehova ae ti taromauria, ti kabongana arana, ao ti reireinia aomata aran te Atua ao baika e na karaoi ibukira.

9, 10. Ti na kangaa ni kaotiota te itangitangiri?

⁹ E riai n iai iroura te tangira ni koaua ibukia aomata. E reireinia taan rimwina Iesu bwa a na itangitangiri. (Wareka Ioane 13:35.) E aki kakawaki bwa kaain ia ngaira, tera kateira, ti kaubwai ke ti maiu ni kainnano, ma ti riai ni katiteuanaaki n ara itangitangiri i marenara, n aroia taari ni koaua. (I-Korote 3:14) Ngaia ae ti aki nako ni buaka ao ni kamateia aomata. E kangai te Baibara: “A kaotaraeaki natin nako te Atua ao natin nako te Riaboro, n aei: Ane e aki kakaraoa ae raoiroi ao e aki nako mairoun te Atua, ao e aki naba nako mairoun te Atua ane e aki tangira tarina.” Ao e kangai riki: “Ti riai n itangitangiri i marenara, tiaki n ai aroni Kain are nako mairoun teuare buakaka are e kamatea tarina.”—1 Ioane 3:10-12; 4:20, 21.

 ¹⁰ Ti kabongana ara tai, korakorara, ao kaubwaira n ibuobuoki iai ao n ikaungaunga i marenara. (Ebera 10:24, 25) Ti “kakaraoa ae raoiroi nakoia aomata ni kabane.”—I-Karatia 6:10.

11. E aera ngkai ti kakoauaa ae Iesu bon te kawai nakon te Atua?

¹¹ Ti riai n ongeaba iroun Iesu bwa bon te kawai nakon te Atua. E kangai te Baibara: “Akea te kamaiu iroun te aomata riki temanna, bwa bon akea te ara riki teuana i aon te aba ae a anganaki aomata, ae ti kona ni kamaiuaki iai.” (Mwakuri 4:12) Ti reiakinna ni Mwakoro 5 n te boki aei bwa Iehova e kanakoa Iesu bwa e na anga maiuna bwa te kaboomwi ibukia aomata aika ongeaba. (Mataio 20:28) E a tia Iehova n rinea Iesu bwa te Uea ae e na tautaekana te aonnaba. Anne bukina ae e tuangira te Baibara bwa ngkana ti kani maiu n aki toki ao ti na ongeaba iroun Iesu.—Wareka Ioane 3:36.

12. E aera ngkai ti aki kairekerekeira ma te waaki n tautaeka?

¹² Ti aki riai n irekereke ma te waaki n tautaeka. E aki kairekerekea Iesu ma te waaki n tautaeka. Ngke e titirakinaki Iesu, ao e taku nakoni Birato are te tia tautaeka i Rom: “Tiaki ana bwai te aba au Tautaeka n Uea.” (Wareka Ioane 18:36.) Ti kakairi iroun Iesu ni kakaonimaki ni koaua nakon Ana Tautaeka n Uea te Atua ae bwaini karawa, ngaia are n aki ongeia bwa ti maeka ia ma ti bon aki naba kairekerekeira ma te waaki n tautaeka. Ma e tua nakoira te Baibara bwa ti na ongeaba irouia “ake a mwiokoaki n te mwaaka n tautaeka,” ae nanona taian tautaeka. (I-Rom 13:1) Ti ongeaba n tuan te aba are ti maeka iai. Ma ngkana e kauntaba te tua ma ana tua te Atua, ti a kakairi ngkanne irouia abotoro ake a kangai: “E riai riki bwa ti na ongeaba iroun te Atua bwa te tia tautaeka, nakon ae ti na ongeaba irouia aomata.”—Mwakuri 5:29; Mareko 12:17.

13. Tera ae ti tataekinna ibukin Ana Tautaeka n Uea te Atua?

 ¹³ Ti kakoauaa bwa tii Ana Tautaeka n Uea te Atua ae kona ni katoki aia kangaanga aomata. E taku Iesu bwa e na tataekinaki “te rongorongo ae raoiroi aei ae taekan te Tautaeka n Uea” ni kabutaa te aonnaba. (Wareka Mataio 24:14.) Akea te tautaeka n aomata ae kona ni karaoa te bwai ae e na karaoia ibukira Ana Tautaeka n Uea te Atua. (Taian Areru 146:3) E reireinira Iesu bwa ti na tataro ni kangai ibukin Ana Tautaeka n Uea te Atua: “E bia roko am Tautaeka n Uea. E na kakororaoaki nanom i karawa ao n te aonnaba naba.” (Mataio 6:10) E tuangira te Baibara bwa e na kamaunai aia tautaeka ni kabane aomata Ana Tautaeka n Uea te Atua ao “tii te tautaeka aei ae e na teimatoa n aki toki.”—Taniera 2:44.

14. Antai ae ko kakoauaa bwa e taromauria te Atua n te aro ae riai?

¹⁴ Imwin reiakinani baikai, titirakiniko ni kangai: ‘Antai aika kabotoa aia reirei i aon te Baibara? Antai aika tutuangia aomata aran te Atua? Antai aika kaotiota te tangira ni koaua ibukia aomata ao aika a kakoauaa ae te Atua e kanakomaia Iesu ibukini kamaiuara? Antai aika aki irekereke ma te waaki n tautaeka? Antai aika tataekinna bwa tii Ana Tautaeka n Uea te Atua ae kona ni katoki ara kangaanga?’ Bon tii Ana Tia Kakoaua Iehova.—Itaia 43:10-12.

15. Tera ae ti riai ni karaoia ngkana ti tangira te Atua bwa e na butimwaea ara taromauri?

¹⁵ E aki tau tii kakoauaan ae iai te Atua. A kakoauaa naba ae iai te Atua taimonio, ma a aki ongeaba irouna. (Iakobo 2:19) Ngkana ti tangira te Atua bwa e na butimwaea ara taromauri, ti aki riai n tii kakoauaa ae iai ngaia ma ti riai naba ni karaoa te bwai ae e taekinna.

16. E aera ngkai ti riai n rawa nakon te Aro ae kewe?

¹⁶ Ti riai n rawa nakon te Aro ae kewe bwa e aonga ni  butimwaeaki ara taromauri iroun te Atua. E korea ae kangai te burabeti ae Itaia: “Kam na otinako mai nanon neienne, kateimatoa itiakimi.” (Itaia 52:11; 2 I-Korinto 6:17) Anne bukina ae ti riai n rawa iai nakon te bwai teuana ae irekereke ma te Aro ae kewe.

17, 18. Tera “Baburon ae Kakannato,” ao e aera ngkai e kaumakaki te rawa nako iai?

¹⁷ Tera te Aro ae kewe? Bon te Aro ae reireinira taromaurian te Atua ae bobuaka ma ana Taeka te Atua. N te Baibara ao a aranaki Aaro aika kewe ni kabane bwa “Baburon ae Kakannato.” (Te Kaotioti 17:5) Bukin tera? Imwin te Ieka are n ana bong Noa, ao a bati aia reirei Aaro aika kewe ake a moan reke man te kaawa ae Baburon. A butanako n te aonnaba reirei akana kewe akanne. N te katoto, aomata ake a maeka i Baburon a taromaurii atua aika kaka teniman. Ni boong aikai ao a bati naba Aaro aika reirei bwa te Atua bon te Temanna n Teniman, ma e katerea te Baibara bwa bon tii temanna te Atua ae koaua ae Iehova, ao Iesu bon Natina. (Ioane 17:3) A kakoauaa naba aomata ake a maeka i Baburon bwa iai te bwai teuana iroun te aomata ae teimatoa ni maiu imwini matena, ao te bwai anne e kona ni kammarakaki i moone. Bon te kewe anne.—Nora Kabwarabwaraana 14, 17, ao 18.

¹⁸ E a kaman taekinna te Atua bwa e a kaan kamaunaaia Aaro aika kewe ni kabane. (Te Kaotioti 18:8) Ko a ota ngkanne bwa e aera ngkai e rangi ni kaumakaki kitanan te Aro ae kewe? E tangiria Iehova ae te Atua bwa ko na karaoa anne imwain ae e a rangi n oimwi.—Te Kaotioti 18:4.

19. Ngkana ko motinnanoia bwa ko na beku iroun Iehova, tera arona nakoim?

¹⁹ N te tai are ko motinnanoia iai bwa ko nang kitana te Aro ae kewe ao n toro iroun Iehova, a kona n aki ota iai  tabeman raoraom ke kaain am utu, ao a bae ni karawawataa riki maium. Ma e na aki kaaki taekam Iehova. Ko nang kaaina te botaki n itaritari ae katobibia te aonnaba, ae mirion ma mirion kaaina aika itangitangiri ni koaua i marenaia, ao e na reke iroum te kantaninga ae te maiu n aki toki n ana waaki ae boou te Atua n te aonnaba. (Mareko 10:28-30) Tao imwina riki ao a na manga kan reirei n te Baibara tabeman raoraom ke kaain am utu ake a kaitaraa am motinnano ae ko na beku iroun Iehova.

20. E aera ngkai e kakawaki taromaurian te Atua n te aro ae boraoi ma nanona?

²⁰ E a rangi ni kaan kamaunaan te buakaka iroun te Atua, ao e nang tautaekana te aonnaba ana Tautaeka n Uea. (2 Betero 3:9, 13) Ai bon tamaroara te tai anne! A nangi bane aomata n taromauria Iehova n te aro ae tangiria. Ngaia are e kakawaki bwa ko na karaoa te bwai teuana ngkai ao n taromauria te Atua n te aro ae boraoi ma nanona.