1. Inde wakarhubwira enjira nyinja y’okuharamya Mungu?

MADINI manene manaderha oku mayigiriza okuli eju ya Mungu. S’aliko burhali bukweri bulala amadini manayigiriza ebintu birhali kuguma eju ya Mungu n’okuntu k’okumuharamya. Gurhe wakamenya enjira nyinja y’okumuharamya? Yehova yenyine yewakarhubwirayo.

2. Gurhe rhwakamenya enjira nyinja y’okuharamya Mungu?

² Yehova arhuhere Ebiblia, na kugerera kuyo, rhwakayiga enjira nyinja y’okumuharamya. Che chirhumire oyiyige. Yehova akurhabala oyunguke n’enyigirizo zage bulala akusimire.​—Isaya 48:17.

3. Bichi Mungu alonzeze rhukole?

³ Bantu baguma banawaza oku Mungu anayemera amadini moshi, aliko arhali ku Yesu ayigirizaga. Aliderhere ntya: “Arhali boshi bambwira: ‘Waliha, Waliha’, ba nji baja omu Bwami bw’embingu; s’aliko, ali olala oli wakola obulonza bwa Darha oli embingu.” K’okuderha oku rhukwanene okumenya obulonza bwa Mungu n’okubukola. Bili by’akamaro bwenene, bulala Yesu alishushanyize abantu barhakenga Mungu n’abanizi, abantu “banakola amabi.”​—Matayo 7:21-23.

4. Bichi Yesu aliderhere oku bilolere enjira y’okuharamya Mungu?

⁴ Yesu alibere abwira abanafunzi bage oku birhakayorohere okugenderera kujira obulonza bwa Mungu esiku zoshi. Aliderhere ntya: “Mugerere omu mulango gufunderere; bulala omulango gugalihire, n’ebarabara liyerekeze ewa kuharabiswa lilambukire, na banene babali baligeramo;  n’obola omulango gufunderere, n’ebarabara liyerekeze oku kalamo lili ligeke-geke na bantu bageke babali balihikira.” (Matayo 7:13, 14) Ebarabara lifunderere, lishushanyizwe n’enjira nyinja y’okuharamya Mungu, liyerekeze oku kalamo k’esiku n’amango. Ebarabara lilambukire lishushanyizwe n’enjira ebihire y’okuharamya Mungu, liyerekeze oku lufu. Aliko, Yehova arhalonzeze haba n’omuntu n’omuguma afe, che chirhumire ahere abantu boshi obushobozi b’okuyiga kumumenya.​—2 Petro 3:9.

5. Gurhe rhwakamenya abaharamya Mungu omu njira nyinja?

⁵ Yesu aliderhere oku byakagalikana okumenya abaharamya Mungu omu njira nyinja, kugerera obwemere bwabo n’ebi banakola. Aliderhere ntya: “Nji mwabamenya, kugerera amalehe mabo.” Anashuba kuyongera ntya: “Buli murhi gwinja gunarhenga kw’amalehe menja.” (Matayo 7:16, 17) Ebyola birhalonzeze kuderha oku abaharamya Mungu omu njira nyinja baba bashinganyanya. S’aliko, banachihangana kukola ebintu binja. Rhulolage gurhe rhwakabamenya.

6, 7. a) Bulagurhe enyigirizo z’abantu baharamya omu kuli zinarhenga omu Biblia? b) Bichi omufano gwa Yesu gwakarhuyigiriza?

⁶ Enyigirizo zerhu zikwanene okurhenga omu Biblia. Ebiblia ederhere ntya: “Ebiyandikirwe byoshi byayerekezwaga na Mungu, kandi biherhe akamaro k’okuyigiriza, okuhana, okuheba ebintu oku musitari, n’okuhana omu kunali, y’omuntu wa Mungu agwarha obushobozi buyenere, anagwarhe ebintu byoshi bikwanene omu kujira buli kasi kenja.” (2 Timoteo 3:16, 17) Entumwa Paulo ya yandikiraga abakristu ntya: “Amango mwahabwaga omwazi gwa Mungu rhwabamenyesaga, murhagurholaga nka mwazi gw’abantu, s’aliko, mwaguyemera nka kulala gunali g’okuli, mwazi gwa Mungu.”  (1 Watesalonike 2:13) Enyigirizo z’abantu bali baharamya omu kuli zinarhengerera omu chinwa gwa Mungu, Ebiblia. Zirharhenga omu mawazo m’abantu, omu ngani changwa omu bindi bintu.

⁷ Byoshi Yesu akazaga yigiriza byaliri byarhenga omu mwazi gwa Mungu. (Osome Yohana 17:17.) Akazaga zigana kuderha amandiko. (Matayo 4:4, 7, 10) Abaharamya Mungu omu kuli banakulikira omufano gwa Yesu, ebi banayigiriza byoshi birhenga omu Biblia.

8. Inde rhukwanene rhuharamye nk’oku Yesu aderhaga?

⁸ Rhukwanene rhuharamye Yehova yenyine. Olwandiko lwa Zaburi 83:18 luderhere ntya: “Boshi bamenye oku woyo, ezino lyawe we Yehova, woyo wenyine weli enyanya bwenene, enyanya y’egulu lyoshi!” Yesu alilonzeze abantu bamenye oku Mungu abaho, anabamenyesa ezino lyage. (Osome Yohana 17:6.) Aliderhere ntya: “Yehova Mungu wawe y’okwanene kuharamya, na yewe yenyine y’okwanene ohe akasi kachesibwa.” (Matayo 4:10) Abaharamya Mungu omu kunali banakulikira olwiganyo lwa Yesu. Banaharamya Yehova yenyine, bakolesa ezino lyage n’okulimenyesa oku bandi bantu. Banayigiriza ebi Mungu nj’ajirira abantu.

9, 10. Gurhe rhunayereka abandi oku rhubazigira?

⁹ Rhukwanene rhuzigirane bwenene. Yesu aliyigirize abanafunzi bage oku bakwanene kugwarha obuzigire ahakagarhi kabo. (Osome Yohana 13:35.) Rhukwanene rhuzigirane chiro akaba rhurharhengerere haguma, okuntu rhwalemberwe, chiro akaba rhuli bachire changwa bakene. Obuzigire bwerhu bukwanene okurhuheba haguma rhunakwanene rhube kuguma na bene berhu na bali berhu. (Wakolosai 3:14) Che chirhuma rhurhalwa vita, rhurhanayirha muntu. Ebiblia ederhere oku “Ech’abana ba Mungu n’abana ba Ibilisi” bamenyerwako che chinola:  “buli yeshi orhakola okunali n’orhazigira mwene wabo arharhengerere na Mungu.” Eshubire kuyongera oku rhukwanene “rhuzigirane ahakagarhi kerhu; rhurhabaga kuguma na Kayini wakomokaga k’olala mubi, wanayirhaga mwene wabo.”​—1 Yohana 3:10-12; 4:20, 21.

¹⁰ Rhunakolesa ebisanzi byerhu, emisi yerhu na buli choshi rhuherhe omu kuhebana omurhima n’okurhabalana. (Waebrania 10:24, 25) “Rhunakolera abantu boshi amenja.”​—Wagalatia 6:10.

11. Bulagurhe rhukwanene rhuyemere oku kugerera Yesu yenyine yi rhwakachungulwa?

¹¹ Rhukwanene rhukenge Yesu bulala kugerera yewe yenyine yi rhwakachungulwa. Ebiblia ederhere oku, “nta buchunguke omu windi muntu n’omuguma, kwa bulala nta lindi zino eshishi y’embingu [. . .] eli kugerera lyowe rhukwanene okuchunguka.” (Matendo 4:12) Rhwaliyigire omu sura ya 5, oku Yehova arhumaga Yesu oku gulu y’ahana obuguma-guma bwage nka nchungu oku bantu bakenga. (Matayo 20:28) Yehova achishogere Yesu abe Mwami w’egulu, che chirhumire Ebiblia ederhere oku, akaba rhulonzeze rhulame esiku n’amango, rhukwanene oku kenga Yesu.​—Osome Yohana 3:36.

12. Bulagurhe rhurhachiheba omu bintu by’epolitike?

¹² Rhurhakwanene rhuchihebe omu bintu by’epolitike. Yesu arhalichihebere omu bintu by’epolitike. Amango alemaga achibirwa olubanja na Pilato, mukulu w’abaroma, aderha ntya: “Obwami bwani, burhali chigabi cha linola gulu.” (Osome Yohana 18:36.) Kuguma na Yesu, rhunaba bimana oku Bwami bwa Mungu buli embingu. Che chirhuma, chiro akaba ahantu rhulamire, rhurhachiheba omu bintu by’epolitike. Chiro akaba ntyo, Ebiblia erhubwirire oku rhukwanene oku kenga “abarhegesi barhukulire,” kuli kuderha amarhegesi. (Waroma 13:1)  Rhunakenga amarhegeko m’echihugo rhulamiremo. S’aliko nka liguma mw’amola marhegeko lipingire amarhegeko ma Mungu, rhwanayiganya entumwa zaderhaga ntya: “Rhukwanene kukenga Mungu ahali h’abantu.”​—Matendo 5:29; Marko 12:17.

13. Bichi rhunahubiri bilolere Obwami bwa Mungu?

¹³ Rhukwanene kugwarha obuyemere oku Obwami bwa Mungu bonyine bwakamala ebibazo oku gulu. Yesu aliderhere oku “omwazi gwinja g’Obwami” nji gwahubiribwa oku gulu lyoshi. (Osome Matayo 24:14.) Nta burhegesi bwakagala kukola eby’Obwami bwa Mungu nji bwajirira abantu. (Zaburi 146:3) Yesu alirhubwirire rhusalire ntya oku bilolere Obwami bwa Mungu: “Obwami bwawe buyinje. Obulonza bwawe bujirike oku gulu kuguma n’omu mbingu.” (Matayo 6:10) Ebiblia ederhere ok’Obwami bwa Mungu nji bwaharabisa amarhegesi moshi m’abantu, n’oku nji bwarhegeka esiku n’amango.​—Danieli 2:44.

14. Owazize oku bande banaharamya Mungu omu njira nyinja?

¹⁴ Ojage wachibaza ntya: “Bande banayigiriza ebirhengerere omu Biblia? Bande banamenyesa abandi ezino lya Mungu? Bantu ba dini lihe banasimana bwenene? Bande baba bayemerere oku Mugu alirhumire Yesu oku gulu y’achungula abantu? Bande barhachiheba omu bintu by’epolitike? Bande banahubiri oku Obwami bwa Mungu bonyine bwakamala ebibazo byoshi by’abantu?” Bali Bahamairizi ba Yehova bonyine.​—Isaya 43:10-12.

15. Bichi rhwakajira yi Mungu ayemera okuntu rhuli rhwamuharamya?

¹⁵ Okuyemera konyine oku Mungu abaho, kurhatosheze. Bulala n’abazimu nabo baba bayemerere oku Mungu abaho; s’aliko barhamukenga. (Yakobo 2:19) Yi  Mungu ayemera okuntu rhuli rhwamuharamya, nerhu rhukwanene rhukole eby’aderhere.

16. Bulagurhe rhukwanene rhulekane n’edini ly’obubeshi?

¹⁶ Yi Mungu ayemera okuntu rhuli rhwamuharamya, rhwukwanene rhulekane n’edini ly’obubeshi. Omulebi Isaya ayandikaga ntya: “Murhenge ahakagarhi kage, muchilange eyi muchere.” (Isaya 52:11; 2 Wakorinto 6:17) K’okuderha oku rhukwanene rhulekane na buli chintu choshi chilolere edini ly’obubeshi.

17, 18. a) “Babiloni Mukulu” ye nde? b) Bulagurhe bili bya juba-juba kurhenga omu dini ly’obubeshi?

¹⁷ Edini ly’obubeshi che chichi? Mali madini moshi mayigiriza abantu okuharamya Mungu omu njira erhalingene n’echinwa cha Mungu. Ebiblia eyirikire edini ly’obubeshi “Babiloni Mukulu.” (Ufunuo 17:5) Bulagurhe? Bulala, enyuma y’envula y’echihonzi, omu vile ye Babiloni mw’enyigizo zinene z’obubeshi zarhondereraga. Ezola nyigirizo zayunjulirene oku gulu lyoshi. Omufano, abantu be Babiloni bakazaga haramya echigusho cha ba mungu basharhu. Na zene, madini manene manayigiriza oku Mungu buba busharhu. S’aliko, Ebiblia eyigirize bwinjabwinja, oku hali Mungu muguma w’okuli Yehova, n’oku Yesu ali Mugala. (Yohana 17:3) Kandi, abantu be Babiloni baliyemerere oku amango omuntu akafire, haba ehintu hyakamurhengeremo hyakagenderere okulama ahandi hantu; n’ahanene, omu muliro gw’amalibuko. S’aliko, burhali bukweri. Olole amahugulo me 14, 17 ne 18, bukurasa bwa 213, 214 na 215.

¹⁸ Mungu amenyeseze oku edini ly’obubeshi lyaharabiswa hanola hofi. (Ufunuo 18:8) Obwene bulagurhe okwanene okurhenga omu dini ly’obubeshi jubajuba si? Yehova akuhemere ojire ntyo buzira kucherehwa.​—Ufunuo 18:4.

19. Oka chishoga kukolera Yehova, gurhe akuhangaikira?

 ¹⁹ Okachishoga okurhenga omu dini ly’obubeshi n’okukolera Yehova, hali amango bera bawe n’abantu b’omulala gwawe, barhayemera okuntu wachishogere, nkabaga n’okukulibuza. S’aliko, Yehova arhakulekerera. Waba omu mulala gunene gw’amamiliyoni m’abantu basimire Yehova, n’okugwarha obunihire bukwanene b’okulama omu gulu lihyahya. (Marko 10:28-30) Nkabaga lusiku luguma, bera bawe n’abantu b’omulala gwawe barhayemerere okuchishoga kwawe k’okukolera Yehova, nji banagera amango bachishoga okuyiga Ebiblia.

20. Bulagurhe bili by’akamaro okuharamya Mungu omu njira nyinja?

²⁰ Mungu akula obubi hanola hofi, n’Obwami bwage nji bwanarhambula egulu. (2 Petro 3:9, 13) Nji byaba binja bwenene! Abantu boshi nji baharamya Yehova, nk’okw’anaba asimire. Ohindamuke nk’okubihemere, y’oharamya Mungu omu njira nyinja.