1. Sin-o ang makasugid sang insakto nga paagi sa pagsimba sa Dios?

ANG kalabanan nga relihion nagasiling nga ginatudlo nila ang kamatuoran parte sa Dios. Pero indi ina matuod, kay sarisari ang ginatudlo sang mga relihion parte sa kon sin-o ang Dios kag kon paano naton sia simbahon. Ano ang insakto nga paagi sa pagsimba sa Dios? Si Jehova lamang ang makasabat sina.

2. Paano mo mahibaluan ang insakto nga paagi sa pagsimba sa Dios?

² Ginhatag ni Jehova ang Biblia para mahibaluan naton ang insakto nga paagi sa pagsimba sa iya. Gani tun-i ang Biblia, kag buligan ka ni Jehova para makabenepisyo ka sa iya mga panudlo kay nagaulikid gid sia sa imo.—Isaias 48:17.

3. Ano ang gusto sang Dios nga himuon naton?

³ Ang iban nagasiling nga ginabaton sang Dios ang tanan nga relihion, pero indi amo sina ang gintudlo ni Jesus sa aton. Nagsiling sia: “Indi tanan nga nagasiling sa akon, ‘Ginuo, Ginuo,’ makasulod sa Ginharian sang langit, kundi ang nagahimo lamang sang kabubut-on sang akon Amay.” Gani dapat tun-an naton ang kabubut-on sang Dios kag himuon ini. Importante gid ini kay ginpaanggid ni Jesus ang mga wala nagatuman sa Dios sa mga kriminal, nga “nagahimo . . . sing malain!”—Mateo 7:21-23.

4. Ano ang ginsiling ni Jesus parte sa paghimo sang kabubut-on sang Dios?

⁴ Nagsiling si Jesus nga kon gusto naton nga himuon ang kabubut-on sang Dios, makaeksperiensia kita sing mga  kabudlayan. Nagsiling sia: “Magsulod kamo sa makitid nga gawang, kay masangkad ang gawang kag malapad ang dalan nga nagapadulong sa kalaglagan, kag madamo ang nagaagi sa sini; apang makitid ang gawang kag mabudlay ang dalan nga nagapadulong sa kabuhi, kag pila lamang ang nakatultol sini.” (Mateo 7:13, 14) Ang mabudlay nga dalan, ukon ang insakto nga paagi sa pagsimba sa Dios, nagapadulong sa kabuhi nga wala sing katapusan. Ang malapad nga dalan, ukon ang sala nga paagi sa pagsimba sa Dios, nagapadulong sa kamatayon. Pero indi gusto ni Jehova nga may mapatay. Ginahatagan niya ang tanan sing tsansa nga makatuon parte sa iya.—2 Pedro 3:9.

5. Paano mo makilala ang mga nagasimba sa Dios sa insakto nga paagi?

⁵ Nagsiling si Jesus nga mahibaluan naton kon sin-o ang mga nagasimba sa Dios sa insakto nga paagi. Makilala naton sila paagi sa pag-usisa sa ila ginapatihan kag ginahimo. Nagsiling sia: “Makilala ninyo sila sa ila mga bunga.” Nagsiling pa sia: “Ang tanan nga maayo nga kahoy nagapamunga sing maayo nga bunga.” (Mateo 7:16, 17) Indi buot silingon nga perpekto ang mga nagasimba sa Dios. Pero pirme nila ginatinguhaan nga himuon ang insakto. Hibaluon naton ang makabulig sa aton para makilala ang mga nagasimba sa Dios sa insakto nga paagi.

6, 7. Ngaa ang insakto nga pagsimba nabase sa Biblia? Ano ang ginatudlo sa aton sang halimbawa ni Jesus?

⁶ Ang aton pagsimba dapat nabase sa Biblia. Ang Biblia nagasiling: “Ang pagsulat sa bug-os nga Kasulatan gintuytuyan sang Dios kag mapuslanon sa pagpanudlo, sa pagsabdong, sa pagtadlong, sa pagdisiplina sa pagkamatarong, agod ang tawo sang Dios may ikasarang gid, kag nasangkapan sing bug-os para sa tagsa ka maayong buhat.”  (2 Timoteo 3:16, 17) Nagsulat si apostol Pablo sa mga Cristiano: “Sang nabatian ninyo ang pulong sang Dios sa amon, ginbaton ninyo ini, indi subong pulong sang mga tawo, kundi kon ano gid ini, subong pulong sang Dios.” (1 Tesalonica 2:13) Ang insakto nga pagsimba nabase lamang sa Pulong sang Dios, ang Biblia. Wala ini nabase sa ideya sang mga tawo, tradisyon, ukon sa iban pa.

⁷ Nabase gid sa Pulong sang Dios ang tanan nga gintudlo ni Jesus. (Basaha ang Juan 17:17.) Ang iya ginahambal pirme halin sa Kasulatan. (Mateo 4:4, 7, 10) Ginasunod sang matuod nga mga alagad sang Dios si Jesus kag ginabase nila ang ila mga panudlo sa Biblia.

8. Ano ang gintudlo ni Jesus sa aton parte sa pagsimba kay Jehova?

⁸ Si Jehova lamang ang dapat naton simbahon. Ang Salmo 83:18 nagsiling: “Ikaw, nga ang ngalan amo si Jehova, ikaw lamang ang Labing Mataas sa bug-os nga duta.” Gusto ni Jesus nga makilala sang mga tawo kon sin-o gid ang matuod nga Dios, kag gintudlo niya sa ila ang ngalan sang Dios. (Basaha ang Juan 17:6.) Nagsiling si Jesus: “Si Jehova nga imo Dios ang dapat mo simbahon, kag sia lamang ang hatagan mo sing sagrado nga pag-alagad.” (Mateo 4:10) Gani bilang mga alagad sang Dios, ginasunod naton si Jesus. Si Jehova lamang ang aton ginasimba, ginagamit naton ang iya ngalan, kag ginatudlo naton sa iban ang iya ngalan kag kon ano ang iya himuon para sa aton.

9, 10. Paano naton mapakita ang aton pagpalangga sa isa kag isa?

⁹ Dapat may matuod kita nga gugma sa mga tawo. Gintudluan ni Jesus ang iya mga disipulo nga palanggaon nila ang isa kag isa. (Basaha ang Juan 13:35.) Dapat naton ini ipakita bisan diin man kita naghalin, ano man ang aton kultura, ukon manggaranon man kita ukon pigado. Ang aton gugma sa isa kag isa amo dapat ang magahiusa sa aton bilang mag-ulutod. (Colosas 3:14) Gani wala kita nagaentra sa inaway kag nagapatay sang tawo. Ang Biblia nagasiling:  “Ang mga anak sang Dios kag ang mga anak sang Yawa makilala paagi sa sini: Ang bisan sin-o nga wala nagapadayon sa paghimo sing pagkamatarong kag wala nagahigugma sa iya utod indi halin sa Dios.” Nagsiling pa ini: “Dapat naton higugmaon ang isa kag isa; indi kaangay ni Cain, nga naghalin sa isa nga malauton kag nagpatay sa iya utod.”—1 Juan 3:10-12; 4:20, 21.

¹⁰ Ginagamit naton ang aton tiempo, kusog, kag manggad para palig-unon kag buligan ang aton kauturan. (Hebreo 10:24, 25) Dapat nga “himuon naton ang maayo sa tanan.”—Galacia 6:10.

11. Ngaa nagapati kita nga si Jesus ang dalan padulong sa Dios?

¹¹ Dapat naton tumanon si Jesus kay sia ang dalan padulong sa Dios. Ang Biblia nagasiling: “Wala na sing iban pa nga manluluwas kundi sia lang, kay wala na sing iban pa nga ngalan sa duta nga ginpili sang Dios sa katawhan sa pagluwas sa aton.” (Binuhatan 4:12) Natun-an naton sa Kapitulo 5 sini nga libro nga ginpadala ni Jehova si Jesus para ihatag ang iya kabuhi bilang gawad para sa matinumanon nga mga tawo. (Mateo 20:28) Ginpili ni Jehova si Jesus nga maggahom bilang Hari sa bilog nga duta. Amo nga nagasiling ang Biblia nga para mabaton naton ang kabuhi nga wala sing katapusan, dapat naton tumanon si Jesus.—Basaha ang Juan 3:36.

12. Ngaa wala kita nagaentra sa pulitika?

¹² Indi kita dapat mag-entra sa pulitika. Wala nag-entra si Jesus sa pulitika. Sang ginbista sia, ginsilingan niya ang Romano nga manuggahom nga si Pilato: “Ang akon Ginharian indi bahin sini nga kalibutan.” (Basaha ang Juan 18:36.) Pareho kay Jesus, mainunungon man kita sa langitnon nga Ginharian sang Dios, gani bisan diin man kita nagaistar wala kita nagaentra sa pulitika. Pero ginasugo kita sang Biblia nga tumanon ang “mas mataas nga mga awtoridad,” ukon ang mga gobierno. (Roma 13:1) Ginatuman  naton ang kasuguan sang aton pungsod. Pero kon kontra ini sa kasuguan sang Dios, ginasunod naton ang mga apostoles, nga nagsiling: “Dapat namon tumanon ang Dios subong manuggahom sa baylo sang mga tawo.”—Binuhatan 5:29; Marcos 12:17.

13. Ano ang ginabantala naton parte sa Ginharian sang Dios?

¹³ Nagapati kita nga ang Ginharian sang Dios lamang ang solusyon sa mga problema sa kalibutan. Nagsiling si Jesus nga dapat ibantala sa bilog nga kalibutan ang “maayong balita sang Ginharian.” (Basaha ang Mateo 24:14.) Indi gid mahimo sang gobierno sang tawo ang mahimo sa aton sang Ginharian sang Dios. (Salmo 146:3) Gintudluan kita ni Jesus nga ipangamuyo ang Ginharian sang Dios sang nagsiling sia: “Magkari ang imo Ginharian. Matuman ang imo kabubut-on sa duta subong sang sa langit.” (Mateo 6:10) Ginasilingan kita sang Biblia nga dulaon sang Ginharian sang Dios ang tanan nga gobierno sang tawo kag “ini lamang ang magapabilin sing dayon.”—Daniel 2:44.

14. Sin-o sa banta mo ang nagasimba sa Dios sa insakto nga paagi?

¹⁴ Pagkatapos matun-an ini nga mga punto, pamangkuta ang imo kaugalingon: ‘Sin-o ang nagabase sang ila panudlo sa Biblia? Sin-o ang nagasugid sa iban sang ngalan sang Dios? Sin-o ang nagapakita sang matuod nga gugma sa isa kag isa kag nagapati nga ginpadala sang Dios si Jesus para luwason kita? Sin-o ang mga wala nagaentra sa pulitika? Sin-o ang nagabantala nga ang Ginharian sang Dios lamang ang makasolbar sang aton mga problema?’ Mga Saksi ni Jehova lamang.—Isaias 43:10-12.

15. Ano ang dapat naton himuon para batunon sang Dios ang aton pagsimba?

¹⁵ Indi lang dapat nga nagapati kita nga may Dios. Kay bisan ang mga demonyo nagapati nga may Dios, pero wala  sila nagatuman sa iya. (Santiago 2:19) Para batunon sang Dios ang aton pagsimba, dapat indi lang nga nagapati kita nga may Dios kundi dapat tumanon man naton sia.

16. Ngaa dapat naton isikway ang butig nga relihion?

¹⁶ Para batunon sang Dios ang aton pagsimba, dapat naton isikway ang butig nga relihion. Si propeta Isaias nagsulat: “Maggua kamo sa tunga niya, tinlui ninyo ang inyo kaugalingon.” (Isaias 52:11; 2 Corinto 6:17) Gani dapat naton isikway ang tanan nga may labot sa butig nga pagsimba.

17, 18. Ano ang “Babilonia nga Daku,” kag ngaa dapat isikway mo ini dayon?

¹⁷ Ano ang butig nga relihion? Ang bisan ano nga relihion nga nagatudlo sa aton sang pagsimba sa Dios nga wala nabase sa iya Pulong. Ginatawag sang Biblia ang tanan nga butig nga relihion nga “Babilonia nga Daku.” (Bugna 17:5) Ngaa? Pagkatapos sang Baha sang panahon ni Noe, madamo nga butig nga panudlo ang naghalin sa siudad sang Babilonia. Naglapta ini sa bilog nga duta. Halimbawa, madamo nga taga-Babilonia ang nagasimba sa grupo sang tatlo ka dios. Madamo man nga relihion subong ang nagatudlo nga ang Dios Trinidad, pero maathag nga ginatudlo sang Biblia nga may isa lamang ka matuod nga Dios, si Jehova, kag si Jesus amo ang iya Anak. (Juan 17:3) Nagapati man ang mga taga-Babilonia nga kon mapatay ang isa may bahin sa iya lawas nga padayon nga nagakabuhi kag mahimo ini mag-antos sa impierno. Indi gid ina matuod.—Tan-awa ang Endnote 14, 17, kag 18.

¹⁸ Gintagna sang Dios nga sa indi madugay laglagon niya ang tanan nga butig nga relihion. (Bugna 18:8) Naintiendihan mo na bala kon ngaa importante nga biyaan dayon ang butig nga relihion? Gusto ni Jehova nga Dios nga himuon mo ina kay basi madalahig ka sa iya kalaglagan.—Bugna 18:4.

19. Kon mag-alagad ka kay Jehova, paano ka niya atipanon?

 ¹⁹ Kon biyaan mo ang butig nga relihion kag mag-alagad kay Jehova, mahimo indi ini maintiendihan sang imo mga abyan kag pamilya kag mahimo ka nila pabudlayan. Pero indi ka pagpabay-an ni Jehova. Mangin miembro ka sang bilog nga kalibutan nga pamilya sang minilyon ka tawo nga nagapalanggaanay gid sa isa kag isa, kag may paglaum ka man nga mabuhi sing wala katapusan sa bag-o nga kalibutan sang Dios. (Marcos 10:28-30) Mahimo nga ang imo mga abyan kag pamilya nga nagpugong sa imo magtuon sa ulihi sang Biblia.

20. Ngaa importante nga magsimba sa Dios sa insakto nga paagi?

²⁰ Malapit na lang laglagon sang Dios ang tanan nga kalainan kag magagahom na ang iya Ginharian sa bilog nga duta. (2 Pedro 3:9, 13) Makalilipay gid ina! Ang tanan magasimba na suno sa gusto ni Jehova. Gani importante nga simbahon mo subong ang Dios sa insakto nga paagi.