1. Ouṋe ngu ma sokuturaera omuano omusemba wokurikotamena ku Mukuru?

OZONGAMBURIRO ozengi ze tja ze honga ouatjiri ohunga na Mukuru. Nungwari kamaape ya, orondu ozongamburiro ze honga oviṋa mbya panguka ohunga nokutja Mukuru omungendu nokutja ma sokurikotamenwa vi. Matu yenene vi okutjiwa omuano omusemba wokurikotamena ku Mukuru? Jehova porwe ongu ma yenene okuturaera kutja matu sokurikotamena vi ku ye.

2. Mo yenene vi okurihonga omuano omusemba wokurikotamena ku Mukuru?

² Jehova we tu pa Ombeibela kutja tu rihonge omuano omusemba wokurikotamena ku ye. Okutja konḓonona Ombeibela nu Jehova me ku vatere kutja u mune ouwa momahongero wayo orondu eye u rikendera kove.—Jesaja 48:17.

3. Mukuru u vanga kutja tu tjite vi?

³ Ovandu tjiva ve tja Mukuru u yakura ozongamburiro azehe, nungwari Jesus ke tu hongere nao. Eye wa tja: “Kaye ngwi auhe ngu ma tja ku Ami: ‘Muhona, Muhona’, ngu ma hiti mouhona womayuru, nungwari ma rire ingwi porwe ngu ma yenenisa ombango yaTate ngu ri meyuru.” Okutja ohepero tjinene ku eṱe okurihonga kutja ombango yaMukuru ooiṋe okuzambo tu i tjite. Indi epu enanḓengu orondu Jesus wa sasaneka ovandu mbe hi nonḓuviro ku Mukuru ku novakatuke voveta, poo “ovarunde.”—Mateus 7:21-23.

4. Jesus wa tja vi ohunga nokutjita ombango yaMukuru?

 ⁴ Jesus we tu rakiza kutja tji matu vanga okutjita ombango yaMukuru, matu munu omauzeu omengi. Eye wa tja: “Hitireye momuvero omumango, omuvero mbwi mbu twara kombandjarero tjinga au ri omuparanga, nondjira ndji yenda ngo ai ri ombupu, nu imba mbe ryangera mu yo ava takavara. Nungwari omuvero mbwi mbu twara komuinyo owo omumango, nondjira ndji yenda ngo i neputi, novehinanḓengu imba mbe i muna.” (Mateus 7:13, 14) Omuvero omumango poo omuano omusemba wokurikotamena ku Mukuru u twara komuinyo waaruhe. Ondjira ombaranga poo omuano omuvi wokurikotamena ku Mukuru u twara konḓiro. Posi yokutja, Jehova ka vanga kutja omundu nandarire umwe ma yandekwe. Eye u yandja oruveze kovandu avehe kutja ve rihonge ohunga na ye.—2 Petrus 3:9.

5. Ove mo yenene okutjiwa vi kutja oouṋe mbe rikotamena ku Mukuru momuano omusemba?

⁵ Jesus wa tja matu yenene okutjiwa kutja oouṋe mbe rikotamena ku Mukuru momuano omusemba. Matu yenene okutjita nai mokukonḓonona oviṋa mbi ve kambura mo noviṋa mbi ve tjita. Eye wa tja: “Eṋe mamu ve zemburukire kovitjitwa vyawo.” Okuzambo a weza kutja, “Omuti omuwa u ruka ovihape oviwa.” (Mateus 7:16, 17) Ihi katji nokuheya kutja imba mbe karera Mukuru kave zunḓa. Nungwari ovakarere vaMukuru aruhe ve kondja okutjita imbi mbi ri ovisemba. Nambano matu katara kutja ovikeṋa mbi mavi tu vatere okutjiwa imba mbe rikotamena ku Mukuru momuano omusemba.

6, 7. Ongwaye omerikotameneno watjiri tji ya zikamena kOmbeibela? Otjihorera tjaJesus matji tu hongo tjike?

⁶ Omerikotameneno wetu maye sokuzikamena kOmbeibela. Ombeibela i tja: “Omatjangwa aehe ya tjangwa  nombatero yOmbepo yaNdjambi, nowo otji ye nonḓengu onene yokuhonga ouatjiri nokupirukira omahongero woposyo, nokuvyura ozondataiziro, nokukuna ongarero osemba, kokutja omundu ngu ri motjiungura tjaNdjambi a rire omupyuke tjinene nu e rirongerere okuungura otjiungura ngamwa atjihe otjiwa.” (2 Timoteus 3:16, 17) Omuapostele Paulus wa tjanga kOvakriste ovakwao na tja: “Mwa yakura ombuze yaNdjambi, ndji mwa zuva mu eṱe namu i ṱakamisa amamu tjiwa, tjiri, kutja oyo kamambo wovandu, nungwari oyo embo raNdjambi.” (1 Ovatesalonika 2:13) Omerikotameneno wouatjiri ya zikamena kEmbo raMukuru Ombeibela porwayo nu kaye zikamene koumune wovandu, otuzo poo otjiṋa tjarwe.

⁷ Oviṋa avihe Jesus mbyaa hongo vya zikamenene kEmbo raMukuru. (Lesa Johanes 17:17.) Potuingi eye aa hungire oviṋa mbyaa isa momatjangwa. (Mateus 4:4, 7, 10) Ovakarere vaMukuru vatjiri ve horera ku Jesus nu ve zikamisira oviṋa avihe mbi mave hongo kOmbeibela.

8. Jesus we tu honga tjike ohunga nokurikotamena ku Jehova?

⁸ Matu sokurikotamena ku Jehova erike. Epsalme 83:19 [EEP] mari tja: “Ve tjiue, kutja Ove erike, ngu nena indi Jehova;: ingui Uokombanda kombanda jehi arihe.” Jesus aa vanga kutja ovandu ve tjiwe nawa kutja Mukuru watjiri ouṋe neye wa honga ovandu ohunga nena raMukuru. (Lesa Johanes 17:6.) Jesus wa tja: “Rikotamena ku Muhona Ndjambi woye, nu u karere Ye erike!” (Mateus 4:10) Okutja, otjovakarere vaMukuru eṱe tu horera ku Jesus. Eṱe tu rikotamena ku Jehova erike, tu ungurisa ena re nu tu honga varwe ohunga nena raMukuru na imbi mbi me ketutjitira.

9, 10. Omomiano viṋe mu tu raisirasana orusuvero?

⁹ Matu sokukara norusuvero rwatjiri kovandu. Jesus wa honga ovahongewa ve okusuverasana. (Lesa Johanes 13:35.) Orusuvero rwetu ku novakwetu ru sokutuwaneka otjovangu nomarumbi, kainatja kutja twa za pi, tu nombazu iṋe poo kutja  oweṱe ovatumbe poo ovasyona. (Ovakolose 3:14) Okutja katu i kovita nu katu zepa ovandu. Ombeibela i tja: “Mu ihi otjinga e ri ongahukiro kutja ovanatje vaNdjambi ooveṋe nu imba ovaSatan ooveṋe: Auhe ngu hi nokutjita ousemba, nu ngu ha suverere omukwao, eye kamuatje waNdjambi.” Okuzambo i tja: “Ngatu suverasane. Eṱe atu ha sana ku Kain; eye wa ri owaingwi Omunaurunde, nu wa zepere omuangu we omuini Abel.”—1 Johanes 3:10-12; 4:20, 21.

¹⁰ Tu ungurisa oruveze, omasa nouini wetu kutja tu vatere nokutunduuza varwe. (Ovaheberi 10:24, 25) Tu ‘tjita ouwa ku avehe.’—Ovagalate 6:10.

11. Ongwaye tji tu kambura kutja ondjamo i za mu Jesus Kristus?

¹¹ Matu sokukara nonḓuviro ku Jesus orondu eye omu tu pitira okuyenda ku Mukuru. Ombeibela i tja: “Ondjamo i za mu Jesus porwe, nu kape na ena rarwe nda yandjewa kovandu kombanda yehi arihe Ndjambi me vanga kutja a rire mu twa kuturwa.” (Oviungura 4:12) MEkondwa 5 rembo ndi, twe rihonga kutja Jehova wa hinda Jesus okuyekuyandja omuinyo we otjonguturiro kovandu mbe nonḓuviro. (Mateus 20:28) Jehova wa toorora Jesus kutja ma honapare otjOmbara kombanda yehi arihe. Ombeibela opu i zokuturaera kutja ngatu kare nonḓuviro ku Jesus tji matu vanga okuhupa nga aruhe.—Lesa Johanes 3:36.

12. Omena ratjike tji tu he rihitisa moviṋa vyopolitika?

¹² Katu sokukara norupa moviṋa vyopolitika. Jesus kena pa kara norupa moviṋa vyopolitika. Indu tja ri mombanguriro komurungu wombara yOvaroma, Pilatus, Jesus wa tja: “Ouhona wandje kawouye mbwi.” (Lesa Johanes 18:36.) Otja Jesus, eṱe oweṱe ovaṱakame kOuhona waMukuru womeyuru, okutja kainatja kutja tu kara pi, katu rihitisa moviṋa vyopolitika. Nungwari Ombeibela i tu rakiza kutja ngatu “riwise kehi youhonapare” owo mbu ri ozohoromende. (Ovaroma 13:1) Tu kara nonḓuviro koveta yehi mu tu kara. Nungwari oveta ndji tji mai pirukire omirari vyaMukuru, tu  horera kovaapostele mba tja: “Omundu wa sokukara nonḓuviro ku Ndjambi komeho yokukara nonḓuviro kovandu.”—Oviungura 5:29; Markus 12:17.

13. Ovikeṋa mbi tu zuvarisa ohunga nOuhona waMukuru?

¹³ Tu kambura kutja Ouhona waMukuru auyerike ombu mau yekuzengurura omauzeu wovandu. Jesus wa tja: “Ombuze Ombwa yOuhona” mai zuvarisiwa mouye auhe. (Lesa Mateus 24:14.) Kape nohoromende yovandu ndji mai yenene okutjita oviṋa ohoromende yaMukuru mbi mai ketutjitira. (Epsalme 146:3) Jesus we tu honga okukumbira Ouhona waMukuru indu tja tja: “Ouhona woye ngau ye; ombango yoye ngai tjitwe na kombanda yehi otja meyuru.” (Mateus 6:10) Ombeibela i tu raera kutja Ouhona waMukuru mau nyono omauhona aehe wovandu nu tjazumba owo “au karerere nga aruhe.”—Daniel 2:44.

14. Ove mo munu kutja oouṋe mbe rikotamena ku Mukuru momuano omusemba?

¹⁴ Tji wa zu nokurihonga oviṋa mbi, ripura omuini kutja, ‘Oowaṋi mbe zikamisira omahongero wawo kOmbeibela? Oowaṋi mbe raera varwe ohunga nena raMukuru? Oowaṋi mbe raisirasana orusuvero rwatjiri nu mbe kambura kutja Mukuru wa hinda Jesus okuyekutuyama? Oowaṋi mbe he rihitisa moviṋa vyopolitika? Oowaṋi mbe zuvarisa kutja Ouhona waMukuru auyerike ombu mau yekuzengurura omauzeu wetu?’ Ovahongonone vaJehova porwawo.—Jesaja 43:10-12.

15. Matu sokutjita vi indu tji matu vanga kutja Mukuru ma yakure omerikotameneno wetu?

¹⁵ Okukambura kutja Mukuru okeri uriri, kaku ya yenena. Orondu nandarire ozondemone ze kambura kutja Mukuru okeri, nungwari kaze nonḓuviro ku ye. (Jakobus 2:19) Tji matu vanga kutja Mukuru ma yakure omerikotameneno wetu, katu sokukambura kutja okeri uriri, nungwari matu sokutjita imbi mbi me tu raere wina.

16. Ongwaye tji matu sokunakaura ozongamburiro zoposyo?

 ¹⁶ Indu tji matu vanga kutja Mukuru ma yakure omerikotameneno wetu, matu sokunakaura ongamburiro yoposyo. Omuprofete Jesaja wa tjanga kutja, ‘Twendeye, twendeye, mu ze mo moBabilon! Amu ṱunu koviṋa mbya zerikwa.’ (Jesaja 52:11; 2 Ovakorinte 6:17) Indi eepu ndu matu sokunakaurira otjiṋa ngamwa atjihe tji tji notjiṋa nomerikotameneno woposyo.

17, 18. “Babilon otjinene” otjikeṋa nu ongwaye tji matu sokuhakahana okupoka ku tjo?

¹⁷ Ongamburiro yoposyo oyondji iṋe? Oyo ongamburiro ngamwa aihe ndji tu honga okurikotamena ku Mukuru momuano mbu he ri imbwi mbu ri mOmbeibela. Ombeibela i raisa kutja ozongamburiro azehe zoposyo onḓe ri “Babilon otjinene.” (Omavandururiro 17:5) Omena ratjike? Mena rokutja kombunda yOmupupo woruveze rwaNoa, omahongero omengi woposyo ya utira motjihuro tjaBabilon. Omahongero ngo ya handjauka mouye auhe. Okutara kotjihorera, Ovature vaBabilon aave rikotamene koomukuru vetatumumwe. Kundino wina, ozokereka ozengi ze honga kutja Mukuru i vetatu mumwe, posi yokutja Ombeibela i honga oukahu kutja pena Mukuru umwe uriri watjiri ngu ri Jehova nokutja Jesus Omuna we. (Johanes 17:3) Ovandu ovengi mba turire moBabilon wina aave kambura kutja ovandu ve nomuinyo mbu hupa kombunda yorutu tji rwa koka nu mbu yenena okupya motjovasengwa. Imbwi kauatjiri.—Tara kOmambo wokehi 14, 17 no 18.

¹⁸ Mukuru wa kwizika kutja moruyaveze rwopopezu ozongamburiro azehe zoposyo maze yandekwa. (Omavandururiro 18:8) Ove mo munu kutja ongwaye tje ri ohepero kove okupoka kozongamburiro zoposyo tjimanga? Jehova Mukuru u vanga kutja ove u tjite nao tjimanga ngunda ape noruveze.—Omavandururiro 18:4.

19. Tji wa tye okukarera Jehova, eye me ku tjevere vi?

 ¹⁹ Indu tji wa tye okupoka kozongamburiro zoposyo, omapanga woye poo ovazamumwe na ove tjiva mape ya ave ha yakura ondando yoye nu mape ya ave ku pirukire. Nungwari Jehova kamaa roro okukuesa. Ove mo rire okaṋepo keṱunḓu rOvakriste ovengi mbe ri mouye auhe nu mba suverasana tjiri. Nu mo kara nomaundjiro wokukahupa nga aruhe kombanda yehi mouye oupe. (Markus 10:28-30) Omapanga woye novazamumwe na ove mbaave pirukire ondando yoye yokukarera Jehova, kombunda mape ya ave utu okurihonga Ombeibela.

20. Ongwaye tje ri ohepero okurikotamena ku Mukuru momuano omusemba?

²⁰ Moruyaveze rwopopezu, Mukuru ma yandeke ourunde auhe nu Ouhona we mau honaparere ehi. (2 Petrus 3:9, 13) Indwo tjiri maru rire oruveze oruwa! Ovandu avehe mave kerikotamena ku Jehova momuano Jehova me vanga. Okutja, ohepero kove okutoora omukambo nai wokurikatomena ku Mukuru momuano omusemba.