1. Ono ọ rẹ sae vuẹ omai oghẹrẹ nọ u fo nọ a rẹ gọ Ọghẹnẹ?

EGAGỌ buobu a rẹ ta nọ a bi wuhrẹ uzẹme na kpahe Ọghẹnẹ. Rekọ onana o sae jọ uzẹme he, keme eware nọ egagọ sa-sa a bi wuhrẹ kpahe oghẹrẹ nọ Ọghẹnẹ ọ rrọ gbe epanọ u fo nọ a rẹ rọ gọe i wo ohẹriẹ gaga. Ẹvẹ ma sae rọ riẹ edhere nọ u fo nọ a rẹ rọ gọ Ọghẹnẹ? Jihova ọvo ọ rẹ sae vuẹ omai oghẹrẹ nọ u fo nọ ma rẹ gọe.

2. Ẹvẹ whọ sae rọ riẹ edhere nọ u fo nọ a rẹ rọ gọ Ọghẹnẹ?

² Jihova ọ kẹ omai Ebaibol na re ma sae riẹ edhere nọ u fo nọ ma rẹ rọ gọe. Fikiere wuhrẹ Ebaibol na, who ti wo erere no eware nọ whọ be jariẹ wuhrẹ na ze keme Jihova ọ gwọlọ ewoma ra.​—Aizaya 48:17.

3. Eme Ọghẹnẹ ọ gwọlọ nọ ma ru?

³ Ahwo jọ a rẹ ta nọ egagọ na kpobi e were Ọghẹnẹ, rekọ ere Jesu o wuhrẹ hẹ. Ọ ta nọ: “Orọnikọ ohwo kpobi nọ o bi se omẹ nọ, ‘Olori, Olori,’ ọ te ruọ Uvie obọ odhiwu hu, rekọ ọnọ o bi ru oreva Ọsẹ mẹ.” Fikiere u wuzou gaga re ma riẹ oware nọ oreva Ọghẹnẹ o rrọ ma ve je ru ei. Onana o ginẹ roja keme Jesu o dhesẹ nọ ahwo nọ a bi yoẹme kẹ Ọghẹnẹ hẹ yọ irumuomu, o se rai “enọ i re koko uzi hi.”​—Matiu 7:21-23.

4. Eme Jesu ọ ta kpahe epanọ o te jọ re a ru oreva Ọghẹnẹ?

⁴ Jesu ọ ta kẹ omai no vẹre inọ o te jọ oware olọlọhọ họ re ohwo o ru oreva Ọghẹnẹ. Ọ ta nọ: “Wha rehọ unuẹthẹ ohwahwa na ruọ eva keme edhere nọ o bi su  kpohọ ọraha o riama fihọ, unuẹthẹ na o rrọ kẹkẹe, yọ ibuobu e be rehọ iẹe ruọ eva; rekọ edhere nọ o bi su kpohọ uzuazọ ọ rrọ kekeke, unuẹthẹ na o rrọ hwahwa, yọ umutho ahwo a bi duku ei.” (Matiu 7:13, 14) Edhere ọkeke, koyehọ edhere nọ u fo nọ a rẹ rọ gọ Ọghẹnẹ na o bi su kpohọ uzuazọ ebẹdẹ bẹdẹ. Edhere nọ o riama fihọ, koyehọ edhere nọ o fo ho nọ a rẹ rọ gọ Ọghẹnẹ na o bi su kpohọ uwhu. Rekọ Jihova ọ gwọlọ nọ ohwo ọvo o whu hu. Ọ kẹ ohwo kpobi uvẹ nọ o re ro wuhrẹ kpahe iẹe.​—2 Pita 3:9.

5. Ẹvẹ ma sai ro vuhu ahwo nọ a be gọ Ọghẹnẹ evaọ edhere nọ u fo?

⁵ Jesu ọ ta nọ ma rẹ sai vuhu ahwo nọ a be rọ edhere nọ u fo gọ Ọghẹnẹ. Ma rẹ sae ruẹ onana nọ ma tẹ kiẹ eware nọ a rọwo gbe eware nọ a bi ru riwi. Ọ ta nọ: “Ibi rai wha re ro vuhu ai.” O fibae nọ: “Emamọ ure kpobi o rẹ mọ emamọ ubi.” (Matiu 7:16, 17) Orọnikọ onana u dhesẹ nọ ahwo nọ a be gọ Ọghẹnẹ yọ ahwo nọ a rrọ gbagba ha. Rekọ idibo Ọghẹnẹ a rẹ daoma ẹsikpobi re a ru oware nọ u kiehọ. Obọnana ma te ruẹ eware nọ i ti fiobọhọ kẹ omai vuhu ahwo nọ a be gọ Ọghẹnẹ evaọ edhere nọ u fo.

6, 7. Fikieme oware kpobi nọ egagọ uzẹme u bi ru u re ro no Ebaibol na ze? Eme oriruo Jesu o wuhrẹ omai?

⁶ U fo nọ eware nọ ma be jọ egagọ mai ru i re no Ebaibol ze. Ebaibol na ọ ta nọ: “Ẹkwoma ẹzi Ọghẹnẹ a ro kere Ikereakere na kpobi, yọ e rẹ kẹ erere nọ a tẹ be rehọ ai wuhrẹ, kẹ uthubro, kpọ eware vi, whọku ohwo evaọ ẹrẹreokie, re ohwo Ọghẹnẹ ọ sai te ziezi, ruẹrẹ oma kpahe ziezi kẹ iruo iwoma kpobi.” (2 Timoti 3:16, 17) Pọl ukọ na o kere se Ileleikristi inọ: “Nọ wha yo  ẹme Ọghẹnẹ, onọ wha jọ unu mai yo, wha jẹ riẹ rehọ, orọnikọ wọhọ ẹme ahwo-akpọ họ rekọ wọhọ epanọ o ginẹ rrọ, ẹme Ọghẹnẹ.” (1 Ahwo Tẹsalonika 2:13) Eware kpobi nọ egagọ uzẹme a re ru i re no Ẹme Ọghẹnẹ, Ebaibol na ze. Orọnikọ eware nọ ahwo a roro nọ i kiehọ, iruemu ẹwho, hayo eware efa a rẹ jọ egagọ uzẹme ru hu.

⁷ Eware kpobi nọ Jesu o wuhrẹ i no Ẹme Ọghẹnẹ ze. (Se Jọn 17:17.) Ọ jẹ hae rehọ ẹme no Ikereakere na ze ẹsikpobi. (Matiu 4:4, 7, 10) Enọ e be rọ edhere uzẹme gọ Ọghẹnẹ a re si oware kpobi nọ a bi wuhrẹ no Ebaibol na ze wọhọ epanọ Jesu o je ru.

8. Eme Jesu o wuhrẹ omai kpahe oghẹrẹ nọ ma rẹ gọ Jihova?

⁸ Jihova ọvo họ ọnọ ma rẹ gọ. Olezi 83:18 o ta nọ: “Ọnọ odẹ riẹ o rrọ Jihova, whẹ ọvo họ Ọnọ Ọ Mai Kpehru vi otọakpọ na kpobi.” Jesu ọ gwọlọ nọ ahwo a riẹ oghẹrẹ ohwo nọ Ọghẹnẹ uzẹme na ọ ginẹ rrọ, yọ o wuhrẹ ahwo odẹ Ọghẹnẹ. (Se Jọn 17:6.) Jesu ọ ta nọ: “Jihova Ọghẹnẹ ra o gba owhẹ họ nọ whọ rẹ gọ, yọ ọye ọvo o gba owhẹ họ nọ who re ru iruo ọrẹri kẹ.” (Matiu 4:10) Fikiere mai idibo Ọghẹnẹ ma rẹ rọ aro kele oriruo Jesu. Jihova ọvo họ ọnọ ma rẹ gọ, ma re se odẹ riẹ je wuhrẹ ahwo odẹ Ọghẹnẹ gbe eware nọ o ti ru kẹ omai.

9, 10. Ẹvẹ ma sai ro dhesẹ uyoyou kẹ ohwohwo?

⁹ O gwọlọ nọ ma re wo uvi uyoyou kẹ ahwo. Jesu o wuhrẹ ilele riẹ inọ a you ohwohwo. (Se Jọn 13:35.) Oria nọ ma no ze, iruemu ẹwho mai, te ma fe te ma yogbe, eyena kpobi i muẹme he. U fo nọ uyoyou nọ ma wo kẹ ohwohwo u fiobọhọ kẹ omai wo okugbe wọhọ inievo emezae gbe emetẹ. (Ahwo Kọlọsi 3:14) Fikiere ma re kpohọ ẹmo nyai kpe ahwo ho. Ebaibol na  ọ ta nọ: “Onana a re ro vuhu emọ Ọghẹnẹ avọ emọ Ẹdhọ: Ohwo kpobi nọ o bi ru oware nọ u kiẹrẹe he o no obọ Ọghẹnẹ ze he, yọ ohwo nọ o you oniọvo riẹ hẹ o no obọ Ọghẹnẹ ze gbe he.” O fibae nọ: “Ma re you ohwohwo; orọnikọ ma rẹ jọ wọhọ Keni hi, ọnọ o no obọ omuomu na ze nọ o kpe oniọvo-ọmọzae riẹ.”​—1 Jọn 3:10-12; 4:20, 21.

¹⁰ Ma rẹ rọ oke mai, ẹgba mai gbe eware nọ ma wo ro fiobọhọ kẹ amọfa, ma vẹ jẹ tuduhọ ohwohwo awọ. (Ahwo Hibru 10:24, 25) Ma re ru “oware uwoma kẹ ahwo kpobi.”​—Ahwo Galesha 6:10.

11. Fikieme u ro fo re ma jẹ Jesu rehọ inọ ọye họ edhere nọ ma re ro te Ọghẹnẹ oma?

¹¹ Ma re yoẹme kẹ Jesu keme ọye họ edhere nọ ma re ro te Ọghẹnẹ oma. Ebaibol ọ ta nọ: “Ohwo ọfa ọ riẹ hẹ nọ a rẹ rọ ẹkwoma riẹ wo esiwo, keme odẹ ọfa o rrọ otọakpọ na ha nọ Ọghẹnẹ ọ kẹ nọ a re ro siwi omai.” (Iruẹru Ikọ 4:12) Evaọ Uzou avọ 5 orọ obe nana, ma wuhrẹ nọ Jihova o vi Jesu ze re ọ rehọ uzuazọ riẹ ta ahwo-akpọ nọ a yoẹme no igbo. (Matiu 20:28) Jihova ọ salọ Jesu no re ọ jọ Ovie nọ o ti su otọakpọ na. Oyejabọ nọ Ebaibol na ọ rọ ta kẹ omai nọ ma re yoẹme kẹ Jesu otẹrọnọ ma gwọlọ wo uzuazọ ebẹdẹ bẹdẹ.​—Se Jọn 3:36.

12. Fikieme ma gbe ro dhomahọ eware ivotu hayo isuẹsu hu?

¹² Ma re dhomahọ eware ivotu hayo isuẹsu hu. Jesu o dhomahọ isuẹsu hu. Okenọ a jẹ rehọ iẹe gu ẹdhọ, ọ ta kẹ Pailet osu nọ ahwo Rom a ro mu inọ: “Uvie mẹ u wo obọ kugbe akpọ nana ha.” (Se Jọn 18:36.) Ma rẹ rọ aro kele Jesu, ma vẹ jọ abọ Uvie odhiwu na ọvo, yọ fiki onana ma re dhomahọ eware ivotu hayo isuẹsu hu evaọ oria kpobi nọ ma be rria. Rekọ  Ebaibol na o jie uzi kẹ omai nọ ma yoẹme kẹ “enọ i wo udu-esuo okpehru” na, koyehọ ahwo egọmeti. (Ahwo Rom 13:1) Ma re koko izi nọ a fihọ evaọ orẹwho nọ ma be rria. Rekọ ma riẹ nọ a te fi uzi jọ họ nọ o wọso izi Ọghẹnẹ, ma rẹ rọ aro kele ikọ na nọ e ta nọ: “Ọghẹnẹ họ osu nọ ma re yoẹme kẹ orọnikọ ahwo ho.”​—Iruẹru Ikọ 5:29; Mak 12:17.

13. Usi uwoma vẹ ma be ta kpahe Uvie Ọghẹnẹ?

¹³ Ma rọwo nọ Uvie Ọghẹnẹ ọvo o ti ku ebẹbẹ akpọ na họ. Jesu ọ ta nọ a rẹ “ta usi uwoma Uvie na evaọ akpọ na soso.” (Se Matiu 24:14.) Egọmeti ọvuọvo ọ rrọ akpọ na ha nọ ọ rẹ sai ru oware nọ Uvie Ọghẹnẹ u ti ru kẹ omai. (Olezi 146:3) Jesu o wuhrẹ omai nọ ma lẹ kẹ Uvie Ọghẹnẹ, ọ ta nọ: “Jọ Uvie ra o ze. Jọ oreva ra u rugba evaọ otọakpọ na, wọhọ epanọ o rrọ evaọ obọ odhiwu.” (Matiu 6:10) Ebaibol na ọ ta nọ Uvie Ọghẹnẹ o te raha egọmeti ahwo-akpọ kpobi no, kẹsena “oye ọvo u ve ti dikihẹ bẹdẹ bẹdẹ.”​—Daniẹl 2:44.

14. Amono whọ ruẹ nọ a be gọ Ọghẹnẹ evaọ edhere nọ u fo?

¹⁴ Nọ who wuhrẹ eware nana no na, nọ omara nọ: ‘Amono a bi wuhrẹ eware nọ i no Ebaibol ze? Amono a bi wuhrẹ ahwo odẹ Ọghẹnẹ? Amono a wo uvi uyoyou kẹ ohwohwo jẹ rọwo nọ Ọghẹnẹ o vi Jesu ze ti siwi omai? Amono a bi dhomahọ ivotu gbe isuẹsu hu? Amono a be ta kẹ ahwo nọ Uvie Ọghẹnẹ ọvo o ti ku ebẹbẹ mai họ?’ Isẹri Jihova ọvo.​—Aizaya 43:10-12.

15. Eme ma re ru ma tẹ gwọlọ nọ Ọghẹnẹ ọ jẹ egagọ mai rehọ?

¹⁵ U te he re whọ rọwo nọ Ọghẹnẹ ọ rrọ. Makọ idhivẹri na dede a rọwo nọ Ọghẹnẹ ọ rrọ, rekọ a bi yoẹme kẹe he. (Jemis 2:19) Ma tẹ gwọlọ nọ Ọghẹnẹ ọ jẹ egagọ  mai rehọ, orọnikọ ma rẹ rọwo ọvo nọ Ọghẹnẹ ọ rrọ họ rekọ ma re ru oware nọ ọ ta.

16. Fikieme ma rẹ rọ nyasiọ egagọ erue ba?

¹⁶ Re Ọghẹnẹ ọ sae jẹ egagọ mai rehọ, ma rẹ nyasiọ egagọ erue ba. Aizaya ọruẹaro na o kere nọ: “Wha no udevie riẹ no, wha ru omarai fo.” (Aizaya 52:11; 2 Ahwo Kọrint 6:17) Oyejabọ nọ u je fo nọ ma rẹ kẹnoma kẹ oware kpobi nọ u wobọ kugbe egagọ erue.

17, 18. Eme họ “Babilọn Ologbo na,” kọ fikieme u ro fo nọ who noi no kpata kpata?

¹⁷ Eme họ egagọ erue? Egagọ erue họ egagọ kpobi nọ o bi wuhrẹ omai re ma gọ Ọghẹnẹ evaọ edhere nọ ọ wọso Ẹme riẹ. Ebaibol na o se egagọ erue kpobi “Babilọn Ologbo na.” (Eviavia 17:5) Fikieme? Nọ Owhe oke Noa o ku kpọ no, ahwo a te mu iwuhrẹ erue buobu họ ewuhrẹ evaọ okpẹwho nọ a re se Babilọn. Iwuhrẹ erue yena e tẹ vaha ruọ otọakpọ na kpobi. Wọhọ oriruo, ahwo nọ a jẹ rria Babilọn a jẹ hae gọ eghẹnẹ esa kugbe. Epọvo na nẹnẹ re, egagọ buobu a bi wuhrẹ nọ Ọghẹnẹ uzẹme na yọ eghẹnẹ esa nọ e rrọ ọvo, rekọ Ebaibol na o dhesẹ vevẹ nọ Jihova Ọghẹnẹ uzẹme na yọ Ọghẹnẹ Ọvo, Jesu ọ tẹ rrọ Ọmọ riẹ. (Jọn 17:3) U te no ere no, ahwo nọ a jẹ rria Babilọn a rọwo nọ otẹrọnọ ohwo o whu, oware jọ o rrọ oma riẹ nọ o rẹ gbẹ jọ uzuazọ, yọ o rẹ sai kpohọ ehẹle nyae ruẹ uye. Oyena yọ uzẹme he.​—Rri Ẹme-Oruvẹ 14, 17, gbe 18.

¹⁸ Ọghẹnẹ ọ ta nọ kẹle na a te raha egagọ erue kpobi no. (Eviavia 18:8) Kọ whọ ruẹ oware nọ u ro fo re who no egagọ erue kpata kpata? Jihova Ọghẹnẹ ọ gwọlọ nọ who no egagọ erue obọnana nọ uvẹ na o gbẹ riẹ na.​—Eviavia 18:4.

19. Whọ tẹ jiroro nọ whọ rẹ gọ Jihova, ẹvẹ ọ te rọ rẹrote owhẹ?

 ¹⁹ Nọ whọ tẹ ta nọ who bi no egagọ erue no re whọ gọ Jihova, o te kẹ egbẹnyusu gbe ahwo uwou ra uye, yọ a sai tube ru akpọ bẹ owhẹ dede. Rekọ Jihova ọ te nyasiọ owhẹ ba ha. Who ti zihe ruọ ohwo uviuwou akpọ soso nọ ima ahwo buobu nọ a you ohwohwo a rrọ, yọ who ti wo ẹruore uzuazọ ebẹdẹ bẹdẹ evaọ akpọ ọkpokpọ Ọghẹnẹ. (Mak 10:28-30) Ẹsejọhọ, egbẹnyusu gbe ahwo uwou ra jọ nọ e jẹ wọso owhẹ fikinọ whọ ta nọ whọ rẹ gọ Jihova a ti nwene iroro a ve ti mu Ebaibol na họ ewuhrẹ.

20. Fikieme u ro wuzou gaga re whọ gọ Ọghẹnẹ evaọ edhere nọ u fo?

²⁰ Kẹle na Ọghẹnẹ ọ te raha emuemu kpobi no, Uvie riẹ u ve ti su akpọ na soso. (2 Pita 3:9, 13) Onana u ti woma kẹhẹ! Ohwo kpobi ọ te gọ Jihova evaọ edhere nọ Jihova ọ gwọlọ nọ ma rọ gọe. Fikiere u wuzou gaga re who ru oware jọ obọnana re whọ gọ Ọghẹnẹ evaọ edhere nọ u fo.