1. Ken ki pode fla-nu modi ki nu debe adora Deus?

KUAZI tudu relijion ta fla ma es ta inxina verdadi sobri Deus. Má é ka verdadi, pamodi kada un ta inxina di se manera, kada un ta fla pa nu adora Deus di un manera. Modi ki nu pode sabe kal ki é adorason ki Deus ta seta? É sô Jeová ki pode fla-nu modi ki nu debe adora-l.

2. Modi ki bu pode prende adora Deus sima el ta krê?

² Jeová da-nu Bíblia pa nu pode prende modi ki nu debe adora-l. Nton, si bu studa Bíblia Jeová ta djuda-u tra pruvetu di kuzas ki el ta inxina pamodi el ta preokupa ku bo. — Isaías 48:17.

3. Kuzê ki Deus krê pa nu faze?

³ Alguns algen ta fla ma Deus ta seta tudu relijion, má é ka si ki Jizus inxina-nu. Jizus fla: ‘É ka tudu algen ki fla-m: ‘Sinhor, sinhor’, ki ta entra na Reinu di Séu, má sô kel ki faze vontadi di nha Pai’. Nton, kel-li ta mostra ma nu meste sabe kal ki é vontadi di Deus i faze sima el ta fla. Kel-li é un asuntu sériu, pamodi Jizus konpara kes algen ki ka ta obi ku Deus ku algen kriminozu. — Mateus 7:21-23.

4. Kuzê ki Jizus fla sobri faze vontadi di Deus?

⁴ Jizus aviza se disiplus ma faze vontadi di Deus é ka faxi. El fla: ‘Nhos entra pa porton stretu; pamodi kaminhu ki ta leba pa distruison é largu i grandi i  txeu algen ta bai pa la; má porton i kaminhu ki ta leba pa vida é stretu i pertadu, i kes algen ki ta atxa-l é poku.’ (Mateus 7:13, 14 ) Ken ki ta sigi kel kaminhu pertadu ô ken ki ta adora Deus sima el ta manda, ta ben vive pa tudu ténpu. Ken ki ta sigi kel kaminhu largu ô kes algen ki ka ta faze kuzas ki Deus ta manda, ta ben perde ses vida. Má Jeová ka krê pa ningen móre. Pur isu, el ta da tudu algen xansi pa prende se vontadi. — 2 Pedro 3:9.

5. Modi ki nu pode sabe ken ki é kes algen ki ta adora Deus sima el ta manda?

⁵ Jizus fla ma nu ta konsigi odja ken ki ta adora Deus sima el ta manda, si nu izamina kuzê ki es ta kridita na el i kuzê ki es ta faze. Jizus fla: ‘Pa ses frutu nhos ta konxe-s.’ Tanbê el fla: ‘Tudu arvi bon ta da frutu bon’. (Mateus 7:16, 17 ) Kel-li ka krê fla ma tudu kes algen ki ta adora Deus é perfetu. Má algen ki ta sirbi Deus, sénpri ta tenta faze kuzas dretu. Gósi nu sta ben odja kuzê ki ta djuda-nu sabe ken ki é kes algen ki ta adora Deus sima el ta manda.

6, 7. (a) Pamodi ki kristons verdaderu ta sigi sô kel ki sta na Bíblia? (b) Kuzê ki izénplu di Jizus ta inxina-nu?

⁶ Nu debe adora Deus sima sta na Bíblia. Bíblia ta fla: ‘Tudu ki sta na Skritura ben di Deus i el ta sirbi pa inxina, pa koriji, pa poi kuzas na kaminhu, pa disiplina ku justisa, pa ki ómi di Deus ser totalmenti kapás, ben priparadu pa tudu bon óbra.’ (2 Timóteo 3:16, 17 ) Apóstlu Polu skrebe pa kristons di se ténpu: ‘Kantu nhos resebe palavra di Deus, ki  nhos obi di nos, nhos ka seta-l sima palavra di ómis, má sima kel ki el é dimé-divéra, palavra di Deus’. (1 Tessalonicenses 2:13 ) Kristons verdaderu ta sigi sô kel ki sta na Bíblia, ki é Palavra di Deus. Es ka ta sigi ideias nen tradisons di ómi.

⁷ Jizus ta uzaba Skrituras pa inxinaba pesoas. (Lé João 17:17.) El ta flaba kuzê ki sta skrebedu na Skrituras. (Mateus 4:4, 7, 10 ) Izénplu di Jizus ta mostra ma tudu kuzas ki kristons verdaderu ta inxina debe sta na Bíblia.

8. Kuzê ki Jizus fla sobri adora Jeová?

⁸ Nu debe adora sô Jeová. Salmo 83:18 ta fla: ‘Bu nómi é Jeová, sô bo ki é Kel Más Grandi riba Téra interu.’ Jizus ta inxinaba pesoas nómi di Deus pamodi el kreba pa pesoas konxeba ken ki é Deus verdaderu. (Lé João 17:6.) Jizus fla: ‘Adora Jeová bu Deus i é sô el ki bu debe sirbi.’ (Mateus 4:10 ) Pur isu, nu ta sigi izénplu di Jizus sima kristons verdaderu debe faze. Nu ta adora sô Jeová, nu ta uza se nómi, nu ta inxina otus algen kal ki é nómi di Deus i kuzê ki el ta ben faze pa nos.

9, 10. Modi ki nu ta mostra ma nu ta ama kunpanheru?

⁹ Nu debe ama kunpanheru di korason. Jizus inxina se disiplus ma es debe ama kunpanheru. (Lé João 13:35.) Ka ta nporta lugar ki nu ta vive, nos kultura ô si nos é riku ô póbri. Nos amor pa kunpanheru debe uni-nu sima si nos tudu é irmons ku irmans. (Colossenses 3:14 ) Pur isu, nu ka ta bai pa géra i nen nu ka ta mata algen. Bíblia ta fla: ‘Di es manera nu ta sabe ken ki é fidjus di Deus i ken ki é fidjus  di Diabu: Kel ki ka ta faze justisa, el ka ben di Deus nen kel ki ka ta ama se irmon.’ Tanbê el ta fla: ‘Nu debe ama kunpanheru; ka sima Kain ki ben di Malvadu ki mata se irmon.’ — 1 João 3:10-12 ; 4:20, 21.

¹⁰ Es ta uza ses ténpu, ses forsa i kuza ki es ten pa djuda i pa da kunpanheru koraji. (Hebreus 10:24, 25 ) Nu ta faze bondadi pa tudu algen. — Gálatas 6:10.

11. Pamodi ki nu ta kridita ma Jizus ki é kaminhu pa salvason?

¹¹ Nu ta sigi Jizus pamodi el ki é kaminhu pa salvason. Bíblia ta fla: ‘Na ningen más ka ten salvason, pamodi na mundu interu, ka ten ninhun otu nómi dadu pa Deus ki nu meste pa salva-nu.’ (Atus 4:12, BPK ) Na kapítlu 5 nu prende ma Jeová manda Jizus pa ben da se vida pa salva kes algen ki ta obi ku el. (Mateus 20:28 ) Jeová skodje Jizus pa ser Rei i pa el governa Téra. É pamô kel-li ki Bíblia ta fla-nu ma nu meste obi ku Jizus si nu krê vive pa tudu ténpu. — Lé João 3:36.

12. Pamodi ki nu ka ta partisipa na pulítika?

¹² Nu ka ta partisipa na pulítika. Jizus ka ta partisipaba na pulítika. Kantu el staba ta ser julgadu, el fla Pilatus, ki éra un governador: ‘Nha Reinu ka ta faze párti di es mundu.’ (Lé João 18:36.) Sima Jizus, nos é lial pa Reinu di Deus. Pur isu, ka ta nporta na undi ki nu ta mora, nu ka ta mete na pulítika. Má nu ta obi ku lei di país undi ki nu ta vive pamodi Bíblia ta fla ma kristons debe ruspeta govérnus di ómi. (Romanos 13:1 ) Má si ses lei ta ba kóntra lei di Deus, nu ta imita kes apóstlu ki fla: ‘Nu ten ki obi ku Deus pamodi el ki ta manda, envês di ómis.’ — Atos 5:29; Marcos 12:17.

13. Kuzê ki nu ta inxina sobri Reinu di Deus?

 ¹³ Nu ta kridita ma é sô Reinu di Deus ki ta rezolve prublémas di mundu. Jizus fla ma ‘notísias sábi di Reinu’ ta sérba pregadu na mundu interu. (Lé Mateus 24:14.) Ninhun govérnu di ómi ka ta pode faze kel ki Reinu di Deus ta ben faze pa nos. (Salmos 146:3 ) Jizus inxina-nu ora pa nu pidi Reinu di Deus kantu el fla: ‘Faze bu Reinu ben. Pa bu vontadi fazedu na Séu, asi tanbê na Téra.’ (Mateus 6:10 ) Bíblia ta fla-nu ma Reinu di Deus ta ben kaba ku tudu govérnus di ómi i ‘el própi ta fika pa tudu ténpu’. — Daniel 2:44.

14. Ken ki bu ta atxa ma sta ta adora Deus sima el ta manda?

¹⁴ Dipôs di studa es asuntu, pergunta bu kabésa: ‘Ken ki ta inxina ku bazi na Bíblia? Ken ki ta fala ku otus algen sobri nómi di Deus? Ken ki ta mostra amor pa kunpanheru di korason i ki ta kridita ma Deus manda Jizus pa ben salva-nu? Ken ki ka ta mete na pulítika? Ken ki ta prega ma é sô Reinu di Deus ki ta ben rezolve-nu nos prublémas?’ É sô Tistimunhas di Jeová ki ta faze kel-li. — Isaías 43:10-12.

15. Kuzê ki nu meste faze pa Deus seta nos adorason?

¹⁵ Sô kridita ma Deus ta izisti, ka ta txiga. Bíblia ta fla ma ti dimónis ta kridita ma Deus ta izisti, má es ka ta obi ku el. (Tiago 2:19 ) Kel-li ta mostra ma nu meste faze más di ki sô kridita ma Deus ta izisti. Si nu krê pa Deus seta nos adorason nu meste faze kel ki el ta manda.

16. Pamodi ki nu meste bandona relijion falsu?

 ¹⁶ Pa Deus seta nos adorason nu meste bandona relijion falsu. Proféta Izaías fla: ‘Nhos sai di la, nhos mante puru’. (Isaías 52:11; 2 Coríntios 6:17 ) Pur isu, nu meste fika lonji di tudu kuza ki ten aver ku relijion falsu.

17, 18. (a) Kuzê ki é ‘Babilónia, kel Grandi’? (b) Pamodi ki nu debe sai di relijion falsu más faxi ki nu pode?

¹⁷ Modi ki nu ta sabe ma un relijion é falsu? Nu ta sabe ma el é falsu si el ta inxina kuzas ki ta bai kóntra kel ki sta na Bíblia. Bíblia ta txoma tudu kes relijion falsu di ‘Babilónia, kel Grandi’. (Apocalipse 17:5 ) Pamodi? Dipôs di Dilúviu di ténpu di Nué, ensinus falsu kumesa na sidadi di Babilónia. Pur izénplu, es ta kriditaba na Trindadi, ki krê fla três deus na un. Oji tanbê, txeu relijion ta inxina ma Deus ta faze párti di Trindadi, três deus na un. Má Bíblia ta fla klaru ma ten sô un Deus verdaderu ki é Jeová i ma Jizus é se Fidju. Tanbê es ta kriditaba ma spritu di mortus ta kontinuaba ta vive na un otu lugar i ma es podia kemaba na inférnu. Má kes ensinu ki ta fla ma alma ô spritu ka ta móre i ma es pode kema na inférnu, ka sta na Bíblia. — João 17:3 ; djobe pártis PRENDE MÁS n^u 14, 17 i 18.

¹⁸ Nu debe sai di relijion falsu más faxi ki nu pode, pamodi Deus fla, ma ka ta dura, tudu relijion falsu ta ben ser distruídu. (Apocalipse 18:8 ) Jeová krê pa bu faze kel-li antis di ser tardi dimás. — Apocalipse 18:4.

19. Óras ki bu disidi sirbi Jeová, ken ki ta kuida di bo?

¹⁹ Óras ki bu disidi adora Deus i bandona relijion  falsu, talvês bu família i bus amigu pode ka ntende bu disizon i es pode ti fika kóntra bo. Má Jeová nunka ka ta bandona-u. Bu ta pasa ta faze párti di un família na mundu interu ki ten milhons di algen ki ta ama kunpanheru di korason. I bu ta ten speransa di vive pa tudu ténpu na kel mundu novu di Deus. (Marcos 10:28-30 ) Ku ténpu, talvês alguns di bus amigu i bu família ki gósi ka krê pa bu sirbi Jeová, pode ben studa Bíblia.

20. Pamodi ki é inportanti adora Jeová sima el ta manda?

²⁰ Ka ta dura Deus ta ben kaba ku tudu maldadi. Reinu di Deus ta ben governa Téra. (2 Pedro 3:9, 13 ) Ta ben ser un ténpu rei di sábi! Tudu algen ta ben adora sô Jeová. Pur isu, é inportanti bu disidi sirbi Jeová gósi sima el ta manda.