ជំពូកទី១៥
ការគោរពប្រណិប័តន៍ព្រះតាមរបៀបត្រឹមត្រូវ
១. តើអ្នកណាមានសិទ្ធិប្រាប់យើងអំពីរបៀបត្រឹមត្រូវដើម្បីគោរពប្រណិប័តន៍ព្រះ?
សាសនាភាគច្រើនអះអាងថាពួកគេបង្រៀនសេចក្ដីពិតអំពីព្រះ។ ប៉ុន្ដែ នេះមិនអាចទៅរួចទេ ពីព្រោះសាសនាទាំងនោះមានសេចក្ដីបង្រៀនខុសៗគ្នាអំពីព្រះ និងអំពីរបៀបដែលយើងគួរគោរពប្រណិប័តន៍លោក។ តើយើងអាចដឹងអំពីរបៀបត្រឹមត្រូវដើម្បីគោរពប្រណិប័តន៍ព្រះយ៉ាងដូចម្ដេច? ព្រះយេហូវ៉ាជាបុគ្គលតែមួយគត់ដែលអាចប្រាប់យើងអំពីរបៀបដែលយើងគួរគោរពប្រណិប័តន៍លោក។
២. តើតាមរបៀបណាអ្នកអាចដឹងអំពីរបៀបត្រឹមត្រូវដើម្បីគោរពប្រណិប័តន៍ព្រះ?
២ ព្រះយេហូវ៉ាបានផ្ដល់គម្ពីរឲ្យយើង ដូច្នេះយើងអាចរៀនអំពីរបៀបគោរពប្រណិប័តន៍លោកយ៉ាងត្រឹមត្រូវ។ ហេតុនេះ សូមសិក្សាគម្ពីរ ហើយព្រះយេហូវ៉ានឹងជួយអ្នកឲ្យទទួលប្រយោជន៍ពីសេចក្ដីបង្រៀនរបស់លោក ពីព្រោះលោកយកចិត្ដទុកដាក់យ៉ាងខ្លាំងចំពោះអ្នក។—អេសាយ ៤៨:១៧
៣. តើព្រះចង់ឲ្យយើងធ្វើអ្វី?
៣ មនុស្សខ្លះជឿថាព្រះពេញចិត្ដនឹងសាសនាទាំងអស់ ប៉ុន្ដែនេះមិនមែនជាអ្វីដែលលោកយេស៊ូបង្រៀនទេ។ លោកបានមានប្រសាសន៍ថា៖ «មិនមែនអស់អ្នកដែលនិយាយមកខ្ញុំថា៖‹លោកម្ចាស់! លោកម្ចាស់!› នឹងចូលក្នុងរាជាណាចក្រស្ថានសួគ៌ឡើយ តែគឺអ្នកណាដែលធ្វើតាមបំណងប្រាថ្នានៃបិតា»។ ដូច្នេះ គឺជាការចាំបាច់ដែលយើងរៀនឲ្យដឹងអំពីបំណងប្រាថ្នារបស់ព្រះ ហើយធ្វើតាមបំណងប្រាថ្នាទាំងនោះ។ នេះគឺជារឿងធ្ងន់ធ្ងរណាស់ ពីព្រោះលោកយេស៊ូបានប្រៀបប្រដូចអ្នកដែលមិនស្តាប់បង្គាប់ព្រះទៅនឹងឧក្រិដ្ឋជនឬ«មនុស្សប្រព្រឹត្ដប្រឆាំងច្បាប់»។—ម៉ាថាយ ៧:២១-២៣
៤. តើលោកយេស៊ូបានមានប្រសាសន៍យ៉ាងណាស្ដីអំពីការធ្វើតាមបំណងប្រាថ្នារបស់ព្រះ?
៤ លោកយេស៊ូបានព្រមានយើងថាពេលយើងចង់ធ្វើតាមបំណងប្រាថ្នារបស់ព្រះ យើងនឹងជួបទុក្ខលំបាក។ លោកបានមានប្រសាសន៍ថា៖ «ចូរចូលតាមខ្លោងទ្វារតូច ពីព្រោះផ្លូវដែលនាំទៅដល់ការវិនាសជីវិត គឺធំហើយទូលាយផង ក៏មានមនុស្សច្រើនចូលតាមផ្លូវនោះ។ រីឯផ្លូវដែលទៅឯជីវិត នោះចង្អៀត ក៏មានខ្លោងទ្វារតូចផង ហើយមានមនុស្សតិចណាស់ដែលរកផ្លូវនោះឃើញ»។ (ម៉ាថាយ ៧:១៣, ១៤) ផ្លូវចង្អៀតឬរបៀបត្រឹមត្រូវដើម្បីគោរពប្រណិប័តន៍ព្រះ នាំទៅដល់ជីវិតដែលគ្មានទីបញ្ចប់។ ផ្លូវធំទូលាយឬរបៀបមិនត្រឹមត្រូវដើម្បីគោរពប្រណិប័តន៍ព្រះ នាំទៅដល់សេចក្ដីស្លាប់។ ប៉ុន្ដែ ព្រះយេហូវ៉ាមិនចង់ឲ្យអ្នកណាម្នាក់ស្លាប់ទេ។ លោកផ្ដល់ឱកាសឲ្យមនុស្សទាំងអស់រៀនអំពីលោក។—ពេត្រុសទី២ ៣:៩
របៀបត្រឹមត្រូវដើម្បីគោរពប្រណិប័តន៍ព្រះ
៥. តើតាមរបៀបណាអ្នកអាចដឹងថាអ្នកណាជាអ្នកដែលគោរពប្រណិប័តន៍ព្រះតាមរបៀបត្រឹមត្រូវ?
៥ លោកយេស៊ូបានមានប្រសាសន៍ថាយើងអាចដឹងថាអ្នកណាជាអ្នកដែលគោរពប្រណិប័តន៍ព្រះតាមរបៀបត្រឹមត្រូវ។ យើងធ្វើដូច្នេះដោយពិនិត្យមើលអ្វីដែលពួកគេជឿនិងអ្វីដែលពួកគេប្រព្រឹត្ដ។ លោកបានមានប្រសាសន៍ថា៖ «អ្នករាល់គ្នានឹងស្គាល់ពួកគេដោយផលផ្លែរបស់ពួកគេ»។ រួចមក លោកបន្ថែមថា៖ «ដើមឈើល្អ បង្កើតផលល្អ»។ (ម៉ាថាយ ៧:១៦, ១៧) នេះមិនមែនមានន័យថាពួកអ្នកដែលគោរពប្រណិប័តន៍ព្រះមានការប្រព្រឹត្ដល្អឥតខ្ចោះនោះទេ។ យ៉ាងណាក្ដី អ្នកបម្រើរបស់ព្រះតែងតែព្យាយាមធ្វើអ្វីដែលត្រឹមត្រូវ។ ឥឡូវ យើងនឹងពិចារណាអំពីអ្វីដែលនឹងជួយយើងឲ្យដឹងថាអ្នកណាជាអ្នកដែលគោរពប្រណិប័តន៍ព្រះតាមរបៀបត្រឹមត្រូវ។
៦, ៧. ហេតុអ្វីការគោរពប្រណិប័តន៍ពិតមានមូលដ្ឋានលើគម្ពីរ? តើគំរូរបស់លោកយេស៊ូបង្រៀនយើងអំពីអ្វី?
៦ ការគោរពប្រណិប័តន៍របស់យើងគួរមានមូលដ្ឋានលើគម្ពីរ។ គម្ពីរចែងថា៖ «គ្រប់ទាំងបទគម្ពីរបានត្រូវសរសេរក្រោមការដឹកនាំរបស់ព្រះ ហើយមានប្រយោជន៍សម្រាប់បង្រៀន កែតម្រង់ ធ្វើឲ្យត្រឹមត្រូវឡើងវិញ និងប្រដៅក្នុងផ្លូវសុចរិត ដើម្បីឲ្យអ្នកបម្រើរបស់ព្រះមានសមត្ថភាពពេញលេញ និងត្រៀមលក្ខណៈសព្វគ្រប់ដើម្បីធ្វើការល្អគ្រប់យ៉ាង»។ (ធីម៉ូថេទី២ ៣:១៦, ១៧) សាវ័កប៉ូលបានសរសេរទៅកាន់គ្រិស្ដសាសនិកថា៖ «ពេលដែលអ្នករាល់គ្នាទទួលបណ្ដាំរបស់ព្រះ គឺជាបណ្ដាំដែលអ្នករាល់គ្នាបានឮពីយើង អ្នករាល់គ្នាមិនបានទទួលទុកជាបណ្ដាំរបស់មនុស្សទេ ប៉ុន្ដែបានទទួលតាមភាពពិតនៃបណ្ដាំនោះ ពោលគឺទទួលទុកជាបណ្ដាំរបស់ព្រះ»។ (ថែស្សាឡូនិចទី១ ២:១៣) ការគោរពប្រណិប័តន៍ពិតមានមូលដ្ឋានលើគម្ពីរដែលជាបណ្ដាំរបស់ព្រះប៉ុណ្ណោះ មិនមែនមានមូលដ្ឋានលើទស្សនៈរបស់មនុស្ស ទំនៀមទម្លាប់ ឬអ្វីផ្សេងទៀតឡើយ។
៧ សេចក្ដីបង្រៀនទាំងអស់របស់លោកយេស៊ូមានមូលដ្ឋានលើបណ្ដាំរបស់ព្រះ។ (សូមអាន យ៉ូហាន ១៧:១៧) ជាញឹកញយលោកដកស្រង់ពីបទគម្ពីរ។ (ម៉ាថាយ ៤:៤, ៧, ១០) អ្នកបម្រើពិតរបស់ព្រះធ្វើតាមគំរូរបស់លោកយេស៊ូ ហើយសេចក្ដីបង្រៀនទាំងអស់របស់ពួកគេមានមូលដ្ឋានលើគម្ពីរ។
៨. តើលោកយេស៊ូបង្រៀនយើងអ្វីខ្លះអំពីការគោរពប្រណិប័តន៍ព្រះយេហូវ៉ា?
៨ យើងគួរគោរពប្រណិប័តន៍តែព្រះយេហូវ៉ាប៉ុណ្ណោះ។ ទំនុកតម្កើង ៨៣:១៨ ចែងថា៖ «គឺទ្រង់តែ១អង្គ ព្រះនាមជាយេហូវ៉ា ដែលជាព្រះដ៏ខ្ពស់បំផុតលើផែនដីទាំងមូល»។ លោកយេស៊ូចង់ឲ្យមនុស្សដឹងយ៉ាងច្បាស់ថាព្រះពិតជាអ្នកណា ហេតុនេះហើយលោកយេស៊ូបានបង្រៀនមនុស្សអំពីនាមរបស់ព្រះ។ (សូមអាន យ៉ូហាន ១៧:៦) លោកយេស៊ូបានមានប្រសាសន៍ថា៖ «គឺព្រះយេហូវ៉ាជាព្រះរបស់អ្នក ដែលអ្នកត្រូវគោរពប្រណិប័តន៍ ហើយគឺសម្រាប់តែលោកប៉ុណ្ណោះ ដែលអ្នកត្រូវបំពេញកិច្ចបម្រើពិសិដ្ឋ»។ (ម៉ាថាយ ៤:១០) ដូច្នេះ ក្នុងនាមជាអ្នកបម្រើព្រះ យើងធ្វើតាមគំរូរបស់លោកយេស៊ូ។ យើងគោរពប្រណិប័តន៍តែព្រះយេហូវ៉ាប៉ុណ្ណោះ ហើយយើងប្រើនាមរបស់ព្រះ។ យើងថែមទាំងបង្រៀនអ្នកឯទៀតអំពីនាមរបស់ព្រះ និងអំពីអ្វីដែលលោកនឹងធ្វើសម្រាប់យើងទាំងអស់គ្នា។
៩, ១០. តើយើងបង្ហាញសេចក្ដីស្រឡាញ់ចំពោះគ្នាយ៉ាងដូចម្ដេច?
៩ យើងត្រូវមានសេចក្ដីស្រឡាញ់យ៉ាងស្មោះចំពោះមនុស្ស។ លោកយេស៊ូបានបង្រៀនពួកអ្នកកាន់តាមលោកឲ្យស្រឡាញ់គ្នា។ (សូមអាន យ៉ូហាន ១៣:៣៥) ទោះជាយើងមកពីណា មានវប្បធម៌បែបណា ជាអ្នកមានឬជាអ្នកក្រ នោះគឺមិនសំខាន់ឡើយ។ សេចក្ដីស្រឡាញ់ដែលយើងមានចំពោះគ្នា គួរបង្រួបបង្រួមយើងជាបងប្អូនប្រុសស្រី។ (កូឡុស ៣:១៤) ម៉្លោះហើយ យើងមិនធ្វើសង្គ្រាម ហើយមិនសម្លាប់អ្នកឯទៀតឡើយ។ គម្ពីរចែងថា៖ «យើងអាចសម្គាល់កូនរបស់ព្រះ និងកូនរបស់មេកំណាចបាន ដោយសេចក្ដីនេះឯង គឺអ្នកណាដែលមិនប្រព្រឹត្ដអំពើសុចរិត ឬមិនស្រឡាញ់បងប្អូនខ្លួន អ្នកនោះមិនកើតមកពីព្រះទេ»។ បន្ទាប់មក គម្ពីរចែងទៀតថា៖ «យើងត្រូវស្រឡាញ់គ្នាទៅវិញទៅមក។ យើងមិនត្រូវប្រព្រឹត្ដដូចកាអ៊ីនដែលកើតមកពីមេកំណាច ហើយបានសម្លាប់ប្អូនខ្លួនយ៉ាងសាហាវនោះឡើយ»។—យ៉ូហានទី១ ៣:១០-១២; ៤:២០, ២១
១០ យើងប្រើពេលវេលា កម្លាំង និងធនធានរបស់យើងដើម្បីជួយហើយលើកទឹកចិត្ដគ្នាទៅវិញទៅមក។ (ហេប្រឺ ១០:២៤, ២៥) យើង«ធ្វើល្អដល់មនុស្សទាំងអស់»។—កាឡាទី ៦:១០
១១. ហេតុអ្វីយើងទទួលស្គាល់ថាលោកយេស៊ូជាផ្លូវដែលនាំទៅឯព្រះ?
១១ យើងត្រូវស្តាប់បង្គាប់លោកយេស៊ូពីព្រោះលោកគឺជាផ្លូវដែលនាំទៅឯព្រះ។ គម្ពីរចែងថា៖ «គ្មានសេចក្ដីសង្គ្រោះតាមរយៈអ្នកណាទៀតឡើយ ព្រោះនៅក្រោមមេឃ គ្មាននាមណាផ្សេងទៀតដែលព្រះបានផ្ដល់ក្នុងចំណោមមនុស្សជាតិឲ្យយើងរាល់គ្នាទទួលសេចក្ដីសង្គ្រោះទេ»។ (សកម្មភាព ៤:១២) ក្នុងជំពូកទី៥ យើងបានរៀនថាព្រះយេហូវ៉ាបានចាត់បុត្ររបស់លោក ដើម្បីផ្ដល់ថ្លៃលោះសម្រាប់មនុស្សដែលស្តាប់បង្គាប់ព្រះ។ (ម៉ាថាយ ២០:២៨) ព្រះយេហូវ៉ាបានតែងតាំងលោកយេស៊ូឲ្យធ្វើជាស្ដេចគ្រប់គ្រងលើផែនដីទាំងមូល។ ហេតុនេះ គម្ពីរប្រាប់យើងថាយើងត្រូវតែស្តាប់បង្គាប់លោកយេស៊ូ បើយើងចង់រស់ជារៀងរហូត។—សូមអាន យ៉ូហាន ៣:៣៦
១២. ហេតុអ្វីយើងមិនចូលរួមក្នុងរឿងនយោបាយ?
១២ យើងមិនគួររួមចំណែកក្នុងរឿងនយោបាយ។ លោកយេស៊ូមិនបានចូលរួមក្នុងរឿងនយោបាយឡើយ។ កាលដែលលោកកំពុងត្រូវគេកាត់ក្ដី លោកប្រាប់អ្នកគ្រប់គ្រងជនជាតិរ៉ូមម្នាក់ឈ្មោះពីឡាតថា៖ «រាជាណាចក្ររបស់ខ្ញុំមិនមែនជារបស់ពិភពលោកនេះទេ»។ (សូមអាន យ៉ូហាន ១៨:៣៦) ដូចលោកយេស៊ូដែរ យើងស្មោះត្រង់ចំពោះរាជាណាចក្រព្រះដែលនៅស្ថានសួគ៌។ អាស្រ័យហេតុនេះ ទោះជាយើងរស់នៅកន្លែងណាក៏ដោយ យើងមិនចូលរួមក្នុងរឿងនយោបាយឡើយ។ ទោះជាយ៉ាងណាក្ដី គម្ពីរបង្គាប់យើងឲ្យចុះចូលនឹង«ពួកអាជ្ញាធរ» ពោលគឺរដ្ឋាភិបាលរបស់មនុស្ស។ (រ៉ូម ១៣:១) ដូច្នេះ យើងគោរពច្បាប់ក្នុងប្រទេសដែលយើងរស់នៅ។ ក៏ប៉ុន្ដែ ពេលច្បាប់ណាមួយរបស់មនុស្សប្រឆាំងនឹងច្បាប់របស់ព្រះ យើងយកតម្រាប់ពួកសាវ័កដែលបាននិយាយថា៖ «យើងត្រូវស្តាប់បង្គាប់ព្រះជាអ្នកគ្រប់គ្រង ជាជាងមនុស្ស»។—សកម្មភាព ៥:២៩; ម៉ាកុស ១២:១៧
១៣. ស្ដីអំពីរាជាណាចក្ររបស់ព្រះ តើយើងផ្សព្វផ្សាយដំណឹងអ្វី?
១៣ យើងជឿថាមានតែរាជាណាចក្ររបស់ព្រះប៉ុណ្ណោះដែលអាចដោះស្រាយបញ្ហារបស់ពិភពលោក។ លោកយេស៊ូបានមានប្រសាសន៍ថា៖ «ដំណឹងល្អនេះអំពីរាជាណាចក្រ»នឹងត្រូវផ្សព្វផ្សាយនៅគ្រប់ទីអាស្រ័យនៅផែនដី។ (សូមអាន ម៉ាថាយ ២៤:១៤) គ្មានរដ្ឋាភិបាលណារបស់មនុស្សអាចធ្វើអ្វីដែលរាជាណាចក្រព្រះនឹងធ្វើសម្រាប់យើងឡើយ។ (ទំនុកតម្កើង ១៤៦:៣) ស្ដីអំពីរាជាណាចក្រព្រះ លោកយេស៊ូបានបង្រៀនយើងឲ្យអធិដ្ឋានថា៖ «សូមឲ្យរាជាណាចក្ររបស់លោកបានមកដល់។ សូមឲ្យបំណងប្រាថ្នារបស់លោកបានសម្រេចនៅផែនដី ដូចនៅស្ថានសួគ៌ដែរ»។ (ម៉ាថាយ ៦:១០) គម្ពីរបានប្រាប់យើងថារាជាណាចក្ររបស់ព្រះនឹងបំផ្លាញចោលរដ្ឋាភិបាលទាំងអស់របស់មនុស្ស ហើយរាជាណាចក្រព្រះ«នឹងស្ថិតស្ថេរនៅអស់កល្បជានិច្ច»។—ដានីយ៉ែល ២:៤៤
១៤. តើអ្នកជឿថាអ្នកណាដែលគោរពប្រណិប័តន៍ព្រះតាមរបៀបត្រឹមត្រូវ?
១៤ ក្រោយពីបានរៀនចំណុចទាំងអស់នេះរួចហើយ សូមសួរខ្លួនអ្នកថា ‹តើអ្នកណាបានយកគម្ពីរជាមូលដ្ឋានក្នុងការបង្រៀន? តើអ្នកណាប្រាប់មនុស្សឯទៀតអំពីនាមរបស់ព្រះ? តើអ្នកណាបង្ហាញសេចក្ដីស្រឡាញ់ដ៏ស្មោះចំពោះគ្នា ហើយជឿថាព្រះបានចាត់លោកយេស៊ូឲ្យមកសង្គ្រោះយើង? តើអ្នកណាមិនចូលរួមក្នុងរឿងនយោបាយ? តើអ្នកណាផ្សព្វផ្សាយថាមានតែរាជាណាចក្រព្រះប៉ុណ្ណោះដែលអាចដោះស្រាយបញ្ហារបស់យើង?›។ គឺមានតែសាក្សីព្រះយេហូវ៉ាប៉ុណ្ណោះ។—អេសាយ ៤៣:១០-១២
តើអ្នកនឹងធ្វើអ្វី?
១៥. តើយើងត្រូវធ្វើអ្វីបើយើងចង់ឲ្យព្រះទទួលការគោរពប្រណិប័តន៍របស់យើង?
១៥ ការជឿថាមានព្រះគឺមិនគ្រប់គ្រាន់ទេ សូម្បីតែពួកវិញ្ញាណកំណាចក៏ជឿថាមានព្រះដែរ ប៉ុន្ដែពួកវាមិនបានស្តាប់បង្គាប់លោកទេ។ (យ៉ាកុប ២:១៩) ប្រសិនបើយើងចង់ឲ្យព្រះទទួលការគោរពប្រណិប័តន៍របស់យើង យើងមិនគ្រាន់តែជឿថាមានព្រះប៉ុណ្ណោះទេ តែយើងក៏ត្រូវធ្វើអ្វីដែលលោកបង្គាប់ផងដែរ។
១៦. ហេតុអ្វីយើងគួរបដិសេធសាសនាមិនពិត?
១៦ ដើម្បីឲ្យព្រះពេញចិត្ដនឹងការគោរពប្រណិប័តន៍របស់យើង យើងត្រូវតែបដិសេធសាសនាមិនពិតទាំងស្រុង។ អ្នកប្រកាសទំនាយអេសាយបានសរសេរថា៖ «ចូរឲ្យឯងរាល់គ្នាចេញពីទីនេះទៅចុះ កុំឲ្យពាល់របស់អ្វីដែលមិនស្អាតឡើយ»។ (អេសាយ ៥២:១១; កូរិនថូសទី២ ៦:១៧) ហេតុនេះហើយបានជាយើងត្រូវបដិសេធអ្វីណាក៏ដោយដែលទាក់ទងនឹងការគោរពប្រណិប័តន៍មិនពិត។
១៧, ១៨. តើ«បាប៊ីឡូនដ៏ខ្លាំងក្លា»ជាអ្វី ហើយហេតុអ្វីអ្នកត្រូវចាកចេញជាបន្ទាន់ពីបាប៊ីឡូនដ៏ខ្លាំងក្លា?
១៧ តើសាសនាមិនពិតជាអ្វី? គឺជាសាសនាណាក៏ដោយដែលបង្រៀនអំពីការគោរពប្រណិប័តន៍ព្រះតាមរបៀបមួយដែលផ្ទុយពីបណ្ដាំរបស់ព្រះ។ គម្ពីរហៅសាសនាមិនពិតទាំងអស់ថាជា«បាប៊ីឡូនដ៏ខ្លាំងក្លា»។ (ការបើកបង្ហាញ ១៧:៥) ហេតុអ្វី? ពីព្រោះក្រោយពីទឹកជំនន់នៅសម័យណូអេ សេចក្ដីបង្រៀនរបស់សាសនាមិនពិតជាច្រើនបានចាប់ផ្ដើមពីក្រុងបាប៊ីឡូន។ ក្រោយមក សេចក្ដីបង្រៀនមិនពិតទាំងនោះបានត្រូវផ្សាយទូទាំងផែនដី។ ជាឧទាហរណ៍ មនុស្សដែលរស់នៅក្នុងក្រុងបាប៊ីឡូន បានគោរពបូជាព្រះបីរួមគ្នាជាព្រះតែមួយ។ សព្វថ្ងៃនេះដែរ សាសនាជាច្រើនបង្រៀនថាព្រះគឺជាព្រះបីរួមគ្នាជាព្រះតែមួយ ប៉ុន្ដែគម្ពីរបង្រៀនយ៉ាងច្បាស់ថាមានតែព្រះយេហូវ៉ាប៉ុណ្ណោះគឺជាព្រះពិត ហើយលោកយេស៊ូគឺជាបុត្ររបស់ព្រះ។ (យ៉ូហាន ១៧:៣) បន្ថែមទៅទៀត ពួកអ្នកដែលរស់នៅក្រុងបាប៊ីឡូនជឿថាផ្នែកមួយនៃមនុស្សបន្ដរស់នៅ ហើយអាចរងទុក្ខវេទនាក្នុងភ្លើងនរកក្រោយពីពួកគេស្លាប់ទៅ។ ប៉ុន្ដែ នេះគឺមិនពិតទេ (សូមមើលលេខ១៤, ១៧ និង១៨ក្នុងកំណត់នៅចុងសៀវភៅ)។
១៨ ព្រះបានប្រាប់ទុកជាមុនថា មិនយូរទៀតសាសនាមិនពិតទាំងអស់នឹងត្រូវបំផ្លាញចោល។ (ការបើកបង្ហាញ ១៨:៨) តើអ្នកយល់អំពីមូលហេតុដែលអ្នកត្រូវចាកចេញជាបន្ទាន់ពីសាសនាមិនពិតឬទេ? ព្រះយេហូវ៉ាចង់ឲ្យអ្នកធ្វើដូច្នេះមុននឹងហួសពេល។—ការបើកបង្ហាញ ១៨:៤
ពេលអ្នកបម្រើព្រះយេហូវ៉ាជាមួយនឹងរាស្ដ្ររបស់លោក អ្នកនឹងក្លាយទៅជាសមាជិកនៃក្រុមគ្រួសារពិភពលោក
១៩. ពេលអ្នកសម្រេចចិត្ដបម្រើព្រះយេហូវ៉ា តើលោកនឹងថែរក្សាអ្នកយ៉ាងដូចម្ដេច?
១៩ ពេលអ្នកសម្រេចចិត្ដចាកចេញពីសាសនាមិនពិតហើយបម្រើព្រះយេហូវ៉ា មិត្ដភក្ដិឬសមាជិកខ្លះក្នុងក្រុមគ្រួសារអ្នក ប្រហែលជាមិនយល់អំពីការសម្រេចចិត្ដរបស់អ្នកឡើយ។ ពួកគេថែមទាំងអាចធ្វើឲ្យជីវិតរបស់អ្នកជួបទុក្ខលំបាកទៀតផង។ ប៉ុន្ដែ ព្រះយេហូវ៉ានឹងមិនបោះបង់អ្នកឡើយ។ អ្នកនឹងទៅជាសមាជិកនៃក្រុមគ្រួសារពិភពលោកដែលមានមនុស្សរាប់លាននាក់ស្រឡាញ់គ្នាយ៉ាងស្មោះ។ ម្យ៉ាងទៀត អ្នកនឹងមានសេចក្ដីសង្ឃឹមរស់ជារៀងរហូតក្នុងពិភពលោកថ្មីរបស់ព្រះ។ (ម៉ាកុស ១០:២៨-៣០) ប្រហែលជាក្រោយមក មិត្ដភក្ដិនិងសមាជិកខ្លះក្នុងក្រុមគ្រួសារអ្នកដែលបានប្រឆាំងអ្នកក្នុងការបម្រើព្រះយេហូវ៉ា នឹងសម្រេចចិត្ដសិក្សាគម្ពីរដែរ។
២០. ហេតុអ្វីជាការសំខាន់ដែលយើងគោរពប្រណិប័តន៍ព្រះតាមរបៀបត្រឹមត្រូវ?
២០ មិនយូរទៀត ព្រះនឹងបំផ្លាញចោលអំពើទុច្ចរិតទាំងអស់ ហើយរាជាណាចក្ររបស់លោកនឹងគ្រប់គ្រងមកលើផែនដី។ (ពេត្រុសទី២ ៣:៩, ១៣) គ្រានោះនឹងទៅជាគ្រាដ៏អស្ចារ្យណាស់! មនុស្សទាំងអស់នឹងគោរពប្រណិប័តន៍ព្រះយេហូវ៉ាតាមរបៀបដែលលោកពេញចិត្ដ។ ហេតុនេះ គឺជាការសំខាន់ណាស់ដែលអ្នកចាត់វិធានការនៅឥឡូវនេះដើម្បីគោរពប្រណិប័តន៍ព្រះតាមរបៀបត្រឹមត្រូវ។
ជំនួយសិក្សា
លោកអ្នកក៏ប្រហែលជាចូលចិត្តដែរ
សំណួរដែលមនុស្សជាច្រើនសួរអំពីសាក្សីព្រះយេហូវ៉ា
តើសាក្សីព្រះយេហូវ៉ាបង្ខំមនុស្សឲ្យផ្លាស់ប្ដូរសាសនាឬទេ?
តើការផ្សព្វផ្សាយសាធារណៈរបស់សាក្សីព្រះយេហូវ៉ាបង្ខំមនុស្សឲ្យផ្លាស់ប្ដូរសាសនាឬទេ? តើពួកគេព្យាយាមបង្ខំមនុស្សឲ្យផ្លាស់ប្ដូរសាសនាឬទេ?
ទស្សនាវដ្ដី
តើសាសនាទាំងអស់ពិតជាល្អទេ?
នាទីឯកសារ
សាក្សីព្រះយេហូវ៉ា ការប្រព្រឹត្តតាមជំនឿ ផ្នែកទី១: ចេញពីសេចក្ដីងងឹត
នេះគឺជាដំណើររឿងរបស់មនុស្សមួយក្រុមដែលមានបំណងរស់នៅក្នុងពន្លឺនៃសេចក្ដីពិតពីគម្ពីរ ទោះជាពួកគេត្រូវអ្នកឯទៀតស្អប់ខ្ពើមក៏ដោយ។ គំរូរបស់ពួកគេនឹងលើកទឹកចិត្តអ្នកឲ្យបន្តបម្រើព្រះយ៉ាងស្មោះត្រង់។
