1. Nanhi ua tokala ku tu tangela o ukexilu uambote ua kubheza Nzambi?

JINGELEJA javulu j’amba kuila, a longa o kidi kia lungu ni Nzambi. Maji makutu, mukonda o jingeleja jene mu longa ima iavulu ia lungu ni Nzambi ni kiebhi ki tua tokala ku mu bheza. Kiebhi-phe ki tu tena kuijiia o ukexilu uambote ua ku bheza Nzambi? Jihova muéne ngó u tena ku tu tangela kiebhi ki tua tokala ku mu bheza.

2. Kiebhi ki u tena kuijiia o ukexilu uambote ua kubheza Nzambi?

² Jihova ua tu bhana o Bibidia, phala tu tene kuijiia o ukexilu uambote ua ku mu bheza. Kienhiki, dilonge o Bibidia, Jihova ua-nda ku kuatekesa kukatula mbote ku milongi iê, mukonda muéne ua kuzolo kiavulu.—Izaia 48:17.

3. Ihi ia mesena Nzambi ko kuetu?

³ Saí athu amba kuila, Nzambi u xikina o jingeleja joso, maji ki kiene kia tu longo Jezú. Muéne uambe: “Ki ene oso a ng’ila Ngana, Ngana, a kà bokona mu mbanza ia diulu; kikale ngó ió u bhanga o vondadi ia Tata iami.” Mukonda dia kiki, tua tokala kuijiia o vondadi ia Nzambi ni ku i bhanga. Ia maka a dikota! Mukonda Jezú ua sokesa o athu kene mu belesela Nzambi ni ifumbe mba “ati a ituxi.”—Matesu 7:21-23.

4. Ihi ia longo Jezú ia lungu ni kubhanga o vondadi ia Nzambi?

⁴ Jezú ua tu dimuna kuila, se tua mesena kubhanga o vondadi ia Nzambi, tua-nda bhita mu ibhidi. Muéne uambe:  ‘Bokuenenu bhu dibhitu dia tolo, mbata o dibhitu dia kulu ni njíla iazanze iia ku’alunga; o athu a di bokona avulu. O kadibhitu-phe katolo, ni kanjíla kòfele, kaia ku muenhu; athu a tolo a bokona-mu.’ (Matesu 7:13, 14) O njíla iofele, mba o ukexilu uambote ua ku bheza Nzambi, iendesa ku muenhu ua kalelaku. O njíla ia dikota mba o ukexilu ua iibha ua ku bheza Nzambi, iendesa ku’alunga. Maji Jihova ka mesena kuila, kufua muthu. Muéne ua mu bhana kithangana ku athu oso phala n’a muijiie.—2 Phetele 3:9.

5. Kiebhi ki u tena kuijiia o athu a mu bheza Nzambi mu ukexilu uambote?

⁵ Jezú uambe kuila, tu tena kuijiia o athu a mu bheza kiambote Nzambi. Tu tena kuijiia o athu enhá, mu kuijiia o ilongesu iâ ni ima ia bhanga. Muéne uambe: ‘Mua ejidila ku ibundu iâ . . . muxi uoso uambote uima ibundu iambote.’ (Matesu 7:16, 17) Maji kiki ki kilombolola kuila, o athu a mu bheza Nzambi kene mu ta ituxi. Maji o jiselevende ja Nzambi, ene mu di suínisa ku bhanga o ima iambote. Tua-nda dilonga ihi i tena ku tu kuatekesa kuijiia o athu a mu bheza Nzambi mu ukexilu uambote.

6, 7. Mukonda diahi o ubhezelu ua kidi u tunda ngó mu Bibidia? O phangu ia Jezú i tu longa ihi?

⁶ Ioso ia longa ia tokala i tunda mu Bibidia. O Bibidia iamba: ‘Mikanda ioso a i bhusu kua Nzambi, mikanda ia kubhandulula, ni mu kulonga o kidi, ni mu kubazela itondalu, ni mu kuiukisa ia bhengalala, ni mu kuijidisa uendelu uambote. Iene iosu’ii phala muthu ua Nzambi a tenene, ua di longo kia soko, mu kubhanga madimu moso mambote.’ (2 Timote 3:16, 17) Poxolo Phaulu ua sonekena o Jikidistá: “O thembu ia mi sange  o Maka metu ma Ukunji koko, maka mene ma Nzambi, enu mua evu, mua a tambulula, kana kuma maka a muthu maji kuma ene o Maka ma Nzambi, mu kidi.” (1 Tesalonika 2:13) O ubhezelu ua kidi u tunda ngó mu Mak’a Nzambi, o Bibidia. Ki u tundu mu ixinganeku mba ijila ia athu mu xitu.

⁷ Ioso ia longo Jezú ia tundile mu Mak’â Nzambi. (Tanga Nzuá 17:17.) Muéne ua tumbula o Bibidia veji javulu. (Matesu 4:4, 7, 10) O jiselevende ja kidi ja Nzambi, a kaiela o phangu ia Jezú, ioso ia longa i tunda mu Bibidia.

8. Ihi ia tu longo Jezú ia lungu ni kubheza Jihova?

⁸ Tua tokala kubheza ngó Jihova. O divulu dia Jisálamu 83:18 diambe: “Eie ngó uavu o dijina dié dia Jihova, ku moneka luiadi; eie-muène ngó Suke-ku mu ngongo ioso.” Jezú ua mesenene kuila o athu ejiie o kidi kia lungu ni nzambi, kiene kia mu bhangesa kua longa o dijina dia Nzambi. (Tanga Nzuá 17:6.) Jezú uambe: “Mu kubheza kikale u bheza Jihova, Nzambi ié, muène ngó u mu tumaka.” (Matesu 4:10) Kienhiki, kuma tu jiselevende ja Nzambi, tu kaiela o phangu ia Jezú. Etu tu bheza ngó Jihova, tu longa ku athu ia lungu ni dijina dia Nzambi, ni ima ia-nda bhanga ku hádia.

9, 10. Kiebhi ki tu londekesa kuila tua dizolo mudietu?

⁹ Tua tokala kudizola mudietu. Jezú ua longo o maxibulu mê kudizola. (Tanga Nzuá 13:35.) Bhu kaxi k’etu ki bhuala kathombo. O henda mudietu ia tokala ku tu bhangesa kukala kumoxi kála tu jiphange. (Kolose 3:14) Mukonda dia kiki, ki tui mu ita, ki tu jibhe-tu ué athu. O Bibidia iambe: ‘Muene mu di monekena o an’a Nzambi ni an’a Diabhu. Uoso u kamba ku bhanga iaiuka, ni uoso u kamba kuzola phang’iê, ka tokala Nzambi.’ Kienhiki o Bibidia i tu suínisa: “Tu di zole mudietu. Ki tu  sokele ni Kaini ua tokalele kua Diabhu mukua ku tondalesa, anga u jibha phang’iê.”—1 Nzuá 3:10-12; 4:20, 21.

¹⁰ Tu kuatekesa akuetu ni kithangana kietu, nguzu ni jimbongo jetu. (Jihebeleu 10:24, 25) ‘Tu bhanga mbote ku athu oso, maji kota-kota a tokala n’etu mu kuxikana.’—Ngalásia 6:10.

11. Mukonda diahi tu xikina Jezú kala Mubhuludi uetu?

¹¹ Tua tokala kubelesela Jezú mukonda muéne o njíla phala kubhuluka. O Bibidia i zuela: ‘O kubhuluka kikale kua Muène ngó. Kuma bhu’axaxe k’athu, kana-bhu dingi dijina diengi dia bhana-bhu, dia tokala ku tu bhulula.’ (Ikalakalu 4:12) O Kibatulu 5 kia divulu didi, dia tu longo kuila Jihova ua tumu Jezú kubhana o muenhu uê, phala kukúla oso a belesela. (Matesu 20:28) Jihova ua solo Jezú phala kukala Sobha ni kutumina o ngongo ioso. Mukonda dia kiki, o Bibidia i tu tangela kuila, se tua mesena kukala ni muenhu ua kalelaku, tua tokala kubelesela Jezú.—Tanga Nzuá 3:36.

12. Mukonda diahi ki tu di te mu maka a jinguvulu?

¹² Ki tu tokala kudita mu maka a jinguvulu. Jezú ka di tele mu maka a jinguvulu. Kioso kia kexile mu mu fundisa, muéne uambela o nguvulu ia Loma, ngana Pilatu: ‘Eme o usobha uami, ki ua tokala mu ngongo mumu.’ (Tanga Nzuá 18:36.) Kála kia bhangele Jezú, etu tuala tu jifiiele ja Utuminu ua Nzambi, mukonda dia kiki, kuoso-kuoso ku tu kala, ki tuene mu dita mu maka a jinguvulu. Maji o Bibidia i tu tendelesa kubelesela “o maungana” mba o jinguvulu. (Loma 13:1) Kienhiki, tu belesela o ijila ia ixi mu tuala. Maji kioso kia tu jijidika kubhukumukina o itumu ia Bibidia, tu kaiela o phangu ia jipoxolo m’ukulu, ambe: “Tua bhingi tu tumaka Nzambi, kana athu.”—Ikalakalu 5:29; Marku 12:17.

13. Ihi i tu boka ia lungu ni Utuminu ua Nzambi?

 ¹³ Tua dielela kuila o Utuminu ua Nzambi uene ngó u tena kuzubha o maka oso mu ngongo. Jezú uambe kuila “o Njimbu iíi Iambote ia Utuminu ua Nzambi,” ieji bhinga ku i tula mu ngongo ioso. (Tanga Matesu 24:14.) Mu ixi sé-mu nguvulu u tena kubhanga o ima ia-nda tu bhangela o Utuminu ua Nzambi ku hádia. (Jisálamu 146:3) Jezú ua tu longo kusamba ni kubhinga kua Nzambi: “Utuminu ué uize. Vondadi ié a i bhange bhoxi, kala kiala ku i bhanga ku diulu.” (Matesu 6:10) O Bibidia i zuela i tu longa kuila, o Utuminu ua Nzambi ua-nda buika o jinguvulu joso mu ixi, o unguvulu uê ‘ua-nda xalela-ku ni kutumina mu thembu joso katé ku hádia ni hádia.’—Daniiele 2:44.

14. Mudiê, a nanhi a mu bheza kiambote Nzambi?

¹⁴ Mu kudilonga o jimbandu jiji, dibhuidise: ‘A nanhi ngó ene mu katula o milongi iâ mu Bibidia? A nanhi ene mu tangela ku athu o dijina dia Nzambi? A nanhi a dizolo mudiâ, a xikina kuila Jihova ua tumu Jezú mu ngongo phala ku tu bhulula? A nanhi kene mu di ta mu maka a jinguvulu? A nanhi ene mu boka kuila o Utuminu ua Nzambi uene ngó ua-nda tena kuzubha o hadi mu ngongo?’ Sé phata, o Jimbangi ja Jihova.—Izaia 43:10-12.

15. Ihi i tua tokala o kubhanga, se tua mesena kuila Nzambi u xikina o ubhezelu uetu?

¹⁵ O kuxikina kuila kuene Nzambi, ki ku soko. Mukonda katé muene ni madimonho, a xikina kuila kuene Nzambi maji kene mu mu belesela. (Tiiaku 2:19) Se tua mesena kuila, Nzambi u xikina o ubhezelu uetu, ki tu tokala ngó kuxikina kuila kuene Nzambi, maji tua tokala ué kubhanga o ima i zuela muéne.

16. Mukonda diahi tua tokala kudituna o jingeleja ja makutu?

 ¹⁶ Phala Nzambi kuxikina o ubhezelu uetu, tua tokala kudituna o jingeleja ja makutu. O polofeta Izaia ua soneka: “Tundenu mu’axaxi kâ, di-zelesienu.” (Izaia 52:11; 2 Kolindo 6:17) Kienhiki, tua tokala kudituna ioso ia tokala mu jingeleja ja makutu.

17, 18. O “Babilonha ia Dikota” ihi, ni mukonda diahi kua bhingi kutunda-mu ni lusolo?

¹⁷ O ngeleja ia makutu ihi? O ngeleja ia makutu ngeleja ioso ioso, i longa makutu alungu ni kubheza Nzambi, ki i longa o milongi iala mu Bibidia. O Bibidia ixana o jingeleja ja makutu kala ‘Babilonha ia Dikota.’ (Dijingunuinu 17:5) Mukonda diahi? Kioso kia bhiti o dilúviu mu izuua ia Noué, o ilongesu ia jingeleja ja makutu, ia mateka ku mbanza ia Babilonha. O ilongesu íii ia makutu, ia di muange mu ngongo ioso. Mu kifika, o athu a tungile mu mbanza ia Babilonha akexile mu bheza ji tilindade. Lelu ué jingeleja javulu, ji longa kuila Nzambi tilindade, maji o Bibidia i longa kuila kuene ngó Nzambi imoxi ia kidi Jihova, i longa ué kuila, Jezú Mon’â Nzambi. (Nzuá 17:3) O athu a tungile ku Babilonha a xikinine ué kuila, o athu kioso kiafuá, saí kima moxi diâ ki tunda kiia mu kididi kiéngi, o kima kiki, ki tena kutala hadi mu ifernu. O ilongesu iii, ilongesu ia makutu.—Tanga o Kibandekesu kia 14, 17, ni 18.

¹⁸ Nzambi ua tu tangela kuila, kua kambe ngó bhofele, jingeleja joso ja makutu a-nda ji buika. (Dijingunuinu 18:8) Eie uejiia se mukonda diahi kua bhingi ku tunda mu ngeleja ia makutu ni lusolo? Jihova Nzambi ua mesena kuila u tunda-mu ni lusolo, mukonda o kibuikilu kiê kia zukama.—Dijingunuinu 18:4.

19. Kiebhi Jihova kia-nda ku langa, se u sola ku mu bheza?

 ¹⁹ Kioso ki ua-nda tunda mu ngeleja ia makutu phala kusidivila Jihova, saí athu kala makamba ni jindandu jê, ka-nda ki xikina, nange a-nda ku zukutisa. Maji Jihova ka-nda kuehelela. Ua-nda bhanga mbandu ku muiji umoxi mu ngongo a dizolo mudiâ ni muxima uoso, ua-nda kala ni kidielelu kia kukala ni muenhu ua kalelaku ku mundu uobhe. (Marku 10:28-30) Nange saí makamba ni jindandu a mu kuzukutisa mukonda dia kusidivila Jihova, a-nda mateka kudilonga ué o Bibidia.

20. Mukonda diahi kima kiambote kubheza Nzambi mu ukexilu uambote?

²⁰ Kua kambe ngó Nzambi ua-nda zubha o kuiibha kuoso, o Utuminu ué ua-nda tumina o ngongo ioso. (2 Phetele 3:9, 13) Kiki kia-nda kala kithangana kiambote! Athu oso a-nda bheza Jihova kala kia mesena muéne. Kienhiki, kima kiambote ku tunda mu ngeleja ia makutu kindala ni kubheza Nzambi mu ukexilu uambote.